Go Back

1 Petero Chapter 1

• 1. NĨ niĩ Petero, mũtũmwo wa Jesu Kristo, ngũmwandĩkĩra marũa maya, inyuĩ andũ arĩa athure mũtũire ũgeni-inĩ, mũharaganĩire mabũrũri ma Ponto, na Galatia, na Kapadokia, na Asia, na Bithunia.
• 2. Nĩ gũthurũo mwathurirũo kũringana na ũrĩa Ngai Ithe witũ aamũmenyete o mbere, akamũtheria na Roho, nĩ getha mwathĩkagĩre Jesu Kristo na mũminjaminjĩrio thakame yake. Wega wa Ngai o na thayũ iromũingĩhĩra.
• 3. Atĩrĩrĩ, we ũrĩa ũrĩ Ngai wa Mwathani witũ Jesu Kristo, na nowe Ithe, arogathwo, o we watũciarire rĩngĩ nĩ ũndũ wa tha ciake nyingĩ, nĩ getha tũgĩe na kĩĩrĩgĩrĩro kĩĩ muoyo, nĩ ũndũ wa ũrĩa Jesu Kristo aariũkire akiuma kũrĩ arĩa akuũ,
• 4. na nĩ getha tũgwate igai rĩrĩa rĩtangĩbutha, rĩrĩa rĩtheru rĩtangĩhwererekera; narĩo nĩrĩo mũigĩirũo Igũrũ
• 5. o inyuĩ mũtũire mũrangagĩrũo nĩ hinya wa Ngai, nĩ ũndũ wa ũrĩa mwĩtĩkĩtie, nĩ getha mũkona ũhonokio ũrĩa ũhaarĩirio wa gũkaguũranĩrio mahinda-inĩ marĩa ma kũrigĩrĩria.
• 6. Na ũhoro ũcio nĩguo mũkenagĩra mũno, o na gwatuĩka atĩ no nginya mũkorũo mũiguithĩtio kĩeha kahinda, mũkĩgerio na magerio ma mĩthemba mĩingĩ,
• 7. nĩ getha wĩtĩkio wanyu, warĩkia kũgerio ta ũrugutĩirũo mwaki-inĩ, ũmenyeke atĩ nĩ wa bata gũkĩra thahabu ĩrĩa ĩthiraga, o na yatuĩka ĩrugutĩirũo mwaki-inĩ; naguo ũmũrehere rũgooco na riri na gĩtĩo, hĩndĩ ĩrĩa Jesu Kristo akaguũranĩrio.
• 8. Nake nĩwe mwendaga o na mũtarĩ mwamuona; ningĩ o na mũtamuonaga rĩu, nĩwe mwĩhokete, mũgaikara mũkenete mũno na gĩkeno kĩrĩa gĩtangĩheanĩka ũhoro wakĩo, o kĩrĩa kĩĩ na riri:
• 9. mũgakĩĩgwatĩra ũndũ ũrĩa mũtanyaga kuona uumanĩte na wĩtĩkio wanyu, naguo nĩ atĩ mũhonokio mĩoyo yanyu.
• 10. Naguo ũhonokio ũcio-rĩ, nĩguo ũrĩa anabii, arĩa maarathaga ũhoro wa Wega wa Ngai ũrĩa ũngĩgatuĩka wanyu, maageragia na kĩyo kũũmenya makĩũtuĩragia mũno.
• 11. Magatuĩragia mũno, mamenye nĩ ũndũ ũrĩkũ, kana nĩ hĩndĩ ĩrĩkũ, Roho wa Kristo ũrĩa warĩ thĩinĩ wao orotaga, rĩrĩa aaheanaga ũhoro, o mbere, wa maũndũ marĩa Kristo akanyarirũo namo, o na wa maũndũ mene riri marĩa magacoka kuoneka moimanĩte namo.
• 12. Nao nĩo maaguũrĩirio atĩrĩ, atĩ to ũndũ wao ene, no nĩ ũndũ wanyu maatuĩtwo ndungata cia kũheana maũndũ, o marĩa mũrĩkĩtie kũmenyithio rĩu nĩ andũ arĩa maanamũhunjĩria Ũhoro-ũrĩa-Mwega, magĩtaaragwo nĩ Roho Mũtheru ũrĩa watũmĩtwo oimĩte Igũrũ; namo maũndũ macio nĩmo araika mendaga mũno kũmacũthĩrĩria.
• 13. Tondũ ũcio, wĩhotorei meciria-inĩ manyu, na mũikarage mũterigĩtwo, mũkĩĩrĩgagĩrĩra o kwĩrĩgĩrĩra Wega wa Ngai, ũrĩa mũkareherũo hĩndĩ ĩrĩa Jesu Kristo akaguũranĩrio.
• 14. Tuĩkai ciana cia gwathĩka, na mũtikehaananie na mũhianĩre wa ũrĩa mwatariĩ mbere, rĩrĩa mwatũire mũtoĩ Ngai na mwathagwo nĩ merirĩria moru.
• 15. Ĩndĩ kuona atĩ ũrĩa wamwĩtire nĩ mũtheru, o na inyuĩ tuĩkai atheru mĩthiĩre-inĩ yanyu yothe;
• 16. nĩ ũndũ kwandĩkĩtwo atĩrĩ, No nginya mũtuĩke atheru, nĩ ũndũ niĩ ndĩ mũtheru.
• 17. Na rĩrĩ, mwakorũo mũkayagĩra Ngai mũkĩmũtuaga Ithe wanyu, o we ũtuagĩra o mũndũ o mũndũ kũringana na ciĩko ciake, ategũthurania-rĩ, gĩikaragei mũmwĩtigĩrĩte hĩndĩ ĩno mũtũire mũrĩ agendi gũkũ thĩ.
• 18. Nĩ ũndũ nĩmũũĩ atĩ rĩrĩa mwakũũrirũo mũtigane na mĩtũũrĩre yanyu ya tũhũ ĩrĩa mwatigĩirũo nĩ maithe manyu, ti indo ibuthaga ta betha na thahabu mwakũũrirũo nacio;
• 19. no nĩ thakame ya goro mũno, ta ya gatũrũme gatarĩ na kaũũgũ o na kana kĩmeni, na nĩyo thakame ya Kristo.
• 20. Nake nĩwe waathĩrĩirio o mbere, thĩ ĩno ĩtanombwo, atĩ nĩwe ũgeka ũguo, no nĩaaguũranĩirio o ithirĩro-inĩ rĩa mahinda maya nĩ ũndũ wanyu,
• 21. o inyuĩ mũtuĩkĩte a gwĩtĩkia Ngai na ũndũ wake, o we Ngai ũrĩa wamũriũkirie oime kũrĩ arĩa akuũ, akĩmũhe riri, nĩ getha mũtũũre mwĩtĩkĩtie na mwĩrĩgĩrĩire o Ngai.
• 22. Kuona atĩ nĩmũtheretie mĩoyo yanyu nĩ gwathĩkĩra ũhoro-ũrĩa-wa-ma, mũgagĩtuĩka a kwendana na ariũ a Ithe witũ hatarĩ ũhinga-rĩ, endanagai o kwendana na ngoro cianyu;
• 23. nĩ ũndũ wa ũrĩa mũciarĩtwo rĩngĩ mũciarĩre ũrĩa ũtoimanĩte na mbeũ ĩrĩa ĩbuthaga, tiga o ĩrĩa ĩtabuthaga, na ũndũ wa Ũhoro wa Ngai, o Ũhoro ũrĩa wĩ muoyo na ũtũũraga tene na tene.
• 24. Tondũ rĩrĩ, Andũ othe mahaana ta nyeki, Na ũthaka wao wothe ũtariĩ ta wa kĩro kĩa nyeki. Nyeki ĩo nĩyũmaga, na kĩro kĩayo gĩgaitĩka:
• 25. No rĩrĩ, kiugo kĩa Mwathani nĩgĩtũũraga tene na tene. Nakĩo kiugo kĩu nokĩo kĩrĩa kĩa Ũhoro-ũrĩa-Mwega mwahunjĩirio.

Home