Go Back

Afilipi Chapter 3

• 1. NAGUO ũhoro wa kũrigĩrĩria nĩ atĩrĩ, ariũ a Ithe witũ, kenagai thĩinĩ wa Mwathani. Ha ũhoro wa gũcokera maũndũ mamwe rĩrĩa ngũmwandĩkĩra, ndikuona ta arĩ ũhoro wa kũ’nogia; no inyuĩ-rĩ, nĩũmwagĩrĩire nĩ ũndũ wa kũmũtiirĩrĩra.
• 2. Wĩmenyagĩrĩrei arĩa mahaana ta magui, mwĩmenyagĩrĩre arĩa marutaga mawĩra moru, na mwĩmenyagĩrĩre andũ arĩa metemengaga mĩĩrĩ yao:
• 3. nĩ ũndũ nĩ ithuĩ tũruaga na ma, o ithuĩ tũinamagĩrĩra Ngai tũkĩmũhoyaga na maroho maitũ, na tũkerahaga nĩ ũndũ wa Kristo Jesu, na tũtiĩhokaga ũhoro wa mwĩrĩ.
• 4. No ingĩkĩenda-rĩ, o na niĩ ndahota kwĩhoka ũhoro wa mwĩrĩ: kũngĩkorũo nĩkũrĩ mũndũ wĩciragia atĩ e na ũndũ angĩĩhokera ũhoro-inĩ wa mwĩrĩ-rĩ, niĩ nĩndĩmũkĩrĩtie.
• 5. Nĩ gũkorũo nĩndaruithirio mũthenya wa ĩnana, na ndĩ wa rũciaro rũa Isiraeli, na wa mũhĩrĩga wa Benjamini, na ndĩ Mũhibirania waciarirũo nĩ Ahibirania. Ha ũhoro wa watho-rĩ, ndĩ Mũfarisai;
• 6. na ha ũhoro wa kĩyo-rĩ, ndatũire ’nyariraga kanitha, na ha ũhoro wa ũthingu ũrĩa uumanaga na watho-rĩ, ndiarĩ na ũcuke.
• 7. Ĩndĩ maũndũ macio ndatuaga atĩ marĩ na uumithio-rĩ, nĩmo ndĩkĩtie gũtua atĩ nĩ ma tũhũ, tondũ wa kũgĩa na Kristo;
• 8. ĩĩ-ni, o na maũndũ mothe-rĩ, ndĩmatuaga ma tũhũ, kuona atĩ rĩu nĩ’menyete Kristo Jesu Mwathani wakwa na ũmenyi ũrĩa ũkĩrĩte kũna maũndũ macio mangĩ mothe. Nĩ tondũ wake ndorĩirũo nĩ indo ciothe, na ngacitua o ta mahuti ma gũteo, nĩ getha ndĩĩgĩĩre na Kristo,
• 9. na ngoragwo ndĩ thĩinĩ wake, itakĩrĩ na ũthingu wakwa mwene, o wa mũthemba ũcio uumanaga na watho, tiga o ũrĩa uumanaga na ũhoro wa gwĩtĩkia Kristo, o ũthingu ũrĩa uumaga kũrĩ Ngai nĩ ũndũ wa gwĩtĩkia.
• 10. Na ningĩ nĩ getha ndĩmũmenye we, o na ’menye hinya ũrĩa uumanaga na kũriũka gwake, na tũgwatanĩre nake mĩnyamaro yake, na ’haananio nake ũhoro-inĩ wake wa gũkua,
• 11. nĩguo atĩ, kũngĩkĩhoteka, ngakinyĩrĩra ũhoro wa kũriũkio nyume kũrĩ arĩa akuũ.
• 12. Ngiuga ũguo-rĩ, ti ta kuuga atĩ nĩndĩkĩtie gũkinya hau, o na kana ngarĩkia kwagĩrĩra kũna: ĩndĩ nĩ kwĩrutanĩria ndĩĩrutanagĩria gũthiĩ na mbere, nĩguo atĩ, kwahoteka, ndĩĩnyitĩre ũndũ o ũrĩa ndanyitĩirũo nĩ Kristo Jesu.
• 13. Ariũ a Ithe witũ, ndikwĩona ta ndĩkĩtie kũũnyita: no ũndũ ũrĩa njĩkaga no ũmwe, atĩrĩ, nĩndiganĩirũo nĩ maũndũ marĩa ndigĩte na thutha, ngatambũrũka ’nyite maũndũ marĩa marĩ mbere yakwa-rĩ,
• 14. ngerutanĩria gũthiĩ o na mbere, nĩ getha ngakinya handũ harĩa hakinyagwo, na ngaheo kĩheo kĩrĩa kĩheanagwo, nakĩo nĩkĩo gwĩtwo nĩ Ngai thĩinĩ wa Kristo Jesu, nĩguo ’thiĩ Igũrũ.
• 15. Nĩ ũndũ ũcio-rĩ, ithuĩ arĩa tũtuĩkĩte andũ agima nĩtũtũũre twĩciragia ũguo, na mũngĩkorũo mũrĩ ũndũ mwĩciragia na njĩra ĩngĩ-rĩ, ũndũ ũcio o naguo Ngai nĩarĩmũguũrĩria.
• 16. No rĩrĩ, harĩa tũrĩkĩtie gũkinya-rĩ, nĩtũthiage na mĩthiĩre ĩrĩa yaganĩrĩire naho.
• 17. Ariũ a Ithe witũ, wĩgerekanagiei na niĩ, ningĩ mũbarage wega andũ arĩa mathiaga na mĩthiĩre o ĩrĩa twamuonagĩrĩria.
• 18. Tondũ nĩkũrĩ andũ aingĩ mathiaga na mĩthiĩre ya kuonania atĩ nĩ thũ cia mũtharaba wa Kristo, o arĩa ndanamwĩra ũhoro wao kaingĩ, o na rĩu ngũmwĩra ũhoro wao ngĩitaga maithori.
• 19. Andũ acio-rĩ, kũrigĩrĩria kwao nĩ gũtoma magatoma; ngai yao nĩyo nda; naguo ũndũ ũrĩa wa kũmaconora, nĩguo megoocaga nĩ ũndũ waguo; ningĩ metaranagia maũndũ o ma gũkũ thĩ.
• 20. Nĩ gũkorũo bũrũri ũrĩa tũrĩ aguo kĩũmbe nĩ kũrĩa Igũrũ, na twetagĩrĩra Mũhonokia ũrĩa ũkoima kuo, nĩwe Mwathani Jesu Kristo,
• 21. ũrĩa ũkagarũra mwĩrĩ ũyũ witũ ũhinyaraga, ũhaananio na mwĩrĩ wake wĩ na riri, nĩ ũndũ wa hinya ũrĩa arĩ naguo wa gũtũma o maũndũ mothe maathĩkage nĩwe.

Home