Go Back

Gũcokerithia Maathani Chapter 32

• 1. Atĩrĩrĩ! inyuĩ matu-mairũ, ta tegai matũ ndĩmũhe ũhoro; O nawe thĩ-rĩ, ta thikĩrĩria ũigue ndeto cia kanua gakwa.
• 2. Ũrutani ũrĩa ngũrutana ũrĩtaataga o ta mbura, Nacio ciugo iria nguuga igũtuĩka o ta ireera rĩiyũrĩte thĩ, O na ituĩke o ta rũciciũ rũkĩihũgia nyeki ya mũmerano, O na ta mbura nene ĩkiurĩra mathangũ gĩthaka-inĩ,
• 3. Nĩ gũkorũo nĩ kũheana ngũheana ũhoro wa rĩĩtwa rĩa Jehova; Inyuĩ na inyuĩ-rĩ, goocai Ngai witũ nĩ ũndũ wa ũnene wake.
• 4. We ũcio wĩtagwo Rũaro Rũa Ihiga-rĩ, wĩra ũrĩa arutaga nĩ mwagĩrĩru kũna kũna; Nĩ gũkorũo mĩthiĩre yake yothe nĩ ya kĩhooto; Nake nĩwe Mũrungu ũrĩa mwĩhokeku, ũtarĩ ũũru, Na ningĩ nĩ wa ma, o na wa kĩhooto.
• 5. Nĩmethũkĩtie mbere yake, na tio ciana ciake, nĩ ũndũ nĩmamwaganĩire; Nĩo rũciaro rũremu rũĩ wogomo.
• 6. Atĩrĩrĩ, inyuĩ andũ aya akĩgu na mũkaaga ũũgĩ, Githĩ mũhera ũrĩa mũcũngĩte Jehova nĩguo ũcio? Githĩ tiwe thoguo ũrĩa wakũũmbire? Nĩwe wakũũmbire, o na agĩtũma ũikare wĩhandĩte wega.
• 7. Ta ririkana matukũ marĩa maathirire tene, Wĩcirie ũhoro wa mĩaka ĩrĩa yatũũrĩtwo nĩ njiaro nyingĩ cia tene; Ta hoya thoguo ũhoro, nake nĩegũkuonia. O na athuri anyu, nao nĩmegũkwĩra.
• 8. Hĩndĩ ĩrĩa Ũcio-Wĩ-Igũrũ-Mũno aagayanirie ndũrĩrĩ mabũrũri ma cio, O na rĩrĩa aamũranirie ciana cia andũ-rĩ, Nĩaatuire mĩhaka ya ndũrĩrĩ Aririkaine ũrĩa ciana cia Isiraeli ĩkaigana igĩtarũo.
• 9. Nĩ gũkorũo andũ a Jehova nĩo igai rĩake, Nake Jakubu nĩwe ũmũgũĩrĩire amwĩgwatĩre atuĩke wake.
• 10. Nĩ kuona aamuonire kũndũ werũ-inĩ mũtheri, O kũndũ kũrĩa gũtarĩ ũrĩa gũtariĩ tiga o werũ mũtheri ũgambagwo nĩ nyamũ; Nake agĩkimũrigicĩria, o na akĩmũikaria wega, Na akĩmũmenyerera o ta arĩ kĩũma gĩake kĩa riitho;
• 11. Na rĩrĩ, o ta ũrĩa nderi yarahũraga tũcui twayo nyũmba yayo thĩinĩ, O na ĩkabatabata igũrũ rĩatuo, O ũguo noguo Jehova aatambũrũkirie mathagu make, akĩmoya, Akĩmakuua amaigĩrĩire igũrũ rĩamo;
• 12. Jehova wiki nowe wamũtongoririe, Na gũtiarĩ ngai ya kũngĩ yarĩ hamwe nake.
• 13. Kũndũ kũrĩa gũtũũgĩru gwa thĩ nĩkuo aamũhaicithirie, Agĩtũma arĩage irio iria ciumĩte mĩgũnda; Na akĩmuongithia ũũkĩ aũrutĩte rũaro-inĩ rũa ihiga, O na maguta amarutĩte ihiga-inĩ rĩa nyaigĩ;
• 14. O na akĩmũhe ngorono ya ng’ombe, o na iria rĩa ng’ondu, Hamwe na maguta ma tũtũrũme, Na ndũrũrae cia kĩruka kĩa Bashani, hamwe na thenge, Na mũtu ũrĩa mwega mũno wa ngano; O na ũkanyua thakame ya thabibu, nayo nĩyo ndibei yacio.
• 15. No rĩrĩ, Jeshuruni nĩ kũnora aanorire, agĩikia hati; Wee-rĩ, nĩ kũnora ũnorete ũgatunguha, ũkahũna mũno; Hĩndĩ ĩo agĩgĩtigana na Ngai ũrĩa wamũũmbire, Agĩkĩnyarara Rũaro Rũa Ihiga rũrĩa rũamũhonokirie.
• 16. Magĩkĩiguithia Jehova ũiru nĩ ũndũ wa ngai ciao cia kũngĩ, O na maĩkĩmũthirĩkia na maũndũ mao ma tũhũ nĩguo arakare.
• 17. Ningĩ makĩrutĩra ndaimono o icio itaarĩ Ngai magongona, Magĩgĩthĩnjĩra ngai iria mataamenyete ũhoro wacio, O ngai cia mũũkano iria cionekire thutha-inĩ, Iria itetigĩrĩtwo nĩ maithe manyu.
• 18. Ũgĩkĩaga kũrũmbũiya Rũaro Rũa Ihiga rũrĩa rũagũciarire, O nake Mũrungu ũrĩa wagũciarire ũgĩkĩriganĩrũo nĩwe.
• 19. Nake Jehova akĩona ũndũ ũcio akĩmathũũra, Nĩ ũndũ wa ũrĩa ariũ ake, na airĩtu ake, maamũthirĩkirie magĩtũma arakare,
• 20. Nake agĩkiuga atĩrĩ, Niĩ na niĩ-rĩ, nĩngũmahitha ũthiũ wakwa, Ndĩkĩone ũrĩa ũhoro wao wa kũrigĩrĩria ũgaikara; Nĩ gũkorũo matũire marĩ rũciaro rũremu mũno, O na ciana itarĩ gwĩtĩkia ingĩĩtĩkia.
• 21. Manjiguithĩtie ũiru nĩ ũndũ wa ngai hatarĩ, Maga’thirĩkia na maũndũ mao ma tũhũ marĩa mekaga magatũma ndakare. Niĩ na niĩ-rĩ, ngamaiguithia ũiru nĩ ũndũ wa rũrĩrĩ hatarĩ, Ndĩmathirĩkie na ũndũ wa rũrĩrĩ rũkĩgu ndũme marakare.
• 22. Marakara makwa maakanĩte o ta mwaki Ũrĩa wakanĩte ũgakinya o Kwa-ngoma kũu kũriku mũno, Ũgagĩcina thĩ o na irio iria ciumaga kuo, ũgacinina biũ; O nacio itina-inĩ cia irĩma magakũmundia mwaki.
• 23. Maũndũ ma kũmagera ngero-rĩ, nĩ kuorerera ngamorerera, Nayo mĩguĩ yakwa ndĩmĩninĩre harĩ o, ngĩmaikia:
• 24. Makaagio hinya nĩ ng’aragu, nayo mĩĩrĩ yao ĩikare ĩhiũhĩte mũno ikarĩĩka, Na maninwo ininana irũrũ mũno; Ngamatwarithĩria nyamũ irĩ magego mogĩ mũno, O na ũrũrũ wa nyamũ iria itambaga thĩ tĩri-inĩ.
• 25. Hĩndĩ ĩrĩa me na kũu nja-rĩ, nĩ hiũ cia njora ikamanina, Narĩo ihinda rĩrĩa me nyũmba, nĩ gũtebeba gũkamagwata, Kũninwo aanake na airĩtu, Na rũkenge, o na mũndũ wĩ mbuĩ.
• 26. Ũrĩa njugĩte nĩ atĩrĩ, nĩ atĩ, Nĩingĩkamaharagania matwarũo kũraya, O na ningĩ nĩingĩgatũma matige gũcoka kũririkanwo thĩinĩ wa andũ,
• 27. Tiga ũndũ wa gwĩtigĩra rũmena rũa arĩa marĩ ũthũ nao, Nĩ getha hihi amuku ao matigakorũo ihĩtia-inĩ Makiuga atĩrĩ, Moko maitũ nĩmo metũũgĩrĩtie, Na ti Jehova wĩkĩte maũndũ macio mothe.
• 28. Nĩ ũndũ nĩ rũrĩrĩ rũagĩte ũũgĩ cira-inĩ, Na rũtirĩ ũmenyi wa maũndũ thĩinĩ waruo.
• 29. Na arĩ korũo andũ aruo nĩ ogĩ nĩguo mamenye ũhoro ũyũ, Na mecirie ũrĩa ũhoro wao wa kũrigĩrĩria ũgaikara!
• 30. Kaĩ mũndũ ũmwe angĩteng’eria andũ ngiri atĩa, Nao andũ erĩ mateng’erie andũ ngiri ikũmi, more, Tiga o Rũaro Rũao Rũa Ihiga rũkorirũo nĩrũmendetie, Nake Jehova akorũo amarekereirie akamaneana?
• 31. Nĩ gũkorũo rũaro rũao rũa ihiga rũtitariĩ ta Rũaro Ruitũ Rũa Ihiga; O nacio thũ ciitũ no ciĩtĩkie ũguo.
• 32. Nĩ gũkorũo mũthabibu wacio nĩguo mũthabibu wa Sodomu, O na wa mũthemba ũrĩa ũkũraga mĩgũnda ya Gomora; Nacio thabibu ciaguo nĩ maciaro ma mũtĩ mũrũrũ, O na imanjika cia thabibu ciaguo nĩ kũrũra irũrĩte mũno;
• 33. Ndibei yacio nĩyo ũrũrũ wa ndamathia, O na ũrũrũ ũrĩa mũũru wa kanua ka nduĩra.
• 34. Githĩ ũndũ ũcio ndũikaraga ũigĩtwo nũndo harĩ niĩ, Ũhingĩirũo mũthithũ-inĩ wakwa?
• 35. Ũhoro wa kũrĩhanĩria, o na wa kũhũrĩra andũ ũũru wao, nĩ wakwa, Hĩndĩ ĩrĩa magũrũ mao megũtenderũka; Nĩ gũkorũo mũthenya wao wa mũtino nĩũkuhĩhĩirie, Namo maũndũ marĩa makamakora nĩmakoneka o narua.
• 36. Tondũ Jehova nĩagacirĩra andũ ake, Na aaiguĩre ndungata ciake tha, Hĩndĩ ĩrĩa akona atĩ hinya wacio nĩ mũthiru, O na hakaaga o na ĩmwe yacio, ngombo, o na kana ĩkwĩatha.
• 37. Na acoke oige atĩrĩ, Ĩ kaĩ ngai ciacio irĩ ha, O rũaro rũacio rũa ihiga rũrĩa rũĩhokagwo nĩcio,
• 38. O ngai icio ciarĩaga maguta ma magongona ma cio, O na ikanyua ndibei ya indo iria ciarutagwo nĩcio cia kũnyuwo? Ngai icio-rĩ, ta nĩikĩarahũke imũteithie; Icio-rĩ, ta nĩigĩtuĩke cia kũmũgitĩra!
• 39. Menyai ũũ: atĩ niĩ, o niĩ nyiki, nĩ niĩ Ngai, Na gũtirĩ ngai ĩngĩ tiga o niĩ. Niĩ nĩ niĩ njũraganaga, na nĩ niĩ ndũmaga gũtũũrũo muoyo; Niĩ nĩ niĩ ndihanagia, na ngacoka kũhonania, Na gũtirĩ mũndũ o na ũmwe ũngĩhota kũhonokia mũndũ amũrute guoko-inĩ gwakwa.
• 40. Tondũ nyambararagia guoko gwakwa kũrorete igũrũ, Ngoiga atĩrĩ, O ta ũrĩa ndũũraga muoyo tene na tene-rĩ,
• 41. Ingĩkorũo nĩ’noorete rũhiũ rũakwa rũrĩa rũhenagia, O na ngaitĩka gũtuanĩra cira na kĩhooto-rĩ, Nĩngerĩhĩria harĩ thũ ciakwa, O nao andũ arĩa ma’thũire, nĩngamarĩhia ũũru ũrĩa maananjĩka.
• 42. Mĩguĩ yakwa-rĩ, ngamĩnyuithia thakame ĩikare ta mũndũ ũrĩĩtwo, Naruo rũhiũ rũakwa rũrĩe nyama rũcinine, Nayo thakame ĩo nĩ ya andũ arĩa moragĩtwo, hamwe na ya arĩa matahĩtwo, O na ĩkoima mĩtwe ya atongoria a thũ icio ciakwa.
• 43. Atĩrĩrĩ, inyuĩ andũ a ndũrĩrĩ, kenai hamwe na andũ ake, Nĩ gũkorũo nĩakarĩhanĩria thakame ya ndungata ciake, Nake erĩhĩrie harĩ amuku ake, Naguo bũrũri wake aũhoroherie, na ahoroherie andũ ake.
• 44. Nake Musa me na Hoshea wa Nuni makĩheana ũhoro wa ciugo cia rũĩmbo rũu ciothe ũkĩiguagwo nĩ andũ acio.
• 45. Nake Musa agĩkĩrĩkia kũhe Aisiraeli othe ndeto icio ciothe,
• 46. agĩkĩmera ũũ: Atĩrĩrĩ, rekei ndeto icio ciothe ciikare thĩinĩ wa ngoro cianyu, o icio ndĩramwĩra na ma o ma ũmũthĩ, nĩ getha mũgataaraga ciana cianyu nacio, nĩguo ikamenyagĩrĩra gwĩka maũndũ mothe marĩa meranĩtwo mekagwo watho-inĩ ũcio.
• 47. Tondũ-rĩ, ũndũ ũcio ti wa tũhũ harĩ inyuĩ, nĩ gũkorũo nĩguo wa kũmũtũũria muoyo, na nĩguo ũgatũma matukũ manyu maingĩhio mwĩ bũrũri ũcio mũkũringa Jorodani mũkegwatĩre ũtuĩke wanyu.
• 48. Ningĩ Jehova akĩarĩria Musa mũthenya o ro ũcio, akĩmwĩra atĩrĩ,
• 49. Ũkĩra wambate irĩma ici cia Abarimu, ũkinye kĩrĩma-inĩ kĩa Nebo igũrũ, kĩrĩa kĩrĩ bũrũri wa Amoabi, kũrĩa kũng’etheire Jeriko, wĩrorere bũrũri wa Kanaani, ũcio ngũhe ciana cia Isiraeli iwĩgwatĩre ũtuĩke wacio,
• 50. na ũgĩcoke ũkuĩre o kũu kĩrĩma-inĩ kĩu ũkwambata, ũturanĩrũo na andũ anyu arĩa maanakua, o ta ũrĩa Haruni mũrũ wa nyũkwa nake aakuĩrĩire kĩrĩma-inĩ kĩa Horu, agĩturanĩrũo na andũ ao arĩa maanakua;
• 51. nĩ ũndũ wa ũrĩa mwaagararire watho wakwa mũrĩ thĩinĩ wa ciana cia Isiraeli, o kũu maĩ-inĩ ma Meriba kũrĩa Kadeshi, werũ wa Zini; nĩ gũkorũo nĩmwaagire gũtũma nyamũrũo nduwo mũtheru harĩ ciana cia Isiraeli.
• 52. Kuona nĩũkona bũrũri ũcio wĩ mbere yaku; no rĩrĩ, gũtonya ndũgatonya bũrũri ũcio ngũhe ciana cia Isiraeli.

Home