Go Back

Ahibirania Chapter 2

• 1. HAKĨRĨ ũguo-rĩ, nĩtwagĩrĩirũo nĩ kũrũmbũiya makĩria mohoro marĩa maanaiguwo, tũtikanae gũtwarĩrĩrio tũtigithanio namo.
• 2. Tondũ rĩrĩ, kũngĩkorũo ũhoro ũrĩa wanaario nĩ araika nĩwatuĩkire mũrũmu, na ningĩ kũhĩtia guothe o na ũremi wothe nĩwarehithanagĩria kĩherithanio kĩrĩa kĩwagĩrĩire-rĩ,
• 3. kaĩ ithuĩ na ithuĩ tũkahonoka atĩa, tũngĩnyarara ũhonokio mũnene ũũ? Naguo nĩguo waambire kwario nĩ Mwathani, ũgĩcoka ũgĩĩkĩrũo hinya kũrĩ ithuĩ nĩ andũ arĩa maamũiguire.
• 4. O nake Ngai nĩaawĩkagĩra ũira hamwe na andũ acio atĩ nĩ wa ma, nĩ ũrĩa aaringaga ciama, agekaga morirũ na ciĩko nyingĩ cia hinya, o na akagayanagia iheo cia Roho Mũtheru, o ta ũrĩa we mwene endaga kũgayania.
• 5. Nĩ ũndũ araika-rĩ, tio maatuirũo a gwathaga thĩ ĩrĩa ĩgoka thutha, o ĩrĩa tũkwaria ũhoro wayo.
• 6. Ĩndĩ mũndũ mũna nĩaaheanire ũhoro gĩkĩro kĩmwe, akiuga atĩrĩ, Kaĩ mũndũ akĩrĩ kĩ, tondũ ũmũririkanaga? Kana mũrũ wa mũndũ nĩ kĩ, tondũ ũũkaga kũmũrora?
• 7. Ũmũtigarĩtie hanini aringane na araika, Ũgakĩmwĩkĩra riri o na ũkaru ta thũmbĩ ya ũnene, O na wamũtuire wa gwathaga mawĩra marĩa marute nĩ moko maku.
• 8. Nacio indo ciothe ũgaciiga thĩ ya makinya make, ciathagwo nĩwe. Kuona atĩ nĩaaigire indo ciothe watho-inĩ wake-rĩ, ndarĩ kĩndũ atigarĩtie gĩtaigĩtwo watho-inĩ wake. Ĩndĩ rĩu tũtirĩ tũrakinya kuona indo ciothe ciigĩtwo watho-inĩ wake.
• 9. No ũrĩa tuonaga-rĩ, nĩ ũcio watigarĩtio hanini aringane na araika, nake nĩwe Jesu, tũkamuona ekĩrĩtwo thũmbĩ ya riri o na ũkaru tondũ wa ũrĩa onire thĩna wa gũkua, nĩ getha atĩ, nĩ ũndũ wa Wega wa Ngai, atuĩke wa gũcama gĩkuũ ithenya rĩa andũ othe.
• 10. Nĩ ũndũ nĩkwamwagĩrĩire, we Ngai, ũrĩa indo ciothe ciombirũo ituĩke ciake, o na nowe waciũmbire-rĩ, akĩrehithie ciana nyingĩ kũrĩa kwĩ riri, atũme Mũtongoria ũrĩa wa kũmatongoria magĩe na ũhonokio aagĩrĩre o kwagĩrĩra nĩ ũndũ wa ũrĩa aanyamarĩkire.
• 11. Tondũ rĩrĩ, we ũtheragia andũ, nao andũ arĩa matheragio, othe hamwe moimĩte o kĩhumo kĩmwe: na nĩ ũndũ ũcio ndaconokaga akĩmeta ariũ a Ithe,
• 12. akoiga atĩrĩ, Nĩngamemerekeria ariũ a Awa ngumo ya rĩĩtwa rĩaku, Nĩngũina ũhoro wa gũgũkumia kĩũngano-inĩ kĩa andũ arĩa aamũre gatagatĩ.
• 13. Ningĩ akoiga atĩrĩ, Niĩ-rĩ, nĩwe ngũtũũra ndĩmwĩhokaga. O na ningĩ atĩrĩ, Onei, niĩ ũyũ, twĩ hamwe na ciana iria ndaheirũo nĩ Ngai.
• 14. Hakĩrĩ ũguo-rĩ, kuona atĩ ciana icio nĩigwatanĩire mwĩrĩ na thakame-rĩ, we nake no taguo egwatĩire mũthemba o ũcio, nĩ getha atĩ, tondũ wa gũkua, aanange ũrĩa mwene hinya wa gĩkuũ, nĩwe mũcukani;
• 15. acoke ahonokie andũ arĩa othe maatũire mohetwo ũkombo-inĩ matukũ mao mothe nĩ ũndũ wa gwĩtigĩra gĩkuũ.
• 16. Tondũ ti-itherũ ti mũthemba ũrĩa wa araika aagwatire, no nĩ ũrĩa wa rũciaro rũa Iburahimu.
• 17. Nĩ ũndũ ũcio nĩaagĩrĩirũo nĩ kũhaananio na ariũ a Ithe maũndũ-inĩ mothe, nĩ getha atuĩke mũthĩnjĩri-Ngai-mũnene wĩ mũigua-tha na wa kwĩhokeka maũndũ-inĩ marĩa ma Ngai, nĩguo arute horohio nĩ ũndũ wa mehia ma kĩrĩndĩ.
• 18. Amu-rĩ, kuona atĩ we mwene nĩaathĩnĩkire akĩgeragio, nĩahotaga gũteithia andũ arĩa mageragio.

Home