Go Back

Atiirĩrĩri Bũrũri Chapter 1

1. Na gũgĩkinya atĩrĩ, atĩ Joshua aarĩkia gũkua, ciana cia Isiraeli ikĩũria Jehova atĩrĩ, Rĩu-rĩ, nĩa megũtata ita magatũhũranĩre harĩ Akanaani?
2. Nake Jehova agĩkiuga atĩrĩ, Andũ a Juda nĩo megũcitata, na atĩrĩrĩ, bũrũri ũcio nĩndĩũrekereirie ngaũneana moko-inĩ mao.
3. Nao andũ a Juda magĩkĩĩra andũ a Simeoni mũrũ wa nyina wao atĩrĩ, Arahũkai mũũke gũkũ twagwatire igai mĩtĩ yacukwo, tũkũhũranĩre harĩ Akanaani, na thutha wa ũguo ithuĩ o na ithuĩ tũgacoka tũthiĩ na inyuĩ o ro ũguo tũkahũranĩre kũndũ kwanyu kũrĩa mwagwatire igai, mĩtĩ yacukwo. Magĩgĩthiĩ na andũ a Simeoni.
4. Ajuda magĩkĩambata; nake Jehova akĩrekereria Akanaani, o na Aperizi, akĩmaneana moko-inĩ mao; magĩkĩũragĩra andũ ngiri ikũmi ao o kũu Bezeki.
5. Nao magĩkĩonera Adoni-bezeki o kũu Bezeki; magĩkĩhũrana mbaara nake, magĩgĩtoria Akanaani na Aperizi.
6. No Adoni-bezeki akĩũra, nao makĩmũrũmĩrĩra na ihenya, makĩmũnyita, makĩmũtinia ciara iria nene cia moko o na cia magũrũ.
7. Nake Adoni-bezeki akiuga atĩrĩ, Nĩkwarĩ athamaki mĩrongo mũgwanja maatinĩtio ciara ciao iria nene cia moko o na cia magũrũ monganagia irio ruungu rũa metha yakwa magĩcirĩaga, na rĩrĩ, o ta ũrĩa niĩ ndekire acio angĩ-rĩ, ũguo noguo Ngai aanjĩka, andĩhie. Nao makĩmũtwara Jerusalemu, agĩkuĩra kuo.
8. Nacio ciana cia Juda ikĩhũrana mbaara na Jerusalemu, ikĩrĩtunyana, ikĩrĩhũra na hiũ cia njora, igĩcoka ikĩrĩikia mwaki.
9. Ningi thutha wa ũguo ciana cia Juda igiikũrũka ikahũrane mbaara na Akanaani arĩa maatũũraga bũrũri ũrĩa wĩ irĩma nyingĩ, o na mwena wa Gũthini, o na bũrũri ũrĩa wĩ gĩtuamba-inĩ.
10. Ningĩ ciana icio cia Juda igĩgĩthiĩ kũhũrana mbaara na Akanaani arĩa maatũũraga Hebironi, (narĩo itũũra rĩu rĩa Hebironi tene rĩetagwo Kiriathu-ariba;) nao magĩkĩũraga Sheshai, na Ahimani, na Talimai.
11. Ningĩ moima kũu, magĩthiĩ kũhũrana na andũ arĩa maatũũraga Debiri. (Narĩo itũũra rĩu rĩa Debiri tene rĩetagwo Kiriathu-seferi.)
12. Nake Kalebu agĩkiuga atĩrĩ, Mũndũ ũrĩa ũrĩhũra Kiriathu-seferi, arĩtunyane-rĩ, nĩwe ngũhe mwarĩ wakwa Akisa atuĩke mũka.
13. Nake Othinieli, mũrũ wa mũrũ wa ithe na Kalebu ũrĩa mũnyinyi wĩtagwo Kenazu, nĩwe warĩtunyanire; nake Kalebu agĩkĩmũhe Akisa mwarĩ atuĩke mũka.
14. Na gũgĩkinya atĩrĩ, atĩ hĩndĩ ĩrĩa aathiire harĩ Othinieli, akĩmwĩkĩra ngoro ya kũhoya mũgũnda gwĩ ithe; nake Akisa agĩkiuma igũrũ rĩa ndigiri yake, akĩrũgama; nake Kalebu akĩmũũria atĩrĩ, Ũbatairio nĩ kĩ?
15. Agĩkĩmwĩra atĩrĩ, Ngwenda ũndathime; na tondũ nĩũ’heete bũrũri wa mwena wa Gũthini-rĩ, ningĩ ndagũthaitha ũ’he ithima cia maĩ. Nake agĩkĩmũhe kũndũ gwĩ ithima cia maĩ rũgongo igũrũ, o na kĩanda-inĩ.
16. Nacio ciana cia Mũkeni, mũthoniwe wa Musa, nĩciaambatĩte ikoima itũũra rĩa mĩkĩndũ, irĩ hamwe na ciana cia Juda, igakinya werũ wa Juda, ũrĩa ũrĩ mwena wa gũthini wa Aradi; nacio igĩgĩthiĩ gũtũũrania nacio kuo.
17. Nacio ciana cia Juda igĩgĩthiĩ na ciana cia Simeoni, mũrũ wa nyina wacio, ikĩhũra Akanaani arĩa maatũũraga itũũra rĩa Zefathu, ikĩrĩnina biũ. Narĩo rĩĩtwa rĩa itũũra rĩu rĩgĩcoka gwĩtwo Horima.
18. Ningĩ ciana cia Juda igĩtunyana Gaza, o nginya mũhaka-inĩ warĩo, na Ashikeloni, o nginya mũhaka-inĩ warĩo, na Ekironi, o nginya mũhaka-inĩ warĩo.
19. Nake Jehova aakĩrĩ hamwe na ciana icio cia Juda; nake agĩkĩingata andũ arĩa maatũũraga bũrũri ũrĩa wĩ irĩma nyingĩ; no rĩrĩ, itiahotire kũingata arĩa maatũũraga ituamba-inĩ, nĩ gũkorũo maarĩ na ngari cia igera.
20. Nacio igĩkĩhe Kalebu Hebironi, o ta ũrĩa Musa oigĩte; nake agĩkĩingata ariũ arĩa atatũ a Anaki, akĩmaruta kuo.
21. Nacio ciana cia Benjamini itiigana kũingata Ajebusi arĩa maatũũrĩte Jerusalemu; no rĩri, Ajebusi maatũũranirie na ciana cia Benjamini o kũu Jerusalemu, o na ũmũthĩ.
22. O nao andũ a nyũmba ya Jusufu makĩambata makahũrane na Beth-eli; nake Jehova aarĩ hamwe nao.
23. Nao andũ a nyũmba ĩo ya Jusufu magĩkĩrekia andũ magathigane Beth-eli. (Narĩo itũũra rĩu tene rĩetagwo Luzu.)
24. Nao athigani acio magĩkĩona mũndũ akiuma kũu itũũra-inĩ rĩu, makĩmwĩra atĩrĩ, Twagũthaitha ũtuonie harĩa itũũra rĩrĩ rĩtonyagĩrũo, na nĩtũgũgwĩka maũndũ mega.
25. Nake agĩkĩmonia harĩa itũũra rĩu rĩatonyagĩrũo, nao magĩkĩrĩhũra na hiũ cia njora; no rĩrĩ, mũndũ ũcio nĩmaamũrekirie athiĩ hamwe na andũ othe a nyũmba yake.
26. Nake mũndũ ũcio agĩthiĩ bũrũri wa Ahiti, agĩaka itũũra kuo, akĩrĩĩta Luzu; narĩo rĩtũire rĩĩtagwo ũguo o na ũmũthĩ.
27. Nao andũ a Manase matiaingatire andũ arĩa maatũũraga Bethi-sheani hamwe na mĩciĩ yarĩo, o na kana arĩa maatũũraga Taanaka, hamwe na mĩciĩ yarĩo, kana arĩa maatũũraga Doru, hamwe na mĩciĩ yarĩo, kana arĩa maatũũraga Ibileamu, hamwe na mĩciĩ yarĩo, kana arĩa maatũũraga Megido, hamwe na mĩciĩ yarĩo; no rĩrĩ, Akanaani maagĩtũũrire bũrũri ũcio.
28. Na gũgĩkinya atĩrĩ, atĩ hĩndĩ ĩrĩa Aisiraeli maagĩire na hinya makĩria, makaheaga Akanaani mawĩra ma kũruta o ta ũrĩa maamaathaga, na matiamaingatire o kũmaingata biũ.
29. Nao andũ a Efiraimu matiigana kũingata Akanaani arĩa maatũire Gezeri; no rĩrĩ, Akanaani acio maatũũranirie nao o kũu Gezeri.
30. Nao andũ a Zebuluni matiigana kũingata andũ arĩa maatũũraga Kitironi, kana arĩa maatũũraga Nahaloli; no rĩrĩ, Akanaani acio maatũũranirie nao, nao Azebuluni makamaheaga mawĩra ma kũruta o ta ũrĩa maamaathaga.
31. Nao andũ a Asheri matiaingatire andũ arĩa maatũũraga Ako, kana arĩa maatũũraga Zidoni, o na kana arĩa maatũũraga Ahalabu, kana arĩa maatũũraga Akizibu, o na kana arĩa maatũũraga Heliba, kana arĩa maatũũraga Afiki, o na kana arĩa maatũũraga Rehobu;
32. no andũ acio a Asheri maatũũrire o kũu thĩinĩ wa Akanaani, o acio maatũũraga bũrũri ũcio, nĩ ũndũ matiamaingatire.
33. Nao andũ a Nafitali matiaingatire andũ arĩa maatũũraga Bethi-shemeshi, kana arĩa maatũũraga Bethi-anathu; no rĩrĩ, maatũũrire o kũu thĩinĩ wa Akanaani, o acio maatũũraga bũrũri ũcio; no rĩrĩ, andũ arĩa maatũũraga Bethi-shemeshi o na Bethi-anathu, nĩmaatuĩkire a kũmarutagĩra mawĩra o ta ũrĩa maamaathaga.
34. Nao Aamori makĩhatĩrĩria ciana cia Dani igĩtũũrio o kũu bũrũri ũrĩa wĩ irĩma nyingĩ na hinya; nĩ gũkorũo nĩmaacigiririe ciikũrũke ituamba-inĩ.
35. Ningĩ Aamori acio magĩtũũra kĩrĩma-inĩ kĩa Herezu, o na Aijaloni, o na Shaalibimu; no rĩrĩ, o na kũngĩtuĩka nĩ ũguo-rĩ, andũ acio a nyũmba ya Jusufu nĩmaamahootire, magĩgĩtuĩka a kũmarutagĩra mawĩra o ta ũrĩa maamaathaga.
36. Naguo mũhaka wa Aamori warutĩtio o rĩambatĩrĩro-inĩ rĩa Akirabimu, ũgakinya o rũaro-inĩ rũa ihiga, o na na kũu mbere yaruo.

Home