Go Back

Joshua Chapter 9

• 1. Na gũgĩkinya atĩrĩ, atĩ hĩndĩ ĩrĩa athamaki othe arĩa maatũire mũrĩmo ũyũ wa Jorodani, bũrũri ũrĩa wĩ irĩma nyingĩ, o na ituamba-inĩ, o na hũgũrũrũ-inĩ cia Iria rĩrĩa Rĩnene, kũng’ethera Lebanoni, maaiguire maũndũ macio, Ahiti, na Aamori, na Akanaani, na Aperizi, na Ahivi, na Ajebusi,
• 2. magĩĩcokanĩrĩria othe hamwe marĩ na ngoro o ro ĩmwe nĩguo makahũrane na Joshua na Isiraeli.
• 3. No rĩrĩ, hĩndĩ ĩrĩa andũ arĩa maatũire Gibeoni maaiguire ũrĩa Joshua ekĩte Jeriko, o na Ai,
• 4. magĩĩka ũndũ wa wara; magĩgĩthiĩ metuĩte ta andũ maareketio; na magĩkuua makũnia makũrũ na ndigiri ciao, o na mondo ngũrũ cia ndibei nduĩkangu, na igatumwo na ndigi,
• 5. na magekĩra iratũ ngũrũ ndaate magũrũ mao, o na makehumba nguo ngũrũ mwĩrĩ; nacio irio ciao ciothe cia rĩĩgu ciarĩ nyũmũ, na ikagwata rũĩ.
• 6. Nao magĩgĩthiĩ kwĩ Joshua kĩraaro-inĩ gĩake o kũu Giligali, makĩmwĩra we mwene, o na andũ othe a Isiraeli atĩrĩ, Tuumĩte bũrũri ũraihanĩrĩirie mũno na gũkũ; na tondũ ũcio rĩu gĩai kĩrĩkanĩro na ithuĩ.
• 7. Nao andũ a Isiraeli magĩkĩĩra Ahivi acio atĩrĩ, Hihi no gũkorũo mũtũũrĩte o gũkũ tũrĩ, na twakĩhota atĩa kũgĩa kĩrĩkanĩro na inyuĩ?
• 8. Nao magĩkĩĩra Joshua atĩrĩ, Tũrĩ ndungata ciaku. Ningĩ Joshua agĩkĩmoria atĩrĩ, Ĩ inyuĩ mũrĩ a? Na muumĩte kũ?
• 9. Nao makĩmwĩra atĩrĩ, Ithuĩ ndungata ciaku tuumĩte bũrũri ũraihanĩrĩirie mũno na gũkũ, na rĩu twoka nĩ ũndũ wa rĩĩtwa rĩa Jehova Ngai waku; nĩ ũndũ nĩtũiguĩte ngumo yake, o na maũndũ mothe marĩa ekire Misiri;
• 10. o na marĩa mothe ekire athamaki arĩa erĩ a Aamori, arĩa maarĩ mũrĩmo ũcio ũngĩ wa Jorodani, nao nĩ Sihoni, mũthamaki wa Heshiboni, o na Ogu, mũthamaki wa Bashani, ũrĩa watũire Ashiterothu.
• 11. Nao athuri aitũ, o na andũ othe a bũrũri witũ, maatwarĩirie, magĩtwĩra atĩrĩ, Wĩkuuĩrei rĩĩgu na moko manyu nĩ ũndũ wa rũgendo, mũthiĩ mũgatũngane na andũ acio, mũmere atĩrĩ, Ithuĩ tũrĩ ndungata cianyu; na rĩu gĩai kĩrĩkanĩro na ithuĩ.
• 12. Mũthenya ũrĩa twoimagarire tũũke kũrĩ inyuĩ-rĩ, irio ici ciitũ twarutire mĩciĩ iitũ cia rĩĩgu ciarĩ hiũ; no rĩrĩ, rĩu ta gĩcibarei, muone atĩ nĩciũmĩte, na ikagwata rũĩ;
• 13. o nacio mondo ici, o ici twaiyũrĩtie ndibei, ciarĩ njerũ; na rĩrĩ, rĩu ta gĩcibarei, muone atĩ nĩituĩkangĩte; o nacio nguo ici ciitũ, o na iratũ, nĩikũrĩte, nĩ ũndũ wa rũgendo kũraiha mũno.
• 14. Nao andũ acio a Isiraeli makĩoya irio imwe cia andũ acio, na matituĩrie ũhoro he Jehova.
• 15. Nake Joshua akĩara ũhoro nao, na akĩrĩkanĩra nao atĩ areke matũũre muoyo; o nao anene a kĩrĩndĩ gĩa ciana cia Isiraeli makĩmahe ũhoro na mwĩhĩtwa.
• 16. Na gũgĩkinya atĩrĩ, atĩ mĩthenya ĩtatũ yathira thutha wa maarĩkia kũrĩkanĩra, magĩcoka kũigua atĩ andũ acio maakanĩtie o nao, na atĩ matũũraga o thĩinĩ wao.
• 17. Nacio ciana cia Isiraeli igĩthiĩ rũgendo, igĩkinya matũũra ma andũ acio mĩthenya ĩtatũ yathira. Namo matũũra mao maarĩ Gibeoni, na Kefira, na Beerothu, na Kiriathu-jearimu.
• 18. Nacio ciana cia Isiraeli itiigana kũmahũra, nĩ ũndũ wa ũrĩa anene a kĩrĩndĩ gĩacio maarĩtie nao na mwĩhĩtwa ũkoniĩ Jehova Ngai wa Isiraeli. Nakĩo kĩrĩndĩ kĩu gĩothe gĩgĩteta nĩ ũndũ wa anene acio ao.
• 19. No rĩrĩ, anene acio othe makĩĩra kĩrĩndĩ kĩu gĩothe ũũ: Nĩtũrĩkĩtie kũhe andũ acio ũhoro na mwĩhĩtwa ũkoniĩ Jehova, Ngai wa Isiraeli; na tondũ ũcio tũtingĩmahutia.
• 20. Ũrĩa tũkũmeka-rĩ, nĩ ũũ: nĩ tũreke matũũre muoyo, nĩ getha tũtigacokererũo nĩ mang’ũrĩka nĩ ũndũ wa mwĩhĩtwa ũrĩa twĩhĩtĩte nĩ ũndũ wao.
• 21. Anene acio magĩkĩĩra ciana cia Isiraeli atĩrĩ, Rekei matũũre muoyo; na tondũ ũcio magĩgĩtuĩka oini ngũ na atahi maĩ a kĩrĩndĩ gĩothe gĩa ciana cia Isiraeli, o ta ũrĩa anene acio maaciĩrire.
• 22. Ningĩ Joshua agĩkĩmeta, akĩmaarĩria, akĩmoria atĩrĩ, Mwatũhenirie nĩkĩ, mũkiuga atĩ, Tũrĩ a kũraya mũno na kwanyu, na mũgĩikarĩte o gũkũ thĩinĩ witũ?
• 23. Tondũ ũcio rĩu nĩmũgũtũũra mũgwatĩtwo nĩ kĩrumi; na thĩinĩ wanyu hatikaaga kuonwo o na rĩ, ngombo, o na oini ngũ, o na atahi maĩ, nĩ ũndũ wa mawĩra ma nyũmba ya Ngai wakwa.
• 24. Nao magĩgĩcokeria Joshua, makĩmwĩra atĩrĩ, Nĩ ũndũ ithuĩ ndungata ciaku nĩtwerirũo na ma, o ma, ũhoro wa ũrĩa Jehova Ngai waku aathanire akĩĩra Musa, ndungata yake, atĩ amũhe inyuĩ bũrũri ũyũ wothe, na atĩ anine andũ othe arĩa maũtũũraga, mehere mbere yanyu; na tondũ ũcio nĩtwagĩĩtigĩrire mũno mũno nĩ ũndũ wa gwĩciria atĩ hihi nĩtũkũũragwo nĩ inyuĩ, na nĩkĩo twekire ũndũ ũcio.
• 25. Na atĩrĩrĩ, rĩu twĩ guoko-inĩ gwaku na tondũ ũcio twĩke o ta ũrĩa wee mwene ũrĩona arĩ wega, na ũrĩa wĩ kĩhooto.
• 26. Nake agĩkĩmeka o ta ũguo, akĩmahonokia harĩ ciana cia Isiraeli, igĩtiga kũmoraga.
• 27. Nake Joshua mũthenya o ro ũcio akĩmatua oini ngũ o na atahi maĩ a kĩrĩndĩ kĩu gĩa ciana cia Isiraeli, o na a kĩgongona-inĩ kĩa Jehova o handũ harĩa angĩthura, nginya o mũthenya wa ũmũthĩ.

Home