9. THIKIRIRIAI NA MATU. (21/2/1946)

1.
Thikĩrĩriai na matũ na mũmenye na ngoro
Atĩ kĩgongona nĩkĩo kĩrutaga andũ
Arĩa anyinyi na arĩa anene ũkombo-inĩ wa mehia
Na gĩakagwo bũrũri wĩ kĩrĩkanĩro

Kĩgongona gĩtũmaga andũ moime ũkombo-inĩ
Rĩrĩa makaĩra Ngai mamũng’etheire

2.
Mũthinjĩri ũrĩa watũire bũrũri wa Kaanani
Nĩwe waũrathimĩte na akawamũra
Iburahĩmu akĩĩrwo nĩ Jehova athiĩ agaake
Gĩthĩnjĩro kũu thĩ ĩyo yaarĩ irathimo

3.
Hĩndĩ ĩrĩa Jakubu aatũire kwa Labani nĩerirwo
Nĩ Ngai ambate Betheli harĩa ehĩtĩire
Akiuga atĩ nĩagaakĩra Jehova kĩgongona
Akĩhanda ihiga agĩitĩrĩria maguta

4.
Rĩrĩa andũ marĩ ũkombo-inĩ nĩ mahinyagĩrĩrio
Makaremwo nĩgwaka kĩgongona mekuo
Musa akũũra andũ ũkombo-inĩ mainũkire Kaanani
Magaakĩre Ngai wao gĩthĩnjĩro kuo

5.
Jerusalemu yoinangwo andũ othe matahirwo
Magĩtwarwo Babuloni magĩtũũra kuo
Mĩaka mĩrongo mũgwanja Ngai agĩconorithia
Jerusalemu itũũra rĩake rĩtheru

6.
Daniel akĩrĩra mũno na akĩĩrira mahĩtia
Na mehia ma mĩhĩrĩga ikũmi na ĩĩrĩ
Jehova akĩĩra Daniel no mũhoka moime kuo
Magaake hekarũ theru thĩ ya irathimo

7.
Mwathani witũ akorire ndũrĩrĩ cia thĩ yothe
Ituĩtwo ngombo cia mehia nĩ mũcukani
Akiuga we nĩamaruta ũkombo-inĩ mambate
Bũrũri wa arĩa me muoyo ũrĩ irathimo

8.
Kũu nĩkuo rĩu ithuothe twakĩirwo gĩthĩnjĩro
Na kĩrĩkanĩro giitũ nĩkuo gĩikaire
Arĩa me ho ona arĩa angĩ matarĩ maraciarwo
Jesu amerire nĩambata gwaka gĩikaro