Go Back

1 Samueli Chapter 10

• 1. Samueli agĩkĩoya kanandũ ka maguta, akĩmũitĩrĩria mũtwe, akĩmũmumunya, akiuga, Githĩ Jehova ndaagũitĩrĩria maguta, ũtuĩke mũtongoria wa andũ arĩa egwatĩire?
• 2. Ũmũthĩ twatigana-rĩ, nĩũgũkora andũ erĩ mbĩrĩra-inĩ ya Rakeli, o kũu Zeliza, mũhaka-inĩ wa bũrũri wa Benjamini; nao makwĩre atĩrĩ, Ndigiri iria ũrathiĩte gũcaria nĩcionekete, na thoguo nĩatigĩte kũrũmbũiya ũhoro wa ndigiri, agacoka gũtangĩka nĩ ũndũ waku, akoiga atĩrĩ, Ngũgĩĩka atĩa nĩ ũndũ wa mũrũ wakwa?
• 3. Ningĩ wathiathia na mbere woima kũu, ũkinye Mũgandi-inĩ wa Taboru-rĩ, nĩũgũcemania na andũ atatũ makĩambata Beth-eli he Ngai, na ũmwe akuuĩte tũũri tũtatũ, na ũrĩa ũngĩ mĩgate ĩtatũ, na wa gatatũ agakuua mondo ya ndibei;
• 4. nao makũgeithie, na makũhe mĩgate ĩĩrĩ, nawe ũmĩamũkĩre.
• 5. Thutha wa ũguo ningĩ wakinya kĩrĩma-inĩ kĩa Ngai, harĩa he kĩhingo gĩa Afilisiti, nĩgũgũtuĩka atĩrĩ, atĩ wakinya kũu itũũra-inĩ, nĩũgũcemania na anabii me gĩtutu, magĩikũrũka moimĩte itĩri-inĩ rĩa handũ hatũũgĩru matongoretio nĩ andũ me na inanda cia kĩnubi, na tũhembe, na mĩtũrirũ, na inanda nene cia mũgeto, nao makorũo makĩratha mohoro;
• 6. na roho wa Jehova nĩũgũgũkora na hinya mũnene, nawe ũrathe mohoro hamwe nao, na nĩũkũgarũrũka ũtuĩke ta mũndũ ũngĩ.
• 7. Na nĩgũgũkinya atĩrĩ, atĩ imenyithia icio ciagũkinyĩrĩra-rĩ, nĩũgeka o ta ũrĩa ũkona kwagĩrĩire, nĩ ũndũ Ngai e hamwe nawe.
• 8. Ũgĩcoke ũikũrũke Giligali ũkinye kuo mbere yakwa; na atĩrĩrĩ, nĩngaikũrũka ngũkore kuo, ndute mahaki ma njino, na ’thĩnje nyamũ cia magongona ma ũiguano; ũgĩikare kuo mĩthenya mũgwanja o nginya ngũkore nguonie ũrĩa ũgwĩka.
• 9. Na gũgĩkinya o ro ũguo, atĩ hĩndĩ ĩrĩa aahutatire agĩthiĩ magĩtigana na Samueli-rĩ, Ngai agĩkĩmũhe ngoro ĩngĩ, na imenyithia icio ciothe ikĩoneka mũthenya o ro ũcio.
• 10. Na maakinya kĩrĩma-inĩ-rĩ, atĩrĩrĩ, gĩtutu kĩa anabii gĩgĩcemania nake, naguo roho wa Ngai ũkĩmũkora na hinya mũnene, akĩratha mohoro e thĩinĩ wao.
• 11. Na gũgĩkinya atĩrĩ, atĩ hĩndĩ ĩrĩa andũ othe arĩa maamenyaine nake mbere ĩo monire ũguo, atĩ nĩ kũratha ekũratha mohoro e hamwe na anabii, makĩũrania o mũndũ na mũndũ atĩrĩ, Ĩ nĩ ũndũ ũrĩkũ ũyũ wakora mũrũ wa Kishu? Kaĩ Saulu o nake akĩrĩ wa thiritũ ya anabii?
• 12. Na mũndũ ũmwe wa handũ o ro hau agĩcokia akiuga atĩrĩ, Nake ithe wao nũ? Na tondũ wa ũguo ũndũ ũcio ũgĩtuĩka thimo, gũkoragio atĩrĩ, Anga o nake Saulu arĩ wa thiritũ ya anabii?
• 13. Na aarĩkia kũratha mohoro, agĩthiĩ itĩri-inĩ rĩa kĩrĩma-inĩ kĩu.
• 14. Nake ithe mũnyinyi wa Saulu akĩũria Saulu o na ndungata yake atĩrĩ, Kaĩ mwagĩthiire kũ? Nake agĩcokia atĩrĩ, Twathiire gũcaria ndigiri; na rĩrĩa twonire atĩ itikuoneka, tũgĩthiĩ gwĩ Samueli.
• 15. Ningĩ ithe mũnyinyi wa Saulu akĩmũũria atĩrĩ, Ta njĩra ũrĩa Samueli aakwĩrire.
• 16. Nake Saulu agĩkĩĩra ithe mũnyinyi atĩrĩ, Nĩaatwĩrire o wega atĩ ndigiri nĩ nyoneku. No rĩrĩ, ũhoro ũkoniĩ ũthamaki ũrĩa Samueli aamũheete ũhoro waguo-rĩ, ndaigana kũmwĩra.
• 17. Nake Samueli agĩgĩĩta andũ mongane harĩ Jehova kũu Mizipa,
• 18. agĩkĩĩra ciana cia Isiraeli atĩrĩ, Jehova, o we Ngai wa Isiraeli, ekuuga ũũ: Nĩ niĩ ndaambatirie Isiraeli, ngĩmaruta Misiri, ngĩmũhonokia ngĩmũruta moko-inĩ ma Amisiri, o na kũrĩ mothamaki mothe marĩa maamũhinyagĩrĩria;
• 19. no rĩrĩ, hau mũrĩ ũmũthĩ, nĩmũregete Ngai wanyu, ũcio ũmũhonokagia we mwene, akamũruta maũũru-inĩ mothe marĩa mamũkoraga, na maũndũ-inĩ manyu marĩa mamũgĩtagĩra hinya; na mũmwĩrĩte atĩrĩ, Aca, no nĩ kaba ũtũhe mũthamaki atũthamakagĩre. Tondũ wa ũguo, rĩu okokai mbere ya Jehova, o ta ũrĩa mĩhĩrĩga yanyu ĩtariĩ, o na ta ũrĩa ngiri na ngiri cia andũ anyu itariĩ.
• 20. Tondũ ũcio Samueli agĩkĩreharehithie mĩhĩrĩga yothe ya Isiraeli ĩmũthengerere; naguo mũhĩrĩga wa Benjamini ũkĩoyũo.
• 21. Ningĩ akĩreharehithie mũhĩrĩga wa Benjamini o ta ũrĩa mbarĩ ciaguo ciatariĩ, makĩmũthengerera; nayo mbarĩ ya Amatiri ĩkĩoyũo; ningĩ Saulu, mũrũ wa Kishu, akĩoyũo; no maamũcaria-rĩ, akĩaga kuoneka.
• 22. Tondũ ũcio magĩgĩtuĩria ũhoro kwĩ Jehova, makĩmũũria atĩrĩ, Mũndũ ũcio arĩ arakinya haha? Nake Jehova agĩcokia ũũ: Atĩrĩrĩ, ehithĩte harĩa indo ciigĩtwo.
• 23. Magĩgĩteng’era, makĩmũgĩra; nake aarũgama thĩinĩ wa andũ-rĩ, akĩonwo akĩrĩte andũ arĩa angĩ othe kũraiha, kuuma ciande-inĩ ciake gũcoka na kũu igũrũ.
• 24. Nake Samueli agĩkĩĩra andũ acio othe atĩrĩ, Githĩ mũtikuona atĩ thĩinĩ wa andũ aya hatirĩ mũndũ o na ũmwe ũhaanaine na mũndũ ũyũ ũthurĩtwo nĩ Jehova? Nao andũ acio othe makĩanĩrĩra mũno makiuga atĩrĩ, Ngai arotũũria mũthamaki ũyũ witũ!
• 25. Hĩndĩ ĩo Samueli akĩhe andũ acio kĩrĩra gĩkoniĩ ũthamaki ũcio, na agĩkĩandĩka ibuku-inĩ, akĩrĩiga mbere ya Jehova. Nake Samueli agĩkĩĩra andũ othe methiĩre, mũndũ o mũndũ ainũke gwake mũciĩ.
• 26. O nake Saulu akĩinũka gwake mũciĩ Gibea, na agĩthiĩ na gĩtungati kĩa andũ arĩa maahutĩtio ngoro ciao nĩ Ngai.
• 27. No andũ amwe aaganu mũno makiuga atĩrĩ, Mũndũ ũyũ nake egũtũhonokia atĩa? Magĩkĩmũnyarara na makĩrega kũmũhothera mũhothi. Nowe agĩĩkirĩra.

Home