Go Back

Joshua Chapter 21

• 1. Na rĩrĩ, hĩndĩ ĩo anene a mbarĩ cia mũhĩrĩga wa Lawii magĩthengerera Eleazaru, mũthĩnjĩri-Ngai, o na Joshua wa Nuni, o na andũ arĩa maarĩ ciongo cia mbarĩ cia mĩhĩrĩga ya ciana cia Isiraeli;
• 2. magĩkĩarĩria nao kũu Shilo, bũrũri wa Kanaani, makĩmera atĩrĩ, Jehova nĩaathanire akĩĩra Musa atĩ tũkaheo matũũra tũmatũũrage, o na tũkaheo ithaka imarigicĩirie cia ũrĩithio, kũrĩa tũrĩrĩithagia ũhiũ witũ.
• 3. Nacio ciana cia Isiraeli igĩkĩhe Alawii matũũra maya, hamwe na ithaka imarigicĩirie cia ũrĩithio igai-inĩ rĩacio, o ta ũrĩa Jehova aathanire gwĩkwo.
• 4. Na rĩrĩ, mĩtĩ yacukwo-rĩ, mbarĩ ya Akohathi makĩamba kũgũĩrũo nĩguo; nacio ciana cia Haruni, mũthĩnjĩri-Ngai, o icio ciarĩ Alawii, ikĩgũĩrũo nĩ matũũra ikũmi na matatũ mĩhĩrĩga-inĩ ya Juda, na Simeoni, o na Benjamini.
• 5. Nacio ciana iria ingĩ cia Kohathi ciacukĩrũo mĩtĩ, ikĩgũĩrũo nĩ matũũra ikũmi mĩhĩrĩga-inĩ ya Efiraimu, na Dani, o na mũhĩrĩga-inĩ wa nuthu ya Manase.
• 6. Nacio ciana cia Gerishoni ikĩgũĩrũo nĩ matũũra ikũmi na matatũ bũrũri wa mbarĩ cia mũhĩrĩga wa Isakaru, na mĩhĩrĩga-inĩ ya Asheri, na Nafitali, o na mũhĩrĩga-inĩ wa nuthu ĩrĩa ĩngĩ ya Manase o kũu Bashani.
• 7. O nacio ciana cia Merari ikĩgũĩrũo nĩ matũũra ikũmi na merĩ, o ta ũrĩa mbarĩ ciacio ciatariĩ, mĩhĩrĩga-inĩ ya Reubeni, na Gadi, o na Zebuluni.
• 8. Ciana cia Isiraeli igĩkĩhe Alawii matũũra macio, hamwe na ithaka imarigicĩirie cia ũrĩithio na ũndũ wa gũcukĩrũo mĩtĩ, o ta ũrĩa Jehova aathire Musa gwĩkwo.
• 9. Nacio igĩcihe o kũu bũrũri wa mũhĩrĩga wa ciana cia Juda, o na bũrũri wa mũhĩrĩga wa ciana cia Simeoni, matũũra maya magwetetwo marĩĩtwa mamo haha kabere;
• 10. namo magĩkĩheo ciana cia Haruni, cia mbarĩ cia Akohathi, o iria ciarĩ ciana cia Lawii; nĩ gũkorũo nĩcio ciaambire kũgũĩrũo nĩ mũtĩ wacio mĩtĩ yacukwo.
• 11. Igĩgĩcihe Kiriathu-ariba, hamwe na ithaka irĩrigicĩirie cia ũrĩithio kũu bũrũri ũcio wĩ irĩma nyingĩ wa Juda; nake Ariba ũcio nĩwe warĩ ithe wa Ahaki (narĩo itũũra rĩu norĩo Hebironi).
• 12. No rĩrĩ, mĩgũnda ya itũũra rĩu, o na tũtũũra twarĩo ikĩhe Kalebu wa Jefune, gũtuĩke igai rĩake.
• 13. Ciana icio cia Haruni, mũthĩnjĩri-Ngai, igĩkĩheo Hebironi, itũũra rĩu rĩa kũũrĩrũo nĩ mũndũ ũrĩa ũũraganĩte, hamwe na ithaka irĩrigicĩirie cia ũrĩithio; na ikĩheo Libina, hamwe na ithaka icio ciarĩo;
• 14. na Jatiru, hamwe na ithaka icio ciarĩo; na Eshitemoa, hamwe na ithaka icio ciarĩo;
• 15. na Holoni, hamwe na ithaka icio ciarĩo; na Debiri, hamwe na ithaka icio ciarĩo;
• 16. na Aini, hamwe na ithaka icio ciarĩo; na Juta, hamwe na ithaka icio ciarĩo na Bethi-shemeshu, hamwe na ithaka icio ciarĩo; mabũrũri-inĩ ma mĩhĩrĩga ĩo ĩĩrĩ-rĩ, igĩkĩheo matũũra kenda.
• 17. Naguo bũrũri wa mũhĩrĩga wa Benjamini ikĩheo Gibeoni, hamwe na ithaka irĩrigicĩirie cia ũrĩithio; na Geba, hamwe na ithaka icio ciarĩo;
• 18. na Anathothu, hamwe na ithaka icio ciarĩo; na Alimoni, hamwe na ithaka icio ciarĩo; nĩ matũũra mana.
• 19. Namo matũũra macio mothe ma ciana cia Haruni, athĩnjĩri-Ngai, magĩgĩtuĩka ikũmi na matatũ, hamwe na ithaka imarigicĩirie cia ũrĩithio wa ũhiũ wacio.
• 20. Nacio mbarĩ cia ciana cia Kohathu, Alawii, naguo ũguo nĩ ta kuuga ciana iria ingĩ cia Kohathu, ikĩgũĩrũo nĩ matũũra mamwe bũrũri wa mũhĩrĩga wa Efiraimu ciacukĩrũo mĩtĩ.
• 21. Ciana cia Isiraeli igĩgĩcihe Shekemu, hamwe na ithaka irĩrigicĩirie cia kũrĩithio, o kũu bũrũri ũrĩa wĩ irĩma nyingĩ wa Efiraimu, itũũra rĩa kũũrĩrũo nĩ mũndũ ũrĩa ũũraganĩte, o na Gezeri, hamwe na ithaka icio ciarĩo;
• 22. na Kibizaimu, hamwe na ithaka icio ciarĩo; na Bethi-horoni, hamwe na ithaka icio ciarĩo; nĩ matũũra mana.
• 23. Ningĩ bũrũri wa mũhĩrĩga wa Dani igĩcihe Eliteke, hamwe na ithaka icio ciarĩo; na Gibethoni, hamwe na ithaka icio ciarĩo;
• 24. na Aijaloni, hamwe na ithaka icio ciarĩo; na Gathi-rimoni, hamwe na ithaka icio ciarĩo; nĩ matũũra mana;
• 25. ningĩ bũrũri wa nuthu ĩo ya mũhĩrĩga wa Manase, igĩcihe Taanaka, hamwe na ithaka icio ciarĩo; na Gathi-rimoni, hamwe na ithaka icio ciarĩo; nĩ matũũra merĩ.
• 26. Matũũra macio mothe ma mbarĩ icio ingĩ cia ciana cia Kohathu magĩgĩtuĩka ikũmi, hamwe na ithaka imarigicĩirie cia ũrĩithio wa ũhiũ wacio.
• 27. Na rĩrĩ, bũrũri wa nuthu ĩo ya mũhĩrĩga wa Manase-rĩ, ciana cia Isiraeli ikĩhe ciana cia Gerishoni, cia mũhĩrĩga wa Alawii, Golani, o kũu Bashani, na ithaka irĩrigicĩirie cia ũrĩithio, itũũra rĩa kũũrĩrũo nĩ mũndũ ũrĩa ũũraganĩte; na Be-eshitera, hamwe na ithaka icio ciarĩo; nĩ matũũra merĩ.
• 28. Naguo bũrũri wa mũhĩrĩga wa Isakaru, igĩcihe Kishoni, hamwe na ithaka icio ciarĩo; na Deberathu, hamwe na ithaka icio ciarĩo;
• 29. na Jaramuthu, hamwe na ithaka icio ciarĩo na Eni-ganimu, hamwe na ithaka icio ciarĩo; nĩ matũũra mana.
• 30. Ningĩ bũrũri wa mũhĩrĩga wa Asheri igĩcihe Mishali, hamwe na ithaka icio ciarĩo; na Abidoni, hamwe na ithaka icio ciarĩo;
• 31. na Helikathu, hamwe na ithaka icio ciarĩo; na Rehobu, hamwe na ithaka icio ciarĩo; nĩ matũũra mana.
• 32. Naguo bũrũri wa mũhĩrĩga wa Nafitali igĩcihe Kedeshi, o kũu Galili, hamwe na ithaka icio ciarĩo, itũũra rĩa kũũrĩrũo nĩ mũndũ ũrĩa ũũraganĩte, na Hamothu-dori, hamwe na ithaka icio ciarĩo; na Karitani, hamwe na ithaka icio ciarĩo; nĩ matũũra matatũ.
• 33. Matũũra macio mothe ma Agerishoni, o ta ũrĩa mbarĩ ciao ciatariĩ, magĩtuĩka ikũmi na matatũ, hamwe na ithaka imarigicĩirie cia ũrĩithio wa ũhiũ wacio.
• 34. Nacio mbarĩ cia ciana cia Merari, o icio ciatigarĩte cia Alawii, ciana cia Isiraeli igĩcihe Jokineamu, o kũu mũhĩrĩga-inĩ wa Zebuluni, hamwe na ithaka irĩrigicĩirie cia ũrĩithio; o na Karita, hamwe na ithaka icio ciarĩo;
• 35. na Dimuna, hamwe na ithaka icio ciarĩo; na Nahalali, hamwe na ithaka icio ciarĩo; nĩ matũũra mana.
• 36. O na ningĩ mũhĩrĩga-inĩ wa Reubeni igĩcihe Bezeri, hamwe na ithaka icio ciarĩo; na Jahazu, hamwe na ithaka icio ciarĩo;
• 37. na Kedemothu, hamwe na ithaka icio ciarĩo; na Mefaathu, hamwe na ithaka icio ciarĩo; nĩ matũũra mana.
• 38. Ningĩ mũhĩrĩga-inĩ wa Gadi igĩcihe Ramothu, o kũu Gileadi, hamwe na ithaka icio ciarĩo, itũũra rĩa kũũrĩrũo nĩ mũndũ ũrĩa ũũraganĩte; na Mahanaimu, hamwe na ithaka icio ciarĩo;
• 39. na Heshiboni, hamwe na ithaka icio ciarĩo; na Jazeri, hamwe na ithaka icio ciarĩo; mothe nĩ matũũra mana.
• 40. Matũũra macio mothe nĩmo ciana cia Merari, o icio ciatigarĩte cia nyũmba cia Alawii, ciaheirũo, o ta ũrĩa mbarĩ ciacio ciatariĩ; nao maacukĩrũo mĩtĩ makĩgũĩrũo nĩ matũũra macio ikũmi na merĩ.
• 41. Na rĩrĩ, matũũra mothe ma Alawii, macio maarĩ mabũrũri-inĩ marĩa megwatĩirũo nĩ ciana cia Isiraeli, maatuĩkire matũũra mĩrongo ĩna na manana magĩtarũo, hamwe na ithaka imarigicĩirie cia ũrĩithio.
• 42. Matũũra macio-rĩ, o itũũra rĩarĩ na ithaka mĩena yothe irĩrigicĩirie cia ũrĩithio; ũguo nĩguo matũũra macio mothe maatariĩ.
• 43. Ũguo nĩguo Jehova aakĩheire Aisiraeli bũrũri ũcio wothe ehĩtire akĩĩra maithe mao atĩ nĩakamahe; nao magĩkĩwĩgwatĩra ũgĩtuĩka wao, makĩũtũũra.
• 44. Nake Jehova agĩgĩtũma maikare mahoreire na ndwere ciothe, o ta ũrĩa maũndũ mothe maatariĩ, marĩa erire maithe mao na mwĩhĩtwa atĩ nĩageka; na gũtiarĩ mũndũ o na ũmwe wa thũ ciao wahotire kũmetiiria; Jehova nĩaarekereirie thũ ciao ciothe agĩcineana moko-inĩ mao.
• 45. Gũtirĩ ũndũ o na ũmwe wa maũndũ mega marĩa Jehova oigĩte atĩ nĩageka nyũmba ya Isiraeli ũtaigana kuoneka; maũndũ macio mothe nĩmaahingirio biũ.

Home