Go Back

1 Timotheo Chapter 2

• 1. NĨ ũndũ wa ũguo, ũrĩa ngwamba gũtaarana nĩ atĩrĩ, atĩ kũhoyagwo mahoya ma gũthaithanĩrĩra, na ma kũhoyanĩra, na ma gũcokeria Ngai ngatho, nĩ ũndũ wa andũ othe:
• 2. na makĩria, atĩ kũhoyagĩrũo athamaki, na arĩa othe maathanaga, nĩ getha tũtũũre na ũhoreri o na twĩkindĩire, tũgĩtĩaga Ngai tũtarĩ na itherũ.
• 3. Ũndũ ũcio nĩguo mwega na wa gwĩtĩkĩrĩka nĩ Ngai Mũhonokia witũ,
• 4. o we wendaga andũ othe mahonokio na matuĩke a kũmenya ũhoro-wa-ma.
• 5. Amu kwĩ na Ngai o ro ũmwe, na mũiguithania o ũmwe wa kũiguithania Ngai na andũ, nake nĩ mũndũ, o Kristo Jesu,
• 6. ũrĩa werutire atuĩke wa gũkũũra andũ othe; naguo ũira wa ũhoro ũcio nĩwaheanirũo ihinda rĩaguo rĩrĩa rĩagĩrĩru rĩakinya.
• 7. Naguo nĩ niĩ ndatuirũo mũhunjia o na mũtũmwo waguo, (ngwaria o ma, ndikũhenania), na ningĩ ngĩtwo mũrutani wa kũrutaga Ndũrĩrĩ ũhoro wa gwĩtĩkia, o na ũhoro-wa-ma.
• 8. Tondũ wa ũguo-rĩ, ngwenda atĩ kũndũ guothe arũme mahoithagie arĩ o, makĩoyaga moko matheru na igũrũ, hatarĩ na marakara o na kana ngarari.
• 9. Ningĩ no taguo ngwenda atĩ andũ-a-nja megemagie na nguo itarĩ cia mwĩonanio, me na thoni na ũũgĩ wa ngoro: matikanegemie na kũrama njuĩrĩ, kana na thahabu kana ruru, kana nguo iria ii goro mũno;
• 10. no nĩmegemagie na ciĩko cia ũthingu, (ũguo nĩguo wagĩrĩire andũ-a-nja arĩa metuaga atĩi Ngai).
• 11. Nĩ wega mũndũ-wa-nja erutage maũndũ akindĩirie, na aathĩkĩte na njĩra ciothe.
• 12. No rĩrĩ, ndingĩĩtĩkĩria mũndũ-wa-nja arutanage, kana aathage mũndũ mũrũme, no nĩaikarage akindĩirie.
• 13. Nĩ ũndũ-rĩ, Adamu nĩwe waambire kũũmbwo, Hawa agĩcokererũo:
• 14. nake Adamu-rĩ, tiwe wahenereirio, nĩ mũndũ-wa-nja wahenereirio agĩtuĩka wa kũhĩtia.
• 15. No rĩrĩ, andũ-a-nja makahonokio na ũndũ wa gũciara twana, mangĩgĩtũũra metĩkĩtie na me na wendani, na marĩ andũ aamũre, o na marĩ na ũũgĩ wa ngoro.

Home