Go Back

Atiirĩrĩri Bũrũri Chapter 11

• 1. Na rĩrĩ, Jefitha, Mũgileadi, aarĩ njamba ĩrĩ hinya, na nyina aarĩ mũmaraya; nake Jefitha ũcio aaciarĩtwo nĩ Gileadi.
• 2. Ningĩ mũtumia wa Gileadi nĩaamũciarĩire ihĩĩ; na hĩndĩ ĩrĩa ihĩĩ icio cia mũtumia wake ciakũrire, ikĩingata Jefitha, ikĩmwĩra atĩrĩ, Wee ndũkagwata igai thĩinĩ wa nyũmba ya ithe witũ, nĩ ũndũ wĩ wa mũka ũngĩ ũtarĩ maitũ.
• 3. Nake Jefitha agĩkĩũrĩra ariũ a ithe, agĩthiĩ gũtũũra bũrũri wa Tobu; nakuo kũu Jefitha akĩũnganĩrũo nĩ andũ matarĩ kĩene, mĩũkũ, magatwaranaga nake.
• 4. Na gũgĩkinya atĩrĩ, atĩ matukũ maathiathia, ciana cia Amoni igĩitĩka kũrũa mbaara na Isiraeli.
• 5. Na gũgĩtuĩka atĩrĩ, atĩ rĩrĩa ciana cia Amoni ciaitĩkire kũrũa na Isiraeli, athuri a Gileadi magĩthiĩ kũgĩra Jefitha oime kũu bũrũri wa Tobu;
• 6. nao magĩkĩĩra Jefitha atĩrĩ, Ũka ũtuĩke mũnene witũ, nĩ getha tũkahũrane na ciana cia Amoni.
• 7. Nake Jefitha agĩkĩĩra athuri acio a Gileadi atĩrĩ, Githĩ mũtia’thũũrire, mũkĩnyingata nyume nyũmba ya baba? Na rĩu-rĩ, nĩ kĩ gĩagĩtũma mũũke kũrĩ niĩ hĩndĩ ĩrĩa mwanyarirĩka?
• 8. Nao athuri acio a Gileadi magĩkĩĩra Jefitha atĩrĩ, Ũndũ ũcio nĩguo ũtũmĩte tũgũcokerere, nĩ getha ũtwarane na ithuĩ, tũkahũrane na ciana cia Amoni, na nĩwe ũgũtuĩka mũnene witũ wa gwathaga andũ othe arĩa matũũraga Gileadi.
• 9. Nake Jefitha agĩkĩũria athuri acio a Gileadi atĩrĩ, Kũngĩkorũo nĩmũkũnjokia kwanyu nĩguo tũkahũrane na ciana cia Amoni, o nake Jehova acirekererie acineane moko-inĩ makwa-rĩ, nĩngũtuĩka mũnene wanyu?
• 10. Nao athuri acio a Gileadi magĩkĩĩra Jefitha atĩrĩ, Jehova nĩwe mũira thĩinĩ witũ nawe. Ti-itherũ o ta ũguo uugĩte-rĩ, noguo tũgwĩka.
• 11. Jefitha agĩgĩthiĩ na athuri acio a Gileadi, nao andũ acio makĩmũtua mũnene wao, o na mwathi wao; ningĩ Jefitha akĩarĩria ũhoro wothe ũrĩa aarĩ naguo o kũu Mizipa mbere ya Jehova.
• 12. Nake Jefitha agĩkĩrekia andũ harĩ mũthamaki wa ciana cia Amoni, akiuga atĩrĩ, Nĩ ũhoro ũrĩkũ wĩ naguo na niĩ atĩ nĩkĩo ũgũũka harĩ niĩ ũhũrane na bũrũri wakwa?
• 13. Nake mũthamaki wa ciana cia Amoni agĩgĩcokeria arekio acio a Jefitha atĩrĩ, Gĩtũmi nĩ ũndũ Aisiraeli, hĩndĩ ĩrĩa moimire bũrũri wa Misiri, nĩmaandunyire bũrũri wakwa kuuma Arinoni o nginya Jaboku, o na nginya Jorodani; na tondũ ũcio njokeria mabũrũri macio na ũhoreri o ro ũguo tũtarĩ na mbaara.
• 14. Nake Jefitha agĩkĩrekeria mũthamaki wa ciana cia Amoni andũ rĩngĩ,
• 15. akĩmwĩra atĩrĩ, Jefitha oiga ũũ: Atĩrĩrĩ, Isiraeli ndaigana gũtunya Amoabi bũrũri wao, kana agĩtunya ciana cia Amoni bũrũri wacio.
• 16. No rĩrĩ, hĩndĩ ĩrĩa aambatire akiuma Misiri, Isiraeli nĩ gũtuĩkanĩria aatuĩkanĩirie werũ o nginya Iria Itune, agĩgĩkinya Kadeshi.
• 17. Na hĩndĩ ĩo Isiraeli agĩkĩrekeria mũthamaki wa Edomu andũ akĩmwĩra atĩrĩ, Ndagũthaitha ũreke nduĩkanĩrie bũrũri waku; no rĩrĩ, mũthamaki wa Edomu ndetĩkĩrire ndeto icio. Ningi akĩrekia andũ o ro ũguo harĩ mũthamaki wa Moabi, no rĩrĩ, o nake nĩaaregire; nao Aisiraeli magĩikara o kũu Kadeshi.
• 18. Thutha wa ũguo magĩgĩtuĩkanĩria werũ-inĩ magĩthiũrũrũka bũrũri wa Edomu, o na bũrũri wa Moabi, makĩgera mwena wa irathĩro wa bũrũri ũcio wa Moabi, makĩamba hema ciao mũrĩmo ũrĩa ũngĩ wa Arinoni; no rĩrĩ, matiahĩtũkĩire mũhaka-inĩ wa Moabi, nĩ gũkorũo rũũĩ rũu rũa Arinoni nĩruo rũarĩ mũhaka wa Moabi.
• 19. Ningĩ Aisiraeli makĩrekia andũ gwĩ Sihoni, mũthamaki wa Aamori, o ũcio warĩ mũthamaki wa Heshiboni; nao Aisiraeli makĩmwĩra atĩrĩ, Twagũthaitha ũreke tũhĩtũkĩre bũrũri waku tũtuĩkanie tũkinye bũrũri witũ.
• 20. No rĩrĩ, Sihoni ndaigana kwĩhoka Aisiraeli atĩ mahĩtũkĩre mũhaka-inĩ wa bũrũri wake; no rĩrĩ, Sihoni nĩ kũũngania onganirie andũ ake othe, akĩamba hema ciake o kũu Jahazu, nake agĩkĩhũrana na Aisiraeli.
• 21. Nake Jehova Ngai wa Isiraeli akĩrekereria Sihoni o na andũ ake othe, akĩmaneana moko-inĩ ma Isiraeli, magĩkĩmahũra; tondũ ũcio Aisiraeli makĩĩgwatĩra bũrũri wothe wa Aamori, o acio maatũũraga kuo.
• 22. O na makĩĩgwatĩra bũrũri wothe wa Aamori, kuuma Arinoni o nginya Jaboku, o na kuuma werũ-inĩ nginya o Jorodani.
• 23. Na rĩrĩ, kuona atĩ Jehova, Ngai wa Isiraeli, nĩwe watunyire Aamori kũndũ kũu maatũire, mehere mbere ya Aisiraeli-rĩ, kaĩ wee arĩ wee ũkwenda ũkwĩgwatĩre?
• 24. Githĩ wee ndũrĩkĩĩgwatĩra kũndũ gwa gũtũũra kũrĩa ngai yaku Kemoshu ĩkũheete? Tondũ ũcio andũ arĩa othe Jehova Ngai witũ aatunyire kũndũ kwao kũrĩa maatũũraga akĩmeheria mbere iitũ-rĩ, acio nĩo ithuĩ tũrĩtũũraga twĩgwatĩire mabũrũri mao.
• 25. Na rĩrĩ, rĩu wee ũkĩagĩrĩte na njĩra ĩrĩkũ gũkĩra Balaki wa Ziporu, mũthamaki wa Moabi? Ũcio-rĩ, e hĩndĩ etire kũgiana na Isiraeli, kana agĩeta kũhũrana nao?
• 26. Githĩ Aisiraeli matigĩtũũrĩte o kũu itũũra rĩa Heshiboni o na mĩciĩ yarĩo, o na magatũũra Aroeri, na mĩciĩ yarĩo, o na matũũra mothe marĩa marĩ hũgũrũrũ-inĩ cia Arinoni, mĩaka magana matatũ? Nĩ kĩ kĩanakĩgiria mũcokererũo nĩ kũndũ kũu?
• 27. Tondũ ũcio niĩ ndirĩ kwĩhia ngwĩhĩtie, no rĩrĩ, wee nĩwe ũranjĩka ũũru nĩ gũũka kũhũrana na niĩ. Jehova, ũrĩa ũtuithanagia andũ cira wao na kĩhooto-rĩ, nĩatuithanie ciana cia Isiraeli na ciana cia Amoni cira wacio ũmũthĩ.
• 28. No rĩrĩ, mũthamaki wa ciana cia Amoni ndaigana kũigua ũhoro ũcio Jefitha aamũtwarithĩirie.
• 29. Hĩndĩ ĩo roho wa Jehova ũgĩkora Jefitha ũkĩgĩa nake, nake akĩgwata rũgendo agĩtuĩkanĩria Gileadi na Manase, agĩgĩkinya Mizipa, itũũra rĩa Gileadi; nake oima kũu Mizipa rĩa Gileadi agĩgĩthiĩ gũkora ciana cia Amoni.
• 30. Nake Jefitha akĩhe Jehova ũhoro na mwĩhĩtwa, akiuga ũũ: Atĩrĩrĩ, ũngĩkorũo nĩũkũrekereria ciana cia Amoni ũcineane moko-inĩ makwa na ma, o ma-rĩ,
• 31. nĩgũgatuĩka atĩrĩ, atĩ hĩndĩ ĩrĩa ngacoka na thayũ nyumĩte gwa ciana cia Amoni, kĩrĩa gĩothe gĩkandũnga thome kiumĩte na gwakwa mũciĩ-rĩ, gĩgatuĩka kĩa Jehova, na nĩngakĩruta gĩtuĩke ihaki rĩa njino.
• 32. Jefitha agĩgĩthiĩ harĩ ciana cia Amoni akahũrane mbaara nacio; nake Jehova agĩcirekereria agĩcineana moko-inĩ make.
• 33. Nake agĩkĩhũra andũ a matũũra mao mĩrongo ĩĩrĩ amarutĩtie Aroeri o nginya Minithu, o na nginya Abelikeramimu, nake agĩkĩmoraga aingĩ mũno. Ũguo nĩguo ciana cia Amoni ciahootirũo nĩ ciana cia Isiraeli.
• 34. Nake Jefitha agĩgĩthiĩ agĩkinya Mizipa gwake mũciĩ; na atĩrĩrĩ, mwarĩ akiumagara athiĩ akamũtũnge, agĩthiĩ akĩhũraga ihembe cia kũinio, o na akĩinaga; nake mũirĩtu ũcio aarĩ wa mũmwe; ithe ndaarĩ na ũngĩ wa kahĩĩ, kana wa kairĩtu, tiga o ũcio wiki.
• 35. Na gũgĩkinya atĩrĩ, atĩ hĩndĩ ĩrĩa aamuonire agĩtehũranga nguo ciake, akiuga atĩrĩ, Ĩiya, mwarĩ wakwa-ĩ! Ũgũtũma njigue o ta ndĩ mũrũnde thĩ, o na ũrĩ wa thiritũ ya arĩa ma’nyariraga, nĩ gũkorũo nĩndumũrĩire Jehova kanua gakwa ngamwarĩria, na ndingĩhota kwĩricũkwo.
• 36. Nake mwarĩ akĩmwĩra atĩrĩ, Baba, kuona atĩ nĩwatumũrĩire Jehova kanua gaku ũkĩmwarĩria, nake agĩkũrĩhĩria harĩ thũ ciaku, ciana icio cia Amoni-rĩ, njĩka o ta ũrĩa ũhoro ũrĩa woimire kanua gaku watariĩ.
• 37. Agĩkĩĩra ithe atĩrĩ, Reka njĩkwo ũndũ ũyũ; ndekereria ihinda rĩa mĩeri ĩĩrĩ, nĩ getha njehere ngacange irĩma-inĩ, ngarĩrĩre ũhoro wakwa wa kwaga kũgũrũo, ndĩ hamwe na airĩtu a thiritũ yakwa.
• 38. Hĩndĩ ĩo ithe agĩkĩmwĩra atĩrĩ, Wĩthiĩre; nake agĩkĩmũrekereria ihinda rĩa mĩeri ĩĩrĩ; nake agĩgĩĩthiĩra me na airĩtu a thiritũ yake, akĩrĩrĩra ũhoro ũcio wake wa kwaga kũgũrũo e kũu irĩma-inĩ.
• 39. Na gũgĩkinya atĩrĩ, atĩ mĩeri ĩĩrĩ yathira agĩcokerera ithe, nake akĩmwĩka o ta ũrĩa ũhoro ũcio oigĩte watariĩ, nake ndonanĩte na mũndũ mũrũme o na ũrĩkũ. Naguo ũndũ ũyũ ũgĩtuĩka mũtugo wa kũrũmĩrĩrũo nĩ Aisiraeli,
• 40. atĩ airĩtu Aisiraeli mathiage mwaka o mwaka kũririkana mwarĩ wa Jefitha, Mũgileadi, makamũrĩrĩra mĩthenya ĩna thĩinĩ wa mwaka mũgima.

Home