Go Back

Atiirĩrĩri Bũrũri Chapter 16

• 1. Ningĩ Samusoni agĩgĩthiĩ Gaza, akĩona mũmaraya kuo, agĩtonya harĩ we.
• 2. Naguo ũndũ ũcio ũkĩĩrũo Agaza, magĩkĩĩrũo atĩrĩ, Samusoni nĩokĩte gũkũ. Nao magĩkĩmũthiũrũrũkĩria, makĩraara mamuohetie ũtukũ mũgima o hau kĩhingo-inĩ gĩa itũũra rĩu, o na makĩraara makirĩte ki ũtukũ ũcio wothe, makiuga atĩrĩ, Rekei tũikare nginya o rũcinĩ gwakĩa, na hĩndĩ ĩo tũgakĩmũũraga.
• 3. Nake Samusoni agĩgĩkoma nginya o ũtukũ gatagatĩ, agĩcoka agĩũkĩra o hĩndĩ ĩo ũtukũ gatagatĩ, akĩnyita mĩrango ya kĩhingo gĩa itũũra rĩu, o na itugĩ ciayo cierĩ, akĩmĩmunyanĩria na igera ciayo, akĩmĩigĩrĩra ciande ciake, akĩmĩkuua, akĩmĩtwara o igũrũ gacũmbĩrĩ ga kĩrĩma kĩrĩa kĩng’etheire Hebironi.
• 4. Na gũgĩkinya atĩrĩ, atĩ thutha wa ũguo akĩenda mũndũ-wa-nja watũire gĩtuamba-inĩ gĩa Soreku, nake etagwo Delila.
• 5. Nao anene a Afilisiti magĩũkĩra magĩthiĩ harĩ we, makĩmwĩra atĩrĩ, Mũhenererie ũmenye harĩa hinya ũcio wake mũnene ũrĩ, na ũmenye ũrĩa tũngĩĩka nĩguo tũmũtorie, nĩ getha tũmuohe tũmwagie hinya; na ithuĩ ithuothe, o mũndũ, nĩtũgũkũhe mbia ngiri ĩmwe na igana rĩmwe.
• 6. Nake Delila agĩkĩĩra Samusoni atĩrĩ, Ndagũthaitha, njĩra harĩa hinya ũcio waku mũnene ũrĩ, o na ningĩ-rĩ, nĩ ta kĩ ũngĩohwo nakĩo nĩguo wagithio hinya.
• 7. Nake Samusoni agĩkĩmwĩra atĩrĩ, Mangĩnjoha na nga mũgwanja cia muogothano itarĩ ciomithio-rĩ, ndaaga hinya nduĩke o ta andũ arĩa angĩ.
• 8. Anene a Afilisiti magĩgĩtwarĩra Delila nga mũgwanja cia muogothano itarĩ ciomithio, agĩkĩmuoha nacio.
• 9. Nake mũndũ-wa-nja ũcio agĩgĩkorũo aigĩte andũ kanyũmba kaarĩ thĩinĩ wa iria ingĩ mamuohie. Nake agĩkĩmwĩra atĩrĩ, Samusoni, wĩ mũkore nĩ Afilisiti. Nake agĩgĩtuanga nga icio o ta ũrĩa mbutha ya ũguta ĩtuĩkaga yahutia mwaki. Na tondũ ũcio hinya wake ndũigana kũmenyeka harĩa ũrĩ.
• 10. Ningĩ Delila akĩĩra Samusoni ũũ: Atĩrĩ, wee nĩ itherũ ũningĩte, ũkanjĩra ndeto cia maheni; rĩu ndagũthaitha ta kĩnjĩre kĩrĩa ũngĩohwo nakĩo.
• 11. Nake agĩkĩmwĩra atĩrĩ, Mangĩnjoha na mĩhĩndo mĩtungu ya muogothano ĩtarĩ yarutithio wĩra-rĩ, ndaaga hinya nduĩke o ta andũ arĩa angĩ.
• 12. Delila agĩkĩoya mĩhĩndo mĩtungu ya muogothano, akĩmuoha nayo; agĩcoka akĩmwĩra atĩrĩ, Samusoni, wĩ mũkore nĩ Afilisiti. Nao andũ a kũmuohia maaikarĩte kanyũmba kaarĩ thĩinĩ wa iria ingĩ. Nake akĩmĩtuanga o ta ũrĩa angĩtua uthi, ĩkĩmuuma moko.
• 13. Ningĩ Delila agĩkĩĩra Samusoni atĩrĩ, Kuuma o ihinda rĩa mbere o na rĩu no itherũ ũningaga, ũkanjĩra ndeto cia maheni; rĩu ta kĩnjĩre wega kĩrĩa ũngĩohwo nakĩo. Nake agĩkĩmwĩra atĩrĩ, No ũtonyanirie ciohe ici mũgwanja cia njuĩrĩ ya mũtwe wakwa na ndigi cia mũtambo wa gũtuma tama.
• 14. Nake Delila agĩciohania na mũnyamũ wa mũtambo, agĩkĩmwĩra atĩrĩ, Samusoni, wĩ mũkore nĩ Afilisiti. Nake agĩũkĩra toro, akĩmunya mũnyamũ ũcio wa mũtĩ wa mũtambo, hamwe na ndigi ciothe iria ciarĩ ho.
• 15. Ningĩ Delila akĩmwĩra atĩrĩ, Wakĩhota atĩa kuuga ũũ: Nĩngwendete; na ngoro yaku ndĩkĩrĩ hamwe na yakwa? Rĩu nĩ mahinda matatũ ũningĩte itherũ, na ndũrĩ wanjĩra harĩa hinya ũyũ waku mũnene ũrĩ.
• 16. Na gũgĩkinya atĩrĩ, atĩ rĩrĩa aamũhatĩrĩirie mĩthenya yothe na ũndũ wa ũhoro ũrĩa aamwĩraga, o na akamũringagĩrĩria mũno, ngoro yake ĩkĩya kũigua ũũru o ta angĩenda gũkua.
• 17. Na tondũ ũcio agĩkĩmwĩra maũndũ mothe marĩa maarĩ ngoro-inĩ yake, akiuga atĩrĩ, Ndirĩ ndahĩtũkĩrũo nĩ rũenji mũtwe wakwa; nĩ ũndũ ndũire ndĩ Mũnaziri wamũrĩirũo Ngai gwata hĩndĩ ĩrĩa ndoimire nda ya maitũ; no rĩrĩ, ingĩenjwo-rĩ, hinya wakwa wora nduĩke o ta andũ arĩa angĩ othe.
• 18. Na rĩrĩ, hĩndĩ ĩrĩa Delila onire atĩ ekũmwĩra maũndũ mothe marĩa marĩ ngoro-inĩ yake-rĩ, akĩrekania anene a Afilisiti magetwo, agĩkĩmera atĩrĩ, Ambatai mũũke o ihinda rĩngĩ rĩmwe, nĩ gũkorũo nĩanjĩrĩte maũndũ mothe marĩa marĩ ngoro-inĩ yake. Nao anene acio a Afilisiti magĩkĩambata magĩkinya harĩ we, na magĩthiĩ makuuĩte mbia iria maamwĩrĩire na moko.
• 19. Nake Delila agĩkĩreka akome maru-inĩ make, agĩĩta mũndũ, agĩũka akĩmwenja ciohe icio mũgwanja cia njuĩrĩ ya mũtwe wake; agĩgĩitĩka kũmwagithia hinya, naguo hinya wake ũgĩkĩmuuma.
• 20. Agĩkĩmwĩra atĩrĩ, Samusoni, wĩ mũkore nĩ Afilisiti. Nake agĩgĩũkĩra toro, akiuga atĩrĩ, Nguuma nja ndĩĩribaribe o ta ũrĩa njĩkaga mahinda marĩa mangĩ. No rĩrĩ, ndaamenyete atĩ Jehova nĩamwehereire.
• 21. Nao Afilisiti magĩkĩmũnyita, makĩmũkũũra maitho; makĩmũikũrũkia Gaza, makĩmuoha na mĩnyororo ya gĩcango; nake agĩtũũra athĩaga e kũu nyũmba ya korokoro.
• 22. No rĩrĩ, thutha wa aarĩkia kwenjwo-rĩ, njuĩrĩ ya mũtwe wake ĩkĩambĩrĩria gũcoka gũkũra.
• 23. Nao anene a Afilisiti magĩkĩũngana othe nĩ getha marutĩre Dagoni, ngai yao, igongona inene, o na makene; nĩ ũndũ moigire atĩrĩ, Ngai iitũ nĩĩrekereirie Samusoni thũ iitũ, ĩkamũneana moko-inĩ maitũ.
• 24. Na hĩndĩ ĩrĩa andũ maamuonire, makĩgatha ngai yao, nĩ gũkorũo moigire atĩrĩ, Thũ iitũ, o na mũthũkia wa bũrũri witũ, ũrĩa woragire andũ aingĩ mũno thĩinĩ witũ, ngai iitũ nĩĩmũrekereirie ĩkamũneana moko-inĩ maitũ.
• 25. Na gũgĩkinya atĩrĩ, atĩ hĩndĩ ĩrĩa ngoro ciao ciaiyũrĩtwo nĩ gĩkeno, magĩkiuga atĩrĩ, Samusoni nĩetwo, oke eke maũndũ ma gũtũthekia. Nake Samusoni agĩgĩĩtwo oime kũu korokoro-inĩ; nake agĩĩka maũndũ ma mathekania arĩ mbere yao; nao maamũigire gatagatĩ-inĩ ga itugĩ cia nyũmba ĩo maarĩ.
• 26. Nake Samusoni agĩkĩĩra kamwanake karĩa kaamũnyitaga atĩrĩ, Ta reka ’hutie itugĩ ici itiirĩte nyũmba ĩno, ndĩciigue, nĩ getha ndĩĩtiiranie nacio.
• 27. Na rĩrĩ, nyũmba ĩo yaiyũrĩtwo nĩ arũme na andũ-a-nja; o nao anene othe a Afilisiti maarĩ kuo; nao andũ arĩa maarĩ nyũmba igũrũ maarĩ ta ngiri ithatũ, arũme na andũ-a-nja, nao nĩ kwĩrorera meroragĩra maũndũ macio ma mathekania mekagwo nĩ Samusoni.
• 28. Nake Samusoni agĩgĩkaĩra Jehova, akĩmwĩra atĩrĩ, Jehova Ngai, ndagũthaitha ũndirikane; na ũ’he hinya, ndagũthaitha Ngai, o ihinda rĩrĩ rĩmwe riiki, nĩ getha ndĩĩrĩhĩrie maitho makwa merĩ harĩ Afilisiti o ro ihinda rĩrĩ.
• 29. Nake Samusoni agĩkĩnyita itugĩ icio cierĩ cia gatagatĩ, iria ciatiirĩte nyũmba ĩo, agĩĩtiirania nacio, kĩmwe agĩkĩnyita na guoko gwake kwa ũrĩo, na kĩrĩa kĩngĩ na guoko gwake kwa ũmotho.
• 30. Nake Samusoni agĩkiuga atĩrĩ, Ndĩrokuanĩra na Afilisiti. Agĩkĩinamĩrĩra, akĩruta hinya ũrĩa wothe aarĩ naguo; nayo nyũmba ĩo ĩkĩgũĩra anene, o na andũ othe arĩa maarĩ kuo thĩinĩ. Tondũ ũcio andũ arĩa oragire agĩkua maarĩ aingĩ gũkĩra arĩa oragire hĩndĩ ĩrĩa aarĩ muoyo.
• 31. Hĩndĩ ĩo ariũ a ithe, o na andũ othe a nyũmba ya ithe, magĩikũrũka, makĩmũkuua, makĩmwambatia, makĩmũthika gatagatĩ ga Zora na Eshitaoli, o handũ harĩa haathikanagwo ha Manoa, ithe. Nake aatiirĩrĩire Isiraeli mĩaka mĩrongo ĩĩrĩ.

Home