Go Back

Joshua Chapter 8

• 1. Ningĩ Jehova agĩkĩĩra Joshua atĩrĩ, Menya wĩtigĩre, o na kana ũmake; oya andũ othe a ita, mũũkĩre mwambate nao mũkinye Ai. Atĩrĩrĩ, mũthamaki wa Ai nĩndĩmũrekereirie ngamũneana moko-inĩ maku, me hamwe na andũ ake, o na itũũra rĩake, o na bũrũri wake;
• 2. nawe ũgwĩka Ai, o na mũthamaki warĩo, o ta ũrĩa wekire Jeriko na mũthamaki warĩo, tiga o ũndũ ũyũ ũmwe, atĩ indo ciarĩo iria mũgũtaha, hamwe na ũhiũ warĩo, nĩ inyuĩ mũkwĩgwatĩra ituĩke cianyu; ikarai muohetie andũ a itũũra rĩu na kũu nyunjurĩ yarĩo.
• 3. Tondũ ũcio Joshua agĩkĩarahũka, me hamwe na andũ ake othe a ita, nĩguo maambate makinye Ai; nake Joshua agĩgĩĩthurĩra andũ ngiri mĩrongo ĩtatũ, njamba irĩ hinya, akĩmarekia mathiĩ ũtukũ.
• 4. Nake agĩkĩmaatha akĩmera ũũ, Atĩrĩrĩ, inyuĩ mũgũikara na nyunjurĩ ya itũũra muohie andũ arĩo; na mũtigathiĩ haraya na itũũra rĩu, no inyuothe ikarai mwĩhaarĩirie;
• 5. niĩ na niĩ twĩ hamwe na andũ aya othe twĩ nao, tũthengerere itũũra-inĩ rĩu; na gũgakinya atĩrĩ, atĩ hĩndĩ ĩrĩa mariuma o ta ũrĩa mekire hĩndĩ ya mbere, atĩ nĩguo tũhũrane nao-rĩ, ithuĩ tũkĩmorĩre;
• 6. nao moimagare matũrũmĩrĩre, o nginya tũmagucĩrĩrie moime itũũra rĩao, nĩ ũndũ mariuga atĩrĩ, Nĩ kũũra maratũũrĩra o ta ũrĩa mekire rĩa mbere. Ũguo nĩguo tũrĩmorĩra.
• 7. Hĩndĩ ĩo inyuĩ na inyuĩ mũũkĩre muume kũrĩa mũmoheirie, mwĩgwatĩre itũũra rĩu, nĩ gũkorũo Jehova Ngai wanyu nĩekũrĩneana moko-inĩ manyu.
• 8. Na nĩgũgakinya atĩrĩ, atĩ mwegwatĩra itũũra rĩu, mũgĩcoke mũrĩikie mwaki; mwĩke o ta ũrĩa Jehova oigĩte gwĩkwo. Atĩrĩrĩ, ũguo nĩguo ndamwatha mũgeka.
• 9. Joshua agĩkĩmarekia mathiĩ; nao magĩgĩthiĩ o handũ harĩa merĩtwo makoherie andũ, magĩgĩikara gatagatĩ ka Beth-eli na Ai, mwena wa ithũĩro wa Ai; no rĩrĩ, Joshua mũthenya ũcio aaraaranirie na andũ acio angĩ.
• 10. Nake Joshua agĩkĩroka gũũkĩra rũcinĩ tene, agĩcokanĩrĩria andũ, nake we mwene, me na athuri a Isiraeli, magĩthiĩ mbere ya andũ, merekeire Ai.
• 11. Nao andũ othe, o andũ acio a ita maarĩ hamwe nake, magĩkĩambata, magĩthiĩ, magĩthengerera itũũra rĩu o mbere yarĩo, magĩĩthondekera kĩraaro mwena wa gathigathini wa Ai; na rĩrĩ, gatagatĩ-inĩ gake na Ai, haarĩ kĩanda
• 12. Nake agĩkĩoya andũ ta ngiri ithano, akĩmaiga mwena wa ithũĩro wa Ai, o gatagatĩ ka Betheli na itũũra rĩu, mohie andũ.
• 13. Ũguo nĩguo maaigire andũ acio, naguo ũguo nĩ ta kuuga ita ĩo yothe yaigĩtwo mwena wa gathigathini wa itũũra rĩu, hamwe na andũ arĩa angĩ maamoheirie andũ me mwena wa ithũĩro wa itũũra rĩu; nake Joshua ũtukũ ũcio agĩthiĩ kũraara o kĩanda-inĩ kĩu gatagatĩ.
• 14. Na gũgĩkinya atĩrĩ, atĩ hĩndĩ ĩrĩa mũthamaki wa Ai onire ũguo, makĩroka gũũkĩra rũcinĩ tene mahiũhĩte, nao andũ a itũũra rĩu makiumagara hamwe na mũthamaki warĩo we mwene, o na andũ ake othe, o ihinda rĩrĩa rĩatuĩtwo, magĩgĩthiĩ marorete kĩanda werũ-inĩ, nĩ getha makarũe mbaara na Isiraeli; no rĩrĩ, mũthamaki ũcio ndaamenyete atĩ harĩ andũ mamuohetie na thutha wa itũũra rĩu.
• 15. Nake Joshua o na Aisiraeli othe magĩĩtua ta mahũrĩtwo magatorio biũ nĩo, magĩkĩũra marorete na njĩra ya werũ.
• 16. Nao andũ othe arĩa maarĩ kũu itũũra-inĩ thĩinĩ magĩĩtwo macokanĩrĩre othe hamwe, nĩ getha mamarũmĩrĩre na ihenya; nao magĩkĩrũmĩrĩra Joshua na ihenya, magĩkĩgucio magĩthiĩ haraya na itũũra rĩao.
• 17. Nakuo kũu matũũra-inĩ ma Ai na Beth-eli gũtiatigarire mũndũ o na ũmwe ũtarũmĩrĩire Isiraeli; narĩo itũũra rĩao magĩkĩrĩtiga rĩhingũrĩtwo o ro ũguo, makĩrũmĩrĩra Isiraeli.
• 18. Nake Jehova agĩkĩĩra Joshua atĩrĩ, Ambararia itimũ rĩu ũnyitĩte na guoko, ũrĩrorie Ai, nĩ gũkorũo nĩngũrĩneana moko-inĩ maku. Nake Joshua agĩkĩambararia itimũ rĩu aarĩ narĩo guoko arĩroretie o kũu itũũra-inĩ rĩu.
• 19. Na rĩrĩ, Joshua aambararia guoko gwake na igũrũ, andũ acio mohetie andũ magĩgĩũkĩra narua mũno, makiuma hau maaikarĩte, magĩgĩteng’era na ihenya mũno, magĩtonya itũũra rĩu, makĩrĩtunyana, magĩkĩrĩikia mwaki o narua.
• 20. Na rĩrĩa andũ acio a Ai maarorire na thutha-rĩ, atĩrĩrĩ, magĩkĩona ndogo yumĩte itũũra rĩu rĩao ĩhaicĩte na igũrũ ĩgakinya o matu-inĩ, nao magĩkĩremwo nĩ kũũra ũũ kana ũũ; nao andũ arĩa morĩte marorete werũ-inĩ magĩkĩhũndũka, magĩcokerera acio maamateng’eretie.
• 21. Nake Joshua, o na Isiraeli othe, rĩrĩa monire atĩ andũ arĩa mohetie andũ nĩmatunyanire itũũra rĩu, nayo ndogo yarĩo yahaica na igũrũ, magĩkĩhũndũka makĩũraga andũ acio a Ai.
• 22. Nao acio angĩ magĩkiumagara moimĩte kũu itũũra-inĩ thĩinĩ makamahũre; tondũ ũcio andũ a Ai magĩkĩgĩa gatagatĩ ga Isiraeli, amwe mamagĩĩte mwena ũyũ, na amwe mwena ũyũ ũngĩ; nao aa Joshua magĩkĩmahũra na matitigarie mũndũ o na ũmwe, kana makĩreka o na ũmwe ahonoke.
• 23. Nake mũthamaki wa Ai, magĩkĩmũnyita arĩ muoyo, makĩmũtwarĩra Joshua.
• 24. Na gũgĩkinya atĩrĩ, atĩ hĩndĩ ĩrĩa Isiraeli maarĩkirie kũũragĩra andũ othe arĩa maatũũraga Ai gĩthaka-inĩ, o kũu werũ-inĩ kũrĩa maamateng’ereirie, nao othe magĩkĩninwo na hiũ cia njora o nginya magĩthira biũ-rĩ, Aisiraeli othe magĩgĩcoka Ai, magĩkĩrĩhũra na hiũ cia njora.
• 25. Nao andũ othe arĩa maakuire mũthenya ũcio, arũme na andũ-a-nja, maarĩ ngiri ikũmi na igĩrĩ; naguo ũguo nĩ ta kuuga andũ othe a Ai.
• 26. Nĩ gũkorũo Joshua ndaigana gũthuna guoko gwake kũrĩa aambararĩtie itimũ nakuo, o nginya hĩndĩ ĩrĩa aaninire andũ othe arĩa maatũũraga Ai, o kũmanina biũ.
• 27. No rĩrĩ, ũhiũ wiki, o na indo iria maatahire itũũra-inĩ rĩu-rĩ, nocio Aisiraeli megwatĩire magĩthiĩ nacio, o ta ũrĩa uuge wa Jehova ũrĩa aathĩte Joshua watariĩ.
• 28. Ũguo nĩguo Joshua aacinire Ai akĩrĩtua kĩhumbu kĩa mahuti tene na tene, o na kũndũ gũkiru ihooru o na ũmũthĩ.
• 29. Nake mũthamaki wa Ai, Joshua akĩmũcuuria mũtĩ igũrũ o nginya hwaĩ-inĩ; narĩo riũa rĩgĩthiĩ gũthũa, Joshua agĩathana, nao andũ magĩikũrũkia kĩimba gĩake, magĩkĩruta mũtĩ igũrũ, magĩgĩikia itonyero-inĩ rĩa kĩhingo gĩa itũũra rĩu, magĩcoka magĩkĩũmbĩrĩra hĩba nene mũno ya mahiga, nayo ĩtũire kuo o na ũmũthĩ.
• 30. Thutha wa ũguo Joshua agĩgĩakĩra Jehova Ngai wa Isiraeli kĩgongona o kũu kĩrĩma-inĩ kĩa Ebali,
• 31. o ta ũrĩa Musa ndungata ya Jehova aathire ciana cia Isiraeli ciĩke, o ta ũrĩa kwandĩkĩtwo ibuku-inĩ rĩa watho wa Musa, agĩgĩaka kĩgongona kĩu na mahiga matarĩ maicũhie, marĩa matarĩ mũndũ o na ũmwe ũmoeire kĩgera na igũrũ; nao magĩkĩrutĩra Jehova indo cia mahaki ma njino o hau, o na makĩruta magongona ma ũiguano.
• 32. Nake agĩkĩandĩka watho wa Musa mahiga-inĩ macio igũrũ, o ta ũrĩa wahaanaga, ciana cia Isiraeli irĩ ho ikĩĩonagĩra.
• 33. Nao Aisiraeli othe, o na athuri ao, na anene ao, o na aciri ao, makĩrũgama mwena ũyũ wa ithandũkũ rĩa Jehova, o na mwena ũrĩa ũngĩ mang’etheire athĩnjĩri-Ngai Alawii arĩa maakuuaga ithandũkũ rĩu rĩa kĩrĩkanĩro kĩa Jehova, nake mũndũ ũrĩa mũgeni wao akĩgĩa o ho, o ta mũndũ ũrĩa ũciarĩtwo e wa rũrĩrĩ rũao; na rĩrĩ, gĩkundi kĩmwe kĩao gĩkĩrũgama kĩng’etheire kĩrĩma kĩa Gerizimu, o nakĩo gĩkundi kĩrĩa kĩngĩ gĩkĩrũgama kĩng’etheire kĩrĩma kĩa Ebali, o ta ũrĩa Musa ndungata ya Jehova yathanĩte atĩ andũ a Isiraeli maambage kũrathimwo maũndũ marĩa mangĩ mothe matanekwo.
• 34. Na thutha wa ũguo Joshua agĩthoma ciugo ciothe cia watho ũcio, agĩgĩthoma mohoro ma kĩrathimo, o na ma kĩrumi, o ta ũrĩa maũndũ mothe maatariĩ marĩa maandĩkĩtwo ibuku-inĩ rĩu rĩa watho.
• 35. Na rĩrĩ, hatiarĩ kiugo o na kĩmwe kĩa maũndũ mothe marĩa maathanĩtwo nĩ Musa Joshua ataathomeire mbere ya kĩrĩndĩ kĩu gĩothe gĩa Isiraeli, andũ othe akĩo marĩ ho, o na atumia, na ciana, o na ageni arĩa maatũũranĩtie nao.

Home