Go Back

1 Samueli Chapter 13

• 1. Na rĩrĩ, Saulu aakinyĩtie mĩaka mĩrongo ĩtatũ rĩrĩa aambĩrĩirie gũthamaka; agĩgĩthamakĩra Isiraeli mĩaka ĩĩrĩ.
• 2. Nake Saulu agĩĩthurĩra andũ a Isiraeli ngiri ithatũ; nao andũ ngiri igĩrĩ thĩinĩ wa acio magĩikara na Saulu Mikimashi, o na kĩrĩma-inĩ kĩa Beth-eli; nao arĩa angĩ ngiri ĩmwe magĩikara na Jonathani kũu Gibea ya Benjamini; nao andũ arĩa angĩ akĩmera mainũke hema-inĩ ciao, mũndũ o mũndũ.
• 3. Nake Jonathani akĩhũra kĩhingo kĩa Afilisiti kĩrĩa kĩarĩ Geba; nao Afilisiti makĩigua ũhoro ũcio. Nake Saulu akĩhuhithia coro bũrũri ũcio wothe akiuga atĩrĩ, Ahibirania ta nĩmaigue.
• 4. Nao Aisiraeli othe magĩkĩigua gũkĩĩranwo atĩ Saulu nĩaahũrĩte kĩhingo kĩa Afilisiti, na atĩ Aisiraeli nĩmathũũrĩtwo mũno nĩ Afilisiti. Nao andũ makĩũngana marũmĩrĩre Saulu, o kũu Giligali.
• 5. Nao Afilisiti magĩkĩũngana nĩguo mahũrane na Isiraeli, marĩ na ngari cia ita ngiri mĩrongo ĩtatũ, na andũ ngiri ithathatũ arĩa mathiaga mahaicĩte mbarathi, na andũ angĩ maigana o ta mũthanga ũrĩa wĩ hũgũrũrũ-inĩ cia iria nĩ kũingĩha; na magĩkĩambata, makĩamba hema ciao Mikimashi, mwena wa irathĩro wa Bethi-aveni.
• 6. Na rĩrĩa andũ a Isiraeli meonire atĩ me hairũ, (nĩ ũndũ andũ nĩmaacĩng’ĩtwo mũno,) hĩndĩ ĩo andũ makĩĩhitha ngurunga-inĩ, na ithaka-inĩ nduru, na ndwaro-inĩ cia mahiga, na marima-inĩ ma ndũire, o na marĩa menjetwo ma maĩ.
• 7. Na rĩrĩ, Ahibirania amwe nĩmaaringĩte mũrĩmo ũrĩa ũngĩ wa Jorodani, magakinya bũrũri wa Gadi na Gileadi; no rĩrĩ, Saulu we mwene aakorirũo arĩ o Giligali; nao andũ othe makĩmũrũmĩrĩra makĩinainaga.
• 8. Nake agĩgĩikara kuo mĩthenya mũgwanja, o ta ũrĩa ihinda rĩrĩa Samueli aatuĩte rĩatariĩ; no rĩrĩ, Samueli ndaigana gũkinya kũu Giligali; nao andũ magĩkĩharagania makiuma harĩ we.
• 9. Nake Saulu agĩkiuga atĩrĩ, Ndeherei indo cia ihaki rĩa njino haha, o na cia magongona ma ũiguano. Nake agĩkĩruta ihaki rĩu rĩa njino.
• 10. Na gũgĩkinya atĩrĩ, atĩ o kahinda karĩa aakorirũo aarĩkia kũruta ihaki rĩu rĩa njino-rĩ, atĩrĩrĩ, Samueli agĩkinya ho; nake Saulu agĩgĩthiĩ kũmũtũnga amũgeithie.
• 11. Nake Samueli akiuga atĩrĩ, Hĩ! Nĩ atĩa wagĩĩka rĩu? Saulu agĩkĩmwĩra atĩrĩ, Nĩ kuona nyonire atĩ andũ mekũharagania moima harĩ niĩ, nawe waaga gũũka ihinda rĩrĩa rĩatuĩtwo, nao Afilisiti nĩmecokanĩrĩirie o kũu Mikimashi;
• 12. tondũ ũcio ndoiga atĩrĩ, Rĩu Afilisiti nĩmegũikũrũka moke mangore gũkũ Giligali, na ndirĩ ndĩrathaitha Jehova nĩguo twĩtĩkĩrĩke nĩwe. Ũndũ ũcio nĩguo ũtũmire ndĩĩringĩrĩrie gwĩka ũndũ ũcio, ndaruta ihaki rĩa njino.
• 13. Nake Samueli agĩkĩĩra Saulu atĩrĩ, Nĩweka ũndũ wa ũkĩgu mũno; ndũnamenyerera rĩathani rĩa Jehova Ngai waku, rĩrĩa aagwathire; nĩ ũndũ rĩu Jehova nĩangĩahanda ũthamaki waku thĩinĩ wa Isiraeli ũtũũre tene na tene.
• 14. No rĩrĩ, rĩu ũthamaki waku ndũngĩtũũra; Jehova nĩecarĩirĩe mũndũ ũrĩa mangĩiguana nake, na Jehova nĩamũtuĩte mũnene wa gwatha andũ ake, nĩ ũndũ wee ndũnamenyerera maũndũ marĩa Jehova aagwathire.
• 15. Nake Samueli agĩgĩũkĩra, akĩambata akiuma Giligali, agĩthiĩ Gibea ya Benjamini. Nake Saulu agĩtara andũ arĩa aarĩ nao hau, magĩkorũo marĩ ta arũme magana matandatũ.
• 16. Nake Saulu, na Jonathani, mũriũ, na andũ arĩa maarĩ nao hau, magĩikara Geba ya Benjamini; no rĩrĩ, Afilisiti maambĩte hema ciao Mikimashi.
• 17. Ningĩ hagĩkiuma aninani kĩraaro-inĩ kĩa Afilisiti marĩ ikundi ithatũ; gĩkundi kĩmwe gĩkĩgwata njĩra ĩrĩa ĩthiaga Ofara, kĩrorete bũrũri wa Shuali,
• 18. kĩrĩa kĩngĩ gĩkĩgwata njĩra ya Bethi-horoni, o nakĩo kĩrĩa kĩngĩ gĩkĩgwata njĩra ya bũrũri ũrĩa ũng’etheire kĩanda gĩa Zeboimu kĩrorete werũ-inĩ.
• 19. Na rĩrĩ, hĩndĩ ĩo bũrũri wa Isiraeli wothe gũtiarĩ mũturi o na ũmwe wonekaga kuo, nĩ ũndũ Afilisiti moigire atĩrĩ, Gũtigĩa, nĩguo Ahibirania matigethondekere hiũ cia njora, na matimũ;
• 20. no rĩrĩ, Aisiraeli othe maaikũrũkaga magagĩthiĩ kũrĩ Afilisiti, mũndũ o mũndũ akanore mengere yake, na rũhiũ rũa mũraũ wake, na ithanwa rĩake, o na icembe rĩake,
• 21. o hĩndĩ ĩrĩa yothe macembe mao, o na hiũ cia mĩraũ yao, na hari ciao, na mathanwa mao, o na igera cia macengi ma gũtindĩka ndegwa ciao, ciatuuha.
• 22. Na tondũ ũcio gũgĩkinya atĩrĩ, mũthenya wa ita, arĩ andũ arĩa maarĩ na Saulu na Jonathani, gũtiarĩ o na ũmwe wao wonirũo na rũhiũ rũa njora, kana itimũ, anyitĩte na guoko; no rĩrĩ, Saulu we mwene, na mũriũ Jonathani maarĩ nacio.
• 23. Nakĩo gĩtungati kĩa Afilisiti gĩkiumagara, nĩguo gĩkinye ihungurĩro-inĩ rĩa Mikimashi, kĩĩakĩre kĩhingo ho.

Home