Go Back

Gũcokerithia Maathani Chapter 6

• 1. Na rĩrĩ, maya nĩmo maathani, na irĩra cia watho wa kũrũmĩrĩrũo, o na matuĩro ma cira, marĩa Jehova Ngai wanyu aathanĩte mũrutagwo, nĩ getha mũkamekaga mwĩ bũrũri ũcio mũkũringa mũthiĩ mũkawĩgwatĩre ũtuĩke wanyu;
• 2. nĩguo ũgetigagĩra Jehova Ngai waku, ũmenyagĩrĩre irĩra ciothe cia watho wake wa kũrũmĩrĩrũo, na maathani make marĩa ngũgwatha wĩkage, wee mwene, na mũrũguo, o na mwana wa mũrũguo, matukũ mothe ma muoyo waku; na nĩguo matukũ maku makaingĩhio.
• 3. Tondũ ũcio, wee Isiraeli, igua, o na ũmenyagĩrĩre ũhoro wa gwĩkaga maũndũ macio; nĩ getha ũtũũre wonaga wega, na ningĩ nĩ getha mũthaathare mũingĩhe mũno, mũrĩ bũrũri wĩ bũthi wa iria o na ũũkĩ, o ta ũrĩa Jehova, Ngai wa mathoguo, aakwĩrĩire.
• 4. Atĩrĩrĩ! Wee Isiraeli, thikĩrĩria; Jehova Ngai witũ, we wiki nowe Jehova;
• 5. nawe enda Jehova Ngai waku na ngoro yaku yothe, na muoyo waku wothe, o na hinya waku wothe.
• 6. Namo mohoro maya ndĩrakũhe ũmũthĩ ngĩgũtaara-rĩ, reka matũũre ngoro-inĩ yaku;
• 7. na ũmarute ciana ciaku na kĩyo, na waragie ũhoro wamo hĩndĩ ĩrĩa ũikarĩte nyũmba yaku thĩinĩ, na hĩndĩ ĩrĩa ũgũthiĩ na njĩra, na hĩndĩ ĩrĩa ũkomete, o na rĩrĩa ũũkĩrĩte.
• 8. Na ũmohagĩrĩre guoko gwaku nĩguo matuĩkage kĩmenyithia marĩ ho, o na ũmekagĩre thiithi waku nĩguo matuĩkage kĩririkania gĩĩkĩrĩtwo gatagatĩ-inĩ ka maitho maku.
• 9. Ningĩ ũmaandĩke hingĩro-inĩ cia nyũmba yaku, o na ihingo-inĩ ciaku.
• 10. Na nĩgũgakinya atĩrĩ, atĩ hĩndĩ ĩrĩa Jehova Ngai waku agagũtwara agũtonyie bũrũri ũcio erĩire mathoguo, Iburahimu, na Isaaka, na Jakubu, na mwĩhĩtwa, atĩ nĩagakũhe, na ũgĩe na matũũra manene mega mũno, marĩa ũtaakĩte wee mwene;
• 11. o na nyũmba ciiyũrĩte indo nyingĩ njega mũno, na tiwe mwene ũiyũrĩtie; o na marima ma maĩ, na tiwe mwene ũmenjete; o na mĩgũnda ya mĩthabibu na mĩtamaiyũ ĩrĩa ũtaahandire wee mwene, nawe ũrĩage ũkahũna-rĩ,
• 12. nĩũgakĩĩmenyagĩrĩra ndũkariganĩrũo nĩ Jehova, ũrĩa wakũrutire bũrũri wa Misiri, uume nyũmba ya ũkombo.
• 13. Ndũrĩ hingo ũtagagĩĩtigagĩra Jehova Ngai waku, na ũmũtungatagĩre, na rĩrĩa ũkwĩhĩta, ũgwetage rĩĩtwa rĩake.
• 14. Na mũtikanarũmĩrĩre ngai ingĩ thĩinĩ wa ngai cia andũ arĩa mamũrigicĩirie;
• 15. nĩ gũkorũo Jehova Ngai waku, ũrĩa ũrĩ thĩinĩ wanyu, nĩ Ngai wĩ ũiru; tigagai gwĩka ũguo nĩ getha marakara ma Jehova Ngai waku matikae gũgũũkĩrĩra magũcine, nake akũnine biũ, akweherie gũkũ thĩ guothe.
• 16. Mũtikanagerie Jehova Ngai wanyu, ta ũrĩa mwamũgereirie kũu Masa.
• 17. Maathani ma Jehova Ngai wanyu, nĩmo mũrĩmenyagĩrĩra na kĩyo mũno, o na maũira make, o na irĩra cia watho wake wa kũrũmĩrĩrũo, marĩa agwathĩte ũrũmagĩrĩre.
• 18. Nawe wĩkage maũndũ marĩa Jehova onaga maagĩrĩire, na marĩa mega, nĩ getha ũtũũre wonaga wega, nĩguo ũhote gũthiĩ ũtonye bũrũri ũcio mwega, ũwĩgwatĩre ũtuĩke waku, o bũrũri ũcio Jehova erĩire mathoguo na mwĩhĩtwa, atĩ
• 19. nĩakaingata thũ ciaku ciothe ciehere mbere yaku, o ta ũrĩa oigĩte.
• 20. Namo matukũ marĩa magoka, rĩrĩa mũrũguo agakũũria atĩrĩ, Gĩtũmi kĩa maũira, na irĩra cia watho wa kũrũmĩrĩrũo, o na matuĩro ma cira, marĩa Jehova Ngai witũ amwathĩte mũrũmagĩrĩre-rĩ, nĩ kĩ?
• 21. Nĩũgakĩĩra mũrũguo atĩrĩ, Ithuĩ kwĩ hĩndĩ twarĩ ngombo cia Firauni o kũu Misiri, nake Jehova agĩtũruta kũu Misiri na ũndũ wa gwĩka maũndũ ma hinya na guoko gwake;
• 22. nakuo kũu bũrũri wa Misiri, o na kwĩ Firauni na andũ othe a nyũmba yake, Jehova akĩringa ciama, o na agĩĩka maũndũ ma kũgegania manene, na ma hinya mũno, tũkĩĩonagĩra na maitho maitũ;
• 23. nake agĩtũruta kuo nĩ getha atũrehe atũtonyie gũkũ, nĩguo atũhe bũrũri ũyũ erĩire maithe maitũ na mwĩhĩtwa atĩ nĩagatũhe.
• 24. Nake Jehova agĩtwatha atĩ tũrũmagĩrĩre irĩra icio ciothe cia watho, na twĩtigagĩre Jehova Ngai witũ, nĩ getha tuonage wega hĩndĩ ciothe, nĩguo atũmenyagĩrĩre tũtũũre muoyo, o ta ũrĩa gũtariĩ ũmũthĩ.
• 25. Naguo ũndũ ũcio nĩguo ũgatũma tũtuwo athingu, tũngĩmenyerera maathani macio mothe tũmarũmie twĩ mbere ya Jehova Ngai witũ, o ta ũrĩa aatwathire.

Home