Go Back

Gũcokerithia Maathani Chapter 25

• 1. Na rĩrĩ, hangĩgĩa ngarari harĩ andũ erĩ, na matwarane cira-inĩ, nao aciri mamatuithanie-rĩ, mũndũ ũrĩa ũkonwo arĩ mũthingu nĩwe magatua atĩ ndarĩ na wĩhia, nake mũndũ ũrĩa mwaganu mamũtuĩre atĩ nĩ mwĩhia;
• 2. na nĩgũgatuĩka atĩrĩ, atĩ mũndũ ũcio mwaganu angĩonwo atĩ aagĩrĩirũo nĩ kũhũrũo-rĩ, mũciri nĩoige akomio thĩ, ahũrũo mahũra maigana o ta ũrĩa waganu wake ũtariĩ, mũciri ũcio akĩonaga.
• 3. Aahota kũmũhũrithia thanju mĩrongo ĩna, no ndagakĩrie hau; tondũ angĩkĩria hau, amũhũrithie thanju nyingĩ gũkĩra icio, mũrũ wa ithe wanyu hihi aahota kuonwo nĩwe ta amenithĩtio.
• 4. Ndũkanohe ndegwa kanua hĩndĩ ĩrĩa ĩkũranga ngano, ĩkĩmĩhũra.
• 5. Mũndũ na mũrũ wa nyina mangĩkorũo matũũranĩtie, na ũmwe wao akue, na akorũo atatigĩte kahĩĩ, mũndũ-wa-nja ũcio wa mũkui ndakanahikio nĩ mũndũ wa kũngĩ ũtarĩ wa nyũmba yao; mũrũ wa nyina na mũrũme nĩwe ũgathiĩ gwake, amũthambie atuĩke mũka, na amwĩkage o ta ũrĩa mũrũ wa nyina na mũrũme wa mũtumia aagĩrĩirũo nĩ gwĩka.
• 6. Na nĩgũgakinya atĩrĩ, atĩ mwana ũrĩa mũtumia ũcio agaciara wa irigithathi, nĩwe ũgacoka ithenya rĩa mũrũ wa nyiha ũcio wakuire, nĩ getha rĩĩtwa rĩake rĩtikae gũikara ta rĩũrĩte thĩinĩ wa Isiraeli.
• 7. Na rĩrĩ, mũndũ ũcio angĩkorũo ndekwenda gũthambia mũka ũcio wa mũrũ wa nyina-rĩ, mũka ũcio nĩakaambata athiĩ kĩhingo-inĩ gĩa itũũra harĩ athuri, oige atĩrĩ, Mũrũ wa nyina na mũthuri wakwa nĩaregete gũcokeria mũrũ wa nyina rĩĩtwa thĩinĩ wa Isiraeli; nĩaregete kũnjĩka ta ũrĩa mũrũ wa nyina na mũthuri wa mũtumia aagĩrĩirũo nĩ gwĩka.
• 8. Hĩndĩ ĩo athuri a itũũra rĩao makĩmwĩte mamwarĩrie; nake angĩkĩrũgama oige atĩrĩ, Ndikwenda kũmũthambia;
• 9. mũka ũcio wa mũrũ wa nyina akĩmũthengerere, o hau mbere ya athuri acio, akĩmuohore kĩratũ kĩmuume kũgũrũ, acoke amũtuĩre mata ũthiũ; akĩmũcokerie, oige atĩrĩ, Ũguo nĩguo mũndũ agekwo ũrĩa ũtagacoka kũhanda nyũmba ya mũrũ wa nyina.
• 10. Na rĩrĩ, thĩinĩ wa Isiraeli, nyũmba ya mũndũ ũcio ĩgetagwo ũũ: Nyũmba ya muohorũo kĩratũ.
• 11. Hĩndĩ ĩrĩa arũme erĩ mangĩgiana makĩrũa, nake mũka wa mũndũ ũmwe wao amakuhĩhĩrie nĩguo ahonokie mũthuriwe amũrute moko-inĩ ma ũcio ũkũmũhũra, nake agĩtambararie guoko gwake amũnyite kĩraĩro-rĩ,
• 12. nĩũkamũtinia guoko; nawe wamuona na maitho maku, ndũkanamũcaĩre.
• 13. Thĩinĩ wa mondo yaku-rĩ, ndũkanagĩe na mahiga merĩ ma gũthima namo me ngũũrani ithimĩro-inĩ, rĩmwe inene, na rĩngĩ inyinyi.
• 14. O na ningĩ thĩinĩ wa nyũmba yaku, ndũkanagĩe na ibaba igĩrĩ cia gũthima nacio ii ngũũrani ithimĩro-inĩ, kĩmwe kĩnene, na kĩngĩ kĩnyinyi.
• 15. No mũhaka ũkagĩa na ihiga rĩa gũthima narĩo rĩtangĩhenania; o na kĩbaba kĩagĩrĩru gĩtangĩhenania; nĩ getha matukũ maku maingĩhe ũrĩ o kũu bũrũri ũcio Jehova Ngai waku akũheaga.
• 16. Nĩ gũkorũo andũ othe arĩa mekaga maũndũ ta macio, naguo ũguo nĩ ta kuuga andũ othe arĩa mekaga maũndũ matarĩ ma kĩhooto, me na thahu makĩonwo nĩ Jehova Ngai waku.
• 17. Ta ririkana ũrĩa Aamaleki maagwĩkire ũrĩ njĩra, hĩndĩ ĩrĩa mwoimaga bũrũri wa Misiri;
• 18. ũrĩa maacemanirie nawe njĩra, makĩhũra andũ anyu arĩa maatigĩtwo marũmĩrĩre arĩa angĩ, o acio othe maagĩte hinya makarigia thutha waku, rĩrĩa worĩtwo nĩ hinya, na ũkanoga; nao matiigana gwĩtigĩra Ngai.
• 19. Na tondũ ũcio, nĩgũgakinya atĩrĩ, atĩ rĩrĩa Jehova Ngai waku agakorũo akũheete ũhurũko, ũgatiga mbaara na thũ ciaku ciothe iria igũikarĩte na ndwere ciothe thĩinĩ wa bũrũri ũcio Jehova Ngai waku akũheaga ũtuĩke igai rĩaku-rĩ, nĩũkanina Aamaleki o kũmanina matikanacoke kũririkanwo gũkũ thĩ guothe; na ndũkanariganĩrũo nĩ ũndũ ũcio.

Home