Go Back

1 Samueli Chapter 30

• 1. Na gũgĩkinya atĩrĩ, atĩ Daudi na andũ ake maakinya Zikilagi mũthenya wa ĩtatũ-rĩ, Aamaleki magĩkorũo matharĩkĩte mwena wa Gũthini, o na Zikilagi, na makahũra Zikilagi, makarĩcina na mwaki,
• 2. na magataha atumia, na indo ciothe iria ciarĩ kuo, iria nyinyi, o na iria nene; na matioragire mũndũ o na ũmwe, no nĩmaamagwatire mĩgwate, magĩĩthiĩra.
• 3. Na rĩrĩa Daudi na andũ ake maagĩkinyire itũũra rĩu rĩao-rĩ, magĩkora rĩcinĩtwo na mwaki; nao atumia ao, na ariũ ao, o na airĩtu ao, magatahwo.
• 4. Hĩndĩ ĩo Daudi, na andũ arĩa maarĩ hamwe nake, makĩanĩrĩra makĩrĩra, o nginya makĩaga hinya wa gũcoka kũrĩra rĩngĩ.
• 5. Nao atumia a Daudi erĩ, Ahinoamu, ũrĩa Mũjezireeli, na Abigaili, ũrĩa warĩ mũka wa Nabali, Mũkarimeli, maarĩ atahe.
• 6. Daudi agĩkĩnyarirĩka mũno, nĩ gũkorũo andũ arĩa maamũrũmĩrĩire nĩmaacirĩire kũmũhũra na mahiga nyuguto, nĩ ũndũ ngoro cia andũ acio othe nĩciaiguĩte kĩeha mũno, mũndũ o mũndũ nĩ ũndũ wa ariũ ake na airĩtu ake; no rĩrĩ, Daudi nĩeũmĩrĩirie nĩ kwĩhoka Jehova Ngai wake.
• 7. Daudi agĩkĩĩra Abiatharu, mũthĩnjĩri-Ngai, mũrũ wa Ahimeleku atĩrĩ, Ta ndehere ebodi haha. Nake Abiatharu agĩgĩtwara ebodi ĩo hau harĩ Daudi.
• 8. Nake Daudi agĩgĩtuĩria ũhoro he Jehova, akĩũria atĩrĩ, Ingĩrũmĩrĩra mbũtũ ĩo ya athigari na ihenya-rĩ, ndamĩkinyĩrĩra? Agĩgĩcokia atĩrĩ, Mĩrũmĩrĩre; nĩ ũndũ ndũrĩ hingo ũtekũmĩkinyĩrĩra; na ndwaga gũcokithia kĩrĩa gĩothe gĩtahe.
• 9. Tondũ ũcio Daudi agĩgĩthiĩ, we mwene, na andũ arĩa magana matandatũ maarĩ hamwe nake, magĩkinya karũũĩ ka Besori; naho hau hagĩgĩikara arĩa maatigĩtwo thutha.
• 10. No Daudi agĩteng’era na ihenya, me na andũ magana mana; nĩ ũndũ acio angĩ magana merĩ morĩtwo nĩ hinya, makaremwo nĩ kũringa karũũĩ ka Besori, nĩmaatigirũo ho.
• 11. Nao magĩgĩkora Mũmisiri kũu gĩthaka-inĩ, makĩmũtwarĩra Daudi, na makĩmũhe irio, akĩrĩa; ningĩ makĩmũhe maĩ ma kũnyua;
• 12. magĩcoka makĩmũhe kĩenyũ kĩa ngũmba ya ngũyũ na imanjika igĩrĩ cia thabibu nyũmũ; na aarĩkia gũcirĩa-rĩ, roho wake ũkĩmũcokerera; nĩ ũndũ ndaarĩĩte irio, kana akanyua maĩ o na atĩa, mĩthenya ĩtatũ, na matukũ matatũ.
• 13. Nake Daudi agĩkĩmũũria atĩrĩ, Wĩ wa ũ? Na uumĩte kũ? Agĩkiuga atĩrĩ, Ndĩ mwanake Mũmisiri, na ndĩ ndungata ya Mũamaleki; na mwathi wakwa aandigire ndarũara ta mĩthenya ĩtatũ ĩthirĩte.
• 14. Nĩ gũtharĩka twatharĩkĩte mwena wa Gũthini wa Akerethi, o na wa Juda, o na mwena wa Gũthini wa Kalebu, ningĩ tũgĩgĩcina Zikilagi na mwaki.
• 15. Nake Daudi akĩmũũria atĩrĩ, Nĩũkũnjikũrũkia ũnginyie harĩ mbũtũ ĩo ya athigari? Nake akiuga atĩrĩ, Njĩra na mwĩhĩtwa, ũkĩgwetaga Ngai, uuge atĩ ndũnjũraga, kana ũ’neane moko-inĩ ma mwathi wakwa, na nĩngũgũkinyia harĩ mbũtũ ĩo ya athigari.
• 16. Nake aamũikũrũkia-rĩ, magĩkora maharaganĩirie handũ hau hothe maikarĩte thĩ makĩrĩa na makĩnyua, me na ndĩa nene ta ya gĩathĩ, nĩ ũndũ wa indo ciothe iria maatahĩte nyingĩ mũno kũu bũrũri wa Afilisiti, o na bũrũri wa Juda.
• 17. Nake Daudi agĩkĩmahũra amaambĩrĩirie kĩhwaĩ-inĩ kwĩ mairia, o nginya hwaĩ-inĩ wa mũthenya ũyũ ũngĩ; na hatiigana kũhonoka mũndũ o na ũmwe wao, tiga o aanake magana mana arĩa mehaicĩire ngamĩra makĩĩũrĩra.
• 18. Daudi agĩgĩcokithia kĩrĩa gĩothe gĩatahĩtwo nĩ Aamaleki, na akĩhonokia atumia ake erĩ.
• 19. Na gũtirĩ kĩndũ o na kĩmwe maagire, kĩnyinyi kana kĩnene, kana ariũ ao, kana airĩtu, o na kana indo iria ciatahĩtwo, kana kĩndũ o na kĩ kĩrĩa gĩathiĩtwo nakĩo nĩ mbũtũ ĩo, Daudi nĩaacicokithirie ciothe.
• 20. Ningĩ Daudi agĩtaha ndũru ciao ciothe cia mbũri na ng’ombe; igĩgĩtwarũo o mbere ya ũhiũ ũcio ũngĩ nĩ andũ ake, makiuga atĩrĩ, Ici nĩcio igũtuĩka itaha rĩa Daudi.
• 21. Nake Daudi agĩkinya harĩa andũ acio magana merĩ morĩtwo nĩ hinya makaremwo nĩ kũrũmĩrĩra Daudi maarĩ, o acio merĩtwo maikare hau karũũĩ-inĩ ka Besori; magĩthiĩ gũtũnga Daudi na andũ arĩa maarĩ hamwe nake; na rĩrĩ, Daudi aakuhĩhĩria andũ acio-rĩ, agĩkĩmageithia.
• 22. Nao andũ othe arĩa imaramari na arĩa aaganu mũno thĩinĩ wa arĩa maathiĩte na Daudi, makiuga atĩrĩ, Tondũ andũ aya matiatwaranire na ithuĩ-rĩ, tũtingĩmahe kĩndũ o na kĩ kĩa indo iria ciatahĩtwo tũgĩcicokithia, tiga o mũndũ acokerio mũka na ciana ciake, amoe, mathiĩ mehere.
• 23. Hĩndĩ ĩo Daudi agĩkiuga atĩrĩ, Aca, andũ aitũ, mũtigwĩka ũguo na indo iria tũheetwo nĩ Jehova, o we ũrĩa ũtũmenyereire o wega, na akarekereria mbũtũ cia athigari iria ciatũtharĩkĩire agacineana moko-inĩ maitũ.
• 24. Ningĩ-rĩ, mũndũ ũrĩa ũngĩkĩmũigua ũhoro-inĩ ũcio nũ? Nĩ ũndũ-rĩ, o ta ũrĩa igai rĩa mũndũ ũrĩa ũthiaga ita-inĩ rĩtariĩ-rĩ, ũguo noguo igai rĩa mũndũ ũrĩa mũikaria wa indo rĩgatuĩka mekũheo o ũndũ ũmwe.
• 25. Naguo ũndũ ũcio akĩũtua kĩrĩra kĩa watho wa kũrũmĩrĩrũo, o na mũtugo, harĩ Isiraeli, o na ũmũthĩ.
• 26. Na rĩrĩ, Daudi aakinya Zikilagi, agĩtwarithĩria athuri a Juda indo imwe iria ciatahĩtwo, o acio maarĩ arata ake, akiuga ũũ: Atĩrĩrĩ, gĩkĩ nĩ kĩheo ndamũhe kĩa indo iria itahĩtwo harĩ thũ cia Jehova.
• 27. Agĩgĩtwarithĩria athuri a Beth-eli, na a Ramothu ya mwena wa Gũthini, na a Jatiru,
• 28. na a Aroeru, na a Sifimothu, na a Eshitemoa,
• 29. na a Rakali, na a matũũra ma Ajerameeli, na a matũũra ma Akeni,
• 30. na a Horima, na a Koriashani, na a Athaki,
• 31. na a Hebironi, o na kũndũ guothe kũrĩa Daudi we mwene, na andũ ake, maahũthĩire gũikara.

Home