Go Back

2 Athesalonike Chapter 2

• 1. RĨU-RĨ, ariũ a Ithe witũ, ha ũhoro wa gũũka kwa Mwathani witũ Jesu Kristo, na wa ũrĩa tũkonganio mbere yake, twamũthaitha
• 2. atĩ mũtikae kwagaagio narua ngoro, kana mũhahũrũo nĩ roho o wothe, kana ũhoro o wothe, o na kana marũa merĩtwo atĩ nĩmoimĩte kũrĩ ithuĩ, ma kũmwĩra atĩ Mũthenya wa Mwathani nĩ mũkinyu.
• 3. Menyai mũkahenio nĩ mũndũ na ũndũ o na ũrĩkũ; nĩ gũkorũo mũthenya ũcio ndũgakinya, ũhoro ũrĩa wa ngariũkũ ũtaambĩte gũkinya, o nake mũndũ ũrĩa mũregi watho ataanaguũranĩrio, o ũcio mwana wa kũũra,
• 4. ũrĩa ũreganaga na ũndũ o wothe wĩtanĩtio na Ũngai, o na kana kĩndũ o gĩothe gĩturagĩrio ndu gĩkahoyũo, agĩĩtũũgĩragia aciũkĩrĩre; agagĩkorũo aikaire thĩ hekarũ-inĩ ya Ngai, agĩĩtuaga we mwene atĩ nĩwe Ngai.
• 5. Kaĩ mũtekũririkana atĩ hĩndĩ ĩrĩa ndarĩ hamwe na inyuĩ nĩndamwĩraga maũndũ macio?
• 6. Na rĩu mũgakĩmenya kĩrĩa kĩgiragia mũndũ ũcio akinye, nĩguo akaguũranĩrio o hĩndĩ yake yakinya.
• 7. Nĩ gũkorũo ũhoro wa hitho ũrĩa wa kũrega watho nĩũraruta wĩra waguo o na rĩu: ĩndĩ nĩkũrĩ ũmwe ũgiragia ũhoro ũcio woneke rĩu, o nginya rĩrĩa agakorũo eheretio.
• 8. Na hĩndĩ ĩo-rĩ, nĩrĩo mũndũ ũrĩa mũregi watho akaguũranĩrio, nake nĩwe Mwathani Jesu akoraga na mĩhũmũ ya kanua gake na amwagie kĩene, nĩ ũndũ wa ũrĩa akonanio acokete gũkũ thĩ.
• 9. Nake ũcio mũregi watho nĩagoka kũringana na ũrĩa Shaitani agakorũo amũhotithĩtie gũũka, agĩũke arĩ na ũhoti wothe, na ciama, o na morirũ ma kũhenania,
• 10. ningĩ oke na wara wothe ũtarĩ wa ũthingu, nĩguo ahenie na maũndũ macio andũ arĩa marĩ njĩra ya kũũra; na gĩtũmi nĩ tondũ matiigana gwĩtĩkĩra kwenda ũhoro-ũrĩa-wa-ma, nĩguo mahonokio.
• 11. Na tondũ ũcio Ngai amarehithagĩrie ũndũ wĩ na hinya wa kũhĩtithania, nĩ getha metĩkie mathara:
• 12. nao meka ũguo magatuĩrũo ituĩro rĩa ũũru, acio othe maagĩte gwĩtĩkia ũhoro-ũrĩa-wa-ma, na matũire makenagĩra maũndũ marĩa matarĩ ma ũthingu.
• 13. No rĩrĩ, nĩtwagĩrĩirũo nĩ gũcokagĩria Ngai ngatho hingo ciothe nĩ ũndũ wanyu, inyuĩ ariũ a Ithe witũ mwendetwo nĩ Mwathani, nĩ ũndũ wa ũrĩa Ngai aamũthurire kuuma o kĩambĩrĩria, nĩguo mũtuĩke andũ a kũhonokio nĩ ũndũ wa gũtherio nĩ Roho, o na gwĩtĩkia ũhoro-wa-ma.
• 14. Naguo ũhonokio ũcio nĩguo aamwĩtĩire na ũndũ wa Ũhoro-ũrĩa-Mwega twamũhunjĩirie, nĩ getha mũkagĩe na riri wa Mwathani witũ Jesu Kristo.
• 15. Tondũ ũcio, ariũ a Ithe witũ, ikaragai mũrũmĩte na mũkĩrũmagia irĩra o iria mwarutirũo na kanua, o na kana marũa maitũ.
• 16. Na rĩu-rĩ, Mwathani witũ Jesu Kristo we mwene, nake Ngai Ithe witũ, we ũtwendete na agatũũmĩrĩria na ũũmĩrĩru ũrĩa ũtathiraga, o na agatũhe kĩĩrĩgĩrĩro kĩega na ũndũ wa Wega wake-rĩ,
• 17. aromũũmĩrĩria ngoro, na arotũma mũikarage mũrũmĩte wega ũhoro-inĩ wa ciĩko o na ciugo iria ciothe njega.

Home