Go Back

Atiirĩrĩri Bũrũri Chapter 9

• 1. Nake Abimeleku, mũrũ wa Jerub-baali, agĩthiĩ Shekemu kũrĩ aa mamawe, akĩaria nao, o na andũ othe a mbarĩ ya nyũmba ya aa guukawe, ithe wa nyina, akĩmera atĩrĩ,
• 2. Ndamũthaitha mwarie mũkĩiguagwo nĩ andũ othe a Shekemu, mũmorie atĩrĩ, Nĩ ũndũ ũrĩkũ mũkuona wagĩrĩire? Nĩ mũthamakĩrũo nĩ ariũ othe a Jerub-baali, o andũ acio mĩrongo mũgwanja, kana nĩ mũthamakĩrũo nĩ mũndũ ũmwe thĩinĩ wao? O na ningĩ-rĩ, ririkanai atĩ niĩ na inyuĩ tũrĩ a mũthimo ũmwe, o na a mwĩrĩ ũmwe.
• 3. Nao aa mamawe makĩmwarĩrĩria harĩ andũ othe a Shekemu na ciugo icio ciothe, nacio ngoro ciao ikĩenda kũrũmĩrĩra Abimeleku, nĩ gũkorũo moigire atĩrĩ, Tũrĩ amwe nake.
• 4. Nao magĩkĩmũhe mbia mĩrongo mũgwanja irutĩtwo nyũmba ya Baali-berithu, nake Abimeleku agĩcioya, agĩcoka akĩandĩka andũ amwe matarĩ kĩene, mĩũkũ, akĩmahe mbia icio nĩguo matuĩke a thiritũ yake, nao magĩkĩmũrũmĩrĩra.
• 5. Nake agĩgĩthiĩ gwa ithe mũciĩ o kũu Ofira, agĩkĩũragithia ariũ a Jerub-baali, acio maarĩ a ithe ũmwe nake, andũ mĩrongo mũgwanja, nake agĩkĩmoragithĩria o ihiga-inĩ rĩmwe; no rĩrĩ, Jothamu, mũrũ wa Jerub-baali ũrĩa warĩ wa kĩhinga-nda-rĩ, nĩaahonokire; nĩ ũndũ nĩehithire.
• 6. Nao andũ othe a Shekemu magĩkĩũngana, o na nyũmba yothe ya Milo, magĩgĩthiĩ magĩtua Abimeleku mũthamaki me mũgandi-inĩ ũrĩa wĩ gĩtugĩ-inĩ kĩrĩa kĩrĩ Shekemu.
• 7. Na rĩrĩa andũ maaheire Jothamu ũhoro ũcio, agĩgĩthiĩ akĩrũgama o igũrũ gacũmbĩrĩ ga kĩrĩma kĩa Gerizimu agĩkĩanĩrĩra na mũgambo mũnene, agĩĩtana, akiuga atĩrĩ, Ta ’thikĩrĩriai inyuĩ andũ a Shekemu, nĩ getha o nake Ngai amũigue.
• 8. Kwĩ hĩndĩ mĩtĩ yoimagarire ĩgaitĩrĩrie ũmwe wayo maguta ũtuĩke mũthamaki wayo; nayo ĩgĩkĩĩra mũtamaiyũ atĩrĩ, Ũka ũtũthamakĩre.
• 9. No mũtamaiyũ ũkĩmĩĩra atĩrĩ, Hĩ! Ndigane na ũnoru wakwa ũrĩa ũtũmaga Ngai o na andũ matĩwo, ngariũnge ũũ na ũũ igũrũ rĩa mĩtĩ ĩrĩa ĩngĩ yothe?
• 10. Ningĩ mĩtĩ ĩgĩkĩĩra mũkũyũ atĩrĩ, Gĩũke arĩ wee ũtũthamakĩre.
• 11. No mũkũyũ ũkĩmĩĩra atĩrĩ, Hĩ! Ndigane na mũrĩo wakwa o na ngũyũ iria njega mũno ciakwa, ngariũnge ũũ na ũũ igũrũ rĩa mĩtĩ ĩrĩa ĩngĩ yothe?
• 12. Ningĩ mĩtĩ ĩgĩkĩĩra mũthabibu atĩrĩ, Gĩũke arĩ wee, ũtũthamakĩre.
• 13. Naguo mũthabibu ũkĩmĩĩra atĩrĩ, Hĩ! Ndigane na ndibei yakwa, ĩrĩa ĩkenagia Ngai o na andũ, ngariũnge ũũ na ũũ igũrũ rĩa mĩtĩ ĩrĩa ĩngĩ yothe?
• 14. Hĩndĩ ĩo mĩtĩ yothe ĩgĩkĩĩra mũtare wa gĩthaka-inĩ atĩrĩ, Ũka ũtũthamakĩre.
• 15. Naguo mũtare ũcio wa gĩthaka-inĩ ũgĩkĩĩra ĩo ĩngĩ atĩrĩ, Kũngĩkorũo ti-itherũ nĩmũkũnjitĩrĩria maguta nduĩke mũthamaki wanyu, ndĩmũthamakagĩre-rĩ, gĩũkei kũrĩ niĩ mũtũũre mwĩhokete kĩĩruru gĩakwa; na kũngĩkorũo ti ũguo, mwaki ũrokiuma mũtare-inĩ ũyũ wa gĩthaka ũcine mĩtarakwa ya Lebanoni, ũmĩnine biũ.
• 16. Jothamu agĩcoka akĩmera atĩrĩ, Undũ ũcio mwĩkĩte wa gũtua Abimeleku mũthamaki wanyu ũngĩkorũo wĩ kĩhooto, na ũtuĩke nĩwerekereire, na mũkorũo nĩmwĩkĩte Jerub-baali na nyũmba yake maũndũ mega, o marĩa aagĩrĩirũo nĩ gwĩkwo, nĩ ũndũ wa ũrĩa ekire we mwene-rĩ, gĩkenagĩrei Abimeleku ũcio;
• 17. (amu-rĩ, ririkanai atĩ baba nĩaamũhũranĩire, na agĩĩtwarĩrĩra ũgwati-inĩ wa gĩkuũ, o na akĩmũruta moko-inĩ ma Midiani;
• 18. na rĩu ũmũthĩ mũkĩarahũkĩte mũũkĩrĩre nyũmba ya baba, na mũkoragĩra ariũ ake mĩrongo mũgwanja o ihiga-inĩ rĩmwe, na mũgagĩtua Abimeleku, mũrũ wa ndungata yake ya mũndũ-wa-nja, mũthamaki, athamakagĩre andũ a Shekemu, nĩ ũndũ atĩ mũrĩ amwe nake;)
• 19. ngũkiuga atĩrĩ, Ũndũ ũcio mwĩkĩte Jerub-baali na nyũmba yake ũmũthĩ ũngĩkorũo nĩ wa ma, o na ũtuĩke wĩ kĩhooto-rĩ, gĩkenagĩrei Abimeleku, o nake akĩmũkenagĩre inyuĩ;
• 20. no kũngĩkorũo ti ũguo, mwaki ũrokiuma harĩ Abimeleku ũcine andũ a Shekemu, o na nyũmba ya Milo, ũmanine biũ; o na ningĩ mwaki ũrokiuma harĩ andũ a Shekemu, o na kũu nyũmba ya Milo, ũcine Abimeleku ũmũnine biũ.
• 21. Nake Jothamu akĩĩyũrĩra ateng’erete, agĩthiĩ Biri, agĩtũũra kuo, nĩ gwĩtigĩra Abimeleku mũrũ wa ithe.
• 22. Na rĩrĩ, Abimeleku agĩgĩtũũra mĩaka ĩtatũ e mũnene wa gwatha Isiraeli.
• 23. Nake Ngai agĩkĩrekia roho mũũru ũthũkie ngoro ya Abimeleku, o na cia andũ a Shekemu; nao andũ acio a Shekemu magĩgĩĩka Abimeleku maũndũ moru na ũhinga,
• 24. nĩ getha ũũru ũrĩa wekirũo ariũ a Jerub-baali mĩrongo mũgwanja ũcokanĩrĩre; na nĩ getha thakame yao ĩcokerere Abimeleku, mũrũ wa ithe wao, ũcio wamoragire, o na ũcokerere andũ a Shekemu, acio maamwĩkĩrire hinya wa kũũraga ariũ a ithe.
• 25. Andũ acio a Shekemu magĩkĩiga andũ o igũrũ tũcũmbĩrĩ-inĩ twa irĩma mamuoherie kuo, nao magĩtunya andũ othe arĩa maageraga njĩra ĩrĩa yarĩ hakuhĩ nao indo ciao; naguo ũndũ ũcio ũkĩĩrũo Abimeleku.
• 26. Nake Gaali wa Ebedi, marĩ na ariũ a ithe, magĩthiĩ magĩkinya Shekemu nao andũ a Shekemu makĩmwĩhoka atuĩke mũmatongoria.
• 27. Nao magĩkiumagara magĩkinya mĩgũnda yao ya mĩthabibu, makĩgetha thabibu iria ciarĩ kuo, magĩcihiha, magĩcoka magĩkĩruga iruga, na thutha wa ũguo magĩtonya nyũmba ya ngai yao, makĩrĩa na makĩnyua, na makiuga atĩ Abimeleku arogwatwo nĩ kĩrumi.
• 28. Nake Gaali wa Ebedi agĩkiuga atĩrĩ, Abimeleku nake nũ hihi, o na ithuĩ andũ a Shekemu tũrĩ a, atĩ nĩguo tũmũtungatagĩre? Githĩ tiwe mũrũ wa Jerub-baali? Ningĩ-rĩ, githĩ Zebuli tiwe mũnene ũrĩa atuĩte wa gwathana? Tungatĩrai andũ a Hamoru ithe wa Shekemu; no rĩrĩ, ũyũ tũkũmũtungatĩra nĩkĩ?
• 29. Na arĩ korũo andũ aya maagĩa moko-inĩ makwa! Tondũ kũngĩtuĩka ũguo, no mũhaka njeherie Abimeleku biũ! Naho ha ũhoro wa Abimeleku agĩkiuga atĩrĩ, Ongerera athigari aku uumagare.
• 30. Nake Zebuli, mwathi wa itũũra rĩu, aaigua ndeto cia Gaali wa Ebedi, agĩcinwo nĩ marakara.
• 31. Agĩkĩrekeria Abimeleku andũ na wara, akĩmwĩra atĩrĩ, Gaali wa Ebedi na ariũ a ithe nĩmokĩte Shekemu na atĩrĩrĩ, nĩ kũgucĩrĩria maragucĩrĩria andũ a itũũra rĩrĩ magũũkĩrĩre.
• 32. Tondũ ũcio wee mwene na andũ arĩa mwĩ nao nĩmũgokĩra ũtukũ gũtanakĩa, mũthiĩ gĩthaka-inĩ, mũkohie andũ aya mwĩ kuo;
• 33. na gũgĩkinye atĩrĩ, atĩ rũciũ rũcinĩ riũa rĩarathũka, ũgokĩra o hĩndĩ ĩo tene, ũkinye itũũra rĩrĩ ũrĩtharĩke; na atĩrĩrĩ, Gaali na andũ arĩa marĩ hamwe nake a kũhũrana nawe moka-rĩ, ũkĩmeke o ta ũrĩa ihinda rĩgakuonia mĩaramano.
• 34. Nake Abimeleku agĩgĩũkĩra, me hamwe na arĩa othe maarĩ nake, kũrĩ o ũtukũ, magĩgĩthiĩ makĩohia andũ a Shekemu marĩ mbũtũ inya.
• 35. Nake Gaali wa Ebedi akiumagara, akĩrũgama itonyero-inĩ rĩa kĩhingo gĩa itũũra rĩu nake Abimeleku na arĩa maarĩ hamwe nake magĩũkĩra, makiuma harĩa mehithĩte.
• 36. Nake Gaali rĩrĩa onire andũ acio, akĩĩra Zebuli ũũ: Atĩrĩrĩ, harĩ andũ maroka moimĩte o igũrũ tũcũmbĩrĩ-inĩ twa irĩma. Nake Zebuli akĩmwĩra atĩrĩ, Hihi nĩ ciĩruru cia irĩma ũrona ihaana ta andũ.
• 37. Ningĩ Gaali akĩaria o rĩngĩ, akiuga atĩrĩ, Ta rora wone andũ magĩikũrũka me mũkuru-inĩ gatagatĩ, na mbũtũ ĩmwe yũkĩire njĩra ya mũgandi-inĩ wa Meonenimu.
• 38. Hĩndĩ ĩo Zebuli agĩkĩmwĩra atĩrĩ, Rĩu-rĩ, kaĩ wee, mũndũ wa kanua ka mwĩgatho, ũkĩrĩ ha, o wee woigire nake ũũ: Abimeleku nake nũ, atĩ nĩguo tũmũtungatagĩre? Githĩ andũ arĩa wamenire tio aya? Rĩu ndũkiumagare ũkahũrane nao!
• 39. Nake Gaali agĩkiumagara atongoretie andũ a Shekemu, akĩhũrana na Abimeleku.
• 40. Nake Abimeleku agĩkĩmũteng’eria, o nake Gaali akĩmũũrĩra, na andũ aingĩ mũno makĩgũa thĩ matihangĩtio o nginya itonyero-inĩ rĩa kĩhingo.
• 41. Abimeleku agĩgĩtũũra Aruma; nake Zebuli akĩingata Gaali na ariũ a ithe matigatũũre Shekemu.
• 42. Na gũgĩkinya atĩrĩ, atĩ rũciũ rũrũ rũngĩ andũ makĩroka kuumagara mathiĩ mĩgũnda, nake Abimeleku akĩheo ũhoro ũcio.
• 43. Nake agĩkĩoya andũ, akĩmagayũkania mbũtũ ithatũ, akĩohia andũ a Shekemu o kũu mĩgũnda-inĩ; nake aacũthĩrĩria, akĩona andũ makiumagara moimĩte itũũra-inĩ, agĩgĩũkĩra akĩmahũra mũno.
• 44. Abimeleku, me na mbũtũ ĩo yarĩ hamwe nake, magĩkĩguthũka marorete na mbere, makĩrũgama itonyero-inĩ rĩa kĩhingo gĩa itũũra; nacio mbũtũ icio ingĩ cierĩ ikĩguthũkĩra arĩa othe maarĩ mĩgũnda, ikĩmahũra.
• 45. Nake Abimeleku agĩkĩhũrana na itũũra rĩu mũthenya ũcio wothe; akĩrĩtunyana, agĩcoka akĩũraga andũ arĩa maarĩ kuo thĩinĩ, akĩrĩtharia biũ, agĩcoka akĩrĩita cumbĩ.
• 46. Na rĩrĩ, hĩndĩ ĩrĩa andũ othe a mũthiringo-inĩ ũrĩa wa nyũmba ndaya wa kũu Shekemu, maaiguire ũrĩa gwĩkĩtwo, magĩtonya handũ harĩa haakĩtwo na hinya nyũmba-inĩ ya Eli-berithu, ngai yao.
• 47. Nake Abimeleku akĩĩrũo atĩ andũ a mũthiringo ũcio wa kũu Shekemu nĩmacokanĩrĩire othe hamwe.
• 48. Abimeleku agĩkĩambata, agĩthiĩ kĩrĩma-inĩ gĩa Zalimuna we mwene, o na andũ othe arĩa maarĩ hamwe nake, agĩkĩnyita ithanwa, agĩtinia rũhonge kũu mĩtĩ-inĩ, akĩruoya na igũrũ, akĩrũigĩrĩra kĩande gĩake; agĩgĩcoka akĩĩra andũ acio maarĩ hamwe nake atĩrĩ, O ta ũguo mwanyona ngĩĩka-rĩ, ĩkai o taguo narua.
• 49. O nao andũ acio othe magĩgĩĩka o ta ũguo, o mũndũ agĩtinia rũhonge rũake, makĩrũmĩrĩra Abimeleku, magĩgĩthiĩ magĩciiga nyũmba-inĩ ĩo yaakĩtwo na hinya, ningĩ nyũmba ĩo makĩmĩikia mwaki andũ acio me kuo thĩinĩ, o nginya andũ acio othe a mũthiringo-inĩ ũcio wa kũu Shekemu magĩkua, nao maarĩ ta andũ ngiri ĩmwe, arũme na aka.
• 50. Ningĩ Abimeleku agĩthiĩ Thebezu, akĩamba hema ciake nĩguo ahũrane na itũũra rĩu rĩa Thebezu, nake agĩkĩrĩtunyana.
• 51. No rĩrĩ, itũũra-inĩ rĩu kwarĩ kĩmũthiringo kĩa nyũmba ndaya gĩaakĩtwo na hinya mũno, na nĩkĩo kĩonganĩirũo nĩ andũ othe, arũme na aka, o na andũ othe a itũũra rĩu, nao magĩkĩĩhingĩra kuo thĩinĩ, na makĩhaica o igũrũ rĩakĩo.
• 52. Nake Abimeleku agĩthiĩ agĩkinya kĩmũthiringo-inĩ kĩu, agĩitĩka kũhũrana na ene kĩo, agĩgĩthengerera mũrango-inĩ wakĩo, nĩguo agĩcine na mwaki.
• 53. Na rĩrĩ, mũndũ-wa-nja ũmwe warĩ kuo agĩgĩikĩria Abimeleku thĩo, akĩmũhehenja kĩongo.
• 54. Nake agĩgĩĩta mwanake ũrĩa wamũkuuagĩra indo ciake cia ita na ihenya, akĩmwĩra atĩrĩ, Comora rũhiũ rũaku ũnjũrage, nĩ getha andũ matikanoige atĩrĩ, Ũcio oragirũo nĩ mũndũ-wa-nja! Nake mwanake ũcio agĩkĩmũtheca akĩmũtũrĩkania, agĩkua.
• 55. Na rĩrĩ, hĩndĩ ĩrĩa andũ a Isiraeli monire atĩ Abimeleku e gũkua, makĩharagania makĩinũka o mũndũ gwake.
• 56. Ũguo nĩguo Ngai aacokereirie Abimeleku waganu ũrĩa ekĩte ithe, nĩ ũndũ wa ũrĩa oragithirie ariũ acio a ithe mĩrongo mũgwanja;
• 57. o naguo waganu wothe wa andũ a Shekemu Ngai akĩmacokereria o ene; magĩgĩcokererũo nĩ kĩrumi kĩrĩa kĩarumanirũo nĩ Jothamu wa Jerub-baali.

Home