Go Back

Gũcokerithia Maathani Chapter 28

• 1. Na nĩgũgakinya atĩrĩ, atĩ ũngĩkaigua uuge wa Jehova Ngai waku na kĩyo, nĩguo ũmenyerere maathani make mothe marĩa ngũgwatha ũmũthĩ wĩkage-rĩ, Jehova Ngai waku nĩagagũtũũgĩria mũno ũnenehe gũkĩra ndũrĩrĩ iria ingĩ ciothe cia thĩ;
• 2. ti-itherũ ũngĩkaigua uuge wa Jehova Ngai waku, nĩũgakinyĩrĩrũo nĩ irathimo ici ciothe.
• 3. Ũrathimwo maũndũ-inĩ ma itũũra rĩanyu, na ũrathĩinwo maũndũ-inĩ ma mĩgũnda yaku.
• 4. Ũrathanwo ũciari-inĩ wa ciana, na ũhoro-inĩ wa mĩgũnda yaku, na wa rũciaro rũa nyamũ ciaku, njaũ cia ng’ombe ciaku, na tũũri twa ndũru ciaku cia mbũri.
• 5. Ũrathimwo ũhoro-inĩ wa ciondo ciaku cia magetha, na wa ndĩrĩ ciaku iria imandagĩrũo mũtu.
• 6. Ningĩ ũrathimwo rĩinũkĩro-inĩ rĩa gwaku mũciĩ, o na riumagarĩro-inĩ.
• 7. Jehova nĩwe ũgatũma thũ ciaku iria igagũũkĩrĩra ihũrĩrũo mbere yaku; igoka na njĩra o ro ĩmwe nĩguo igũũkĩrĩre; no rĩrĩ, ikagera njĩra mũgwanja igĩkũũrĩra.
• 8. Jehova nĩagatũma kĩrathimo gĩake gĩgũkinyĩrĩre gĩkoniĩ makũmbĩ maku, o na maũndũ-inĩ mothe marĩa ugakoragwo ũgĩĩka na moko maku, na akũrathime ũrĩ bũrũri ũcio Jehova Ngai waku akũheaga.
• 9. Jehova nĩagagũtua rũrĩrĩ rũtheru rũamũrĩirũo we mwene na ma o ma, o ta ũrĩa aakwĩrire na mwĩhĩtwa atĩ nĩageka, ũngĩgatũũra ũmenyereire maathani ma Jehova Ngai waku, na ũthiage na njĩra ciake.
• 10. Nacio ndũrĩrĩ ciothe cia thĩ nĩikona atĩ wĩtanĩtio na Jehova; nacio nĩigagwĩtigagĩra.
• 11. O na ningĩ-rĩ, Jehova nĩagagũtongia akũgune ũciari-inĩ wa ciana, o na rũciaro-inĩ rũa nyamũ ciaku, na maciaro-inĩ ma mĩgũnda ya bũrũri waku, o bũrũri ũcio Jehova erĩire mathoguo na mwĩhĩtwa atĩ nĩagakũhe.
• 12. Jehova nĩagakũhingũrĩra kũndũ kũrĩa mũthithũ wake mwega ũigĩtwo, naguo ũguo nĩ ta kuuga igũrũ matu-inĩ, nĩ getha rĩkuuragĩrie mbura ĩrĩa bũrũri waku ũbatairio nĩyo ihinda rĩayo rĩakinya, na arathime mawĩra mothe marĩa marutagwo na moko maku; nawe nĩũkohoragĩra ndũrĩrĩ nyingĩ indo, no rĩrĩ, wee mwene ndũkohora harĩ cio.
• 13. Nake Jehova nĩagagũtua o ta wĩ mũtwe, na ndagũtue ta wĩ gĩthita; nawe ũgaikara ũkĩrĩte andũ arĩa angĩ, no wee ndũgakĩrũo nĩo, ũngĩkorũo nĩũgatũũra ũiguĩte maathani ma Jehova Ngai waku, marĩa ndĩragwatha ũmũthĩ, ũmamenyagĩrĩre na ũmekage;
• 14. na ndũkanagarũrũke na mwena wa ũrĩo, kana wa ũmotho, ũtige kũrũmĩrĩra kiugo o na kĩrĩkũ kĩa maũndũ marĩa ngũgwatha ũmũthĩ, atĩ nĩguo ũrũmagĩrĩre ngai ingĩ, ũcitungatĩre.
• 15. No nĩgũgakinya atĩrĩ, atĩ ũngĩkaaga kũigua uuge wa Jehova Ngai waku, ũmenyagĩrĩre gwĩka maathani make mothe, o na irĩra cia watho wake wa kũrũmĩrĩrũo, marĩa ndĩragwatha ũmũthĩ, irumi ici ciothe nĩigagũcokerera, ĩkũgwate.
• 16. Ũgwatwo nĩ kĩrumi maũndũ-inĩ ma itũũra rĩanyu, na ũgwatwo nĩ kĩrumi maũndũ-inĩ ma mĩgũnda yaku.
• 17. Na ũgwatwo nĩ kĩrumi ũhoro-inĩ wa ciondo ciaku cia magetha, o na wa ndĩrĩ ciaku iria imandagĩrũo mũtu.
• 18. Na ũgwatwo nĩ kĩrumi ũciari-inĩ wa ciana, na ũhoro-inĩ wa maciaro ma mĩgũnda yaku, na wa njaũ cia ng’ombe ciaku, o na tũũri twa ndũru ciaku cia mbũri.
• 19. Ningĩ ũgwatwo nĩ kĩrumi rĩinũkĩro-inĩ rĩa gwaku mũciĩ, o na riumagarĩro-inĩ.
• 20. Jehova nĩagatũma ũgwatwo nĩ kĩrumi, o na kũnyarirĩka, na ũtũũre ũkũũmagwo maũndũ-inĩ mothe marĩa ũgakoragwo ũgĩĩka na guoko gwaku, o nginya ũkaninwo, o na nginya ũthire o gũthira narua, nĩ ũndũ wa ũũru wa ciĩko ciaku iria wĩkaga, o icio itũmĩte ũtigane na niĩ.
• 21. Jehova nĩagatũma mũthiro ũgũtũũrĩrĩre, o nginya hĩndĩ ĩrĩa agakorũo akũninĩte weherio bũrũri ũrĩa ũgũthiĩ kwĩgwatĩra ũtuĩke waku.
• 22. Jehova niagakũhũra na ndũari njũru cia kũnina andũ, na mũrimũ wa kũhiũha mwĩrĩ, na kũrugĩka mwĩrĩ, na gwatio nĩ ciĩga, o na kũhũrũo na rũhiũ rũa njora, o na rũhuho rũhiũ rũa gũcina andũ, o na mbuu iria iragathagia irio namo maũndũ macio magũthingate o nginya ũninwo o kũninwo biũ.
• 23. Na rĩrĩ, matu marĩa marĩ igũrũ rĩa mũtwe waku nĩmagatuĩka o ta gĩcango, o nayo thĩ ĩrĩa ĩrĩ mũhuro waku ĩtuĩke o ta kĩgera.
• 24. Jehova nĩagatũma mbura ya bũrũri waku ĩtuĩke o ta mũhu, na ta rũkũngũ; nayo ĩkoima igũrũ ĩgũkore, o nginya hĩndĩ ĩrĩa ũkaninwo o kũninwo.
• 25. Nake Jehova nĩagakũhũrithia thũ ciaku. Gũthiĩ ũgathiĩ na njĩra o ro ĩmwe ũgĩciũkĩrĩra, no rĩrĩ, ũkagera njĩra mũgwanja ũgĩciũrĩra na; nĩmũgacangio mabũrũri-inĩ mothe ma athamaki a gũkũ thĩ.
• 26. Nakĩo kĩimba gĩaku gĩgatuĩka irio cia kũrĩagwo nĩ nyamũ ciothe cia rĩera-inĩ, o na nyamũ ciothe cia gĩthaka cia gũkũ thĩ, na hatikoneka mũndũ o na ũmwe wa gũcirira.
• 27. Jehova agakũhũra na mahũra marĩa ma Misiri, na ironda njũru, na kĩmaĩ, o na ũhere, na ndũkahoneka.
• 28. Ningĩ Jehova akũhũre na ũgũrũki, na ũtumumu, na ũgwatwo nĩ kĩmako ngoro-inĩ yaku;
• 29. nawe ũgathiĩ ũkĩhambatagĩria mũthenya barigici, o ta ũrĩa mũndũ mũtumumu ahambatagĩria nduma-inĩ, na ndũkagaacĩra mĩthiĩre-inĩ yaku, no kũhinyĩrĩrio ũkahinyagĩrĩrio, na ũtũũre ũtahagwo indo hĩndĩ ciothe; na gũtikoneka mũndũ wa gũkũhonokia.
• 30. Kũgũra ũkagũra mũirĩtu no nĩ mũndũ ũngĩ ũgakoma nake, ningĩ wake nyũmba, na ndũmĩtũũre, o na ũhande mũgũnda wa mĩthabibu, na ndũrĩe maciaro maguo.
• 31. Ndegwa yaku ĩgathĩnjwo ũkĩĩonagĩra na maitho maku, no wee mwene ndũkarũma nyama yayo o na atĩa; ningĩ ũtunyũo ndigiri yaku na hinya, ĩrĩ o hau mbere yaku, na ndũcokerio; ningĩ mbũri ciaku iheo thũ ciaku, na nduone wa gũkũhonokia ũhoro-inĩ ũcio.
• 32. Ariũ aku, na airĩtu aku, makaheo andũ a ndũrĩrĩ, na maitho maku meonere ũndũ ũcio, na maage hinya nĩ ũndũ wa gũtũũra macũthĩrĩirie mamerirĩirie, na gũtikagĩa ũndũ o na ũmwe ũkahota gwĩka na hinya wa guoko gwaku.
• 33. Maciaro ma mĩgũnda yaku, o na ma mawĩra mothe marĩa ũkaruta, makarĩo maninwo biũ nĩ rũrĩrĩ ũtoĩ; nawe ũtũũre o uhinyagĩrĩrio, na ũthahagĩrĩrio hĩndĩ ciothe;
• 34. nawe ũtuĩke o ta ũgũrũkĩte nĩ ũndũ wa maũndũ marĩa ũkeonagĩra na maitho maku.
• 35. Jehova agakũhũra na mahũha moru, maru o na magũrũ, kuuma o ikinya rĩa kũgũrũ nginya o ruototia-inĩ rũa mũtwe waku, na matikahoneka.
• 36. Jehova agagũtwara wee mwene, o na mũthamaki waku ũrĩa ũgethurĩra agwathage, kũrĩ rũrĩrĩ ũtoĩ, wee mwene, kana mathoguo; na kũu nĩkuo ũgatungatagĩra ngai ingĩ, cia mĩtĩ, o na cia mahiga.
• 37. Nawe nĩũgatuĩka ta ũndũ wa kũgegania, o na uunagwo thimo, na ũnyararũo nĩ ndũrĩrĩ ciothe cia kũndũ kũrĩa Jehova agagũtwarithia.
• 38. Ningĩ nĩũkoimagaria mbeũ nyingĩ cia kũhandwo mũgũnda, na no tũirio tũnini ũkagetha; nĩ gũkorũo ngigĩ nĩigacirĩa icinine biũ.
• 39. Ningĩ ũhande mĩgũnda ya mĩthabibu, o na ũmĩcehe; no rĩrĩ, ndũkanyua ndibei yayo kana ũtue thabibu ciayo; nĩ ũndũ nĩikarĩo nĩ igunyũ.
• 40. Ningĩ nĩũkagĩa na mĩtamaiyũ bũrũri waku wothe o handũ warũma; no ndũkehaka maguta mayo, nĩ ũndũ mĩtamaiyũ yaku nĩĩkahũrũrũka maciaro mayo.
• 41. O na ũciare ciana cia arũme, na cia airĩtu, no itigatuĩka ciaku; nĩ gũkorũo nĩigatahwo igatuĩke ngombo.
• 42. Ngigĩ nĩcio ikegwata mĩtĩ yaku yothe, na maciaro mothe ma mĩgũnda ya bũrũri waku.
• 43. Mũndũ wa kũngĩ ũrĩa ũtũũrĩte thĩinĩ wanyu agakĩragĩrĩria o kwambatĩra akũgĩe igũrũ; nawe ũgakĩragĩrĩria o kũnyiha.
• 44. Ũcio nĩagakuohoragĩra indo, no wee ndũrĩ kĩndũ ũkamuohorera; ningĩ atuĩke ta arĩ mũtwe, nawe ũtuĩke ta wĩ gĩthita.
• 45. Irumi icio ciothe nĩigagũcokerera, na nĩigagũthingata, ũgwatwo nĩcio, o nginya ũninwo o kũninwo biũ, nĩ gũkorũo ndũigana kũigua mũgambo wa Jehova Ngai waku, ũmenyerere maathani make, na irĩra cia watho wake wa kũrũmĩrĩrũo, marĩa aagwathire wĩkage;
• 46. nacio irumi icio ũkagwatwo nĩcio, nĩigatuĩka ũndũ wa kũmenyithania, na wa kũgegania, harĩ wee, o na harĩ njiaro ciaku, tene na tene;
• 47. nĩ gũkorũo ndũigana gũtungatĩra Jehova Ngai waku ũkenete mũno, na ũcaũkĩte ngoro mũno, nĩ ũndũ wa ũrĩa indo ciaku ciothe ciingĩhĩte;
• 48. tondũ ũcio ũgatũũra ũtungatagĩra thũ ciaku iria Jehova akarekia harĩ wee igũũkĩrĩre, ũhũtĩte mũno, na ũkanyota, na ũrĩ njaga, na wagĩte indo ciothe; nacio nĩigagwĩkĩra mũtĩ wa ngingo wa kĩgera ngingo, o nginya hĩndĩ ĩrĩa igakũnina biũ.
• 49. Jehova nĩagakũrehithĩrie rũrĩrĩ ruumĩte kũndũ kũraya mũno, o gĩturi-inĩ gĩa thĩ, rũũmbũkĩte o ta nderi rũgũũkĩrĩre; na nĩ rũrĩrĩ ũtangĩmenya mwarĩrie waruo,
• 50. naruo nĩ rũrĩrĩ rũa andũ monagwo gĩthiithi ta marĩ eĩ mũno, arĩa matarũmbũyagia ũhoro wa ũrĩa mũndũ akũrĩte, kana mageka andũ arĩa matarĩ akũrũ wega;
• 51. nao andũ a rũrĩrĩ rũu nĩmakarĩa rũciaro rũa ũhiũ waku, o na maciaro ma mĩgũnda yaku, o nginya ũninwo biũ; ningĩ andũ acio matigagũtigĩria ngano, kana ndibei, kana maguta, kana rũciaro rũa ng’ombe ciaku, kana tũũri twa rũũru rũaku rũa mbũri; o nginya hĩndĩ ĩrĩa magatũma ũthirĩrĩkĩre.
• 52. Ningĩ andũ acio makũrigicĩrie nĩguo magũtunye matũũra maku kũndũ guothe bũrũri waku, o nginya thingo ciaku iria ndaya cia matũũra maku igũe thĩ, o icio watũire wĩhokete; na makũrigicĩrie nĩguo magũtunye matũũra maku mothe kũndũ guothe bũrũri waku ũrĩa Jehova Ngai waku akũheete.
• 53. Ningĩ ũrĩe maciaro ma nda yaku wee mwene, namo nĩ nyama cia ariũ aku, na airĩtu aku, arĩa Jehova Ngai waku akũheete. Ũguo nĩguo ũgeka hĩndĩ ĩo ya kũrigicĩrio mũgĩtunyũo matũũra manyu, o na ya kũnyarirĩka kũnene kũrĩa thũ ciaku igakũnyarira.
• 54. Mũndũ ũrĩa mũhoreri thĩinĩ wanyu, na ũrĩa mwĩbarĩrĩri mũno, nĩakarora mũrũ wa nyina riitho rĩũru, o na mũka ũrĩa endete mũno, o na matigari ma ariũ ake arĩa atigĩtwo nao,
• 55. na amaime othe, mũndũ o mũndũ, nyama ya ciana ciake ĩrĩa ekũrĩa we mwene, tondũ ndagakorũo atigarĩirũo nĩ kĩndũ kĩngĩ o na kĩ. Ũguo nĩguo ũgeka hĩndĩ ĩo ya kũrigicĩrio mũgĩtunyũo matũũra manyu, o na ya kũnyarirĩka kũnene kũrĩa thũ ciaku igakũnyarira, mũrĩ ahingĩre ihingo-inĩ cianyu ciothe thĩinĩ.
• 56. O nake mũndũ-wa-nja ũrĩa mũhoreri na mwĩbarĩrĩri thĩinĩ wanyu, ũrĩa ũtangĩenda kũhutithia ikinya rĩa kũgũrũ gwake thĩ nĩ ũndũ wa ũrĩa e mwĩbarĩrĩri na akahorera, nĩakarora mũrũme ũrĩa endete mũno riitho rĩũru, o na mũrũwe, o na mwarĩ,
• 57. o na gakenge karĩa gakoima gatagatĩ ka magũrũ make, o na ciana iria ingĩ ciake iria agaciara; nĩ gũkorũo nĩagacirĩa na hitho nĩ ũndũ wa ũrĩa aagĩte indo ciothe. Ũguo nĩguo ũgeka hĩndĩ ĩo ya kũrigicĩrio mũgĩtunyũo matũũra manyu, o na ya kũnyarirĩka kũnene kũrĩa thũ ciaku igakũnyarira, mũrĩ ahingĩre ihingo-inĩ cianyu thĩinĩ.
• 58. Ũngĩkorũo ndũkamenyagĩrĩra gwĩka maũndũ o ta ũrĩa ciugo ciothe cia watho ũyũ, iria ciandĩkĩtwo ibuku-inĩ rĩrĩ, itariĩ, nĩ getha wĩtĩgagĩre rĩĩtwa rĩrĩ, JEHOVA NGAI WAKU, narĩo nĩrĩo rĩagĩrĩire kũgoocwo, o na gwĩtigĩrũo mũno-rĩ,
• 59. Jehova nĩagagĩtũma mĩrimũ ĩrĩa ũkahũrũo nayo ĩtuĩke ya kũgegania mũno, hamwe na mĩrimũ ĩrĩa ĩkahũra njiaro ciaku, nayo nĩĩgatuĩka mĩrimũ mĩnene mũno, na ya gũtũũra hĩndĩ ndaya, o na ndũari njũru mũno cia gũtũũra hĩndĩ ndaya.
• 60. O na ningĩ nĩagatũma mĩrimũ yothe ya Misiri, ĩrĩa watũire wĩtigagĩra, igũcokerere, nayo ĩtũũre ĩkwĩgwatĩrĩire.
• 61. O na ningĩ atĩrĩ, ndũari ciothe, o na mĩrimũ yothe, ĩrĩa ĩtaandĩkĩtwo ibuku-inĩ rĩrĩ rĩa watho, ĩo o nayo Jehova nĩakamĩrehithie kũrĩ wee, o nginya ũninwo biũ.
• 62. Na nĩmũgatigwo mũnyihĩte mũno mũgĩtarũo, o na harĩa mwaingĩhĩte ta njata iria irĩ igũrũ nĩ gũkorũo ndũigana kũigua uuge wa Jehova Ngai waku.
• 63. Na nĩgũgatuĩka atĩrĩ, atĩ o ta ũrĩa Jehova aakenagio nĩ inyuĩ akĩmwĩka wega, o na akĩmũĩngĩhia, ũguo noguo Jehova agakenagio nĩ inyuĩ agĩtũma mũthire, na akĩmũnina o kũmũnina biũ; na nĩmũkahũrũo mũrutwo bũrũri ũcio ũgũthiĩ kwĩgwatĩra ũtuĩke waku.
• 64. Nake Jehova nĩagakũharaganĩria ndũrĩrĩ-inĩ ciothe, kuuma o gĩturi kĩmwe gĩa gũkũ thĩ, o nginya gĩturi kĩrĩa kĩngĩ gĩakuo nakuo kũu nĩũgatungatĩra ngai ingĩ, iria wee mwene, kana mathoguo, mũtaamenyete; nacio nĩ ngai cia mĩtĩ, na cia mahiga.
• 65. Na thĩinĩ wa ndũrĩrĩ icio ndũkona ũndũ o na ũrĩkũ wa gũkũiguithia wega, na hatikoneka handũ ha kũhurũkia ĩkinya rĩa kũgũrũ gwaku; no rĩrĩ, wĩ kũu, Jehova nĩagagũtebebia ngoro, na maitho maku maage kuona wega, na roho waku ũkũiguithagie ruo;
• 66. namo matukũ mothe ma muoyo waku ũgatũũra o na mathangania; na nĩũkagwatagwo nĩ guoya ũtukũ, o na mũthenya, na ndũkamenya o na hanini ũrĩa ũhoro wa matukũ maku ũgaikara.
• 67. Ihinda rĩa rũcinĩ ũkoiga atĩrĩ, Na arĩ gũtingĩgĩtuka! O narĩo ihinda rĩa hwaĩ-inĩ ũcoke kuuga atĩrĩ, Na arĩ gũtingĩgĩkĩa! Ũguo nĩguo ũkoiga nĩ ũndũ wa gwĩtigĩra kũrĩa ũgakorũo wĩtigĩrĩte na ngoro yaku, o na ũndũ wa maũndũ marĩa ũgakoragwo ũkĩona na maitho maku.
• 68. Nake Jehova nĩagagũcokia Misiri wĩ marikabu-inĩ, akũgererie njĩra ĩrĩa ndakũheire ũhoro wayo, ngiuga ũũ: Ndũgacoka kũmĩona rĩngĩ o na rĩ. Nakuo kũu nĩmũgetwara mwĩyenderie thũ cianyu, nĩ getha mũtuĩke ndungata ciacio cia arũme, o na cia andũ-a-nja, no rĩrĩ, gũtirĩ mũndũ ũgetĩkĩra kũmũgũra.

Home