Go Back

Atiirĩrĩri Bũrũri Chapter 3

• 1. Na rĩrĩ, ici nĩcio ndũrĩrĩ iria Jehova aatigire kuo, nĩguo ageragie Aisiraeli nacio, o acio mataamenyete ũhoro wothe wa mbaara iria cia Kanaani,
• 2. naguo ũndũ ũcio wekirũo ũguo, mũno, nĩ ũndũ wa njiaro icio cia Isiraeli kĩũmbe, iria ciakorirũo itoĩ o na hanini ũhoro wa kũrũa mbaara, nĩ getha irutwo ũhoro waguo;
• 3. nacio ndũrĩrĩ icio nĩcio ici, nĩ aathani arĩa atano a Afilisiti, o na Akanaani othe, o na Azidoni, o na Ahivi arĩa maatũũraga kĩrĩma kĩa Lebanoni, kuuma kĩrĩma kĩa Baali-herimoni o nginya itonyero-inĩ rĩa Hamathu.
• 4. Nao acio maatigĩtwo nĩ ũndũ wa kũgeria Isiraeli, nĩ getha kũmenyũo kana nĩmarĩiguaga maathani ma Jehova, marĩa aathire maithe mao na kanua ka Musa.
• 5. Nacio ciana cia Isiraeli igĩgĩtũũrania na Akanaani, na Ahiti, na Aamori, na Aperizi, na Ahivi, o na Ajebusi;
• 6. nacio igĩgĩtwara airĩtu ao, matuĩke aka a cio, o nao airĩtu a cio cio nyene ikĩmanengera ariũ a andũ acio, nacio ciana cia Isiraeli igĩgĩtungatĩra ngai ciao.
• 7. Ciana cia Isiraeli igĩgĩĩka maũndũ marĩa monagwo me moru nĩ Jehova, ikĩriganĩrũo nĩ Jehora Ngai wacio, igĩtungatĩra Mabaali na Maasherothu.
• 8. Na tondũ ũcio Jehova agĩgĩcinwo nĩ marakara nĩ ũndũ wa Aisiraeli, nake akĩmendia moko-inĩ ma Kushani-rishathaimu, mũthamaki wa Mesopotamia; nacio ciana icio cia Isiraeli igĩgĩtungatĩra Kushani-rishathaimu mĩaka ĩnana.
• 9. Na rĩrĩ, hĩndĩ ĩrĩa ciana cia Isiraeli ciakaĩire Jehova, Jehova agĩciarahũrĩra mũhonokia ũrĩa wacihonokirie; nake nĩ Othinieli, mũrũ wa mũrũ wa ithe na Kalebu ũrĩa mũnyinyi wetagwo Kenazu.
• 10. Naguo roho wa Jehova ũgĩkĩmũkora ũkĩgĩa nake, agĩtiirĩrĩra Isiraeli; agĩgĩthiĩ ita, nake Jehova akĩrekereria Kushani-rishathaimu, mũthamaki wa Mesopotamia, akĩmũneana moko-inĩ make; nake agĩkĩhoota Kushani-rishathaimu.
• 11. Naguo bũrũri ũcio ũgĩkĩhorera ihinda rĩa mĩaka mĩrongo ĩna. Nake Othinieli, mũrũ wa Kenazu, agĩgĩkua.
• 12. Ningĩ ciana cia Isiraeli igĩĩka maũndũ marĩa monagwo marĩ moru nĩ Jehova; nake Jehova agĩĩkĩra Egiloni mũthamaki wa Moabi hinya, okĩrĩre ciana cia Isiraeli, nĩ ũndũ nĩciekĩte maũndũ marĩa monagwo marĩ moru nĩ Jehova.
• 13. Nake agĩkĩũnganithia ciana cia Amoni na cia Aanaleki ithiĩ harĩ we, igĩgĩthiĩ ikĩhũra Isiraeli, igĩtunyana itũũra rĩa mĩkĩndũ.
• 14. Nacio ciana cia Isiraeli igĩgĩtungatĩra Egiloni, mũthamaki wa Moabi, mĩaka ikũmi na ĩnana.
• 15. No hĩndĩ ĩrĩa ciana cia Isiraeli ciakaĩire Jehova, agĩciarahũrĩra mũhonokia, nake nĩ Ehudu mũrũ wa Gera, Mũbenjamini, mũndũ warĩ wa kĩmotho; nacio ciana cia Isiraeli igĩtwarithĩria Egiloni mũthamaki wa Moabi igoti na Ehudu ũcio.
• 16. Ningĩ Ehudu ũcio agĩkorũo nĩeturithĩirie rũhiũ rũa njora rũũgĩ mbarĩ cierĩ, na rũarĩ rũa mũkono ũmwe kũraiha; nake akĩrũĩyoha njohero mwena wa ũrĩo, nguo-inĩ thĩinĩ.
• 17. Nake agĩgĩtwarĩra Egiloni mũthamaki ũcio wa Moabi igoti rĩu; nake Egiloni ũcio aarĩ mũndũ mũnoru mũno.
• 18. Na rĩrĩ, aarĩkia kũmũtwarĩra igoti rĩu-rĩ, akĩĩra andũ arĩa maarĩkuuĩte methiĩre.
• 19. No rĩrĩ, we mwene akĩhũndũka oimĩte mĩhianano-inĩ ĩrĩa yarĩ hakuhĩ na Giligali, akiuga ũũ: Atĩrĩrĩ, mũthamaki ũyũ, ndĩ na ũhoro wa ndundu ngwenda gũkwĩra. Nake mũthamaki akiuga atĩrĩ, Ta kĩambe ũkire. Nao andũ othe arĩa maarũgamĩte hakuhĩ nake magĩkiuma hau aarĩ, makĩmweherera.
• 20. Nake Ehudu agĩthiĩ harĩ we; nake agĩkorũo aikarĩte thĩ arĩ o wiki nyũmba ya igũrũ ĩrĩa aaikaraga hĩndĩ ya riũa. Nake Ehudu akiuga ũũ: Atĩrĩrĩ, ndĩ na ũhoro ngũkũhe uumĩte kwĩ Ngai. Nake Egiloni agĩgĩũkĩra gĩtĩ-inĩ kĩrĩa aaikarĩire.
• 21. Hĩndĩ ĩo Ehudu agĩgĩtambũrũkia guoko kwa ũmotho, agĩcomora rũhiũ rũu njohero mwena wa ũrĩo, akĩrũikia akĩmũtheca nda;
• 22. naruo rũhiũ rũu ruothe rũkĩmũtonya nda, hamwe na mũtĩ waruo; naruo rũambũ rũkĩnyitana, nĩ ũndũ ndaacomorire rũhiũ arũrute nda yake; naruo rũgĩkiumĩrana na mbarĩ ĩrĩa ĩngĩ.
• 23. Nake Ehudu agĩkiuma agĩkinya gĩthaku-inĩ, agĩcokia mĩrango ya nyũmba ĩo Egiloni aarĩ, akĩmũhingĩra.
• 24. Na rĩrĩ, aarĩkia kuuma nja, ndungata cia Egiloni igĩcoka kuo, igĩgĩkora mĩrango ya nyũmba ĩo irĩ mĩhinge; igĩkiuga atĩrĩ, Ti-itherũ hihi nĩ gwĩteithia areteithia e kanyũmba-inĩ gake ka hĩndĩ ya riũa.
• 25. Nacio igĩgĩikara cietereire o nginya ĩkĩya kũmaka; nake agĩkĩaga kũhingũra mĩrango ya nyũmba ĩo; tondũ ũcio igĩkĩoya kĩhingũri ikĩmĩhingũra; na atĩrĩrĩ, igĩkĩona mwathi wacio agũĩte thĩ arĩ mũkuũ.
• 26. Nake Ehudu agĩkorũo eyũrĩire hĩndĩ ĩo ciaikarĩte cietereire, akĩhĩtũka handũ hau haarĩ mĩhianano agĩkinya mbarĩ ĩrĩa ĩngĩ yaho, agĩkĩũrĩra Seira.
• 27. Na gũgĩkinya atĩrĩ, atĩ aakinya kuo-rĩ, agĩkĩhuhĩra coro o kũu bũrũri ũcio wĩ irĩma nyingĩ wa Efiraimu, nacio ciana cia Isiraeli igĩgĩikũrũkania nake ciumĩte bũrũri ũcio wĩ irĩma nyingĩ, igĩtongorio nĩwe.
• 28. Nake agĩciĩra atĩrĩ, Nũmĩrĩrai; nĩ gũkorũo Jehova nĩarekereirie thũ cianyu cia Amoabi, agacineana moko-inĩ manyu. Nacio igĩgĩikũrũka ikĩmũrũmĩrĩra, igĩthiĩ ikĩnyita mariũko ma Jorodani marĩa maaringĩrĩire bũrũri wa Amoabi, nacio itiigana kũreka mũndũ o na ũmwe aringe rũũĩ.
• 29. Hĩndĩ ĩo igĩkĩũraga arũme ta ngiri ikũmi a Amoabi, nao othe maarĩ andũ me hinya, na maarĩ njamba; na gũtirĩ mũndũ o na ũmwe wahonokire.
• 30. Ũguo nĩguo Amoabi maakĩhootirũo nĩ Aisiraeli mũthenya ũcio. Naguo bũrũri ũkĩgĩa thayũ ũkĩhorera ihinda rĩa mĩaka mĩrongo inana.
• 31. Ningĩ thutha wake hakĩgĩa mũndũ ũngĩ wetagwo Shamigari wa Anathu, ũrĩa woragire Afilisiti andũ magana matandatũ na mũcengi ũrĩa ũtindĩkaga ndegwa; o nake mũndũ ũcio nĩaahonokirie Isiraeli.

Home