Go Back

Atiirĩrĩri Bũrũri Chapter 19

• 1. Na gũgĩkinya atĩrĩ, atĩ matukũ-inĩ o ro macio gũtaarĩ mũthamaki kũu Isiraeli, gũgĩkorũo kwĩ Mũlawii ũmwe waikarĩte mũthia-inĩ wa bũrũri ũrĩa wĩ irĩma nyingĩ wa Efiraimu, nake nĩehikĩirie thuriya ya kũu Bethi-lehemu-juda.
• 2. Nayo thuriya ĩo ĩgĩkĩmwaganĩra nĩ kũhũra maraya, nayo ĩgĩkiuma gwake, ĩgĩĩthiĩra gwa ithe o kũu Bethi-lehemu-juda, ĩgĩikara kuo ta mĩeri ĩna.
• 3. Nake mũthuri wayo agĩũkĩra akĩmĩrũmĩrĩra, nĩ getha akamĩarĩrie na ũhoreri amĩcokie mũciĩ; agĩgĩthiĩ me na ndungata yake, o na ndigiri ciake igĩrĩ; nake mũirĩtu ũcio agĩkĩmũtonyia gwa ithe mũciĩ; nake ithe aakĩmuona, agĩkena mũno nĩ ũndũ wa kuonana nake.
• 4. Nake mũthoniwe, ithe wa mũirĩtu ũcio, akĩmũgiria athiĩ, agĩgĩikarania nake mĩthenya ĩtatũ; tondũ ũcio magĩkĩrĩa na makĩnyua, o na makĩraara kuo.
• 5. Na gũgĩkinya atĩrĩ, atĩ mũthenya wa ĩna makĩroka gũũkĩra rũcinĩ tene, nake Mũlawii ũcio akĩarahũka ethiĩre; nake ithe wa mũirĩtu ũcio agĩkĩĩra mũthoniwe atĩrĩ, Amba ũhorerie ngoro yaku wĩgagũre tũirio tũnini, na thutha wa ũguo mũcoke mwĩthiĩre.
• 6. Tondũ ũcio magĩgĩikara thĩ, makĩrĩa na makĩnyua, o erĩ marĩ hamwe; nake ithe wa mũirĩtu ũcio akĩĩra mũndũ ũcio atĩrĩ, Ndagũthaitha wĩtĩkĩre gũikara ũtukũ ũyũ wothe wĩkenie ngoro yaku.
• 7. Nake mũndũ ũcio agĩgĩũkĩra, nĩguo athiĩ; no rĩrĩ, mũthoniwe akĩmũringĩrĩria mũno araare, agĩkĩraara kuo rĩngĩ.
• 8. Ningĩ mũthenya ũyũ ũngĩ wa ĩtano akĩroka gũũkĩra rũcinĩ tene mũno ethiĩre; nake ithe wa mũirĩtu ũcio akĩmwĩra atĩrĩ, Ndagũthaitha ũhorerie ngoro yaku mũtinde gũkũ o nginya gũtukatuke; nao magĩkĩrĩa me hamwe o erĩ.
• 9. Na rĩrĩ, hĩndĩ ĩrĩa mũndũ ũcio okĩrire ethiĩre, we mwene na thuriya ĩo yake, o na ndungata yake-rĩ, mũthoniwe, ithe wa mũirĩtu ũcio, akĩmwĩra ũũ: Atĩrĩrĩ, rĩu gũkiriĩ gũtuka, ndagũthaitha ũraare gũkũ; kaĩ ũtekuona nĩ gũtuku; ikara ũraare gũkũ, nĩ getha wĩkenie ngoro yaku, na ũroke gũũkĩra rũcinĩ tene wĩthiĩre, nĩguo ũinũke gwaku mũciĩ.
• 10. No rĩrĩ, mũndũ ũcio ndetĩkĩrire kũraara kuo ũtukũ ũcio, no nĩ gũũkĩra okĩrire agĩĩthiĩra, nake agĩgĩkinya handũ hang’ethanĩire na Jebusi (na nokuo Jerusalemu); nake aarĩ na ndigiri iria ciake cierĩ ciĩkĩrĩtwo matandĩko; nao maarĩ hamwe na thuriya ĩo yake.
• 11. Na rĩrĩ, hĩndĩ ĩrĩa maakorirũo makuhĩhĩirie Jebusi, gũgĩkorũo gũkiriĩ gũtuka; nayo ndungata yake ĩgĩkĩĩra mwathi wayo atĩrĩ, Ndagũthaitha ũreke tũkerũre tũtonye itũũra rĩrĩ rĩa Ajebusi, tũraarĩrĩre kuo.
• 12. Nake mwathi wayo akĩmĩĩra atĩrĩ, Aca, tũtingĩkerũra itũũra rĩa rũrĩrĩ rũtarĩ rũa ciana cia Isiraeli; no nĩ kũhĩtũka tũkũhĩtũka tũkinye Gibea.
• 13. Agĩgĩcoka akĩĩra ndungata yake atĩrĩ, Ũka tũthiĩ tũkuhĩhĩrie itũũra rĩmwe rĩa matũũra marĩa me mbere iitũ, Gibea, kana Rama, tũraarĩrĩre kuo.
• 14. Tondũ ũcio magĩgĩthiathia; narĩo riũa rĩkĩmathũĩra makinyĩte hakuhĩ na Gibea, narĩo nĩ itũũra rĩa Benjamini.
• 15. Nao magĩgĩkerũra nĩguo makaraarĩrĩre kũu Gibea; nake agĩgĩtonya itũũra rĩu, agĩikara thĩ njĩra-inĩ ĩmwe yarĩo, nĩ ũndũ gũtirĩ mũndũ wamagwatire ũgeni maraarĩrĩre gwake.
• 16. Na atĩrĩrĩ, o kĩhwaĩ-inĩ, hagĩgĩũka mũthuri mũkũrũ oimĩte wĩra-inĩ wake wa mũgũnda, agĩkinya harĩ o; nake agĩkorũo nĩ wa bũrũri ũrĩa wĩ irĩma nyingĩ wa Efiraimu, no nĩ gũtũũra aatũũrĩte kũu Gibea arĩ mũgeni kuo; no rĩrĩ, andũ a kũndũ kũu maarĩ Abenjamini.
• 17. Nake mũthuri ũcio agĩgĩtiira maitho akĩona mũgendi njĩra-inĩ ya itũũra; agĩkĩmũũria atĩrĩ, Wathiĩ kũ? Na uuma kũ?
• 18. Nake akĩmwĩra atĩrĩ, Nĩ gũthiĩ tũrathiĩ tuumĩte Bethi-lehemu-juda tũkinye mũthia-inĩ wa bũrũri ũrĩa wĩ irĩma nyingĩ wa Efiraimu; gwitũ nĩ kũu, na nĩ gũthiĩ ndĩrathiĩte Bethi-lehemu-juda; na rĩu nĩ gũthiĩ ngũthiĩ nginye nyũmba ya Jehova; na gũtirĩ mũndũ ũngwatĩte ũgeni gwake mũciĩ.
• 19. No rĩrĩ, mahuti ma gũkomerũo nĩ ndigiri ciitũ, o na irio ciacio, twĩ nacio; o na ningĩ twĩ na mũgate na ndibei nĩ ũndũ wakwa, o na ũndũ wa ndungata ĩno yaku ya mũndũ-wa-nja, o na ũndũ wa mwanake ũyũ ithuĩ, ndungata ciaku, twĩ nake; hatirĩ kĩndũ o na kĩmwe twagĩte.
• 20. Nake mũthuri ũcio mũkũrũ agĩkĩmwĩra atĩrĩ, Ũrogĩa na thayũ; reka kĩrĩa gĩothe ũbatairio nĩkĩo kĩgĩe igũrũ rĩakwa; no ndũngĩkĩraara njĩra-inĩ.
• 21. Tondũ ũcio agĩkĩmũtwara gwake mũciĩ, agĩcoka akĩhe ndigiri ciake gĩa kũrĩa; nao magĩgĩĩthamba magũrũ, magĩcoka makĩrĩa na makĩnyua.
• 22. Na rĩrĩ, hĩndĩ ĩo mekenagia-rĩ, atĩrĩrĩ, andũ amwe aaganu mũno a itũũra rĩu magĩthiũrũrũkĩria nyũmba, makĩhũranga mũrango; nao magĩkĩaria na mũnene wa nyũmba ĩo, mũthuri ũcio mũkũrũ, makĩmwĩra atĩrĩ, Ruta mũndũ ũcio ũũkire kũu nyũmba yaku nja, tũmũgwate.
• 23. Nake mũthuri ũcio mũnene wa nyũmba ĩo akiuma, agĩthiĩ kũrĩ o, akĩmera atĩrĩ, Aca, andũ aya! Ndamũthaitha tigai gwĩka ũndũ ũcio wa waganu kuona atĩ mũndũ ũyũ okĩte nyũmba yakwa-rĩ, menyai mwĩke ũndũ ũcio wa ũkĩgu.
• 24. Atĩrĩrĩ, mwarĩ wakwa nĩwe ũyũ, na nĩ mũirĩtu gathirange, o nayo thuriya ya mũndũ ũcio nĩyo ĩno; acio-rĩ, nĩngũmuumĩria nja o ro rĩu, mũmaagithie gĩtĩo, o na mũmeke o ta ũrĩa mũrĩona kwagĩrĩire; no rĩrĩ, mũndũ ũyũ, menyai mũmwĩke ũndũ o na ũmwe wa ũkĩgu ta ũcio mwagweta.
• 25. No rĩrĩ, andũ acio matiigana kũmũigua; tondũ ũcio mũndũ ũcio mũgeni akĩnyita thuriya ĩo yake, akĩmoimĩria na nja, nao makĩmĩgwata, magĩkĩraara makĩmĩnyarira ũtukũ ũcio wothe o nginya rũcinĩ; na ruoro rũatema, makĩmĩrekia ĩĩthiĩre.
• 26. No rĩrĩ, rĩrĩa gwatigairie hanini gũthere-rĩ, mũndũ-wa-nja ũcio agĩthiĩ agĩkinya mũrango-inĩ wa nyũmba ya mũthuri ũcio kũu mũthuriwe aarĩ, agĩkĩgũa thĩ, agĩikara ho o nginya gũgĩkĩa.
• 27. Na rĩrĩ, rũcinĩ tene mũthuriwe akĩroka gũũkĩra, akĩhingũra mĩrango ya nyũmba, akiuma nĩguo ethiĩre; na atĩrĩrĩ, thuriya ĩo yake ĩgĩkorũo ĩgũĩte mũrango-inĩ wa nyũmba ĩo, namo moko mayo makenyitĩrĩra hingĩro ya thĩ ya mũrango.
• 28. Nake agĩkĩmĩĩra atĩrĩ, Ũkĩra tũthiĩ; no rĩrĩ, hatiigana kuoneka icokia; hĩndĩ ĩo mũthuri ũcio agĩkĩmĩoya, akĩmĩigĩrĩra igũrũ rĩa ndigiri yake, nake akĩgwata njĩra akĩĩinũkĩra gwake mũciĩ.
• 29. Na rĩrĩa aakinyire gwake mũciĩ, akĩoya rũhiũ, akĩnyita thuriya ĩo, akĩmĩtinangia o kĩĩga mwanya, o kĩĩga mwanya, akĩmĩtinangia icunjĩ ikũmi na igĩrĩ, akĩmĩtwarithia bũrũri wothe kũrĩa ciana cia Isiraeli ciarĩ.
• 30. Na gũgĩkinya atĩrĩ, atĩ andũ arĩa othe maaiguire ũhoro ũcio makiuga atĩrĩ, Gũtirĩ kwagĩa ũndũ ta ũyũ wĩkĩtwo, o na kana ũkĩoneka, gwata hĩndĩ ĩrĩa andũ a Isiraeli maambatire makiuma bũrũri wa Misiri, o na ũmũthĩ. Ta wĩciriei ũhoro waguo, mũũcire, na mwarie.

Home