50. UKAI ANDU A MWATHANI

1.
Ũkai andũ a Mwathani, na mwarahũre ngoro
Mũigue thĩna ũrĩa wonirwo, nĩ Isiraeli tene
Gwathĩnĩkirwo nĩ athuri
Na atumia na aanake
Na airĩtu na ngenge ciothe
Na atumia othe a ndigwa

2.
Hĩndĩ ĩrĩa mairirio ngoro, nĩ ciugo cia Jehova
Nake akĩmairĩra ngoro, na akĩmarekerereria
Ithandũkũ rĩgĩtahwo
Na rĩarĩ hinya wao
Ningĩ rĩarĩ tawa wao, ona kĩmũrĩ kĩao

3.
Nyũmba ya Jerusalemu, thũ ciao ikĩmiunanga
Na athĩnjiri makiũragwo, nĩ thũ na hiũ cia njora
Ndamũthaitha mũigue ruo
Nĩ thĩna ũrĩa wonirwo
Athuri na atumia othe, makĩaga magongona

4.
Anake ao na airĩtu ao, mahaanire ndũrĩrĩ
Tondũ nĩ maagire ũhiki, ũrĩa warĩ mũtheru
Ciana ciao ikĩhanana
Na ciana cia ndũrĩrĩ
Nĩ kwaga igongona itheru, rĩa Ngai wa Jakubu

5.
Atumia othe a ndigwa, na ciana cia ngoriai
Na athĩni makĩaga handũ, ha kũrĩrĩra Ngai
Rĩu ĩrai andũ othe
Arĩa anyinyi na anene
Mehonokie kũrĩ waganu, marĩrĩre Jehova

6.
Menyai Jesu nĩ nyũmba, nyamũre nĩ Jehova
Nĩatuirwo hekarũ theru, ya Rĩtwa rĩa Ithe witũ
Ya kũrathimĩrwo andu arĩa
Matarĩ ũhinga ngoro
Rĩrĩa maturĩtie maru, magĩthaitha Jehova.