Go Back

Joshua Chapter 20

• 1. Ningĩ Jehova akĩarĩria Joshua, akĩmwĩra atĩrĩ,
• 2. Aria na ciana cia Isiraeli ũciĩre atĩrĩ, Wĩthurĩrei matũũra marĩa ndamũheire ũhoro wamo, ngĩaria na Musa, mũmatue ma kũũrĩrũo;
• 3. nĩ getha mũũragani ũrĩa ũũragĩte mũndũ o na ũrĩkũ na ũndũ wa kũhĩtia, na atacirĩire gwĩka ũguo, orĩre kuo; namo magĩtuĩke manyu ma kũũrĩrũo nĩ ũndũ wa mwĩrĩhĩria wa thakame ĩrĩa ĩitĩtwo.
• 4. Nake mũũragani ũcio orĩre itũũra rĩmwe rĩa matũũra macio, akarũgame itonyero-inĩ rĩa kĩhingo gĩa itũũra rĩu, acoke oimbũre ũhoro ũrĩa e naguo, akĩiguagwo nĩ athuri a itũũra rĩu; nao mamũtonyie kũu marĩ itũũra-inĩ, mamũhe ha gũikara atũũranie nao kuo.
• 5. Nake mwĩrĩhĩria ũcio wa thakame ĩrĩa ĩitĩtwo angĩkorũo nĩamũteng’eretie, matikarekererie mũũragani ũcio mamũneane harĩ we, nĩ gũkorũo aagũthire mũndũ ũcio ũngĩ atacirĩire gwĩka ũguo, na ndaatũire amũthũũrĩte.
• 6. Nake mũndũ ũcio atũũre itũũra rĩu o nginya hĩndĩ ĩrĩa akarũgama mbere ya andũ monganĩte atuĩrũo cira, o nginya hĩndĩ ĩrĩa gĩkuũ kĩa mũthĩnjĩri-Ngai ũrĩa mũnene wa hĩndĩ ĩo gĩgakinya, na hĩndĩ ĩo mũũragani ũcio agacoka ainũke itũũra rĩao, o gwake mũciĩ, kũu itũũra-inĩ rĩrĩa oimĩte akĩũra.
• 7. Nao magĩkĩamũra Kedeshi, o kũu Galili, bũrũri ũrĩa wĩ irĩma nyingĩ wa Nafitali; o na Shekemu, rĩa bũrũri ũrĩa wĩ irĩma nyingĩ wa Efiraimu, na Kiriathu-ariba (na nokuo Hebironi), o kũu bũrũri ũrĩa wĩ irĩma nyingĩ wa Juda.
• 8. Naguo mũrĩmo ũcio ũngĩ wa Jorodani, mwena wa irathĩro wa Jeriko, makĩamũra Bezeru, o kũu werũ gĩtuamba-inĩ, mũhĩrĩga-inĩ wa Reubeni; na Ramothu, o kũu Gileadi mũhĩrĩga-inĩ wa Gadi; na Golani, o kũu Bashani, mũhĩrĩga-inĩ wa Manase.
• 9. Macio nĩmo matũũra marĩa maamũrirũo nĩ ũndũ wa ciana ciothe cia Isiraeli, o na ũndũ wa ageni arĩa matũũranĩtie nacio, nĩ getha mũndũ o wothe ũrĩa ũngĩũraga mũndũ o na ũrĩkũ atacirĩire gwĩka ũguo, orĩre kuo, ndakae kũũragwo nĩ mwĩrĩhĩria wa thakame ĩrĩa ĩitĩtwo atanarũgama mbere ya andũ monganĩte.

Home