Go Back

1 Samueli Chapter 4

• 1. Nayo ndũmĩrĩri ya Samueli ĩgĩkinyĩra Aisiraeli othe. Na rĩrĩ, Aisiraeli magĩkiumagara mathiĩ ita makahũrane na Afilisiti makĩamba hema ciao hakuhĩ na Ebeni-ezeri; nao Afilisiti makĩamba hema ciao Afeku.
• 2. Afilisiti magĩkĩnuna ita ciao Afeku, mahũrane na Aisiraeli; na rĩrĩ, ita yathenganĩrĩrũo-rĩ, Aisiraeli makĩhũrũo nĩ Afilisiti; nao makĩũraga ta andũ ngiri inya a Isiraeli arĩa maanunĩte ita kũu kwarũagĩrũo werũ-inĩ.
• 3. Na rĩrĩ, hĩndĩ ĩrĩa andũ maainũkire kĩraaro-inĩ-rĩ, athuri a Isiraeli makiuga atĩrĩ, Jehova agĩtũmire tũhootwo nĩ Afilisiti ũmũthĩ nĩ ũndũ kĩ? Ta rekei tũgĩre ithandũkũ rĩa kĩrĩkanĩro kĩa Jehova, tũrĩrute Shilo, tũrĩrehe gũkũ tũrĩ nĩ getha rĩikare thĩinĩ witũ, nĩguo rĩtũhonokie rĩtũrute moko-inĩ ma thũ ciitũ.
• 4. Gũgĩkĩrekio andũ Shilo, nao makĩrehe ithandũkũ rĩa kĩrĩkanĩro kĩa Jehova, Mũnene wa Ita, ũrĩa ũikaraga gatagatĩ-inĩ ka makerubi marĩo, marĩrutĩte kuo. Nao ariũ arĩa erĩ a Eli, Hofini na Finehasi, maarĩ o hamwe na ithandũkũ rĩu rĩa kĩrĩkanĩro kĩa Ngai.
• 5. Na rĩrĩ, ithandũkũ rĩu rĩa kĩrĩkanĩro kĩa Jehova rĩatonyio kĩraaro-inĩ-rĩ, Aisiraeli othe makiugĩrĩria riugĩrĩria inene mũno, o nginya thĩ ĩkĩruruma.
• 6. Na hĩndĩ ĩrĩa Afilisiti maaiguire kayũ ka mbugĩrĩrio ĩo makĩũria atĩrĩ, Gĩtũmi gĩa kayũ ka mbugĩrĩrio ĩo nene ũguo ĩrĩ kĩraaro-inĩ kĩa Ahibirania nĩ kĩ hihi? Magĩgĩcoka makĩmenya atĩ nĩ ithandũkũ rĩa Jehova rĩkinyĩte kĩraaro-inĩ kĩao.
• 7. Afilisiti magĩgĩĩtigĩra, nĩ ũndũ moigire atĩrĩ, Nĩ Ngai mũũku kĩraaro-inĩ kĩao. Nao magĩkiuga atĩrĩ, Wũi-ĩiya-witũ-ĩ! Nĩ gũkorũo gũtirĩ kwoneka ũndũ ũngĩ ta ũyũ mbere ya hĩndĩ ĩno.
• 8. Wũi-ĩiya-witũ-ĩ! Nũ ũgũtũhonokia atũrute moko-inĩ ma ngai ici irĩ hinya ũũ? Ici nĩcio ngai iria ciahũrĩire Amisiri na mĩrimũ ya mĩthemba yothe werũ-inĩ.
• 9. Atĩrĩrĩ, Afilisiti aya, gĩai na hinya, mwĩtue ta arũme ki, nĩ getha mũtigatuĩke ngombo cia Ahibirania, o ta ũrĩa matũire marĩ ngombo cianyu; wĩtuei ta arũme ki, mũhũrane.
• 10. Afilisiti magĩkĩhũrana nao, nao Aisiraeli makĩhũrũo, makĩũrĩra mũndũ o mũndũ hema-inĩ yake; gũgĩkĩũraganwo mũno mũno; nĩ ũndũ kũu kwagũire andũ a Isiraeli ngiri mĩrongo ĩtatũ arĩa maathiaga na magũrũ, moragĩtwo.
• 11. Narĩo ithandũkũ rĩa Ngai rĩgĩtahwo nao ariũ a Eli erĩ, Hofini na Finehasi, makĩũragwo.
• 12. Na rĩrĩ, hagĩgĩteng’era mũndũ ũmwe wa Benjamini, oimĩte mbũtũ-inĩ ĩo ya ita, agĩkinya Shilo mũthenya o ro ũcio, nguo ciake irĩ ndembũkangu, na akeitĩrĩria tĩri mũtwe.
• 13. Na atĩrĩrĩ, aakinya kuo, Eli agĩkorũo nĩ gũikara aaikarĩire gĩtĩ gĩake mũkĩra-inĩ wa njĩra, acũthĩrĩirie njĩra; nĩ gũkorũo ngoro yake nĩyainainaga nĩ ũndũ wa ithandũkũ rĩa Ngai. Na rĩrĩa mũndũ ũcio aakinyire itũũra-inĩ thĩinĩ akĩheana ũhoro ũcio-rĩ, andũ othe a itũũra rĩu magĩkayũrũrũka.
• 14. Na rĩrĩa Eli aaiguire inegene rĩa mũkayũrũrũko ũcio, akĩũria atĩrĩ, Gĩtũmi kĩa inegene rĩu rĩa ngũĩ ĩo nĩ kĩ? Nake mũndũ ũcio akĩhiũhahiũha, agĩkinya harĩ Eli, akĩmũhe ũhoro ũcio.
• 15. Na rĩrĩ, Eli aakinyĩtie mĩaka mĩrongo kenda na ĩnana gũkũra; na maitho make nĩmorĩte, ndonaga.
• 16. Mũndũ ũcio agĩkĩĩra Eli atĩrĩ, Nĩ niĩ mũndũ ũrĩa uumĩte mbũtũ-inĩ ya ita, na nĩ kũũra njũrire ũmũthĩ ndoima mbũtũ-inĩ ĩo ya ita. Nake agĩkĩmũũria atĩrĩ, Gũgĩkĩnyire atĩa, mũrũ wakwa?
• 17. Nake ũcio warehete ũhoro agĩcokia, akiuga atĩrĩ, Isiraeli nĩmorĩire Afilisiti, na nĩkũũraganĩtwo mũno thĩinĩ wa andũ aitũ; na ariũ aku erĩ, Hofini na Finehasi, nĩmakuĩte, na ithandũkũ rĩa Jehova nĩ itahe.
• 18. Na gũgĩkinya atĩrĩ, atĩ hĩndĩ ĩrĩa aagwetire ithandũkũ rĩa Ngai, Eli akĩgũa na ngara na mwena-inĩ wa kĩhingo, oimĩte gĩtĩ-inĩ gĩake kĩu aaikarĩire, nayo ngingo yake ĩkiunĩka, agĩkua; nĩ ũndũ aarĩ mũkũrũ, na akaritũha. Nake aatiirĩrĩire Isiraeli mĩaka mĩrongo ĩna.
• 19. Ningĩ mũka wa Finehasi, mũrũwe, aarĩ mũritũ, na aatigairie hanini ohoke; nake rĩrĩa aaiguire ũhoro ũcio, atĩ ithandũkũ rĩa Ngai nĩrĩtahĩtwo, na atĩ iciciarawe na mũthuriwe nĩmakuĩte, akĩinamĩrĩra akĩohoka; nĩ gũkorũo nĩaagwatirũo nĩ ruo rũa kũrũmwo.
• 20. Na rĩrĩa aaikarĩte ta egũkua-rĩ, atumia arĩa maarũngiĩ harĩ we makĩmwĩra atĩrĩ, Tiga gwĩtigĩra, no ũndũ ũgũciara kahĩĩ. No rĩrĩ, ndaigana gũcokia ũndũ kana akĩrũmbũiya ũhoro ũcio.
• 21. Nake agĩtua kaana kau Ikabodu, akiugaga atĩrĩ, Ũnene ũkwehera woima he Isiraeli; nĩ gũkorũo ithandũkũ rĩa Ngai nĩrĩatahĩtwo, o na ningĩ nĩ ũndũ wa iciciarawe, o na mũthuriwe.
• 22. Agĩkiuga atĩrĩ, Ũnene ũkwehera woima he Isiraeli, nĩ ũndũ ithandũkũ rĩa Ngai nĩrĩtahĩtwo.

Home