Go Back

Atiirĩrĩri Bũrũri Chapter 15

1. No gũgĩkinya atĩrĩ, atĩ matukũ maathiathia, hĩndĩ ya magetha ma ngano, Samusoni agĩthiĩ gũceerera mũka amũtwarĩre kori; agĩkiuga atĩrĩ, Ngũthiĩ ndonye kwĩ mũka wakwa, o kũu nyũmba thĩinĩ. No rĩrĩ, ithe ndaigana kũmwĩtĩkĩria atonye kuo.
2. Ithe wa mũndũ-wa-nja ũcio agĩkĩmwĩra atĩrĩ, Ti-itherũ ndegereirie atĩ nĩwamũthũũrire o kũmũthũũra; na tondũ ũcio ngĩkĩmũhe mũndũ ũcio warĩ mũrataguo; githĩ mwarĩ wa nyina ũrĩa mũnyinyi wake ti mũthaka kũrĩ we? Ndagũthaitha ũtware ũcio ithenya rĩa ũcio ũngĩ.
3. Nake Samusoni agĩkĩmera atĩrĩ, Ti-itherũ ihinda rĩrĩ, ndirĩ ũũru ũngĩnjokerera ũhoro-inĩ wa Afilisiti ingĩmeka ũũru.
4. Nake Samusoni agĩgĩthiĩ agĩtega mbwe magana matatũ, agĩcihũgũrania ithita, o igĩrĩ igĩrĩ, agĩcoka akĩoya icinga, akĩoherera icinga icio gatagatĩ ga ithita igĩrĩ igĩrĩ cia mbwe icio.
5. Nake aagwatia icinga icio mwaki, agĩcirekia ithiĩ ngano-inĩ ya Afilisiti ĩrĩa yarũngiĩ ĩtarĩ ngethe, agĩgĩcinithia ngano ĩrĩa yarĩ itĩa-inĩ ĩrũgamĩtio mũgũnda, o na ngano ĩrĩa yarũngiĩ ĩtarĩ ngethe, o na ningĩ agĩcinithia mĩgũnda yao ya mĩtamaiyũ.
6. Hĩndĩ ĩo Afilisiti magĩkĩũria atĩrĩ, Ĩ nũ weka ũũ? Nao andũ magĩkiuga, Nĩ Samusoni, mũthoniwe wa mũndũ ũcio wa Timina, nĩ ũndũ nĩamũtunyĩte mũka, akahe mũndũ ũngĩ mũratawe. Afilisiti magĩgĩthiĩ magĩcina mũndũ-wa-nja ũcio, o na ithe, na mwaki.
7. Nake Samusoni agĩkĩmera atĩrĩ, Okorũo ũguo nĩguo mwĩkaga-rĩ, ndirĩ hingo itekwĩrĩhĩria harĩ inyuĩ, na thutha wa ũguo njoke ndige.
8. Samusoni agĩkĩmahũra ihũra inene, akĩmoraga aingĩ mũno, agĩcoka agĩikũrũka, agĩikara mwanya-inĩ wa rũaro rũa ihiga rũa Etamu thĩinĩ.
9. Hĩndĩ ĩo Afilisiti magĩkĩambata, makĩamba hema ciao Juda, makĩharaganĩria kũu Lehi.
10. Nao andũ a Juda magĩkĩmoria atĩrĩ, Nĩ kĩ gĩatũma mũũke mũtũũkĩrĩre? Nao magĩkiuga atĩrĩ, Twaambata nĩguo tũũke tuohe Samusoni, tũmwĩke o ta ũrĩa atwĩkĩte.
11. Hĩndĩ ĩo andũ ngiri ithatũ a Juda magĩgĩikũrũka magĩkinya mwanya-inĩ ũcio wa rũaro rũu rũa ihiga o kũu Etamu, makĩĩra Samusoni atĩrĩ, Kaĩ ũtoĩ atĩ Afilisiti nĩo matwathaga? Rĩu ũndũ ũcio ũgĩtwĩkĩte nĩ ũrĩkũ? Nake agĩkĩmera atĩrĩ, O ta ũrĩa maanjĩkire-rĩ, ũguo noguo na niĩ ndĩmekĩte.
12. Magĩkĩmwĩra ũũ: Tũikũrũkĩte nĩguo tũũke tũkuohe, tũkũnenganĩre moko-inĩ ma Afilisiti. Nake Samusoni akĩmera atĩrĩ, Wĩhĩtei muuge atĩ inyuĩ inyuene mũtinguthũkĩra mũnjũrage.
13. Nao magĩkĩmwarĩria, makĩmwĩra atĩrĩ, Aca, tũtikũguthũkĩra; no nĩ kuoha tũgũkuoha tũkũnyitie, tũkũneane moko-inĩ mao; no rĩrĩ, nĩ ma atĩ ithuene tũtikũũraga. Nao magĩkĩmuoha na mĩhĩndo ĩĩrĩ mĩerũ, makĩmwambatia makĩmũruta rũaro-inĩ rũu rũa ihiga.
14. Na rĩrĩ, aakinya Lehi-rĩ, Afilisiti magĩkĩanĩrĩra na mũgambo mũnene maacemania nake; naguo roho wa Jehova ũkĩmũkora na hinya mũnene, nayo mĩhĩndo ĩo ohetwo nayo moko ĩgĩtuĩka o ta ũguta ũcinĩtwo na mwaki, nayo mĩnyamũ ĩo aakĩohetwo nayo ĩkĩgũa thĩ, ĩkĩmuuma njara.
15. Nake agĩkĩona rũkambucu rũa ndigiri rũtarĩ rũkũrũ, agĩtambũrũkia guoko akĩruoya, akĩũraga andũ ngiri naruo.
16. Nake Samusoni agĩkiuga atĩrĩ, Njiganĩrĩire andũ hĩba na hĩba, ndĩmoragĩte na rũkambucu rũa ndigiri, Ĩĩ ti-itherũ, na ũndũ wa rũkambucu rũu, nĩ andũ ngiri njũragĩte biũ.
17. Na gũgĩkinya atĩrĩ, atĩ aarĩkia kwaria ciugo icio, agĩte rũkambucu rũu aarĩ naruo guoko; naho handũ hau hagĩgĩtuwo Ramathu-lehi.
18. Nake agĩkĩigua anyotete mũno, na tondũ ũcio agĩgĩkaĩra Jehova, akiuga atĩrĩ, Ũhoro ũyũ mũnene ũũ wa kũhonokanio-rĩ, ũũheanĩte na guoko gwakwa, niĩ ndungata yaku, na rĩu ngwatĩte gũkua nĩ nyota, njikare ta ’neanĩtwo moko-inĩ ma andũ aya mataruaga.
19. No rĩrĩ, Ngai agĩtua irima handũ haarĩ mwanya o kũu Lehi, naho hagĩkiuma maĩ; nake aamanyua, hinya wa roho wake ũkĩmũcokerera, akĩriũka; na tondũ ũcio rĩĩtwa rĩa handũ hau rĩgĩtuwo Eni-hakore; naho harĩ o kũu Lehi o na ũmũthĩ.
20. Nake Samusoni agĩtiirĩrĩra Isiraeli mĩaka mĩrongo ĩĩrĩ matukũ macio ma Afilisiti.

Home