Go Back

Atiirĩrĩri Bũrũri Chapter 8

1. Nao andũ a Efiraimu makĩmwĩra atĩrĩ, Nĩ kĩ gĩatũmire ũtwĩke ũguo, ũkĩrega gũtwĩta hĩndĩ ĩrĩa wathiire kũhũrana na Midiani? Nao magĩgĩtetania nake mũno.
2. Nowe akĩmera atĩrĩ, Kaĩ ũndũ ũrĩa niĩ njĩkĩte arĩ mũnene na njĩra ĩrĩkũ ũkĩgerekanio na ũrĩa inyuĩ mwĩkĩte? Githĩ thabibu iria ihaarĩtwo kũu Efiraimu, itikĩrĩ njega gũkĩra magetha mothe ma thabibu cia Abiezeri?
3. Ngai nĩarekereirie anene a Midiani, Orebu na Zeebu, akamaneana moko-inĩ manyu; kaĩ niĩ ndĩgĩĩkĩte ũndũ ũrĩkũ mũnene ũhĩtũkanĩte na ũrĩa inyuĩ mwĩkĩte? Na rĩrĩ, rĩrĩa oigire ũguo-rĩ, marakara mao marĩa maamũroretie makĩhũahũa.
4. Nake Gideoni agĩkinya Jorodani, akĩringa mũrĩmo, we mwene, o na andũ acio magana matatũ maarĩ hamwe nake, nao magĩkorũo morĩtwo nĩ hinya, no matiatigĩte kũrũmĩrĩra thũ ciao na ihenya.
5. Nake agĩkĩĩra andũ a Sukothu atĩrĩ, Ndamũthaitha mũhe andũ aya manyumĩte thutha irio; nĩ ũndũ nĩmorĩtwo nĩ hinya, na nĩ kũrũmĩrĩra nũmĩrĩire Zeba na Zalimuna, athamaki a Midiani, na ihenya.
6. Nao anene acio a Sukothu makiuga atĩrĩ, Anga rĩu nĩ kũnyita ũkĩnyitĩte Zeba na Zalimuna atĩ nĩkĩo ũgũtwĩra tũhe athigari aku irio?
7. Nake Gideoni agĩkiuga atĩrĩ, Tondũ wa ũguo mwoiga-rĩ, hĩndĩ ĩrĩa Jehova akarekereria Zeba na Zalimuna amaneane moko-inĩ makwa, ngahehenja mĩĩrĩ yanyu na mĩigua ya werũ-inĩ, o na mahiũ ma nyeki-inĩ.
8. Agĩkĩambata akiuma kũu, agĩthiĩ Penueli, akĩaria na andũ akuo ndeto o ro ta icio; o nao andũ a Penueli makĩmũcokeria o ta ũrĩa andũ a Sukothu maamũcokeirie.
9. Agĩkĩarĩria andũ acio a kũu Penueli, akĩmera atĩrĩ, Hĩndĩ ĩrĩa ngahũndũka ndĩ o thayũ-rĩ, mũthiringo ũyũ wanyu wa nyũmba ĩno ndaya na igũrũ nĩngaũtharia biũ.
10. Na rĩrĩ, Zeba na Zalimuna maarĩ Karikori, me na mbũtũ ciao cia ita, ta andũ ngiri ikũmi na ithano, nao acio oiki no-o maatigarĩte a mbũtũ yothe ya ciana cia mwena wa irathĩro; nĩ ũndũ haakuire andũ ngiri igana rĩmwe na mĩrongo ĩĩrĩ arĩa maamenyete kũrũa na hiũ cia njora.
11. Nake Gideoni akĩambata na njĩra ya arĩa maatũũraga hema-inĩ arorete na mwena wa irathĩro wa Noba na Jogibeha, agĩkĩhũra mbũtũ ĩo yao, akĩmĩnina biũ, hĩndĩ ĩrĩa yecirĩtie atĩ ĩĩ handũ hatarĩ ũgwati.
12. Nao Zeba na Zalimuna magĩkĩũra; nake akĩmarũmĩrĩra na ihenya, akĩnyita athamaki acio erĩ a Midiani, Zeba na Zalimuna, nayo mbũtũ yao yothe ya ita, akĩmĩagithia hinya.
13. Nake Gideoni ũcio wa Joashu agĩkĩhũndũka oimĩte rĩambatĩro-inĩ rĩa Heresi, o kũu aarũagĩra mbaara.
14. Nake agĩkĩnyita mwanake wa andũ a Sukothu, akĩmũhoya ũhoro; nake mwanake ũcio akĩmwandĩkĩra ũhoro wothe wa anene a Sukothu, o na wa athuri akuo, andũ mĩrongo mũgwanja na mũgwanja.
15. Agĩgĩkinya harĩ andũ a Sukothu, akĩmera ũũ: Atĩrĩrĩi, Zeba na Zalimuna nĩo aya, o arĩa mwa’ nyũrũrĩirie ũhoro wao rĩrĩa mwoigire atĩrĩ, Anga rĩu nĩ kũnyita ũkĩnyitĩte Zeba na Zalimuna atĩ nĩkĩo ũgũtwĩra tũhe andũ aku arĩa manogete irio?
16. Nake agĩkĩnyita athuri a itũũra rĩu, agĩcoka akĩoya mĩigua ya werũ-inĩ, o na mahiũ ma nyeki-inĩ, agĩkĩherithia andũ acio a Sukothu na mĩnyamũ ĩo.
17. Naguo mũthiringo wa nyũmba ĩo ndaya na igũrũ wa Penueli-rĩ, akĩũtharia biũ, o nao andũ a itũũra rĩu akĩmoraga.
18. Hĩndĩ ĩo akĩũria Zeba na Zalimuna atĩrĩ, Andũ arĩa mworagĩire o kũu Taboru maahaanaga atĩa? Nao magĩcokia makiuga atĩrĩ, Andũ acio maahaanaga tawe; o mũndũ wao aahaanaga o ta mũrũ wa mũthamaki.
19. Nake agĩkiuga atĩrĩ, Acio maarĩ a baba, na twarĩ a nyina ũmwe nao; hĩ, o ta ũrĩa Jehova atũũraga muoyo-rĩ, korũo nĩmwamahonokirie mũkĩmatiga muoyo, ndingĩamũũraga.
20. Agĩgĩcoka akĩĩra Jetheri, mũrũwe wa irigithathi, atĩrĩ, Ũkĩra ũmorage. No rĩrĩ, mwanake ũcio ndaigana gũcomora rũhiũ rũake nĩ ũndũ nĩetigagĩra, nĩ gũkorũo aarĩ mwanake o ro ũguo ũtarĩ mũkũrũ.
21. Hĩndĩ ĩo Zeba na Zalimuna makĩmwĩra atĩrĩ, Ũkĩra, ũtũũrage arĩ we; nĩ ũndũ o ta ũrĩa mũndũ akoragwo atariĩ, ũguo noguo hinya wake naguo ũtariĩ. Nake Gideoni agĩũkĩra akĩũraga Zeba na Zalimuna, agĩcoka akĩruta mĩnyamũ ĩĩhacĩte ta mweri, ĩrĩa yarĩ ngingo cia ngamĩra ciao ya gũcigemia, agĩthiĩ nayo.
22. Hĩndĩ ĩo andũ a Isiraeli magĩkĩĩra Gideoni, atĩrĩ, Tũthamakĩre, o na mũrũguo agatũthamakĩra, o na mũrũ wa mũrũguo o nake; nĩ gũkorũo nĩũtũhonoketie ũgatũruta moko-inĩ ma Midiani.
23. Nake Gideoni agĩkĩmera atĩrĩ, Ndikũmũthamakĩra niĩ, o na kana mũrũ wakwa amũthamakĩre; Jehova nowe ũrĩmũthamakagĩra.
24. Nake Gideoni agĩcoka akĩmera atĩrĩ, Nĩharĩ ũndũ ngwenda kũmũhoya, naguo nĩ ũyũ, atĩ o mũndũ wanyu a’he icũhĩ cia matũ iria aatahire. (Nĩ ũndũ thũ ciao ciarĩ na icũhĩ cia matũ cia thahabu, nĩ gũkorũo ciarĩ Aishumaeli.)
25. Nao magĩcokia atĩrĩ, Nĩtũgũcineana tũtekũrega o na hanini. Nao magĩkĩara nguo thĩ, na andũ othe, mũndũ o mũndũ wao, agĩikia ho icũhĩ ciake cia matũ iria aatahĩte.
26. Nacio icũhĩ icio cia matũ cia thahabu iria etirie ciarĩ cia cekeri ngiri ĩmwe na magana mũgwanja cia thahabu igĩthimwo, thengia mĩnyamũ ĩrĩa ĩĩhacĩte ta mweri, o na mathaga macunjurĩtio, hamwe na nguo cia rangi wa zambarau iria athamaki a Midiani maakorirũo mekĩrĩte, o na thengia mĩnyororo ĩrĩa yarĩ ngingo cia ngamĩra ciao.
27. Nake Gideoni agĩthondeka ebodi, akĩmĩiga itũũra-inĩ rĩake, narĩo nĩrĩo Ofira; nao Aisiraeli makĩĩrirĩria mũno kũmĩrũmĩrĩra, nayo ĩkĩya kũhenereria Gideoni, o na nyũmba yake, maagane.
28. Ũguo nĩguo Amidiani maahootirũo nĩ ciana cia Isiraeli, nao matiigana gũcoka kũhota kwambararia kĩongo o na rĩ. Naguo bũrũri ũcio ũkĩhorera ũkĩgĩa thayũ ihinda rĩa mĩaka mĩrongo ĩna, matukũ marĩa Gideoni aarĩ ho.
29. Nake Jerub-baali wa Joashu agĩgĩthiĩ agĩtũũra gwake mũciĩ.
30. Nake Gideoni agĩkorũo arĩ na ariũ ake andũ mĩrongo mũgwanja arĩa moimĩte mũthimo wake we mwene; nĩ ũndũ aarĩ na aka aingĩ.
31. O nayo thuriya ĩrĩa aaigĩte Shekemu nĩyamũciarĩire kĩhĩĩ, agagĩtua Abimeleku.
32. Gideoni ũcio wa Joashu agĩgĩkua e mũkũrũ mũno, agĩthikwo mbĩrĩra-inĩ ya ithe Joashu, o kũu Ofira itũũra rĩa Aabiezeri.
33. Na gũgĩkinya atĩrĩ, atĩ o rĩmwe Gideoni aarĩkia gũkua, ciana cia Isiraeli igĩcoka kwĩrirĩria mũno kũrũmĩrĩra Mabaali, igĩgĩtua Baali-berithu ngai yacio.
34. Nacio ciana cia Isiraeli ikĩaga kũririkana Jehova Ngai wacio, o we ũrĩa wacihonokirie agĩciruta moko-inĩ ina thũ ciacio iria ciarĩ na ndwere-inĩ ciacio ciothe;
35. o na itiekire nyũmba ya Jerub-baali, nake nĩwe Gideoni, maũndũ mega, ta ũrĩa ciaagĩrĩirũo nĩ kũmĩĩka nĩ ũndũ wa wega wothe ũrĩa we mwene ekĩte Isiraeli.

Home