Go Back

Gũcokerithia Maathani Chapter 33

• 1. Nakĩo gĩkĩ nĩkĩo kĩrathimo kĩrĩa Musa, mũndũ ũcio wa Ngai, aarathimire ciana cia Isiraeli atanakua,
• 2. agĩkiuga ũũ: Jehova oimire Sinai, Akĩarahũka agĩthiĩ kũrĩ o oimĩte Seiru. Agĩcangararũka oimĩte kĩrĩma kĩa Parani, Ningĩ agĩũka oimĩte harĩ arĩa aamũre ngiri makũmi maingĩ; Na guoko-inĩ gwake kwa ũrĩo kwarĩ mwaki wa watho waakanaga nĩ ũndũ wao.
• 3. Ti-itherũ nĩendaga mĩhĩrĩga ya andũ ake; Andũ ake othe arĩa atheru me moko-inĩ maku, Nao maaikarire thĩ o kũu magũrũ-inĩ maku, Nao, mũndũ o mũndũ, nĩakaheo ũhoro uumĩte harĩ we.
• 4. Musa nĩwe watũheire watho, Naguo ũgĩtuĩka kĩrĩra gĩa gũtigĩrũo ũũngano wa Jakubu gĩtuĩke kĩaguo.
• 5. Agĩgĩtuĩka mũthamaki harĩ Jeshuruni, Rĩrĩa anene othe a andũ maakorirũo monganĩte, O rĩrĩa mĩhĩrĩga yothe ya Isiraeli yonganire.
• 6. Reubeni arorekwo atũũre, na ndagakue, No rĩrĩ, andũ ake maronyiha.
• 7. Nakĩo kĩrathimo kĩa Juda nĩkĩo gĩkĩ: agĩkiuga atĩrĩ, Jehova, igua mũgambo wa Juda, Na ũmũtwarithie harĩ andũ ake; Nĩeteithirie we mwene na moko make akĩhũrana; Ningĩ wee nĩwe mũmũteithia akĩrũa na thũ ciake.
• 8. Naho ha ũhoro wa Lawii, akiuga ũũ: Thumimu yaku o na Urimu yaku irĩ hamwe na mũndũ waku ũcio mwĩtigĩri Ngai, O we ũrĩa wagereirie kũu Masa, Na ũkĩmũrũithĩria kũu Meriba.
• 9. Ningĩ ha ũhoro wa ithe na nyina akiuga atĩrĩ, Ndimonete, O nao ariũ a ithe ndaigana kũmathurania, O nacio ciana ciake ndaigana gũcirũmbũiya. Nĩ gũkorũo Alawii nĩo mamenyagĩrĩra ũhoro waku, O na makamenyerera kĩrĩkanĩro gĩaku.
• 10. Acio nĩo makaruta Jakubu matuĩro maku ma cira, O nake Isiraeli mamũrute watho waku; Ningĩ nĩo magakũigagĩra ũbumba mbere yaku, O namo mahaki ma gũcinwo marĩ magima, mamaigage kĩgongona-inĩ gĩaku.
• 11. Atĩrĩrĩ, Jehova, rathima indo ciake iria e nacio, O na wĩtĩkĩre wĩra wa moko make; Theca njohero cia arĩa mamũũkagĩrĩra, O na cia arĩa mamũthũire, matikanacoke kwĩhanda.
• 12. Naho ha ũhoro wa Benjamini akiuga ũũ: Ũrĩa wendetwo mũno nĩ Jehova nĩagatũũra hakuhĩ nake atarĩ na ũgwati; Jehova atindaga amũgitĩire mũthenya wothe, Nake atũũraga aikarĩte gatagatĩ-inĩ ga ciande ciake.
• 13. Naho ha ũhoro wa Jusufu akiuga ũũ: Bũrũri wake ũrorathimwo nĩ Jehova Ũrathimĩrũo indo cia bata iria ciumaga igũrũ, o na ireera, O na kũndũ kũriku kũrĩa gũikaraga gwĩthunĩte mũhuro warĩo,
• 14. O na ningĩ arathimĩrũo indo cia bata iria cionekaga nĩ ũndũ wa riũa, O na indo cia bata iria cionekaga nĩ ũndũ wa ũrĩa mĩeri ĩrũmanagĩrĩra.
• 15. O na arathimĩrũo indo iria njega ikĩrĩte iria ingĩ cia irĩma-inĩ iria cia tene o tene, O na indo iria irĩ bata cia ithũngũri iria cia mĩndĩ na mĩndĩ,
• 16. O na ningĩ arathimĩrũo indo iria irĩ bata cia gũkũ thĩ, o na iria ciiyũrĩte kuo, O na arathimĩrũo ũtugi wa ũcio waikarĩte kĩhinga-inĩ. Kĩrathimo kĩu-rĩ, kĩrokinya o mũtwe wa Jusufu, O ruototia-inĩ rũa mũtwe wa ũcio waamũrĩtwo atuĩke mũnene gũkĩra ariũ a ithe.
• 17. Irigithathi rĩake nĩ ndegwa, naguo ũhoro wa kũneneha ũgatũũra wĩ warĩo, Nacio hĩa ciarĩo itariĩ o ta cia mbogo, Na nĩcio rĩkahũra ndũrĩrĩ ciothe nacio, rĩcitindĩke rĩcikinyie ituri-inĩ cia thĩ. Nao arĩa mageka ũguo nĩ njiaro cia Efiraimu ngiri makũmi maingĩ, O na njiaro cia Manase ngiri nyingĩ.
• 18. Naho ha ũhoro wa Zebuluni akiuga ũũ: Atĩrĩrĩ, wee Zebuluni, kenaga nĩ ũndũ wa ng’endo iria ũthiaga ũgeni; Nawe Isakaru, kenaga nĩ ũndũ wa ũrĩa ũtũũraga hema-inĩ ciaku.
• 19. Andũ acio nĩ gwĩta mageta ndũrĩrĩ ithiĩ harĩ o kĩrĩma-inĩ, Nakuo kũu nĩkuo makarutĩra magongona ma ũthingu; Nĩ gũkorũo indo nyingĩ cia maria-inĩ nĩcio makeguna nacio, ta arĩ kuonga mekuonga, O na megunage na indo iria hithe mũthanga-inĩ wa iria rĩrĩa inene.
• 20. Naho ha ũhoro wa Gadi akiuga ũũ: Ũrĩa ũnenehagia mĩhaka ya Gadi arogoocwo; Atũũraga atariĩ ta mũrũthi wa mũgoma, Nake nĩ gũtambuura agagĩtambuura guoko, o na mũtwe ruototia-inĩ.
• 21. Gĩcunjĩ kĩa mbere nĩ kũiga eigĩire we mwene, Nĩ gũkorũo kũu nĩkuo gĩcunjĩ kĩa mũtua-watho kĩigĩtwo; Ningĩ aatwaranire na anene a andũ, O naguo cira wa kĩhooto wa Jehova nĩwe waũtuire, O namo matuĩro ma cira wake akĩmahe Isiraeli.
• 22. Naho ha ũhoro wa Dani akiuga ũũ: Dani nĩwe kĩana kĩa mũrũthi Kĩrĩa kĩguthũkaga kiumĩte Bashani.
• 23. Naho ha ũnoro wa Nafitali akiuga ũũ: Atĩrĩrĩ, wee Nafitali ũtũire ũhũnĩtio nĩ ũtugi wa Jehova, O na ũkaiyũrũo nĩ kĩrathimo gĩake; Wĩgwatĩre mabũrũri ma mwena wa ithũĩro, o na wa gũthini, matuĩke maku.
• 24. Naho ha ũhoro wa Asheri akiuga ũũ: Asheri arorathimĩrũo ciana, O na etĩkĩrĩkage nĩ ariũ a ithe; O narĩo ikinya rĩake-rĩ, arorĩtobokagia maguta-inĩ.
• 25. Wee Asheri-rĩ, hingĩro ciaku igatuĩka cia igera, o na gĩcango; Na rĩrĩ, o ta ũrĩa matukũ maku magaikara-rĩ, ũguo noguo hinya waku naguo ũgaikara.
• 26. Atĩrĩrĩ Jeshuruni, gũtirĩ ũngĩ ũtariĩ ta Mũrungu, O we ũcio ũgeraga igũrũ matu-inĩ nĩguo agũteithie, O na agaikarĩra matu marĩa mairũ onanie ũnene wake.
• 27. Ngai ũrĩa ũtũũraga mĩndĩ na mĩndĩ, nĩwe ũtũũro waku, Namo moko make marĩa matũũraga tene na tene nĩmo me mũhuro waku. Nĩwe watugutanirie thũ yaku ĩkweherere, Agĩcoka akiuga atĩrĩ, Ninana.
• 28. Nake Isiraeli agĩgĩtũũra atarĩ na ũgwati, Nakĩo gĩthima kĩa Jakubu gĩgĩikara gĩĩ giiki, O kũu bũrũri wĩ ngano na ndibei; Ti-itherũ matu make ma igũrũ maitaga ireera.
• 29. Hĩ! Gũkena-rĩ, nĩwe Isiraeli; Nĩ andũ arĩkũ matariĩ tawe, wee rũrĩrĩ rũhonokie nĩ Jehova, O we ũcio ũtuĩkĩte ngo ya ũteithio waku, O na agatuĩka rũhiũ rũa njora rũa ũnene waku? Nacio thũ ciaku nĩikenyihanyihagĩria harĩ wee, Nakuo kũndũ gwacio kũrĩa gũtũũgĩru nĩkuo ũkarangaga na makinya maku.

Home