Go Back

Ahibirania Chapter 9

• 1. RĨU-RĨ, kĩrĩkanĩro kĩrĩa kĩa mbere o nakĩo kĩarĩ na maũndũ maathanĩtwo ma mĩhoere ya kũhoyaga Ngai nayo, o na kĩarĩ na handũ haamũre he gũkũ thĩ.
• 2. Amu-rĩ, kwarĩ na hema yathondeketwo, ĩrĩa ya mbere, na thĩinĩ wayo yarĩ na mũtĩ ũrĩa wa gwĩkagĩrũo matawa, o na metha, o na mĩgate ĩrĩa yaigagĩrũo Ngai; hau nĩho hetagwo Handũ harĩa Hatheru.
• 3. Na mbarĩ ĩrĩa ĩngĩ ya gĩtama kĩrĩa gĩa kerĩ, kwarĩ na hema yetagwo Handũ Harĩa Hatheru Mũno;
• 4. nĩyo yarĩ na kĩgongona gĩa thahabu kĩrĩa gĩa gũcinĩrũo ũbumba, na Ithandũkũ rĩrĩa rĩa kĩrĩkanĩro rĩahumbĩirũo na thahabu mbarĩ ciothe, igũrũ na thĩinĩ; na thĩinĩ warĩo nĩhaarĩ nyũngũ ya thahabu yarĩ na mana thĩinĩ, na rũthanju rũa Haruni rũrĩa rũathundũrĩte, o na ihengere iria ciandĩkĩtwo kĩrĩkanĩro.
• 5. Ningĩ igũrũ rĩa Ithandũkũ rĩu nĩkwarĩ Akerubi me na riri maacuhĩrĩire gĩikaro-gĩa-tha: no tũtingĩhota kwaria rĩu ũhoro wa indo icio mwanya mwanya.
• 6. Nacio indo icio ikĩrĩ thondeke ũguo-rĩ, athĩnjĩri-Ngai matonyaga mĩthenya yothe hema-inĩ ĩrĩa ya mbere, makarutaga wĩra wao wa ũtungatĩri;
• 7. ĩndĩ hema ĩrĩa ya kerĩ-rĩ, no mũthĩnjĩri-Ngai-mũnene ũtonyaga, o we wiki, rĩmwe o mwaka. Na ndatonyaga atakuuĩte thakame ĩrĩa arutagĩra Ngai nĩ ũndũ wake mwene, na nĩ ũndũ wa mahĩtia ma kĩrĩndĩ marĩa ma wariga.
• 8. Ũguo nĩguo Roho Mũtheru amenyithanagia atĩ njĩra ya gũtonya Handũ harĩa Hatheru ndĩrĩ ĩronanio hĩndĩ ĩrĩa hema ĩrĩa ya mbere ĩtũire o ho.
• 9. Nayo nĩyo ngerekano ya gũtũgerekanĩria mahinda maya tũrĩ: na kũringana na ngerekano ĩo kũrutagwo maruta na magongona marĩa matangĩhota gũtũma mũndũ ũrĩa ũmarutaga aagĩrĩre kũna ha ũhoro wa thamiri yake,
• 10. kuona atĩ makoniĩ o ũhoro wa kũrĩa na kũnyua, na wa methamba maingĩ, namo no maathani makoniĩ o mwĩrĩ, maathanĩtwo mekagwo o nginya hĩndĩ ĩrĩa maũndũ mothe makarũngĩrĩrio wega.
• 11. Ĩndĩ rĩrĩa Kristo okire, arĩ mũthĩnjĩri-Ngai-mũnene wa maũndũ marĩa mega makiriĩ gũũka-rĩ, nĩaahungurire hema ĩrĩa nene na njagĩrĩru makĩria, o ĩrĩa ĩtarĩ thondeke na moko, (ũguo nĩ ta kuuga ndĩũmbĩtwo mĩũmbĩre ya thĩ ĩno).
• 12. Agĩgĩtonya Handũ Harĩa Hatheru ihinda o rĩmwe rĩa kũigana, atakuuĩte thakame ya mbũri na ya njaũ, no akuuĩte thakame yake mwene, agĩgĩkorũo akũũrĩte andũ ũguo na ũkũũri ũrĩa ũtagathira.
• 13. Tondũ kũngĩkorũo atĩ thakame cia mbũri na cia ndegwa, o na mũhu wa mori ĩcinĩtwo, ciaminjaminjĩrio andũ arĩa me na thahu, nĩihotaga kũmatheria, mĩĩrĩ yao ĩthahũke-rĩ,
• 14. githĩ thakame ya Kristo, o we werutĩire Ngai, atarĩ na kaũũgũ, na ũndũ wa Roho ũrĩa ũtũũraga tene na tene-rĩ, ndĩngĩkĩria mũno kũmũtheria thamiri cianyu nĩguo mũtigane na ciĩko iria irehage gĩkuũ, na mũtungatagĩre Ngai ũrĩa wĩ muoyo?
• 15. Na tondũ ũcio nĩwe mũiguithania wa kĩrĩkanĩro kĩngĩ kĩerũ, nĩ getha arĩa metĩtwo makagaĩrũo igai rĩtagathira, o rĩrĩa merĩirũo, kuona atĩ nĩharĩ na gĩkuũ gĩkuĩtwo kĩrĩa kĩmakũũrĩte mahĩtia-inĩ marĩa maahĩtirie hingo ya kĩrĩkanĩro kĩrĩa kĩa mbere.
• 16. Tondũ rĩrĩa kwĩ na kĩrĩkanĩro gĩa kwĩgaya-rĩ, no mũhaka kũmenyeke atĩ ũrĩa wĩgaĩte nĩakuĩte.
• 17. Tondũ kĩrĩkanĩro gĩa kwĩgaya nĩkĩgĩaga na hinya ũrĩa wĩgaĩte aarĩkia gũkua; gĩkĩrĩ na hinya ũrĩkũ ũrĩa wĩgaĩte arĩ o muoyo?
• 18. Ũguo no taguo kĩrĩkanĩro kĩrĩa kĩa mbere o nakĩo gĩtiigana kũrugũrio hatarĩ na thakame.
• 19. Nĩ ũndũ Musa-rĩ, aarĩkia kũhe kĩrĩndĩ gĩothe maathani mothe kũringana na watho-rĩ, nĩaacokire akĩoya thakame ya njaũ na ya mbũri, hamwe na maĩ na guoya mũtune na mũtĩ wa mũthobi, akĩminjĩria ibuku rĩo rĩene, o na andũ acio othe,
• 20. akĩmera atĩrĩ, Ino nĩyo thakame ya kĩrĩkanĩro kĩrĩa Ngai aamwathĩire.
• 21. Ningĩ o ũndũ ũmwe akĩminjĩria hema ĩo thakame, o na nyũngũ ciothe cia gũtungatĩra Ngai nacio.
• 22. O na atĩrĩrĩ, kũringana na watho, hakuhĩ indo ciothe itheragio na thakame, na gũtaitĩtwo thakame-rĩ, gũtingĩrekanĩrũo mehia.
• 23. Nĩ ũndũ ũcio, kwarĩ na bata atĩ mĩhianĩre ya indo iria irĩ Igũrũ ĩtherio na magongona macio; no rĩrĩ, atĩ indo icio irĩ Igũrũ cio nyene itherio na magongona mega kũrĩ macio.
• 24. Nĩ ũndũ Kristo ndaatonyire handũ hatheru hathondeketwo na moko, harĩa hahaananĩtio na harĩa ha ma; nĩ gũtonya aatonyire o Igũrũ kuo kwene, nĩ getha rĩu onekage mbere-inĩ ya Ngai nĩ ũndũ witũ.
• 25. Ningĩ ti getha erutage kaingĩ, ta ũrĩa mũthĩnjĩri-Ngai-mũnene atonyaga Handũ harĩa Hatheru o mwaka o mwaka akuuĩte thakame ĩtarĩ yake mwene;
• 26. amu kũngĩrĩ ũguo-rĩ, no mũhaka angĩtũire anyariragwo kaingĩ kuuma o hĩndĩ ĩrĩa thĩ yaambĩrĩirie kũũmbwo. Ĩndĩ rĩu o mahinda maya ma kũrigĩrĩria-rĩ, nĩaguũranĩirio ihinda o rĩmwe rĩa kũigana, nĩguo athengie wĩhia o gũthengia nĩ kwĩruta atuĩke wa igongona we mwene.
• 27. Na ta ũrĩa gũtuĩtwo atĩ andũ makue gĩkuũ o kĩmwe, na thutha ũcio matuĩrũo cira-rĩ;
• 28. ũguo no taguo Kristo nake, tondũ nĩarĩkĩtie kũrutwo arĩ wa igongona ihinda rĩmwe, nĩ getha akuue mehia ma andũ aingĩ, nĩagacoka kuoneka ihinda rĩa kerĩ, gũtarĩ na mehia, nĩguo akahonokie andũ arĩa mamwetagĩrĩra.

Home