Go Back

Joshua Chapter 5

• 1. Na gũgĩkinya atĩrĩ, atĩ hĩndĩ ĩrĩa athamaki othe a Aamori arĩa maatũũraga mũrĩmo ũcio wa Jorodani, o kũu mwena wa ithũĩro, o na athamaki othe a Kanaani, arĩa maatũũraga gũkuhĩ na iria, maaiguire ũrĩa Jehova ahũithĩtie maĩ ma Jorodani makeherera ciana cia Isiraeli, o nginya hĩndĩ ĩrĩa twakorirũo tũringĩte mũrĩmo-rĩ, makĩiyũrũo nĩ maĩ nda, makĩigua ngoro ciao ta ikuĩte o gũkua nĩ undũ wa ciana cia Isiraeli.
• 2. Hĩndĩ ĩo Jehova agĩkĩĩra Joshua atĩrĩ, Thondeka hiũ cia mahiga ma nyaigĩ, ũroke kwerũhia ũhoro wa irua harĩ ciana cia Isiraeli.
• 3. Joshua agĩgĩĩthondekithĩria hiũ cia mahiga ma nyaigĩ, akĩruithithĩria ciana cia Isiraeli kĩrĩma-inĩ kĩrĩa gĩetagwo Kĩrĩma gĩa Ikonde.
• 4. Na rĩrĩ, ũndũ ũrĩa watũmire Joshua aruithithanie nĩ rĩrĩ, nĩ atĩ arũme othe arĩa moimire Misiri, o acio othe maathiaga ita, nĩmaakuĩrĩire o kũu werũ me rũgendo-inĩ, thutha wa moima Misiri,
• 5. nao othe maarĩ aruu; no rĩrĩ, arũme arĩa othe maaciarĩirũo werũ-inĩ hĩndĩ ĩo maarĩ rũgendo-inĩ makiuma Misiri matiamaruithĩtie.
• 6. Nĩ ũndũ ciana cia Isiraeli ciacangire werũ-inĩ mĩaka mĩrongo ĩna, o nginya hĩndĩ ĩrĩa rũrĩrĩ rũu ruothe, naguo ũguo nĩ ta kuuga andũ othe a ita arĩa moimire Misiri, maaninũkirio, nĩ ũndũ wa ũrĩa mataaiguire uuge wa Jehova. Nao nĩo andũ arĩa Jehova erire na mwĩhĩtwa atĩ ndakareka makone bũrũri ũrĩa erĩire maithe mao na mwĩhĩtwa atĩ nĩakamahe, naguo nĩguo bũrũri wĩ bũthi wa iria na ũũkĩ.
• 7. Nacio ciana ciao, iria Jehova aarahũrire ciikare ithenya rĩao, icio nĩcio ciaruithithirio nĩ Joshua; nĩ ũndũ ciatũire itaruithĩtio, nĩ gũkorũo matiaciruithĩirie rũgendo-inĩ.
• 8. Na gũgĩkinya atĩrĩ, atĩ hĩndĩ ĩrĩa maarĩkirie kũruithia rũrĩrĩ rũu ruothe, andũ othe aruo magĩikara handũ hao o nginya makĩhona.
• 9. Nake Jehova akĩĩra Joshua atĩrĩ, Ũmũthĩ nĩguo ndeheria rũmena rũa Misiri ruume kũrĩ inyuĩ. Na tondũ ũcio handũ hau hagĩtuwo Giligali o na ũmũthĩ.
• 10. Nacio ciana cia Isiraeli igĩkĩamba hema ciacio hau Giligali; nacio ikĩrĩa gĩathĩ kĩa Bathaka mũthenya wa ikũmi na ĩna wa mweri ũcio, o hwaĩ-inĩ, irĩ kũu werũ-inĩ ũcio wa Jeriko.
• 11. Naguo mũthenya o ro ũcio wa kerĩ thutha wa Bathaka ikĩrĩa irio iria ciarĩ o kũu mĩgũnda-inĩ ya bũrũri ũcio, ithondeketwo igatuwo mũgate ũtarĩ mũimbie, o na ngano hĩhie.
• 12. Naguo mũthenya ũyũ ũngĩ wa kerĩ thutha wa mũthĩ ũcio ciarĩire irio ciarĩ kũu, mana makĩroka kwaga, nacio ciana cia Isiraeli itiigana gũcoka kuona mana rĩngĩ; no rĩrĩ, ciarĩire maciaro ma bũrũri ũcio wa Kanaani mwaka ũcio.
• 13. Na gũgĩkinya atĩrĩ, atĩ hĩndĩ ĩrĩa Joshua aarĩ kũu gũkuhĩ na Jeriko, agĩtiira maitho, agĩcũthĩrĩria, na atĩrĩrĩ, hakĩrũgama mũndũ amũng’etheire, anyitĩte rũhiũ rũake na guoko rũĩ rũcomore; nake Joshua agĩgĩthiĩ harĩ we, akĩmũũria atĩrĩ, Wĩ wa mwena witũ, kana wĩ wa mwena wa thũ ciitũ?
• 14. Nake akĩmũcokeria atĩrĩ, Aca; njũkĩte rĩu ta ndĩ mũnene wa mbũtũ ya ita cia Jehova. Nake Joshua akĩĩgũithia, agĩturumithia ũthiũ thĩ, akĩmũgooca, agĩcoka akĩmũũria atĩrĩ, Nĩ ũhoro ũrĩkũ, Wee, Mwathi wakwa, ũkwenda kũ’he, niĩ ndungata yaku?
• 15. Nake mũnene ũcio wa mbũtũ ya ita cia Jehova akĩĩra Joshua atĩrĩ, Amba ũrute iratũ ciaku magũrũ, nĩ gũkorũo handũ hau ũrũngiĩ nĩ haamũre. Nake Joshua agĩgĩĩka o ta ũguo.

Home