Go Back

Gũcokerithia Maathani Chapter 16

• 1. Mweri wa Abibu-rĩ, ũũmenyagĩrĩre mũno, ũrĩage Bathaka ya Jehova Ngai waku, nĩ gũkorũo mweri ũcio wa Abibu nĩguo Jehova Ngai waku aakũrutire bũrũri wa Misiri ũtukũ.
• 2. Nĩũgathĩnjĩra Jehova Ngai waku igongona rĩa Bathaka rĩa nyamũ cia rũũru rũaku rũa mbũri, o na rũa ng’ombe, ũcithĩnjagĩre o handũ harĩa Jehova agathura haamũrĩrũo rĩĩtwa rĩake, rĩtũũre ho.
• 3. Ndũkanarĩanĩrie mũgate mũimbie na nyama cia nyamũ icio; ũgaikara mĩthenya mũgwanja o ũgĩcirĩanagĩria na mũgate ũtarĩ mũimbie, naguo nĩguo mũgate wa mĩtangĩko, nĩ gũkorũo woimire bũrũri wa Misiri na ihenya; ĩkaga ũguo nĩ getha ũririkanage mũthenya ũcio woimire bũrũri wa Misiri matukũ mothe ma muoyo waku.
• 4. Nayo mĩthenya o mũgwanja, mĩhaka-inĩ yaku yothe, gũtikanoneke ndawa ya kũimbia mũgate o na atĩa; kana nyama iria ciarutirũo igongona mũthenya wa mbere, hwaĩ-inĩ, iraare ikinyie rũcinĩ.
• 5. Mũtikanathĩnjĩre igongona rĩa Bathaka matũũra-inĩ manyu thĩinĩ o na atĩa, o macio mũheetwo nĩ Jehova Ngai wanyu;
• 6. no rĩgathĩnjĩrũo o handũ harĩa Jehova Ngai wanyu agathura haamũrĩrũo rĩĩtwa rĩake rĩtũũre ho; hau nĩho ũgathĩnjĩra igongona rĩa Bathaka o hwaĩ-inĩ, riũa rĩgĩthiĩ gũthũa, o ihinda ta rĩrĩa woimire Misiri.
• 7. Nacio nyama ciarĩo ũgaciruga ũcirĩĩre o handũ hau Jehova Ngai waku agathura; thutha wa ũguo ũroke kũhũndũka ũcoke hema-inĩ ciaku.
• 8. Mĩgate ĩo ĩtarĩ mĩimbie, ũkamĩrĩaga mĩthenya ĩtandatũ; naguo mũthenya wa mũgwanja kũgĩe gĩtũngano kĩamũrĩirũo Jehova Ngai waku, naguo mũthenya ũcio-rĩ, ndũkanarute wĩra o na ũrĩkũ.
• 9. Ningĩ wĩtaragĩre ciumia mũgwanja, ũcirutĩtie o hĩndĩ ĩrĩa gũgaitĩka kũrengwo ngano ĩrĩa ĩrũngiĩ mũgũnda ĩtarĩ ngethe,
• 10. ũcoke ũgĩe na gĩathĩ gĩa ciumia nĩ ũndũ wa Jehova Ngai waku; nakĩo gĩathĩ-inĩ kĩu ũrute mĩthemba ya indo ciaku wee mwene, o iria irutagwo na kwĩendera, irutwo o ta ũrĩa Jehova Ngai waku akũrathimĩte;
• 11. na ũgakenagĩra mbere ya Jehova Ngai waku, wee mwene, hamwe na mũrũguo na mwarĩguo, o na ndungata ciaku cia arũme, na cia andũ-a-nja, na Mũlawii ũrĩa wĩ gwaku mũciĩ, na mũndũ wa kũngĩ, na mwana wa ngoriai, o na mũtumia wa ndigwa, arĩa matũũranĩtie nawe, o handũ harĩa Jehova Ngai waku agathura haamũrĩrũo rĩĩtwa rĩake rĩtũũre ho.
• 12. Na ũririkanage atĩ kwĩ hĩndĩ warĩ ngombo kũu Misiri; nacio irĩra icio cia watho wa kũrũmĩrĩrũo ũcimenyagĩrĩre ũciĩkage.
• 13. Ningĩ nĩũkagĩaga na gĩathĩ gĩa gwaka ithũnũ mĩthenya mũgwanja, warĩkia gũcokereria irio iria ciumĩte kĩhuhĩro-inĩ gĩaku kĩa ngano, o na kĩhihĩro-inĩ gĩaku kĩa ndibei;
• 14. na ũkenagĩre gĩathĩ-inĩ kĩu gĩaku, wee mwene, o na mũrũguo, na mwarĩguo, na ndungata yaku ya mũndũ mũrũme, o na ya mũndũ-wa-nja, na Mũlawii, na mũndũ wa kũngĩ, na mwana wa ngoriai, o na mũtumia wa ndigwa, arĩa marĩ gwaku mũciĩ.
• 15. Gĩathĩ kĩu kĩa Jehova Ngai waku, ũkagĩaga nakĩo o handũ harĩa Jehova agathura, kĩnine mĩthenya mũgwanja; nĩ gũkorũo Jehova Ngai waku nĩagakũrathimĩra indo ciaku ciothe ciumie, o na akũrathime mawĩra-inĩ mothe marĩa ũkaruta na moko maku, na nĩũkaiyũrũo nĩ gĩkeno.
• 16. Nĩ mahinda matatũ, mwaka o mwaka, andũ aku othe arũme magagĩthiaga kwĩonania mbere ya Jehova Ngai waku, o handũ hau agathura; namo nĩmo ihinda rĩa gĩathĩ kĩu kĩa mĩgate ĩtarĩ mĩimbie, na rĩa gĩathĩ kĩu kĩngĩ gĩa ciumia, o na rĩa gĩathĩ kĩu kĩngĩ gĩa gwaka ithũnũ; na hatikanoneke mũndũ o na ũrĩkũ mbere ya Jehova wĩ moko matheri;
• 17. andũ othe, mũndũ o mũndũ akarutaga indo o ta ũrĩa ekũhota, o ta ũrĩa kũrathimwo kũrĩa arathimĩtwo nĩ Jehova Ngai waku gũtariĩ.
• 18. Na atĩrĩ, nĩũgathura aciri, o na anene, ũmaige matũũra-inĩ maku mothe marĩa Jehova Ngai waku akũheaga, o ta ũrĩa mĩhĩrĩga yanyu ĩtariĩ; nao maciragĩre andũ, mamatuagĩre cira na kĩhooto.
• 19. Ndũkanahotomie cira, na ndũkanathuranie ũrĩa andũ matariĩ, kana wamũkĩre ihaki; nĩ gũkorũo ihaki nĩrĩo rĩtũmaga maitho ma andũ arĩa ogĩ matuĩke matumumu, narĩo nĩrĩo rĩtũmaga cira wa andũ arĩa athingu ũhotomio ũthũkio.
• 20. Rũmagĩrĩra ũndũ ũrĩa wĩ kĩhooto kũna, nĩ getha ũtũũre muoyo, na ũkagaya bũrũri ũrĩa ũheagwo nĩ Jehova Ngai waku.
• 21. Ndũkanehandĩre Ashera ya mũtĩ o na ũrĩkũ mwena-inĩ wa kĩgongona kĩrĩa ũgathondekera Jehova Ngai waku.
• 22. Kana wĩhandĩre gĩtugĩ gĩa kũhoyũo, tondũ nĩ gĩthũũre mũno nĩ Jehova Ngai waku.

Home