Go Back

1 Samueli Chapter 29

• 1. Na rĩrĩ, Afilisiti magĩkĩũnganĩria mbũtũ ciao ciothe cia ita kũu Afeku; nao Aisiraeli makĩamba hema ciao gũkuhĩ na gĩthima kĩrĩa kĩrĩ Jezireeli.
• 2. Nao anene a Afilisiti makĩhĩtũka na makĩaranio marĩ mathimbũtũ maingĩ ma andũ igana igana, na ma ngiri ngiri; nake Daudi na andũ ake makĩhĩtũka me na Akishi marĩ thutha wa arĩa angĩ othe.
• 3. Hĩndĩ ĩo atongoria a Afilisiti magĩkĩũria atĩrĩ, Ĩ Ahibirania aya mareka atĩa haha? Nake Akishi agĩkĩĩra atongoria acio a Afilisiti atĩrĩ, Githĩ ũyũ ti Daudi, ndungata ya Saulu, mũthamaki wa Isiraeli, ũrĩa ũtũire gwakwa matukũ maya makĩrĩte mwaka ũmwe? Na rĩrĩ, gwata mũthenya ũrĩa aagũire harĩ niĩ orĩte-rĩ, ndirĩ ndona ihĩtia rĩake o na ũmũthĩ.
• 4. No atongoria acio a Afilisiti makĩrakario nĩwe, makĩmwĩra atĩrĩ, Hũndũra mũndũ ũyũ acoke o handũ harĩa wamũigire; menya ũreke atwarane na ithuĩ ita-inĩ, nĩ getha twĩ kũu ita-inĩ ndagatũgarũke atuĩke thũ iitũ; nĩ ũndũ-rĩ, kaĩ mũndũ ũyũ angĩkĩĩiguithania na mwathi wake na kĩ tiga o anenganĩrire ciongo cia andũ aya, moragĩtwo?
• 5. Githĩ ũyũ tiwe Daudi, ũrĩa andũ a kwao maainanĩire nyĩmbo-inĩ ciao ũũ: Saulu nĩoragĩte andũ ngiri nyingĩ, Nake Daudi akoraga andũ ngiri makũmi maingĩ?
• 6. Akishi agĩgĩĩta Daudi, akĩmwĩra atĩrĩ, Ta ũrĩa Jehova atũũraga muoyo-rĩ, wee ũtũire wĩ mũthingu, nayo mĩthiĩre yaku ya ũkiumagara na ũgĩthiĩ na niĩ ita-inĩ, nĩnyonaga ta ĩrĩ mĩega; nĩ ũndũ ndionete ũũru waku gwata mũthenya ũrĩa wokire harĩ niĩ, o na ũmũthĩ; no rĩrĩ, anene aya matigũkwenda.
• 7. Tondũ ũcio ũkĩra ũhũndũke wĩthiĩre na ũhoreri, nĩ getha ndũkarakarie anene a Afilisiti.
• 8. Daudi agĩkĩĩra Akishi atĩrĩ, No rĩrĩ, kaĩ ndĩgĩĩkĩte atĩa? Na nĩ ũndũ ũrĩkũ wanona niĩ, ndungata yaku, njĩkĩte ihinda rĩrĩa rĩothe ndũire ndĩ hamwe nawe o na ũmũthĩ, atĩ nĩguo ndigathiĩ kũhũrana na thũ ciaku, wee, mwathi wakwa, mũthamaki?
• 9. Akishi agĩgĩcokia akĩĩra Daudi atĩrĩ, Nĩnjũĩ atĩ wĩ mwega ngĩkuona, o ta ũrĩ mũraika wa Ngai; no rĩrĩ, anene a Afilisiti nĩo moigĩte atĩrĩ, Ndangĩambatania na ithuĩ ita-inĩ.
• 10. Tondũ ũcio, roka gũũkĩra rũcinĩ tene, mwĩ na ndungata cia mwathi waku iria mũũkĩte nacio; na mwokĩra o ro ũguo rũcinĩ tene, gwakĩa, mwĩthiĩre.
• 11. Daudi agĩkĩroka gũũkĩra rũcinĩ tene, we mwene na andũ ake, nĩguo methiĩre kũrĩ o rũcinĩ, macoke bũrũri wa Afilisiti. Nao Afilisiti magĩkĩambata Jezireeli.

Home