Go Back

Atiirĩrĩri Bũrũri Chapter 20

• 1. Hĩndĩ ĩo ciana cia Isiraeli ciothe igĩkiumagara, nakĩo kĩrĩndĩ kĩu gĩkĩũngana o ta kĩrĩ mũndũ ũmwe kuuma Dani o nginya Biri-shiba, kĩĩ hamwe na andũ a bũrũri wa Gileadi, gĩgĩcemania harĩ Jehova o kũu Mizipa.
• 2. Nao anene a andũ acio othe, nao nĩo anene a mĩhĩrĩga yothe ya Isiraeli, magĩthiĩ makĩrũgama o kũu kĩrĩndĩ-inĩ kĩa andũ a Ngai, nakĩo kĩrĩndĩ kĩu gĩothe kĩarĩ andũ a ita arĩa mathiaga na magũrũ ngiri magana mana, arĩa maamenyete kũrũa na hiũ cia njora.
• 3. (Na rĩrĩ, ciana cia Benjamini ikĩigua atĩ ciana cia Isiraeli nĩciambatĩte igathiĩ Mizipa.) Nacio ciana cia Isiraeli ikĩũria atĩrĩ, Ta twĩrei kĩrĩa gĩtũmĩte ũũru ũcio woneke?
• 4. Nake Mũlawii ũcio mũrũme wa mũndũ-wa-nja ũcio woragirũo, agĩcokia akiuga atĩrĩ, Nĩ gũkinya ndakinyire Gibea, itũũra rĩa Benjamini, tũrĩ na thuriya yakwa, tũraarĩrĩre kuo.
• 5. Nao andũ a Gibea magĩũka ũtukũ kũnjũkĩrĩra, makĩrigicĩria nyũmba ĩrĩa ndarĩ, makĩmĩthiũrũrũkĩria makĩndeherere ngũĩ; nao maacirĩire kũnjũraga niĩ mwene, nayo thuriya yakwa makĩmĩgwata na hinya, nayo rĩu nĩ nguũ.
• 6. Tondũ ũcio niĩ na niĩ ngĩnyita thuriya ĩo yakwa, ngĩmĩtinangia icunjĩ, ngĩmĩtwarithia kũndũ guothe bũrũri wa Isiraeli ũrĩa maagwatire ũgĩtuĩka igai rĩao; nĩ ũndũ arũme acio a Gibea nĩmekĩte ũndũ mũnene wa waga-thoni, o na wa ũkĩgu, thĩinĩ wa Isiraeli.
• 7. Atĩrĩrĩ, inyuĩ ciana cia Isiraeli, inyuothe, rĩu twĩ haha-rĩ, ta heanai kĩrĩra, o na mũtaarane.
• 8. Nao andũ acio othe magĩũkanĩrĩra o ta marĩ mũndũ ũmwe, makiuga atĩrĩ, Gũtirĩ mũndũ o na ũmwe witũ ũkũinũka hema-inĩ yake, o na gũtirĩ mũndũ o na ũmwe witũ ũkũgarũrũka acoke gwake mũciĩ.
• 9. No rĩrĩ, ũndũ ũrĩa tũgwĩka itũũra rĩa Gibea nĩ ũyũ; nĩ kũhũra tũkũrĩhũra twambĩte gwĩcukĩra mĩtĩ;
• 10. na rĩrĩ, thĩinĩ wa mĩhĩrĩga yothe ya Isiraeli-rĩ, tũkuoya andũ ikũmi thĩinĩ wa andũ igana rĩmwe, o na thĩinĩ wa andũ ngiri tuoe igana rĩmwe, na thĩinĩ wa andũ ngiri ikũmi tuoe ngiri ĩmwe, nĩguo makagĩrĩre andũ arĩa megũthiĩ irio, nĩ getha maakinya Gibea ya Benjamini mageka maũndũ ma kwĩrĩhĩria, nĩ ũndũ wa ukĩgu ũcio wothe andũ akuo mekire thĩinĩ wa Isiraeli.
• 11. Tondũ ũcio andũ othe a Isiraeli magĩkĩũngana makahũre itũũra rĩu, nao makĩnyitana o ta marĩ mũndũ ũmwe meciria-inĩ mao.
• 12. Nayo mĩhĩrĩga ya Isiraeli ĩgĩkĩrekia andũ mathiĩ kũndũ guothe mũhĩrĩga-inĩ wa Benjamini makaũũrie atĩrĩ, Kaĩ waganu ũcio wonekete thĩinĩ wanyu ũgĩtariĩ atĩa?
• 13. Tondũ ũcio gĩtũnengerei andũ acio aaganu mũno marĩ Gibea, nĩ getha tũmorage, tweherie ũũru thĩinĩ wa Isiraeli. No rĩrĩ, Abenjamini matiigana kũigua uuge wa ciana icio ingĩ cia Isiraeli, ariũ a ithe wao.
• 14. Nacio ciana cia Benjamini igĩkĩũngana hamwe ciumĩte matũũra-inĩ ma cio, igĩkinya Gibea, nĩguo ciumagare ikahũrane mbaara na ciana cia Isiraeli.
• 15. Nacio ciana cia Benjamini iria cioimĩte matũũra-inĩ macio igĩtarũo mũthenya ũcio; igĩkorũo irĩ ngiri mĩrongo ĩĩrĩ na ithathatũ thengia andũ arĩa maatũũraga Gibea, nao acio maatarũo makĩhinga magana mũgwanja; nao othe maarĩ njamba cia ita ciamenyete kũrũa na hiũ cia njora.
• 16. Na rĩrĩ, thĩinĩ wa andũ acio othe-rĩ, kwarĩ andũ magana mũgwanja arĩa maathurĩtwo a kĩmotho; nao othe, o mũndũ nĩaahotaga gũikia mahiga na kĩgũtha, aagera wega, handũ haigana ta rũcuĩrĩ kwarama, na ndangĩhahĩtia.
• 17. Nao andũ a Isiraeli a ita arĩa maamenyete kũrũa na hiũ cia njora, thengia andũ a Benjamini, maarĩ ngiri magana mana; nao othe maarĩ njamba cia ita.
• 18. Nacio ciana cia Isiraeli igĩũkĩra, ikĩambata, igĩkinya Beth-eli, igĩkĩhoya Ngai acitaare wega, nacio igĩkĩũria ũũ: Rĩu-rĩ, nũ ũkwamba gũtata ita nĩ ũndũ witũ, tũkĩhũrana na ciana cia Benjamini? Nake Jehova akiuga atĩrĩ, Juda nĩwe ũgũcitata.
• 19. Ciana icio cia Isiraeli igĩkĩroka gũũkĩra rũcinĩ tene, igĩthiĩ ikĩamba hema ciacio ing’etheire Gibea.
• 20. Nao arũme acio a Isiraeli makiumagara mathiĩ ita makahũrane na andũ a Benjamini; Aisiraeli magĩkĩarania ita yao mahũranĩre nao o kũu Gibea.
• 21. Nacio ciana cia Benjamini ikiumagara ciumĩte Gibea, igĩkĩũraga andũ ngiri mĩrongo ĩĩrĩ na igĩrĩ a Isiraeli ikĩmanina biũ mũthenya ũcio.
• 22. Nao andũ o acio a Isiraeli magĩkĩũmĩrĩria, magĩcoka makĩarania ita yao rĩngĩ o handũ hau mearanĩtie mũthenya wa mbere.
• 23. (Nacio ciana cia Isiraeli igĩkĩambata igĩkaĩra Jehova ikĩmũrĩrĩra nginya o hwaĩ-inĩ; igĩkĩmũũria atĩrĩ, Hihi nĩtwagĩrĩirũo nĩ gũthiĩ rĩngĩ tũkuhĩhĩrie ciana cia Benjamini, ũcio mũrũ wa ithe witũ, tũkahũrane ita nacio? Nake Jehova akiuga atĩrĩ, Ĩĩ, thiĩi mũkahũrane nacio.)
• 24. Nacio ciana cia Isiraeli igĩkuhĩhĩria ciana cia Benjamini ikahũrane nacio mũthenya ũcio wa ĩĩrĩ.
• 25. O nao Abenjamini makiumagara moimĩte Gibea mũthenya o ro ũcio wa ĩĩrĩ makahũrane nacio, magĩkĩũraga andũ ngiri ikũmi na inyanya a ciana cia Isiraeli, magĩcinina biũ; nao andũ acio othe nĩ arĩa maamenyete kũrũa na hiũ cia njora.
• 26. Hĩndĩ ĩo ciana ciothe cia Isiraeli, naguo ũguo nĩ ta kuuga andũ acio othe, makĩambata magĩkinya Beth-eli, makĩrĩra, magĩgĩikara o hau mbere ya Jehova, makĩĩhinga kũrĩa irio mũthenya ũcio wothe nginya o hwaĩ-inĩ; nao makĩrutĩra Jehova indo iria irutagwo cia mahaki ma njino, o na cia magongona ma ũiguano.
• 27. Nacio ciana icio cia Isiraeli ikĩhoera Jehova ũhoro kũu, (nĩ ũndũ ithandũkũ rĩa kĩrĩkanĩro kĩa Ngai nĩkuo rĩarĩ matukũ macio,
• 28. nake Finehasi wa Eleazaru mũrũ wa Haruni, nĩwe warũgamaga harĩ rĩo matukũ macio,) nacio igĩkĩũria ũũ: Nĩtwagĩrĩirũo nĩ kuumagara tũthiĩ rĩngĩ, tũkahũrane mbaara na ciana cia Benjamini ũcio mũrũ wa ithe witũ, kana tũtige? Nake Jehova agĩkiuga atĩrĩ, Ambatai; nĩ gũkorũo rũciũ nĩngacirekereria ndĩcineane moko-inĩ manyu.
• 29. Nao Aisiraeli magĩkĩiga andũ a kuohia Gibea, nĩguo marĩhũre, nao makĩrĩrigicĩria na mĩena yothe.
• 30. Ningĩ mũthenya wa ĩtatũ ciana cia Isiraeli ikĩambata ikahũrane na ciana cia Benjamini, nacio igĩkĩĩarania wega nĩguo ihũrane na Gibea, o ta ũrĩa ciekaga mahinda macio mangĩ.
• 31. Nacio ciana cia Benjamini ikiumagara nĩguo ikahũrane na andũ acio, nacio ikĩgucĩrĩrio igĩtwarũo nĩo handũ haraya na itũũra rĩacio; nacio igĩitĩka kũhũra andũ arĩa maakorirũo njĩra-inĩ cia gĩtwari, o ta ũrĩa ciekaga mahinda macio mangĩ; nacio njĩra icio-rĩ, ĩmwe yaambatĩte ĩrorete Beth-eli, nayo ĩrĩa ingĩ yathiaga ĩrorete Gibea-rĩa-werũ-inĩ; nacio igĩkĩũraga ta andũ mĩrongo ĩtatũ a Isiraeli.
• 32. Nacio ciana icio cia Benjamini igĩkiuga atĩrĩ, Nĩtũmahũrĩte tũkamatoria biũ, o ta ũrĩa twekire rĩa mbere. No rĩrĩ, ciana icio cia Isiraeli igĩkiuga atĩrĩ, Rekei tũũre, nĩ getha tũcigucĩrĩrie ciume itũũra-inĩ ikinye njĩra-inĩ ya gĩtwari.
• 33. Nao andũ othe a Isiraeli magĩũkĩra makiuma handũ harĩa maaikarĩte, magĩthiĩ makĩĩarania wega o kũu Baali-tamaru; nao andũ a Isiraeli arĩa maaikarĩte mohetie andũ, makĩguthũka, makiuma harĩa maaikarĩte o hau Maare-geba.
• 34. Na hĩndĩ ĩo hagĩgĩthiĩ andũ ngiri ikũmi Aisiraeli marorete Gibea, nao othe maarĩ njamba iria thure thĩinĩ wao, nayo ita ĩo igĩkĩĩha o mũno mũno; no rĩrĩ, ciana icio cia Benjamini itiigana kũmenya atĩ ũũru nĩũcikuhĩhĩirie.
• 35. Nake Jehova agĩcihũrĩra mbere ya Isiraeli; naguo mũthenya ũcio ciana cia Isiraeli ikĩũraga andũ a Benjamini ngiri mĩrongo ĩĩrĩ na ithano, na igana rĩmwe; nao acio othe nĩ arĩa maamenyete kũrũa na hiũ cia njora.
• 36. Tondũ ũcio ciana cia Benjamini ikĩona atĩ ii gũtorio; nĩ ũndũ andũ acio a Isiraeli nĩmorĩire andũ acio a Benjamini nĩ ũndũ wa ũrĩa mehokete andũ arĩa maaigĩte a kuohia andũ nĩguo mahũre Gibea.
• 37. Nao andũ acio mohetie andũ magĩkĩguthũka magĩtharĩka Gibea; nao magĩthiathia na mbere, makĩhũra andũ othe arĩa maarĩ itũũra-inĩ rĩu na hiũ cia njora.
• 38. Na rĩrĩ, kĩmenyithia kĩrĩa andũ a Isiraeli maarĩkanĩire na andũ ao arĩa mohetie andũ-rĩ, nĩ atĩ matogie ndogo nene mũno ĩthiĩ na igũrũ yume itũũra rĩu.
• 39. Nao andũ a Isiraeli, acio maarĩ ita-inĩ, magĩkĩgarũrũka marorete na thutha. Nao Abenjamini magĩitĩka kũhũra andũ acio a Isiraeli, makĩũraga andũ mĩrongo ĩtatũ thĩinĩ wao, nĩ ũndũ moigire atĩrĩ, Ti-itherũ nĩtũmahũrĩte tũkamatoria biũ o ta ũrĩa twekire ita ya mbere.
• 40. No rĩrĩ, hĩndĩ ĩrĩa ndogo ĩtariĩ ta itu yaambĩrĩirie gũtoga na igũrũ yumĩte itũũra rĩao-rĩ, Abenjamini magĩkĩrora na thutha wao, na atĩrĩrĩ, makĩona ta arĩ itũũra rĩao rĩothe rĩambatĩte na igũrũ rĩgakinya o matu-inĩ rĩrĩ ndogo theri.
• 41. Andũ a Isiraeli magĩkĩgarũrũka, o nao andũ a Benjamini makĩmaka; nĩ ũndũ nĩmonire atĩ ũũru nĩũmakorire.
• 42. Tondũ ũcio magĩkĩhutatĩra andũ a Isiraeli makĩmorĩra magerete njĩra ya werũ-inĩ; no rĩrĩ, andũ arĩa maarĩ ita-inĩ ĩo nĩmaamarũmĩrĩire na ihenya mũno; nao arĩa moimaga matũũra-inĩ makĩmoragĩra hau gatagatĩ-inĩ kao.
• 43. Nao Aisiraeli magĩkĩhĩta Abenjamini mamarigicĩirie na mbarĩ ciothe, makĩmateng’eria, makĩmarangĩrĩria thĩ kũu Menuha, o nginya makĩmakinyia mũrĩmo ũrĩa wa Gibea ũrĩa ũrorete irathĩro.
• 44. Nakuo kũu gũgĩkĩgũa andũ ngiri ikũmi na inyanya a Benjamini; nao othe maarĩ njamba theri cia ita.
• 45. Nao magĩgĩcoka makĩgarũrũka, makĩũra, marorete na werũ-inĩ, magĩkinya o rũaro-inĩ rũa ihiga rĩa Rimoni; nao Aisiraeli magĩkinyĩra andũ ngiri ithano ao arĩa maakorirũo njĩra-inĩ ya gĩtwari magĩthiĩ, makĩmanyita; magĩgĩteng’eria andũ ao na hinya mũno o nginya Gidomu, makĩũraga andũ ngiri igĩrĩ thĩinĩ wao.
• 46. Tondũ ũcio andũ a Benjamini arĩa maakuire mũthenya ũcio maarĩ ngiri mĩrongo ĩĩrĩ na ithano a ita; nao othe maarĩ njamba theri cia ita.
• 47. No rĩrĩ, andũ magana matandatũ thĩinĩ wao nĩmaagarũrũkire, makĩũra marorete na werũ-inĩ, magĩkinya rũaro-inĩ rũa ihiga rũa Rimoni, nao magĩgĩikara ihiga-inĩ rĩu rĩa Rimoni mĩeri ĩna.
• 48. Ningĩ andũ a Isiraeli makĩgarũrũkĩra ciana cia Benjamini rĩngĩ, magĩcihũra na hiũ cia njora, makĩhũra itũũra rĩu rĩothe, o na ũhiũ warĩo, o na kĩrĩa gĩothe monire kuo; o na ningĩ matũũra marĩa mothe maakorire na kũu, makĩmacina na mwaki.

Home