Go Back

Ruthu Chapter 2

• 1. Na rĩrĩ, Naomi agĩgĩkorũo arĩ na mũndũ ũmwe wa nyũmba ya aa mũthuriwe, nake aarĩ gĩtonga wa nyũmba o ro ĩo ya Elimeleku; na etagwo Boazu.
• 2. Nake Ruthu ũcio Mũmoabi agĩkĩĩra Naomi atĩrĩ, Reka ’thiĩ na kũu mĩgũnda ngahaare cairi ĩrĩa ĩtigĩtwo thĩ ndĩ thutha wa mũndũ ũrĩa ũrĩenda kũnjiguĩra tha. Nake agĩkĩmwĩra atĩrĩ, Wĩthiĩre, mwarĩ wakwa.
• 3. Nake agĩgĩthiĩ akĩhaara cairi kũu mĩgũnda arĩ thutha wa agethi; na rĩrĩ, mũnyaka wake nĩ atĩ aakinyire mũgũnda wa Boazu, ũcio wa nyũmba ya Elimeleku.
• 4. Na atĩrĩrĩ, Boazu agĩkiuma Bethi-lehemu, agĩkinya kuo, akĩĩra agethi atĩrĩ, Jehova aroikara na inyuĩ. Nao makĩmũcokeria atĩrĩ, Jehova arokũrathima.
• 5. Hĩndĩ ĩo Boazu agĩkĩũria ndungata yake ĩrĩa yaroraga agethi atĩrĩ, Mũirĩtu ũyũ nĩ wa ũ?
• 6. Nayo ndungata ĩo yaroraga agethi ĩkĩmũcokeria ĩkiuga atĩrĩ, Nĩ mũirĩtu Mũmoabi ũrĩa wacokire na Naomi oimĩte bũrũri wa Moabi;
• 7. nake anjĩrire ũũ: Ndagũthaitha, ũreke ’haare cairi nyũnganie ĩrĩa ĩtigĩtwo thĩ gatagatĩ ga itĩa, ndĩ thutha wa agethi; tondũ ũcio aagĩũka, na ndarĩ aratigithĩria kuuma rũcinĩ nginya o rĩu; no harĩa nyũmba aahurũka hanini.
• 8. Hĩndĩ ĩo Boazu agĩkĩĩra Ruthu atĩrĩ, Ta igua, mwarĩ wakwa; menya ũthiĩ ũkahaare irio mũgũnda ũngĩ, kana ũhĩtũke gũkũ, no ikara o haha mwĩ na airĩtu aya akwa.
• 9. Ikara ũroretie maitho maku o mũgũnda ũrĩa mekũgetha, ũthiage ũrĩ o thutha wao; githĩ ndiagĩatha aanake akwa matigakũhutie? na rĩrĩa wanyota-rĩ, thiaga harĩa inya ciigĩtwo, ũnyue maĩ marĩa aanake aya matahĩte.
• 10. Nake agĩkĩĩgũithia agĩturumithia ũthiũ thĩ, akĩinamĩrĩra o hau thĩ tĩri-inĩ, akĩmwĩra atĩrĩ, Nĩ kĩ gĩatũma njĩtĩkĩrĩke nĩwe, na wenda kũnjĩka maũndũ mega, ndĩkĩrĩ mũrũrĩrĩ?
• 11. Nake Boazu akĩmũcokeria akĩmwĩra atĩrĩ, Maũndũ mothe marĩa waneka nyaciaraguo gwata hĩndĩ ĩrĩa mũthuriguo aakuire nĩ’menyithĩtio mũno ũhoro wamo; o na ũrĩa watiganire na thoguo o na nyũkwa, o na bũrũri wanyu ũrĩa waciarĩirũo, ũgĩũka kũrĩ andũ ũtaamenyanĩte nao mbere ĩo.
• 12. Jehova arokũhe kĩrĩa wagĩrĩirũo nĩ kũheo nĩ ũndũ wa maũndũ macio waneka! Ningĩ Jehova, Ngai wa Isiraeli, ũrĩa wee, mwarĩ wakwa, ũũkĩte kwĩhitha mathagu-inĩ make, arokũhe mũcara ũrĩa ũiganĩire!
• 13. Hĩndĩ ĩo agĩkiuga atĩrĩ, Mwathi wakwa, reka njĩtĩkĩrĩke nĩwe ndĩ haha mbere yaku; nĩ ũndũ nĩũhoreretie ngoro yakwa, na ũkanjarĩria ndeto njega cia tha, niĩ ndungata yaku ya mũirĩtu, o na harĩa itarĩ wa thiritũ ya ndungata ciaku cia airĩtu.
• 14. Na ihinda rĩa kũrĩa irio rĩakinya Boazu akĩmwĩra atĩrĩ, Ũka na haha, ũrĩe irio, na ũtobokie kĩenyũ gĩaku thiki-inĩ ĩno. Nake Ruthu agĩgĩikara hau hamwe na agethi; nao makĩmũnengereria cairi hĩhie, nake agĩkĩmĩrĩa akĩhũna, o na agĩtigaria.
• 15. Na hĩndĩ ĩrĩa aarahũkire acoke mũgũnda akahaare cairi ĩngĩ-rĩ, Boazu agĩatha aanake ake, akĩmera atĩrĩ, Rekei o na kũu itĩa-inĩ ahaare, na mũtikamũtetie.
• 16. O na ningĩ rutagai cairi ĩmwe ĩrĩa ĩrĩ itĩa-inĩ, mũmĩrekie thĩ nĩ ũndũ wake, mũreke ahaare, na mũtikamũkũme.
• 17. Tondũ ũcio agĩkĩhaara cairi mũgũnda ũcio nginya o hwaĩ-inĩ; agĩcoka akĩhũra cairi ĩo aahaarĩte, ĩkĩigana ta eba ĩmwe ya cairi.
• 18. Nake akĩmĩoya, akĩinũka nayo kũu itũũra-inĩ; nake nyaciarawe agĩkĩona irio icio aahaarĩte; ningĩ Ruthu akĩruta iria aatigarĩtie aahũna, akĩmũnengera.
• 19. Nake nyaciarawe agĩkĩmũũria atĩrĩ, Ĩ ũmũthĩ uuma kũhaara kũ? Nĩ na kũ uuma kũruta wĩra? Kaĩ mũndũ ũcio wendire gũgwĩka wega, arogĩa na kĩrathimo kĩa Ngai-ĩ! Nake Ruthu agĩkĩmenyithia nyaciarawe mwene mũgũnda ũcio aarutĩte wĩra, akiuga atĩrĩ, Mwene mũgũnda ũcio ngũrutaga wĩra ũmũthĩ-rĩ, etagwo Boazu.
• 20. Nake Naomi akĩarĩria mũka wa mũriũ akiuga atĩrĩ, Mũndũ ũcio arorathianwo nĩ Jehova, o ũrĩa ũtatigaga gwĩka andũ arĩa me muoyo maũndũ ma ũtugi, o na arĩa maanakua! Ningĩ Naomi akĩĩra Ruthu atĩrĩ, Mũndũ ũcio nĩ wa nyũmba iitũ, na nĩ ũmwe wa arĩa mangĩtũthambia.
• 21. Nake Ruthu ũcio Mũmoabi agĩkiuga atĩrĩ, Ningĩ anjĩrire ũũ: Rũmanĩrĩra mũno na aanake aya akwa a wĩra o nginya hĩndĩ ĩrĩa makanina magetha makwa mothe.
• 22. Nake Naomi agĩkĩĩra Ruthu, mũka wa mũriũ, atĩrĩ, Nĩ wega, mwarĩ wakwa, mũtwaranage na ndungata icio cia airĩtu cia mũndũ ũcio, na itikanagũkore mũgũnda ũngĩ o na atĩa.
• 23. Tondũ ũcio agĩkĩrũmanĩrĩra mũno na airĩtu a Boazu, agakĩhaaraga cairi o na ngano, o nginya hĩndĩ ĩrĩa magetha mayo maathirire; nake agĩtũũra na nyaciarawe.

Home