Go Back

2 Timotheo Chapter 4

• 1. NDAKWĨRA atĩrĩ na ma, Ngai arĩ ho, o nake Kristo Jesu, o we ũrĩa ũgacirithia andũ arĩa marĩ muoyo o na arĩa makuĩte, na nĩ ũndũ wa ũrĩa akaguũranĩrio na athamakage,
• 2. atĩrĩ, kĩhunjagie Ũhoro wa Ngai, na wĩkagĩre kĩyo hĩndĩ ĩrĩa njagĩrĩru o na ĩrĩa ĩtarĩ njagĩrĩru; ningĩ rũithagĩria andũ ũũru wao, na ũmakaanagie, na ũmahatagĩrĩrie, ũgĩkiragĩrĩria mũno o ũkĩrutanaga.
• 3. Nĩ gũkorũo hĩndĩ nĩirĩũka rĩrĩa andũ matagakirĩrĩria kũrutagwo ũrutani ũrĩa wagĩrĩire, no nĩmakeyũnganagĩria arutani a kũrutanaga o maũndũ marĩa makerirĩria kũrutagwo o ene, tondũ wa ũrĩa magakorũo mategete matũ mao maigue maũndũ moru;
• 4. na nĩmakahũgũraga matũ mao matikaigue ũhoro-ũrĩa-wa-ma, na merekagĩre ndeto cia mũhuhu.
• 5. No wee-rĩ, ikaraga maũndũ-inĩ mothe ũterigĩtwo, na ũkiragĩrĩrie ũkĩnyamario, na ũtũũre ũrutaga wĩra wa kũhunjia Ũhoro wa Ngai, na ũhingie ũtungatĩri waku wothe.
• 6. Nĩ ũndũ niĩ-rĩ, thakame yakwa nĩyambĩrĩirie gũitwo ĩtuĩke ya igongona, na hingo yakwa nĩ nginyu ndĩĩeherere.
• 7. Nĩndũĩte mbaara ĩrĩa njega, nakĩo kĩhĩtahĩtano gĩakwa-rĩ, nĩnginyĩte gĩturi gĩakĩo, naguo ũrutani ũrĩa wa Wĩtĩkio-rĩ, nĩndũire ndĩũmenyereire.
• 8. Gwata rĩu nĩnjigĩirũo thũmbĩ ĩrĩa ya ũthingu, o ĩrĩa Mwathani, we mũtuanĩri cira na kĩhooto, aka’he Mũthenya ũcio: na to niĩ nyiki, no ningĩ ahe andũ othe arĩa magakorũo matanyĩte kũguũranĩrio gwake me na wendo.
• 9. Geria na kĩyo gũũka kũrĩ niĩ narua:
• 10. nĩ gũkorũo Dema nĩaandiganĩirie, nĩ ũrĩa endete maũndũ ma mahinda maya, agĩthiĩ Thesalonike: Keresike nake agĩthiĩ Galatia, nake Tito agĩthiĩ Dalamatia.
• 11. No Luka wiki tũrĩ nake. Ũka ũkĩoya Mariko, mũũke nake; nĩ ũndũ nĩwe wagĩrĩire wa kũndungatagĩra.
• 12. Nake Tukiko nĩndĩmũtũmĩte Efeso.
• 13. Kabuti karĩa ndatigire gwa Karipo kũrĩa Teroa, njũkĩra nako ũgĩũka, na ningĩ ũnjũkĩre na mabuku, na makĩria njũa iria cia kwandĩkwo.
• 14. Alekisandero ũrĩa mũturi wa icango cia rũthuku nĩaanjĩkire ũũru mũno: Mwathani nĩwe ũkamũthukĩra kũringana na ciĩko ciake.
• 15. Nawe ũmwĩmenyerere, nĩ gũkorũo nĩehotorete akararie mohoro maitũ mũno.
• 16. Rĩrĩa ndatwarirũo cira-inĩ rĩa mbere-rĩ, hatirĩ mũndũ o na ũmwe wandũgamĩrĩire: no kũndiganĩria maandiganĩirie othe. Maroaga gũtarĩrũo ũndũ ũcio!
• 17. No Mwathani nĩwe wandũgamĩrĩire akĩnjĩkĩra hinya, nĩ getha ndũmĩrĩri ĩrĩa ya Ngai ĩhunjio ĩmemereke wega na ũndũ wakwa, nao andũ othe a Ndũrĩrĩ mamĩigue: ngĩgĩtunyũkithio kanua-inĩ ka mũrũthi ũcio.
• 18. Nake Mwathani nĩwe ũkandunyũkithia ũndũ-inĩ ũrĩa wothe mũũru, na a’honokie nĩguo ngakinya ũthamaki-inĩ wake wa Igũrũ: nake we arogoocagwo mĩndĩ na mĩndĩ. Amen.
• 19. Geithia Pirisika na Akula, o na andũ a mũciĩ wa Onesiforo.
• 20. Erasito nĩaatigirũo aikare Korintho: nake Terofimo ngĩmũtiga Mileto arĩ mũrũaru.
• 21. Ikĩra kĩyo gĩa gũũka hĩndĩ ya heho ĩtanakinya. Nĩwageithio nĩ Eubulu, na Pudene, na Lino, na Kilaudia, o na ariũ a Ithe witũ othe.
• 22. Mwathani aroikara na roho waku. Naguo Wega wa Ngai ũroikara na inyuĩ.

Home