Go Back

1 Samueli Chapter 19

• 1. Rĩrĩ rĩngĩ Saulu agĩkĩaria na Jonathani, mũriũ, na ndungata ciake ciothe, nĩguo morage Daudi.
• 2. No rĩrĩ, Jonathani, mũrũ wa Saulu, nĩaakenagio nĩ Daudi mũno. Jonathani agĩkĩhe Daudi ũhoro ũcio, akiuga atĩrĩ, Saulu, baba, acarĩtie gũkũũraga; tondũ ũcio nĩũkemenyerera rũciũ rũcinĩ ũikare handũ hatoĩwo wĩhithe ho;
• 3. na niĩ nĩngoimagara, ngarũgame he baba o gĩthaka-inĩ kĩu ũrĩ, njoke njarie na baba ũhoro ũgũkoniĩ; na ingĩkona ũndũ o na ũrĩkũ, nĩngakwĩra.
• 4. Nake Jonathani akĩgathĩrĩria Daudi he ithe, Saulu, akiuga atĩrĩ, Mũthamaki witũ nĩatige kwĩhia agĩĩka Daudi ndungata yake ũũru; nĩ ũndũ ndarĩ aakwĩhia, na maũndũ marĩa atũire ekaga nĩ ũndũ waku nĩ mega mũno;
• 5. nĩ ũndũ ndaaregire gwĩtwarĩrĩra ũgwati-inĩ wa gĩkuũ, akĩgũtha Mũfilisiti ũrĩa, na hĩndĩ ĩo Jehova agĩĩka ũndũ mũnene mũno, akĩhonokia andũ othe a Isiraeli; nawe ũkĩĩonera ũndũ ũcio, ũgĩgĩkena; ũgũkĩĩhia nĩkĩ ũgĩita thakame ĩtarĩ na ũũru, ũũrage Daudi hatakĩrĩ gĩtũmi?
• 6. Saulu agĩkĩigua uuge wa Jonathani, akĩĩhĩta, akiuga atĩrĩ, O ta ũrĩa Jehova atũũraga muoyo-rĩ, ndangĩũragwo.
• 7. Nake Jonathani agĩgĩĩta Daudi, ningĩ Jonathani akĩmũmenyithia maũndũ macio mothe. Jonathani agĩgĩtwara Daudi gwĩ Saulu, nake agĩikara harĩ we, o ta rĩa mbere.
• 8. Ningĩ gũgĩkĩgĩa mbaara rĩngĩ; nake Daudi agĩthiĩ akĩhũrana na Afilisiti, akĩmoraga rĩũragana inene mũno; nao magĩkĩmũũrĩra.
• 9. Ningĩ roho mũũru uumĩte he Jehova ũkĩgwata Saulu aikarĩte gwake mũciĩ, anyitĩte itimũ na guoko; nake Daudi akĩhũra kĩnanda na guoko.
• 10. Nake Saulu agĩcaria gũtheca Daudi akamũthecithanie na rũthingo na itimũ rĩu; no rĩrĩ, Daudi akĩĩhonokia akiuma harĩ we, agĩgĩtheca rũthingo na itimũ rĩu; nake Daudi akĩũra, akĩĩhonokia ũtukũ ũcio.
• 11. Ningĩ Saulu akĩrekia andũ kwa Daudi mũciĩ, makamuoherie handũ mamũũrage rũcinĩ; nake Mikali, mũka wa Daudi, akĩmũmenyithia ũndũ ũcio, akiuga atĩrĩ, Ũngĩaga kwĩhonokia muoyo ũtukũ ũyũ-rĩ, nĩũkũroka kũũragwo.
• 12. Mikali agĩgĩikũrũkĩria Daudi ndirica-inĩ, agĩthiĩ akĩĩũrĩra, akĩĩhonokia.
• 13. Nake Mikali akĩoya mũhianano wa kũhoya ngai naguo, akĩũkomia ũrĩrĩ wake, agĩcoka akĩiga mwĩtiiro wa guoya wa mbũri mũtwe-inĩ waguo, akĩũhumbĩra na nguo.
• 14. Nake Saulu aarekia andũ makanyite Daudi-rĩ, mũka akiuga atĩrĩ, Nĩ mũrũaru.
• 15. Ningĩ Saulu agĩkĩrekia andũ makarore Daudi, akĩmera atĩrĩ, Mũrehei kũrĩ niĩ arĩ ũrĩrĩ, nĩguo ndĩmũũrage.
• 16. Nao arekio acio maatonya nyũmba-rĩ, makĩona nĩ mũhianano wa kũhoya ngai naguo ũrĩ ũrĩrĩ, na mwĩtiiro wa guoya wa mbũri wĩ mũtwe-inĩ waguo.
• 17. Saulu agĩkĩũria Mikali atĩrĩ, Wa’henia ũguo nĩkĩ, wareka thũ yakwa ĩthiĩ, yahonoka? Mikali agĩgĩcokeria Saulu, akĩmwĩra atĩrĩ, Anjĩrire atĩrĩ, Reka ndĩĩthiĩre; kaĩ ngũgĩkũũraga nĩkĩ?
• 18. Nake Daudi agĩkĩĩũrĩra, akĩhonoka, agĩthiĩ gwĩ Samueli o kũu Rama, akĩmwĩra maũndũ mothe marĩa Saulu aamwĩkĩte. Nake we mwene, me na Samueli, magĩthiĩ gũtũũra Naiothu.
• 19. Ningĩ Saulu akĩheo ũhoro ũcio, akĩĩrũo ũũ: Atĩrĩrĩ, Daudi e Naiothu, o kũu Rama.
• 20. Saulu agĩkĩrekia andũ makanyite Daudi; no rĩrĩa monire gĩkundi kĩa anabii makĩratha mohoro, na Samueli akarũgama amatongoretie-rĩ, roho wa Ngai ũgĩkora arekio acio a Saulu, o nao makĩratha mohoro.
• 21. Na rĩrĩa Saulu aaheirũo ũhoro ũcio, agĩkĩrekia andũ angĩ, o nao makĩratha mohoro. Ningĩ Saulu akĩrekia andũ angĩ hĩndĩ ya gatatũ, o nao makĩratha mohoro.
• 22. Thutha wa ũguo o nake we mwene agĩthiĩ Rama, agĩkinya irima-inĩ rĩa maĩ rĩrĩa inene rĩrĩ o kũu Seku; akĩhoya andũ ũhoro, akĩmoria atĩrĩ, Aa Samueli na Daudi me ha? Mũndũ ũmwe agĩkiuga ũũ: Atĩrĩrĩ, me Naiothu, o kũu Rama.
• 23. Agĩgĩthiĩ Naiothu, kũu Rama; na rĩrĩ, roho wa Ngai ũkĩmũkora o nake, agĩthiĩ arorete na mbere o ro ũguo akĩrathaga mohoro, o nginya rĩrĩa aakinyire Naiothu, kũu Rama.
• 24. Ningĩ agĩgĩĩcuma nguo ciake cia igũrũ, akĩratha mohoro arĩ mbere ya Samueli, agĩkoma thĩ atarĩ na nguo icio mũthenya ũcio wothe, o na ũtukũ ũcio. Tondũ ũcio, kũũragio atĩrĩ, Hĩ! Kaĩ Saulu o nake akĩrĩ wa thiritũ ya anabii?

Home