Go Back

1 Petero Chapter 4

• 1. HAKĨRĨ ũguo-rĩ, kuona atĩ Kristo nĩaanyarirĩkire arĩ na mwĩrĩ-rĩ, na inyuĩ wĩthagathagei na kĩrĩĩko o ta kĩrĩa aarĩ nakĩo, nĩ ũndũ mũndũ ũnyarirĩkĩte arĩ na mwĩrĩ nĩatiganĩte na wĩhia.
• 2. Wĩthagathagei ũguo, nĩ getha matukũ marĩa mũtigarĩtie ma gũikara mũrĩ na mwĩrĩ, mũtigaikarage mũgĩathagwo nĩ merirĩria ma andũ, no mũikarage mũgĩĩkaga maũndũ marĩa Ngai enda.
• 3. Nĩ ũndũ mahinda marĩa mathirĩte mo nĩmaiganĩte ma gwĩkaga maũndũ marĩa mendagwo nĩ andũ a Ndũrĩrĩ iria itoĩ Ngai, ta rĩrĩ, gũthiaga na mĩthiĩre ya ũũra-thoni, na ya kwĩrirĩria maũndũ moru, o na ya ũnyui, ningĩ gũthiaga maruga-inĩ kũrĩa kũinagĩrũo nyĩmbo itaagĩrĩire, o na ciathĩ-inĩ cia kũnyua njohi, o na kũhoyaga na mĩhoere ĩĩ mũgiro o ĩrĩa ya kũhoya mĩhianano.
• 4. Naho ha ũhoro wa maũndũ macio, nĩmagegaga tondũ mũtithiaga thiritũ nao hĩndĩ ĩrĩa makĩragĩrĩria ũmaramari ũcio wao, na magakĩmũcambagia.
• 5. Nao nĩmakaheana ũhoro wa maũndũ mao kwĩ ũrĩa wĩhaarĩirie gũtuĩra cira arĩa marĩ muoyo na arĩa makuĩte.
• 6. Na nĩkĩo gĩatũmire Ũhoro-ũrĩa-Mwega ũhunjĩrio o na andũ arĩa makuĩte, nĩ getha magatuĩrũo cira o ta ũrĩa andũ arĩa marĩ mwĩrĩ magatuĩrũo, no gũtũũra matũũre na muoyo wa roho, o ta muoyo ũrĩa Ngai atũũraga naguo.
• 7. No atĩrĩrĩ, ithirĩro rĩa maũndũ mothe nĩrĩkuhĩhĩirie: nĩ ũndũ ũcio ikaragai mũrĩ na ũũgĩ wa ngoro na mũterigĩtwo, nĩ getha mũhoyage Ngai wega:
• 8. na gũkĩra maũndũ mothe, tũũrai mwendanĩte o kwendana inyuene; nĩ ũndũ wendani nĩguo ũhumbagĩra mehia maingĩ.
• 9. Ningĩ tuganagai inyuene mũtekũng’ong’ora:
• 10. o ta ũrĩa o mũndũ wanyu aheetwo kĩheo kiumanĩte na Wega wa Ngai-rĩ, tungatanagĩrai o ro ũguo, ta mũrĩ aramati ega a Wega wa Ngai, ũrĩa wa mĩthemba mĩingĩ.
• 11. Mũndũ angĩkorũo akĩaria-rĩ, nĩaarie ta arĩ ciugo cia Ngai ekũheana; na mũndũ angĩkorũo agĩtungatanĩra-rĩ, nĩatungatanĩre na hinya ũrĩa ũheanagwo nĩ Ngai: nĩ getha Ngai akumagio maũndũ-inĩ mothe na ũndũ wa Jesu Kristo: nake nĩwe ũgũtũũra e na riri na wathani, nginya o tene na tene. Amen.
• 12. Endwa akwa, tigai kũgega nĩ ũndũ wa thĩna ũtariĩ ta mwaki ũrĩa ũkiriĩ kũmũkora, ũtuĩke wa kũmũgeria, ta arĩ ũndũ ũkũmũkora ũtarĩ wa ndũire:
• 13. no rĩrĩ, kenagai, kuona atĩ nĩmũgwatanĩire na Kristo kũnyarirĩka gwake; nĩ getha o na hĩndĩ ĩrĩa riri wake ũkaguũranĩrio, mũgakena o mũgĩcanjamũkaga.
• 14. Gũkena-rĩ, nĩ inyuĩ mũngĩrumwo nĩ ũndũ wa rĩĩtwa rĩa Kristo, nĩ ũndũ Roho ũrĩa mwene riri, o we Roho wa Ngai, aikaraga igũrũ rĩanyu.
• 15. No rĩrĩ, wĩmenyererei atĩ mũndũ o na ũrĩkũ wanyu ndakanae kũnyarirũo nĩ ũndũ wa gũtuĩka mũũragani, kana mũici, kana mũgeri ngero, o na kana mũndũ wa gwĩtonyereria maũndũ-inĩ mene.
• 16. Ĩndĩ mũndũ angĩnyarirũo nĩ ũndũ wa gũtuĩka Mũkristiano, nĩatige gũconoka; wega-rĩ, nĩakumagie Ngai nĩ ũrĩa atuĩtwo rĩĩtwa rĩu.
• 17. Tondũ rĩrĩ, hĩndĩ nĩ nginyu cira wambĩrĩre gũtuĩrũo andũ a nyũmba ya Ngai; naguo ũngĩambĩrĩra o kũrĩ ithuĩ-rĩ, kaĩ arĩa maremete Ũhoro-ũrĩa-Mwega wa Ngai makarigĩrĩria na ituĩro rĩhaana atĩa?
• 18. Na ningĩ angĩkorũo mũndũ ũrĩa mũthingu ekũhonoka na hinya-rĩ, kaĩ ũrĩa ũreganĩte na Ngai na ũrĩa mwĩhia magakĩona atĩa?
• 19. Hakĩrĩ ũguo-rĩ, andũ arĩa manyarirĩkaga kũringana na ũrĩa Ngai endete, nĩmamũtigagĩre mĩoyo yao, arĩ we Mũũmbi ũrĩa wa kwĩhokeka, na maikare magĩĩkaga maũndũ mega.

Home