Go Back

Atiirĩrĩri Bũrũri Chapter 5

• 1. Na rĩrĩ, mũthenya o ro ũcio Debora na Baraka wa Abinoamu makĩina rũĩmbo rũrũ:
• 2. Atĩrĩrĩ, gathai Jehova, Nĩ ũndũ thĩinĩ wa Aisiraeli, atongoria ao nĩmaaitĩkire gũtongoria andũ, O na andũ o ene magĩitĩka gwĩtwara na kwĩendera na ngoro ciao.
• 3. Atĩrĩrĩ, inyuĩ athamaki aya, ta thikĩrĩriai, o na inyuĩ anene aya-rĩ, ta tegai gũtũ; Niĩ-rĩ, nĩ kũina ngũinĩra Jehova, Ngũina, ngathe Jehova, ũcio Ngai wa Isiraeli.
• 4. Wee Jehova, hĩndĩ ĩrĩa woimagarire ũkiuma Seiru, O na hĩndĩ ĩrĩa wathecire njĩra ũkiuma werũ wa Edomu-rĩ, Thĩ nĩ gũthingitha yathingithire, o narĩo igũrũ rĩkiura, Ti-itherũ, matu o namo nĩ gũita maaitire maĩ thĩ.
• 5. Irĩma nacio ikĩinaina nĩ kuona Jehova; Ti-itherũ, kĩrĩma gĩa Sinai nĩkĩainainire nĩ kuona Jehova, Ngai wa Isiraeli.
• 6. Atĩrĩrĩ, ihinda rĩa Shamigari wa Anathu, O na ihinda rĩa Jaeli-rĩ, njĩra cia gĩtwari nĩciaagĩte andũ a gũcigera, Nao agendi makageraga tũcĩra twa mĩkĩra.
• 7. Tũtũũra tũkĩaga andũ o kũu Isiraeli, tũkĩaga andũ biũ, O nginya hĩndĩ ĩrĩa niĩ, Debora, ndaarahũkire, Ngĩkĩarahũka, ngĩtuĩka nyina wa Isiraeli.
• 8. Andũ nĩ gũthura methurĩire ngai cia mũũkano, Nayo ita ĩgĩkĩmaikarĩrĩra o ihingo-inĩ. Atĩrĩrĩ, thĩinĩ wa andũ ngiri mĩrongo ĩna a Isiraeli-rĩ, Anga nĩkwarĩ ngo o na ĩmwe, kana itimũ, cionekaga kũrĩ o?
• 9. Niĩ njikaraga ndĩĩte aathani a Isiraeli, O acio metwarire thĩinĩ wa andũ monganĩte, na ũndũ wa kwĩendera na ngoro ciao. Kĩgathei Jehova.
• 10. Atĩrĩrĩ, inyuĩ mũhaicĩte ndigiri njerũ, hunjanĩriai ũhoro wa maũndũ macio, O inyuĩ mũikarĩire mĩgeka ĩrĩ riri, O na inyuĩ mũrathiĩ na njĩra.
• 11. Na rĩrĩ, kũu kũraya na inegene rĩa arĩa maikagia mĩguĩ, o kũu gũtahagwo maĩ-rĩ, Nĩkuo andũ makaheanĩra ũhoro wa ciĩko cia Jehova, Ciĩko ciake cia kĩhooto iria ekaga Isiraeli agĩathana kuo. Hĩndĩ ĩo andũ a Jehova magĩgĩikũrũka ihingo-inĩ.
• 12. Atĩrĩrĩ, wee Debora, ũkĩra, ĩ ndũgiũkire! Ũkĩra, ũkĩra wanĩrĩre rũĩmbo, O nawe Baraka wa Abinoamu-rĩ, kĩarahũke ũgetahĩre itaha rĩaku.
• 13. Gũgĩgĩikũrũka matigari ma anene, o na ma andũ arĩa angĩ; O nake Jehova agĩgĩikũrũka ahũrane na andũ njamba.
• 14. Na rĩrĩ, arĩa mehandĩte kwa Amaleki magĩgĩikũrũka moimĩte Efiraimu, Magĩkuuma thutha, wee Benjamini, mwĩ hamwe na andũ aku. Ningĩ aathani magĩikũrũka moimĩte kwa Makiru, O nakuo gwa Zebuluni gũgĩkiuma arĩa manyitaga thanju cia anene a ita.
• 15. O nao anene a Isakaru magĩkorũo me hamwe na Debora, Na rĩrĩ, o ta ũrĩa ũhoro wa Isakaru watariĩ-rĩ, ũguo noguo wa Baraka watariĩ; Magĩgĩikũrũka kĩanda na ihenya mamũrũmĩte nyarĩrĩ; Kũu tũrũũĩ-inĩ twa Reubeni-rĩ, Gũgĩkĩgĩa cira mũnene ngoro-inĩ cia andũ.
• 16. Wee-rĩ, nĩ kĩ gĩtũmire ũtinde ũikarĩte ciugũ-inĩ cia mbũri, Ũgĩthikĩrĩria mĩrũri ĩrĩa yugagĩrũo ndũru cia ũhiũ? Ĩĩ ti-itherũ, o kũu tũrũũĩ-inĩ twa Reubeni Nĩkũgĩire ituĩria inene ngoro-inĩ cia andũ.
• 17. Gileadi aikarire o ro kũu mũrĩmo ũcio ũngĩ wa Jorodani; O nake Dani-rĩ, nĩ kĩ gĩtũmire atinde o marikabu-inĩ? Nake Asheri aikarire o ro ũguo hũgũrũrũ-inĩ cia iria, Agaikara o tũcongoco-inĩ twake twa maĩ.
• 18. Azebuluni nĩo andũ arĩa metwarĩrĩire ũgwati-inĩ wa gĩkuũ, O nake Nafitali agĩĩtwara kũrĩa gũtũũgĩru werũ-inĩ.
• 19. Nao athamaki magĩgĩũka kũhũrana, Athamaki a Kanaani nĩo maahũranire mbaara O kũu Taanaka, gũkuhĩ na maĩ ma Megido, No rĩrĩ, matiigana kuona uumithio wa betha o na ũrĩkũ.
• 20. O kũu igũrũ-rĩ, kwarĩ mbaara yahũranagwo nao, Tondũ njata, ng’endo-inĩ ciacio, nĩciahũranire mbaara na Sisera,
• 21. Naruo rũũĩ rũa Kishoni rũkĩmatwara na kĩguũ, O rũũĩ rũu rũa tene rũĩtagwo Kishoni. Atĩrĩrĩ, wee ngoro yakwa, wĩtware na hinya!
• 22. Hĩndĩ ĩo mahũngũ ma mbarathi makĩrumĩa thĩ Nĩ ũndũ wa ũrĩa kwarũgarũgirũo o kũrũgarũgwo nĩ mbarathi ciao irĩ hinya.
• 23. Atĩrĩrĩ, itũũra rĩa Merozu rĩrogwatwo nĩ kĩrumi; ũguo nĩguo mũraika wa Jehova oiga; O nao arĩa marĩtũũraga-rĩ, marogwatwo nĩ kĩrumi kĩrĩa kĩũru, Nĩ gũkorũo matinoka gũteithia Jehova, O gũteithia Jehova akĩhũrana na andũ arĩa marĩ hinya.
• 24. Gũkena-rĩ, nĩ Jaeli, agakĩra andũ-a-nja arĩa angĩ othe, O we mũtumia ũcio wa Heberi ũrĩa Mũkeni; Ti-itherũ, nĩagakena gũkĩra andũ-a-nja arĩa angĩ arĩa matũũraga hema-inĩ.
• 25. Sisera nĩ maĩ aamũhoire, nake akĩmũhe iria; Agĩkĩmũrehere ngorono na mbakũri ĩrĩ riri mũno.
• 26. Agĩcoka agĩtambũrũkia guoko, akĩnyita higĩ, Agĩkĩnyita nyondo ya bundi na guoko kwa ũrĩo, Akĩgũthĩra Sisera na nyondo ĩo, akĩmũgũthĩra mũtwe ĩkiumĩrana; Ĩĩ, ti-itherũ nĩaamũgũthire akĩmũtheca thikĩrĩrio, ĩkiumĩrana.
• 27. Nake agĩkĩinamĩrĩra o hau magũrũ-inĩ make, akĩgũa thĩ, agĩkoma o ho, Ti-itherũ, nĩ kũinamĩrĩra aainamĩrĩire o kũu magũrũ-inĩ make, akĩgũa thĩ; O ro hau aainamĩrĩire-rĩ, noho aagũire thĩ e mũkuũ biũ.
• 28. Nyina wa Sisera agĩgĩcũthĩrĩria na ndirica, Akĩanĩrĩra arĩ gatirica-inĩ kau akiuga atĩrĩ, Hĩ, nĩ kĩ hihi gĩtũmĩte ngari yake ya ita ĩikare ũguo ĩtokĩte? Magũrũ ma ngari ciake-rĩ, nĩ kĩ hihi gĩtũmĩte matinde hĩndĩ ndaya ũguo?
• 29. Nao atumia ogĩ arĩa maarĩ hamwe nake makĩmũcokeria atĩrĩ, O nake, we mwene agĩgĩĩcokeria na ngoro yake atĩrĩ,
• 30. Anga ti kuona monete indo cia gũtahwo, na nĩ kũgayana maracigayana? Hihi, mũndũ o mũndũ wao nĩonete mũirĩtu ũmwe, kana erĩ; Sisera, we mwene-rĩ, hihi ndakĩgwatĩte itaha rĩa nguo cia rangi wa mĩthemba mĩingĩ? O itaha rĩa nguo cia rangi wa mĩthemba mĩingĩ itirihĩtwo wega, Nacio nguo icio cia rangi wa mĩthemba mĩingĩ itirihĩtwo mbarĩ cierĩ-rĩ, anga itirutĩtwo ngingo cia arĩa matahĩtwo maciĩhumbĩte?
• 31. Thũ ciaku ciothe irokua o ta ũguo, Jehova! No rĩrĩ, andũ arĩa mamwendete-rĩ, maroikara o ta riũa hĩndĩ ĩrĩa rĩkwara na hinya warĩo wothe. Naguo bũrũri ũcio ũgĩkĩgĩa na thayũ ũkĩhorera ihinda rĩa mĩaka mĩrongo ĩna.

Home