Go Back

Afilipi Chapter 4

• 1. HAKĨRĨ ũguo, ariũ a Ithe witũ-rĩ, inyuĩ nyendete na ngamwĩriragĩria, o inyuĩ mũhaana ta gĩkeno gĩakwa o na thũmbĩ yakwa-rĩ, ikaragai mũrũmĩte wega, endwa akwa, thĩinĩ wa Mwathani.
• 2. Ngũgĩthaitha Euodia, na ngathaitha Sunutuke o nake, atĩ maikarage thĩinĩ wa Mwathani marĩ na ngoro ĩmwe.
• 3. O nawe mũrata wakwa wa ma, wee tũrutithanagia wĩra nawe ta tuohereirũo icoki rĩmwe, nĩndakũhoya ũteithagie atumia acio, nĩ gũkorũo nĩmaarũagĩrĩra Ũhoro-ũrĩa-Mwega hamwe na niĩ, o na Klementi nake, o na arĩa angĩ othe twarutithanagia wĩra nao. Nao othe-rĩ, marĩĩtwa mao nĩ maandĩke ibuku-inĩ rĩrĩa rĩa muoyo.
• 4. Ikaragai mũkenete nĩ ũndũ wa Mwathani hĩndĩ ciothe: o na nguuga o rĩngĩ atĩ mũikarage mũkenete.
• 5. Tũmagai gũkiranĩrĩria kwanyu kũmenyũo nĩ andũ othe. Mwathani akiriĩ gũũka.
• 6. Tigagai gwĩtanga nĩ ũndũ o na ũrĩkũ: no rĩrĩ, menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho.
• 7. Naguo thayũ wa Ngai, ũrĩa ũtangĩmenyeka ũrĩa ũtariĩ, nĩũrĩikaragia ngoro cianyu o na gwĩciria kwanyu nakuo thĩinĩ wa Kristo Jesu.
• 8. Na ngũrĩkĩrĩria atĩrĩ, ariũ a Ithe witũ, maũndũ o marĩa ma ma, namo marĩa matĩĩku, na ma kĩhooto, na marĩa matheru, na marĩa mangĩendeka, o na marĩa me na ũhoreri-rĩ; ningĩ kũngĩrĩ na ũndũ wĩ mwagĩrĩru, kana ũndũ wa kũgathwo, maũndũ macio-rĩ, wĩciragiei ũhoro wamo.
• 9. Namo maũndũ marĩa mwerutire harĩ niĩ mũkĩmetĩkĩra, na ningĩ mũkĩmaigua harĩ niĩ, na mũkĩmona, ĩkagai mo; nake Ngai mwene thayũ nĩarĩikaraga na inyuĩ.
• 10. Na rĩrĩ, nĩ gũkena ngenete mũno thĩinĩ wa Mwathani, nĩ ũndũ atĩ rĩu nĩmũrurumũkĩtie ũhoro wanyu wa kwĩĩnjirĩria. Na no mweĩnjiragĩria, tiga nĩ ihinda mwaagĩte.
• 11. No ti ũhoro wa wagi ngwaria: nĩ gũkorũo nĩndĩĩrutĩte kũiganwo nĩ maũndũ o marĩa ndĩ namo.
• 12. Ni’menyerete gũikara ndĩ mũkĩaru, na ngamenyera gũikara ndĩ mũtongu: kũndũ guothe o na maũndũ-inĩ mothe nĩndutĩtwo kũhũna o na kũhũta, na ningĩ gũtonga o na kwaga.
• 13. Nĩ’hotaga gwĩka maũndũ mothe na ũndũ wake we ũrĩa ũ’heaga hinya.
• 14. Ĩndĩ nĩmwekire wega nĩ kũgwatanĩra na niĩ thĩna wakwa.
• 15. Na inyuĩ Afilipi nĩmũũĩ inyuene atĩ hĩndĩ ĩrĩa Ũhoro-ũrĩa-Mwega waambĩrĩirie kũhunjanĩrio, ndoima bũrũri wa Makedonia-rĩ, gũtirĩ kanitha wagwatanĩire na niĩ ũhoro-inĩ wa kũheana na wa kwamũkĩra, tiga o inyuĩ oiki;
• 16. tondũ o na ndĩ Thesalonike nĩmwandũmĩire indo cia kũndeithia, na ti rĩmwe.
• 17. No rĩrĩ, ti atĩ ngwĩrirĩria o kĩheo kĩanyu: ũrĩa ndĩĩriragĩria kuona nĩ maciaro marĩa maingihaga ma kũmũrehere ngatho.
• 18. Na rĩrĩ, indo ciothe ndĩ nacio, na ngakĩrĩrĩria. Nĩnjiganĩtie nĩ ũndũ nĩnyamũkĩrĩte indo iria mwandehithĩirie na Epafarodito, nacio ihaana ta mũtararĩko wa kĩndũ kĩnungĩte wega, na ta igongona rĩngĩĩtĩkĩrĩka nĩ Ngai na rĩa kũmũkenia.
• 19. Nake Ngai wakwa nĩarĩkĩragĩrĩria kũmũhe kĩrĩa o gĩothe mũngĩkorũo mwagĩte, akĩmũtanahagĩra na ũtonga wake ũrĩa wĩ na Kristo Jesu kũrĩa kwĩ na riri.
• 20. Nake Ngai, o we Ithe witũ, arogoocagwo tene na tene. Amen.
• 21. Geithiai mũndũ ũrĩa wothe mwamũre ũikaraga thĩinĩ wa Kristo Jesu. Ariũ a Ithe witũ arĩa twĩ hamwe nao nĩmaamũgeithia.
• 22. Nao andũ arĩa aamũre othe nĩmaamũgeithia, na makĩria nĩ arĩa a mũciĩ wa Kaisari.
• 23. Wega wa Mwathani Jesu Kristo ũrogĩa na maroho manyu.

Home