Go Back

1 Samueli Chapter 18

• 1. Na gũgĩkinya atĩrĩ, atĩ aarĩkia kwaria na Saulu, ngoro ya Jonathani ĩgĩciarana mũno na ngoro ya Daudi, nake Jonathani akĩmwenda o ta ũrĩa eyendete we mwene.
• 2. Nake Saulu agĩkĩmuoya mũthenya o ro ũcio, agĩthiĩ nake, na ndaigana gũcoka kũmũreka ainũke gwa ithe mũciĩ.
• 3. Hĩndĩ ĩo Jonathani na Daudi makĩgĩa na kĩrĩkanĩro, nĩ ũndũ nĩaamwendete o ta ũrĩa eyendete we mwene.
• 4. Jonathani agĩgĩĩcuma nguo yake ĩrĩa ndaya ya igũrũ, akĩmĩhe Daudi, o na nguo iria ingĩ ciake, o na rũhiũ rũake rũa njora, na ũta wake, na mũcibi wake.
• 5. Nake Daudi agathiaga kũndũ guothe kũrĩa Saulu aamũrekagia, na agĩtũũra ekaga maũndũ na ũũgĩ; ningĩ Saulu akĩmũtua mwathi wa andũ a ita, nao andũ othe makĩona ũndũ ũcio wĩ mwega, o nacio ndungata cia Saulu ikĩona o ta ũguo.
• 6. Na gũgĩkinya atĩrĩ, atĩ rĩrĩa kwainũkagwo, o hĩndĩ ĩo Daudi oimaga kũũraga Mũfilisiti, andũ-a-nja makiuma matũũra-inĩ mothe ma Isiraeli makĩinaga, na makĩrũũgarũũgaga, nĩguo magatũnge Saulu mũthamaki wao, me na tũhembe, na inanda cia mĩthemba mĩthemba.
• 7. Nao andũ-a-nja acio magĩkĩinanĩra o mũndũ-wa-nja na ũrĩa ũngĩ magĩthaka, makiuga atĩrĩ, Saulu nĩoragĩte andũ ngiri nyingĩ, Nake Daudi akoraga andũ ngiri makũmi maingĩ.
• 8. Saulu agĩkĩrakara mũno, naguo uuge ũcio ũkĩmũiguithia ũũru; agĩkiuga atĩrĩ, Githĩ Daudi mamũtuĩte mũũragi andũ ngiri makĩmũ maingĩ, na niĩ makandua mũũragi o ngiri nyinyi; kaĩ aagĩtigaria ũndũ ũrĩkũ tiga o agwate ũthamaki?
• 9. Nake Saulu agĩgĩitĩka kũrora Daudi manyiira kuuma mũthenya ũcio, o na thutha waguo.
• 10. Na gũgĩkinya atĩrĩ, atĩ rũciũ rũrũ rũngĩ Saulu akĩroka gũkorũo na hinya mũno nĩ roho mũũru uumĩte kwĩ Ngai, akĩgwatwo nĩ ũgũrũki arĩ o kũu gwake mũciĩ; nake Daudi akĩhũra kĩnanda na moko, o ta ũrĩa ekaga mũthenya o mũthenya; nake Saulu agĩkorũo anyitĩte itimũ na guoko.
• 11. Saulu agĩgĩikia itimũ rĩu, nĩ ũndũ oigire atĩrĩ, Ngũikia Daudi itimũ ngamũthecithanie na rũthingo. Nake Daudi akĩmweherera mahinda merĩ, akiuma harĩ we.
• 12. Nake Saulu agĩgĩĩtigĩra Daudi, nĩ ũndũ Jehova aarĩ hamwe nake, akeherera Saulu.
• 13. Tondũ ũcio Saulu agĩkĩmũthengia oime harĩ we, akĩmũtua mũnene wa athigari ngiri; agĩgĩtũũra athiaga o agĩcokaga, atongoretie andũ.
• 14. Nake Daudi agekaga na ũũgĩ maũndũ marĩa mamũkoniĩ mĩthiĩre-inĩ yake yothe; na Jehova aarĩ hamwe nake.
• 15. No rĩrĩa Saulu onire atĩ nĩegwĩka maũndũ make na ũũgĩ mũno-rĩ, akĩmwĩtigĩra ma.
• 16. No Isiraeli othe, o na Juda, makĩenda Daudi, nĩ ũndũ nĩaatũire athiaga agĩcokaga amatongoretie.
• 17. Nake Saulu agĩkĩĩra Daudi ũũ: Atĩrĩrĩ, mwarĩ wakwa ũrĩa mũkũrũ, Merabu, nĩwe ũyũ; nĩwe ngũkũhe atuĩke mũkaguo; no rĩrĩ, wee gĩta o gũtuĩka njamba ya kũ’hũranĩra mbaara, na kũhũranĩra Jehova mbaara. Nĩ ũndũ Saulu oigire atĩrĩ, Nĩ kaba ndige kũmwĩka ũũru na guoko gwakwa niĩ mwene; no rĩrĩ, reke moko ma Afilisiti mamwĩke ũũru arĩ mo.
• 18. Daudi agĩkĩĩra Saulu atĩrĩ, Hĩ! Niĩ ndĩ ũ, ningĩ andũ aitũ nĩ a, kana nyũmba ya baba nayo nĩ ndũũ, tũkĩonwo nĩ Aisiraeli, atĩ nĩguo nduĩke mũthoniwe wa mũthamaki?
• 19. No rĩrĩ, nĩgwakinyire atĩrĩ, atĩ ihinda rĩrĩa Merabu, mwarĩ wa Saulu, angĩanengerirũo Daudi, akĩnengerũo Adirieli, Mũmeholathu, atuĩke mũka.
• 20. No rĩrĩ, Mikali, mwarĩ wa Saulu, nĩendete Daudi; nao andũ makĩhe Saulu ũhoro ũcio, naguo ũndũ ũcio ũkĩmũkenia.
• 21. Saulu agĩkiuga atĩrĩ, Nĩngũmũhe we, nĩguo atuĩke wa kũmũrehere ũgwati, na nĩ getha guoko kwa Afilisiti kũmwĩke ũũru. Tondũ ũcio Saulu agĩkĩĩra Daudi atĩrĩ, Ũmũthĩ nĩguo ũgũtuĩka mũthoni wakwa nĩ ũndũ wa ũcio wa kerĩ.
• 22. Nake Saulu agĩatha ndungata ciake, agĩciĩra atĩrĩ, Aranĩriai na Daudi na hitho, mũmwĩre ũũ: Atĩrĩrĩ, mũthamaki nĩ mũkenie nĩwe, ningĩ ndungata ciake ciothe nĩikwendete; tondũ ũcio ĩtĩkĩra gũtuĩka mũthoniwe wa mũthamaki.
• 23. Ndungata cia Saulu igĩkĩhe Daudi ũhoro ũcio me ndundu. Nake Daudi akiuga atĩrĩ, Anga mũkuona ta arĩ ũndũ mũhũthũ gũtuĩka mũthoniwe wa mũthamaki, ndĩkĩrĩ mũthĩni, na ngaaga igweta?
• 24. Ningĩ ndungata icio cia Saulu ikĩmũhe ũhoro ũcio, ikĩmwĩra atĩrĩ, Daudi oiga ũna na ũna.
• 25. Saulu agĩkiuga atĩrĩ, Ĩrai Daudi atĩrĩ, Mũthamaki ndarĩ rũraacio o na rũrĩkũ ekwenda, tiga o ikonde cia nyama ya gĩrima igana cia Afilisiti, nĩguo arĩhĩrio harĩ thũ ciake. No Saulu aacirĩire gũtũma Daudi oragwo na guoko kwa Afilisiti.
• 26. Na rĩrĩa ndungata ciake ciaheire Daudi ndeto icio, Daudi agĩkenera mũno gũtuĩka mũthoniwe wa mũthamaki. Na matukũ ma kũhingia ũndũ ũcio mataanahinga-rĩ,
• 27. Daudi agĩũkĩra agĩthiĩ, me na andũ ake, makĩũraga Afilisiti andũ magana merĩ; Daudi agĩgĩtwara ĩkonde ciao cia nyama ya gĩrima, nao magĩcinengera mũthamaki ihingĩte o ta ũrĩa mũthamaki endaga, nĩguo atuĩke mũthoniwe wa mũthamaki. Nake Saulu agĩkĩmũhe Mikali, mwarĩ, atuĩke mũka.
• 28. Nake Saulu akĩona, na akĩmenya, atĩ Jehova aarĩ hamwe na Daudi; nake Mikali, mwarĩ wa Saulu, akĩmwenda.
• 29. Saulu agĩgĩkĩrĩrĩria gwĩtigĩra Daudi; ningĩ Saulu agĩtũũra arĩ o thũ ya Daudi.
• 30. Na rĩrĩ, anene a Afilisiti magĩtũũra moimagaraga nĩ ũndũ wa mbaara; na gũgĩkinya atĩrĩ, atĩ o hĩndĩ ĩrĩa yothe moimagara-rĩ, Daudi ageka maũndũ na ũũgĩ mũno gũkĩra ndungata iria ingĩ ciothe cia Saulu; na tondũ ũcio rĩĩtwa rĩake rĩkĩgĩa igweta mũno.

Home