Go Back

1 Samueli Chapter 16

• 1. Ningĩ Jehova akĩĩra Samueli atĩrĩ, Ũgũtũũra ũrĩragĩra Saulu nginya hĩndĩ ĩ, kuona atĩ nĩndĩmũregete, atige gũtũũra arĩ mũthamaki wa gũthamakĩra Isiraeli? Iyũria rũhĩa rũaku maguta, ũthiĩ, ngũrekie kwĩ Jesii Mũbethilehemu, nĩ gũkorũo nĩndĩĩoneire mũthamaki thĩinĩ wa ariũ ake.
• 2. Samueli agĩgĩcokia atĩrĩ, Ndakĩhota atĩa gũthiĩ? Saulu angĩigua ũguo-rĩ, no kũũraga angĩnjũraga. Jehova agĩkiuga atĩrĩ, Oya mori ũthiĩ nayo, uuge atĩrĩ, Ndoka kũrutĩra Jehova igongona.
• 3. Na wĩte Jesii igongona-inĩ rĩu, na nĩndĩrĩkuonia ũrĩa ũrĩĩka; nawe ũgĩitĩrĩrie maguta mũndũ ũrĩa ndĩrĩkũgwetera rĩĩtwa ũmũnyamũrĩre.
• 4. Nake Samueli agĩgĩĩka ũndũ ũcio Jehova oigĩte, agĩkinya Bethi-lehemu. Nao athuri a itũũra rĩu magĩgĩthiĩ kũmũtũnga makĩinainaga, makĩmũũria atĩrĩ, Ĩ woka na thayũ, kana?
• 5. Nake akiuga atĩrĩ, Ĩĩ, nĩ thayũ; ndoka kũrutĩra Jehova igongona; wĩamũrei mwĩtherie mũũke tũthiĩ igongona-inĩ. Ningĩ agĩkĩamũra Jesii na ariũ ake akĩmatheria, akĩmeta igongona-nĩ rĩu.
• 6. Na gũgĩkinya atĩrĩ, atĩ maakinya ho, akĩbara Eliabu, akĩĩĩra atĩrĩ, Ti-itherũ mũndũ wa Jehova ũrĩa ũgũitĩrĩrio maguta ekũrũgama mbere yake.
• 7. No Jehova akĩĩra Samueli atĩrĩ, Tiga kũmũbara gĩthiithi, kana kĩũga kĩa ũrĩa araihĩte, nĩ ũndũ nĩndĩmũregete, nĩ gũkorũo Jehova ndonaga ta ũrĩa mũndũ wa gũkũ thĩ onaga; mũndũ wa gũkũ thĩ abaraga one ũrĩa mũndũ atariĩ akĩonwo na maitho, no rĩrĩ, Jehova abaraga ngoro thĩinĩ.
• 8. Ningĩ Jesii agĩĩta Abinadabu, akĩmũhĩtũkithĩria harĩ Samueli. Nake akiuga atĩrĩ, O nake ũyũ tiwe ũthurĩtwo nĩ Jehova.
• 9. Thutha wa ũguo Jesii akĩhĩtũkithia Shama. Nake akiuga atĩrĩ, O na ũyũ tiwe ũthurĩtwo nĩ Jehova.
• 10. Jesii agĩkĩhĩtũkithĩria ariũ ake mũgwanja harĩ Samueli. Nake Samueli akĩĩra Jesii atĩrĩ, Jehova ndathurĩte aya.
• 11. Hĩndĩ ĩo Samueli agĩkĩũria Jesii atĩrĩ, Ĩ ciana ciaku ciothe irĩ haha? Nake akiuga ũũ: Nĩhatigarĩte ũrĩa wa kĩhinga-nda, na atĩrĩrĩ, e rũũru. Samueli agĩkĩĩra Jesii atĩrĩ, Rekania agĩrũo; nĩ ũndũ tũtiikara thĩ o nginya aambe oke.
• 12. Agĩkĩrekania, nake akĩrehwo ho. Nake agĩgĩkorũo arĩ mũtune, na akaagĩra gĩthiithi, agathakara mũno akĩonwo. Nake Jehova akiuga atĩrĩ, Ũkĩra ũmũitĩrĩrie maguta, nĩ ũndũ ũyũ nĩwe.
• 13. Samueli agĩkĩoya rũhĩa rũa maguta, akĩmũitĩrĩria maguta arĩ o hau gatagatĩ-inĩ ka ariũ a nyina; naguo roho wa Jehova ũgĩgĩkora Daudi na hinya mũno kuuma mũthenya ũcio. Nake Samueli agĩũkĩra agĩĩthiĩra.
• 14. Na rĩrĩ, roho wa Jehova nĩwoimĩte Saulu, ũkamũthengera, naguo roho mũũru woimĩte he Jehova nĩwamũnyariraga.
• 15. Nacio ndungata cia Saulu igĩkĩmwĩra ũũ: Atĩrĩrĩ, nĩ roho mũũru uumĩte he Ngai ũrakũnyarira.
• 16. Na rĩrĩ, mwathi witũ, twathe ithuĩ ndungata ciaku, o ithuĩ twĩ haha mbere yaku, tũgũcarĩrie mũndũ mũũgĩ na kũhũra kĩnanda kĩa mũgeto; na nĩgũgakinya atĩrĩ, atĩ hĩndĩ ĩrĩa roho ũcio mũũru uumĩte he Ngai wagũkora, mũndũ ũcio mũũgĩ agakũhũrĩra kĩnanda kĩu na guoko gwake, ũkaigua wega.
• 17. Saulu agĩkĩĩra ndungata ciake atĩrĩ, ’Mathĩrai mũndũ ũngĩhota kũhũra kĩnanda wega, mũmũrehe harĩ niĩ.
• 18. Hĩndĩ ĩo mũndũ ũmwe wa aanake acio agĩcokia, akiuga ũũ: Atĩrĩrĩ, nĩnyonete mũriũ ũmwe wa Jesii, Mũbethi-lehemu, na nĩ mũũgĩ mũno na kũhũra kĩnanda, na nĩ njamba ĩrĩ hinya, na nĩ mũndũ wa ita, na nĩ mũbarĩrĩri ũhoro mũno akĩaria, na nĩ thaka, nĩngĩ Jehova e hamwe nake.
• 19. Tondũ ũcio Saulu agĩkĩrekeria Jesii andũ, akiuga atĩrĩ, Ndehithĩrie Daudi, mũrũguo ũrĩa wĩ rũũru.
• 20. Nake Jesii agĩkĩnyita ndigiri, ĩgĩkuuithio mũrigo wa irio, na mondo ya ndibei, na kori, agĩcitwarithia na Daudi, mũrũwe, ihirĩrũo Saulu.
• 21. Daudi agĩgĩthiĩ he Saulu, akĩrũgama mbere yake, nake Saulu akĩmwenda mũno; nake Daudi agĩtuĩka mũmũkuuĩri indo ciake cia mbaara.
• 22. Ningĩ Saulu akĩrekeria Jesii mũndũ, akiuga atĩrĩ, Reka mũrũguo Daudi arũgamage mbere yakwa; nĩ ũndũ nĩetĩkĩrĩkĩte mũno nĩ niĩ.
• 23. Na gũgĩkinya atĩrĩ, atĩ hĩndĩ ĩrĩa roho ũcio mũũru uumĩte he Ngai wagwata Saulu, Daudi akoya kĩnanda gĩake kĩa mũgeto, agakĩhũra na guoko; nake Saulu agakĩhorera, akaigua wega, roho ũcio mũũru ũgakĩmweherera.

Home