Go Back

Ahibirania Chapter 13

• 1. IKARAGAI mwendaine na ariũ a Ithe witũ.
• 2. Mũtikanariganĩrũo nĩ gũtuga ageni; nĩ gũkorũo, tondũ wa gwĩka ũguo-rĩ, andũ amwe maanagwata araika ũgeni matekũmenya.
• 3. Ririkanagai arĩa mohetwo, o ta muohetwo hamwe nao; o na mũririkanage arĩa manyariragwo, kuona atĩ o na inyuĩ mwĩ na mĩĩrĩ ĩngĩnyarirĩka.
• 4. Ũhoro wa kũhikania nĩwĩkĩrĩrũo nĩ andũ othe, na gũkomania kwa arĩa mahikanĩtie nĩgũtuwo ũndũ mũthingu. Nĩ ũndũ ahũri-maraya o na atharania nĩ Ngai ũkamatuĩra ituĩro.
• 5. Mĩikarire-inĩ yanyu-rĩ, ikaragai mũtegũkorokera mbia; na mũiganagwo nĩ indo iria mwĩ nacio: amu Ngai we mwene nĩoigĩte atĩrĩ, Ndirĩ hĩndĩ ngagũtigĩrĩra, kana ndigane nawe o na atĩa.
• 6. Tondũ ũcio nĩtwetaga kuuga, tũũmĩrĩirie, atĩrĩ: Mwathani nĩwe mũndeithia; ndigetigĩra: Mũndũ-rĩ, nĩ atĩa angĩkĩhota kũnjĩka?
• 7. Ririkanagai aathani anyu atongoria, o arĩa maamũheire Ũhoro wa Ngai: na mwĩgerekanagie nao ũhoro-inĩ wa gwĩtĩkia, mũgĩcũranagia ũhoro wa mĩtũũrĩre yao harĩa yarigĩrĩire.
• 8. Jesu Kristo atũũraga atekũgarũrũka, ira, na ũmũthĩ, o na nginya tene na tene.
• 9. Mũtikanatwarĩrĩrio nĩ morutani mageni ma mĩthemba mĩthemba, nĩ gũkorũo nĩkwagĩrĩire atĩ ngoro ya mũndũ ĩĩkagĩrũo hinya nĩ Wega wa Ngai, na ti ũndũ wa kũrĩaga irio mĩrĩĩre ĩrĩa ĩtaagunaga arĩa maarũmanĩrĩire nayo.
• 10. Ithuĩ-rĩ, tũkĩrĩ na kĩgongona, nakĩo, andũ arĩa matũire matungataga hema-inĩ ĩo matirĩ na rũtha marĩage mahaki marĩa kĩrutagĩrũo.
• 11. Nĩ ũndũ-rĩ, nyamũ iria thakame yacio ĩrehagwo nĩ mũthĩnjĩri-Ngai-mũnene handũ harĩa hatheru thĩinĩ, ĩtuĩke ya horohio nĩ ũndũ wa mehia-rĩ, nyamũ icio nĩ gũcinwo icinagĩrũo nyama ciacio keheri-inĩ ga itũũra.
• 12. No taguo Jesu nake aanyarirĩirũo na nja ya kĩhingo, nĩ getha atherie andũ na thakame yake mwene.
• 13. Hakĩrĩ ũguo-rĩ, nĩtuumagarei tũthiĩ kũrĩ we o kũu keheri-inĩ ga itũũra, tũkuuanĩire nake ũhoro wake wa kũmenwo.
• 14. Nĩ ũndũ gũkũ-rĩ, tũtirĩ na itũũra rĩtagathira: ĩndĩ nĩ gũcaria tũcaragia itũũra o rĩrĩa rĩkoneka thutha.
• 15. Gwatuĩka ũguo-rĩ, nĩtũgoocage Ngai na ũndũ wa Jesu tũtegũtigithĩria, ta arĩ igongona tũramũrutĩra; naguo nĩ ta kuuga arutagĩrũo maciaro moimĩte tũnua-inĩ twa arĩa moimbũraga rĩĩtwa rĩake.
• 16. Na mũtikanariganĩrũo nĩ gwĩkana wega o na gũtanahanĩra, nĩ ũndũ magongona ta macio nĩmo Ngai akenagio nĩmo.
• 17. Iguagai aathani arĩa matũire mamũtongoragia, na mũmenyihagĩrie: nĩ gũkorũo nĩmaikaraga meiguĩte nĩ ũndũ wa mĩoyo yanyu ta arĩ o makorio ũhoro wayo; nĩ getha mekage ũguo makenete na matekũigua ũũru; tondũ ũndũ ũcio ndũngĩmũguna.
• 18. Tũhoyagĩrei: amu nĩtũkwĩhoka atĩ twĩ na thamiri ĩtarĩ ũcuke, tũkenda gũikaraga na mĩikarĩre mĩega maũndũ-inĩ mothe.
• 19. Na ndamũthaitha mũno makĩria mwĩkage ũguo nĩ getha njokio kũrĩ inyuĩ o narua makĩria.
• 20. Rĩu-rĩ, Ngai Mwene thayũ, ũrĩa wacokirie mũrĩithi ũrĩa mũnene wa mbũri, o we Mwathani witũ Jesu, akĩmũruta kũrĩ arĩa akuũ nĩ ũndũ wa thakame ya kĩrĩkanĩro kĩrĩa gĩtathiraga-rĩ,
• 21. arotũma mũtuĩke aagĩrĩru kũna ũndũ-inĩ o wothe mwega, nĩ getha mwĩkage o ũrĩa endaga; na aroeka thĩinĩ wanyu, na ũndũ wa Jesu Kristo, maũndũ marĩa onaga marĩ ma kũmũkenia. Nake arogoocagwo tene na tene. Amen.
• 22. Ndamũthaitha, ariũ a Ithe witũ, atĩ mwĩtĩkanie na ũhoro ũcio wa kũmũtaara, amu nĩndamwandĩkĩra ũhoro na ciugo nyinyi.
• 23. Menyai atĩ Timotheo, mũrũ wa Ithe witũ, nĩohoretwo; nake angĩũka narua-rĩ, nĩtũrĩonana na inyuĩ twĩ nake.
• 24. Geithiai aathani arĩa othe mamũtongoragia, o na andũ arĩa othe aamũre. Arĩa a Italia nĩmaamũgeithia.
• 25. Wega wa Ngai ũrogĩa na inyuĩ inyuothe. Amen.

Home