Go Back

Akolosai Chapter 3

• 1. HAKĨRĨ ũguo-rĩ, mũngĩkorũo nĩmwariũkirio hamwe na Kristo, no kĩmathagei maũndũ marĩa marĩ Igũrũ, kũrĩa Kristo arĩ, aikaire guoko-inĩ kwa ũrĩo kwa Ngai.
• 2. Rũmbũyagiai maũndũ marĩa marĩ Igũrũ, na mũtigage kũrũmbũria marĩa marĩ thĩ.
• 3. Nĩ ũndũ nĩmwakuire, naguo muoyo wanyu nĩ mũhithe hamwe na Kristo thĩinĩ wa Ngai.
• 4. Na rĩrĩa Kristo, o we ũrĩ muoyo witũ, akonanio, hĩndĩ ĩo o na inyuĩ nĩmũkonanio hamwe nake mwĩ na riri.
• 5. Nĩ ũndũ ũcio, tuagai ciĩga cianyu iria irĩ gũkũ thĩ ta ikuĩte; nacio nĩ ici, atĩrĩ, ũmaraya, na meciria mathũku, na thuti njũru, na kwĩrirĩria maũndũ moru, na gũcumĩkĩra, nakuo no ũndũ ũmwe na kũinamĩrĩra mĩhianano na kũmĩhoya.
• 6. Maũndũ macio-rĩ, nĩmo matũmaga marakara ma Ngai makinyagĩre andũ a rũciaro rũrĩa rũremu;
• 7. namo nĩmo mwathiaga namo rĩa mbere, hĩndĩ ĩrĩa mwatũire mũmekaga.
• 8. No rĩu kĩeheriei maya mothe o namo: marakara, na mang’ũrĩka, na muku, na kũrumana, na kwaria maũndũ ma thoni na kanua.
• 9. Tigagai kũhenania na kanua o mũndũ na ũrĩa ũngĩ, kuona atĩ nĩmwĩaũrĩte mũndũ ũrĩa wa tene, o na ciĩko ciake
• 10. na mũkehumba mũndũ ũngĩ mwerũ, ũrĩa werũhagio o nginya agĩe na ũmenyo, agakĩgĩa na mũhianĩre wa ũrĩa wamũũmbire.
• 11. Na ũhoro-inĩ ũcio-rĩ, gũtingĩgĩa na Mũyunani kana Mũyahudi; mũndũ ũruĩte kana mũndũ ũtaruĩte, mũndũ mũcenji kana Mũsikuthi ; o na ngombo kana mũndũ ũtarĩ ngombo; no Kristo wiki na nĩwe ũiyũire guothe.
• 12. Tondũ ũcio-rĩ, kuona atĩ mũrĩ athure nĩ Ngai, mũgagĩtuĩka andũ atheru mendetwo nĩwe, wĩhumbei mwĩhumbĩre wa ngoro ũrĩa wa kũiguanĩra tha, na wa gũtugana, na kwĩnyihia, na kũhorera, o na gũkirĩrĩria,
• 13. mũgĩkiranagĩra na mũkĩohanagĩra o mũndũ na ũrĩa ũngĩ, angĩkorũo nĩharĩ mũndũ matetanĩtie na ũrĩa ũngĩ-rĩ; kĩohanagĩrei inyuene o ta ũrĩa Mwathani nake aamuoheire inyuĩ.
• 14. Ningĩ gũkĩra maũndũ macio mothe-rĩ, gĩagai na wendani, na nĩguo wohanagia maũndũ mothe hamwe nĩguo maagĩrĩre kũna.
• 15. Rekei thayũ wa Kristo ũteithũranage maũndũ mothe ngoro-inĩ cianyu; na nĩguo mwetĩirũo mwathagwo nĩguo, kuona atĩ mũrĩ a mwĩrĩ ũmwe; ningĩ mũgĩage na ngatho.
• 16. Rekei Ũhoro wa Kristo ũikarage ũingĩhĩte mũno thĩinĩ wanyu, ũkĩmũũhĩgagia na ũũgĩ wothe; na mũrutanage inyuĩ ene, mũgĩtaaranaga na thaburi, na nyĩmbo cia Ngai, o na nyĩmbo cia kũguna maroho ma andũ, mũkĩinagĩra Ngai mũrĩ na Wega wake thĩinĩ wa ngoro cianyu.
• 17. Na ningĩ atĩrĩ, maũndũ marĩa mothe mũrĩĩkaga, mũkĩaria o na kana mũgĩĩka ũndũ o ũrĩkũ-rĩ, mekagei na rĩĩtwa rĩa Mwathani Jesu, mũgĩcokagĩria Ngai Ithe witũ ngatho na ũndũ wake.
• 18. Inyuĩ atumia-rĩ, athĩkagĩrai athuri anyu o ta ũrĩa kwagĩrĩire andũ arĩa maikaraga thĩinĩ wa Mwathani.
• 19. Na inyuĩ athuri-rĩ, endagai atumia anyu, na tigagai kũmakũũma.
• 20. O na inyuĩ ciana, iguagai aciari anyu maũndũ-inĩ mothe, nĩ ũndũ ũguo nĩguo ũkenagia Mwathani.
• 21. Na inyuĩ maithe-rĩ, tigagai kũrakaria ciana cianyu, mũtigatũme igĩe na kĩnyiria.
• 22. Na inyuĩ ngombo-rĩ, athĩkagai maũndũ-inĩ mothe nĩ aathani arĩa mamwathaga ũhoro-inĩ wa mwĩrĩ; to hĩndĩ ĩrĩa mekũmũrora na maitho, o ta mũgwĩcukumithania nao, no makĩria maathĩkagĩrei mũtarĩ na ũhinga ngoro, mũgĩĩtigagĩra Mwathani.
• 23. Na rĩrĩ, ũndũ o wothe mũgwĩka-rĩ, wĩkagei na ngoro o ta arĩ wĩra wa Mwathani mũraruta, na ti wa andũ,
• 24. mũkĩmenyaga atĩ nĩ Mwathani ũkamũhe kĩrĩa mwĩrĩirũo, arĩ kĩo igai rĩanyu: nĩ Mwathani Kristo mũtungatagĩra.
• 25. Tondũ-rĩ, mũndũ ũrĩa wĩkaga ũũru nĩagathukĩrũo na ũũru o ta ũcio ekĩte: na gũtirĩ ũhoro wa gũtĩĩra andũ maũthĩ.

Home