Go Back

1 Petero Chapter 3

• 1. ŨGUO no taguo, inyuĩ atumia, athĩkagai nĩ athuri anyu, nĩguo atĩ angĩkorũo nĩharĩ amwe mataiguaga Ũhoro, mahote kũgarũrũo ngoro, Ũhoro ũtarĩ ho, nĩ mĩikarĩre ya atumia ao,
• 2. nĩ ũndũ wa kuonaga ũrĩa mũikaraga na mĩikarĩre ya ũthingu, na mwĩ na gĩtĩo.
• 3. Na kwĩgemia kwanyu nĩgũtige gũtuĩka o kwa mwĩrĩ, ta kũrama njuĩrĩ, na gwĩkĩra mathaga ma thahabu, kana kwĩhumba nguo;
• 4. nĩ kaba mwĩgemie na mũndũ ũrĩa wa hitho wa ngoro thĩinĩ, ta mwĩhumbĩte nguo ĩrĩa ĩtangĩbutha, o ĩrĩa ya kũhorera na gũkindĩria ngoro. Kwĩgemia ũguo nĩkuo kwĩ bata mũno harĩ Ngai.
• 5. Tondũ tene-rĩ, noguo atumia arĩa atheru mehokete Ngai megemagia, magĩathĩkaga nĩ athuri ao ene,
• 6. o ta ũrĩa Sara aaiguaga Iburahimu akĩmũtuaga mũmwathi; na inyuĩ rĩu mũrĩ ciana ciake, mũngĩkorũo mwĩkaga wega, mũtegwĩtigĩra kĩmakania o na kĩrĩkũ.
• 7. O ũguo taguo na inyuĩ athuri, tũũraniai na atumia anyu kũringana na ũrĩa mũũĩ arĩ wega; na mũtĩage mũndũ-wa-nja, tondũ wa ũrĩa atarĩ na hinya mwĩrĩ ta inyuĩ, ningĩ tondũ mũrĩ agai hamwe na atumia anyu a kũgaĩrũo Wega ũrĩa wa muoyo; mwĩkage ũguo nĩguo mahoya manyu matikarigĩrĩrio.
• 8. Na ngũrĩkĩrĩria atĩrĩrĩ, inyuothe gĩagai na ngoro o ĩmwe, na mũiguanagĩre tha, ningĩ mwendanage ta mũrĩ a nyina ũmwe, na mũtuĩke oima-andũ, o na mũikarage mwĩnyihĩtie.
• 9. Tigagai kwĩrĩhĩria ũũru na ũũru, o na kana kwĩrumĩra mwarumwo, nĩ kaba mũrathimanage, tondũ ũguo nĩguo mwĩtĩirũo, nĩ getha mũkagaĩrũo kĩrathimo.
• 10. Tondũ rĩrĩ, Mũndũ ũrĩa wendete gũkenera muoyo wake, Na eonagĩre matukũ mega, Ũcio nĩarigagĩrĩrie rũrĩmĩ rũake rũtikanoige ũũru, Na mĩromo yake ndĩkaanarie ũrongo:
• 11. Ningĩ nĩethemagie ũũru-inĩ, ekage o wega: Nĩacaragie thayũ o nginya kũũthingata.
• 12. Nĩ ũndũ maitho ma Mwathani merekeire na kũrĩ arĩa athingu, Namo matũ make magategerũo mathaithana mao: Ĩndĩ arĩa mekaga ũũru-rĩ, ũthiũ wa Mwathani nĩ kũmomĩra ũmomĩire.
• 13. Na rĩrĩ, mũngĩkorũo mũrĩ na kĩyo gĩa kwendaga maũndũ marĩa mega, kaĩ mũgagĩĩkwo ũũru nũ?
• 14. No gũkena-rĩ, nĩ inyuĩ mũngĩkorũo mũnyarirĩkaga nĩ ũndũ wa maũndũ marĩa maagĩrĩire. Na tigagai gwĩtigĩra maũndũ marĩa mũrĩĩkagwo ma kũmũmakia, o na kana mũtangĩkage;
• 15. no thĩinĩ, wa ngoro cianyu tuagai Kristo Mwathani mũkĩmwĩkagĩrĩra. Ningĩ ikaragai hĩndĩ ciothe mwĩhaarĩirie gũcokeria mũndũ o wothe ũrĩa ũngĩmũũria gĩtũmi kĩa ũhoro ũrĩa mũtũire mwĩrĩgagĩrĩra, no mũmũcokerie mũhoreire, na mwĩ na gĩtĩo;
• 16. na mũikarage mwĩ na thamiri itegwĩcuka, nĩ getha, mũngĩkorũo mũigĩrĩirũo ũndũ, andũ arĩa macambagia mĩthiĩre ĩrĩa mĩagĩrĩru mũthiaga nayo mũkĩhikagĩra Kristo maconoragwo.
• 17. Tondũ rĩrĩ, nĩ kaba kũnyarirĩka nĩ ũndũ wa gwĩkaga wega, Ngai angĩkorũo nĩguo endete-rĩ, kũrĩ kũnyarirĩka nĩ ũndũ wa gwĩkaga ũũru.
• 18. Tondũ Kristo nake nĩaanyarirĩkĩire mehia ihinda o rĩmwe, ũrĩa mũthingu ithenya rĩa arĩa matarĩ athingu, nĩ getha atũtware kwĩ Ngai: agĩkĩũragwo mwĩrĩ, no ha ũhoro wa roho agĩcoka gwĩkĩrũo muoyo.
• 19. Agĩthiĩ e na muoyo ũcio wa roho, akĩhunjĩria maroho marĩa maatũire mohetwo,
• 20. o marĩa maaremire tene, hĩndĩ ĩrĩa Ngai aametereire akirĩrĩirie matukũ-inĩ ma Nuhu, rĩrĩa thabina yaakagwo. Nayo thabina ĩo, nĩyo andũ anyinyi, nao no andũ anana, maahonokeire thĩinĩ wayo maĩ-inĩ.
• 21. Naguo ũhoro ũcio nĩguo ngerekano ya ũrĩa na inyuĩ mũhonokagio rĩu nĩ ũhoro wa kũbatithio - na ti ũhoro wa kweheria o gĩko kĩa mwĩrĩ, no nĩ wa gũkaĩra Ngai na thamiri njega - na ũndũ wa kũriũka kwa Jesu Kristo.
• 22. Nake nĩaathiire Igũrũ, agaikaraga guoko-inĩ kwa ũrĩo kwa Ngai, nao araika, na arĩa ene wathani, o na arĩa marĩ na hinya matuĩtwo a gwathagwo nĩwe.

Home