29. URIA WINA MATU NIAGUE

1.
Ũrĩa wĩna matũ nĩague
Na ngoro ĩrĩa ĩhetwo ũmenyo
Mũcukani ũũgĩ wake
Ũciaraga gĩkuũ na ruo
Na kĩeha, na maithori na kĩrumi
Na gũtũũra ũkayaga
Na ũhagaranagia magego
Mũthenya na ũtukũ,
mwaki-inĩ wa tene na tene

2.
Shaitani nĩakorire Hawa
Ona Adamu akĩmera
Marege watho wa Jehova
Magĩe ũũgĩ mahaane Ngai
Mamenyage wega, ona makamenya ũũru
Jehova akĩmetia ũthingu
Magĩtigwo njaga marĩ erĩ
Mendaga magĩe ũũgĩ,
Ngai akĩmaconorithia

3.
Kaini igongona rĩake
Rĩathũka Ngai akĩrĩrega
Oragire mũrũ wa nyina
Habili na rũhiũ nĩ ũiru
Ngai akĩmwandĩka, gĩthithi gĩake kĩrumi
Tondũ we nĩ mũragani
Macio nĩ maciaro ma ũũgĩ
Wa Caitani kĩũmbe,
tondũ we aciaraga mũtino

4.
Ona Esau nĩomire
Gĩthaka-inĩ ahũtiĩ mũno
Agĩkũrania ũrigithathi
Na irio nyinyi cia rũĩga rũmwe
Ndagakue hĩndĩ ĩo,
akĩona e mũũgĩ mũno
Gwakinya hĩndĩ ya irathimo
Arĩrire maithori,
ma ruo ruumu ngoro thĩinĩ

5.
Dathani na Kora moigire
Ti irimũ makũrwo maitho
Nĩ Musa na mũrũ wa nyina
Mameririo nĩ thĩ me muoyo
Na arĩa angĩ mateta, makĩũragwo ngiri ikũmi
Na inya cia magana mũgwanja
Nake Musa akĩĩra,
Harunĩ thiĩ ũthaithe Jehova

6.
Rĩrĩa Jeriko kwahũrirwo
Akani akĩgĩa na ũũgĩ
Wa gũkua indo iria nume
Ciatũmire oragwo we mwene
Na andũ ake ona indo, cia mũciĩ wake Joshua akiuga
Nĩ ihũrwo na mahiga ithire
Nĩ andu othe a ciana,
cia mũhĩrĩga wa Jakubu

7.
Ũũgĩ wa andũ othe a thĩ nĩ ũrimũ
Mbere ya ũthiũ wa Jehova
Judasi nĩagĩire ndundu
Na Athĩnjĩri na Afarisai na Andĩki-marũa
Magũre Jesu ciringi
Mĩrongo ĩtatu oragwo
Judasi akĩita,
mbia ikĩũra na muoyo ũkĩũra

8.
Anania na mũtumia
Wake mendia gĩthaka mbia
Makĩrĩkanĩra maigae
Mahenie Roho wa Mwathani
Petero akĩmoria,
nĩ harĩ ingĩ kana no ici
Makiuga aca ciothe irĩ haha
Makĩrwo ti mũndũ mwahenia
Nĩ Roho magĩkua,
magĩthikwo rũcinĩ rũmwe.