Go Back

Gũcokerithia Maathani Chapter 10

• 1. Hĩndĩ ĩo Jehova agĩkĩnjĩra atĩrĩ, Wĩicũhĩrie ihengere igĩrĩ cia mahiga itariĩ ta iria cia mbere, ũcoke wambate gũkũ kũrĩ niĩ kĩrĩma-inĩ, ningĩ wĩthondekere ithandũkũ rĩa mbaũ
• 2. Na niĩ njoke nyandĩke igũrũ rĩa ihengere icio ciugo iria ciarĩ ihengere-inĩ cia mbere, o iria woragire, nawe ũcoke ũciĩkĩre ithandũkũ-inĩ rĩu thĩinĩ.
• 3. Tondũ ũcio ngĩgĩthondeka ithandũkũ rĩa mũtĩ wa mũthemba ta mũgaa, ngĩgĩicũhia ihengere igĩrĩ cia mahiga ihaanaine na iria cia mbere, ngĩambata kĩrĩma-inĩ ’nyitĩte ihengere icio cierĩ na moko makwa.
• 4. Jehova agĩkĩandĩka ihengere-inĩ icio maathani marĩa ikũmi, o ta ũrĩa maandĩkĩtwo hĩndĩ ya mbere, namo nĩmo Jehova aaririe ũhoro wamo na inyuĩ kĩrĩma-inĩ arĩ mwaki-inĩ thĩinĩ mũthenya ũrĩa mwagomanĩte; nake Jehova agĩci’nengera.
• 5. Na niĩ ngĩgarũrũka, ngĩikũrũka kĩrĩma, ngĩĩkĩra ihengere icio ithandũkũ-inĩ rĩrĩa ndathondekete, o ta ũrĩa Jehova aanjathire; naho hau nĩho irĩ.
• 6. (Na rĩrĩ, ciana cia Isiraeli ciagwata rũgendo ciumĩte ithima-inĩ cia ciana cia Jaakani igĩkinya Mosera-rĩ, Haruni agĩgĩkuĩra kuo, na agĩthikwo o ro kuo nake Eleazaru, mũrũwe, agĩtuĩka mũruti wĩra wa gũthĩnjĩra Ngai ithenya rĩake.
• 7. Ningĩ cioima hau ciagwatire rũgendo, igĩkinya Gudugoda; ningĩ cioima kũu Gudugoda, igĩkinya Jotibatha, bũrũri wĩ twanda tũingĩ twĩ maĩ.
• 8. Hĩndĩ ĩo nĩguo Jehova aakĩamũrire mũhĩrĩga wa Lawii, ũkuuage ithandũkũ rĩa kĩrĩkanĩro kĩa Jehova, na ũrũgamage mbere ya Jehova ũmũtungatĩre, na ũrathimanage na rĩĩtwa rĩake o na ũmũthĩ.
• 9. Tondũ ũcio Lawii ndarĩ gĩcunjĩ kĩa bũrũri, kana igai, harĩ ariũ a ithe; Jehova nĩwe ũtuĩkĩte igai rĩake, o ta ũrĩa Jehova Ngai waku aamwĩrire.)
• 10. Na niĩ ndaikarire kũu kĩrĩma-inĩ matukũ mĩrongo ĩna, mũthenya na ũtukũ, o ta hĩndĩ ya mbere; ningĩ o na hĩndĩ ĩo Jehova nĩaanjiguire; nake Jehova agĩgĩtiga kwenda kũmũnina.
• 11. Ningĩ Jehova akĩnjĩra atĩrĩ, Ũkĩra ũgwate rũgendo ũtongorie andũ, matonye bũrũri ũcio mawĩgwatĩre ũtuĩke wao, o ũcio nderĩire maithe mao na mwĩhĩtwa atĩ nĩngamahe.
• 12. Na rĩrĩ, Isiraeli, rĩu, ũndũ ũrĩa Jehova Ngai waku abatairio nĩguo harĩ wee-rĩ, nĩ ũrĩkũ, tiga o wĩtigagĩre Jehova Ngai waku, na ũthiage na njĩra ciake ciothe, na ũmwendage, na ũtungatagĩre Jehova Ngai waku na ngoro yaku yothe, o na muoyo waku wothe,
• 13. na ũmenyagĩrĩre maathani ma Jehova, o na irĩra cia watho wake wa kũrũmĩrĩrũo, marĩa ngũgũtaara namo ngĩgwatha ũmũthĩ, nĩguo wonage wega?
• 14. Atĩrĩrĩ, Jehova Ngai waku nĩwe mwene igũrũ, o na igũrũ rĩrĩa rĩrĩ kũraya kũu matu-inĩ, o na thĩ, o na indo ciothe iria irĩ kuo.
• 15. No rĩrĩ, Jehova aarũmanĩrĩire na mathoguo nĩ ũndũ wa ũrĩa aamendete, agĩgĩthura rũciaro rũrĩa rũgoka thutha wao nĩguo arũende gũkĩra ndũrĩrĩ iria ingĩ ciothe, naruo nĩruo inyuĩ, o ta ũũ gũtariĩ ũmũthĩ.
• 16. Tondũ ũcio wĩruithiei gĩkonde kĩa ngoro cianyu, mũtige gũtũũra mũremete.
• 17. Nĩ gũkorũo Jehova Ngai wanyu, nĩwe Ngai ũrĩa ũkĩrĩte ngai iria ingĩ ciothe, na nĩwe Mwathani wa aathani, o Mũrungu ũrĩa mũnene, na ũrĩa wĩ hinya mũno, na wa kũmakania, ũrĩa ũtathuranagia gĩthiithi kĩa ũrĩa mũndũ atariĩ, na ũrĩa ũtangĩhakĩka.
• 18. Ciana cia ngoriai, o na atumia a ndigwa, nĩwe ũmonagĩra kĩhooto cira-inĩ wao; o nake mũndũ wa kũngĩ nĩamwendaga, o na akaamũhe irio, o na nguo.
• 19. Tondũ ũcio o na inyuĩ endagai andũ a kũngĩ; nĩ ũndũ o na inyuĩ nĩmwatũire bũrũri wa Misiri mũrĩ andũ a kũngĩ.
• 20. Wĩtigagĩre Jehova Ngai waku, na ũmũtungatagĩre, na wĩgwatanagie nake, na ũkĩĩhĩta ũgwetage rĩĩtwa rĩake.
• 21. Ũcio nowe ũrĩgoocaga, na nĩwe Ngai waku ũrĩa wekire maũndũ macio manene ma kũgegania marĩa meyoneirũo nĩ maitho maku.
• 22. Mathoguo maaikũrũkire magĩthiĩ Misiri marĩ andũ mĩrongo mũgwanja; na rĩu Jehova Ngai waku nĩagũtuĩte o ta njata cia igũrũ nĩ ũndũ wa ũrĩa ũingĩhĩte.

Home