Go Back

Gũcokerithia Maathani Chapter 1

• 1. ŨHORO ũyũ nĩguo Musa aaririe akĩhe Aisiraeli othe me werũ-inĩ mũrĩmo ũrĩa wa Jorodani, o kũu Araba kũringana na Sufi, gatagatĩ ga Parani na Tofeli, na Labani, na Hazerothu, na Di-zahabu.
• 2. Na rĩrĩ, kuuma Horebu nginya Kadeshi-barinea, mũndũ agerete njĩra ya kĩrĩma gĩa Seiru nĩ rũgendo rũa mĩthenya ikũmi na ũmwe.
• 3. Na gũgĩkinya atĩrĩ, atĩ mwaka wa mĩrongo ĩna, mweri wa ikũmi na ũmwe waguo, o mũthenya wa mbere waguo-rĩ, Musa akĩarĩria ciana cia Isiraeli, agĩciĩra maũndũ mothe o ta ũrĩa erĩtwo nĩ Jehova aciathe.
• 4. Na rĩrĩ, aarĩkia kũhũra Sihoni, mũthamaki wa Aamori, ũrĩa watũũraga Heshiboni, o na Ogu, mũthamaki wa Bashani, ũrĩa watũire Ashitarothu, o kũu Edirei-rĩ,
• 5. nĩguo aagĩitĩkire kũheanĩra ũhoro wa watho ũyũ, o kũu bũrũri wa Moabi, mũrĩmo ũcio wa Jorodani, akiuga atĩrĩ,
• 6. Jehova, Ngai witũ, aatwarĩirie tũrĩ o kũu Horebu, akiuga ũũ; ihinda rĩrĩa mũtũũrĩte kĩrĩma-inĩ gĩkĩ nĩrĩiganĩte,
• 7. kĩgarũrũkei mũgwate rũgendo rũanyu mũkinye bũrũri ũrĩa wĩ irĩma nyingĩ wa Aamori, na kũndũ guothe kũrĩa gũkuhanĩrĩirie nakuo, nakuo nĩkuo Araba, o na bũrũri ũrĩa wĩ irĩma nyingĩ, o na ituamba, o na mwena wa Gũthini, o na hũgũrũrũ-inĩ cia iria, na bũrũri wa Aatanami, o na kũu Lebanoni, o nginya rũũĩ rũrĩa rũnene, naruo nĩruo Farati.
• 8. Atĩrĩrĩ, bũrũri nĩguo ũcio ndĩmũigĩire mbere yanyu; thiĩi mũkegwatĩre bũrũri ũcio Jehova ehĩtire akĩĩra maithe manyu atĩ nĩakaũhe Iburahimu, na Isaaka, na Jakubu, o ene, o na njiaro ciao iria igoka thutha wao.
• 9. Na niĩ ngĩmwarĩria hĩndĩ ĩo, ngĩmwĩra atĩrĩ, Ndingĩhota gũkirĩrĩria ũrori wa kũmũroraga ndĩ nyiki.
• 10. Jehova Ngai wanyu nĩamũingĩhĩtie mũno, na rĩu ũmũthĩ mũtariĩ o ta njata iria irĩ igũrũ, nĩ ũndũ wa ũrĩa mũingĩhĩte.
• 11. Jehova Ngai wa maithe manyu aromuongerera mũingĩhe maita ngiri gũkĩra ũrĩa mũingĩhĩte rĩu, na amũrathime, o ta ũrĩa aamwĩrire!
• 12. Kaĩ ingĩkĩhota atĩa niĩ nyiki gũkirĩrĩria maũndũ manyu maya manditũhĩire mũno, o na mũrigo wa maũndũ manyu na ngarari cianyu?
• 13. Wĩthurĩrei andũ ogĩ, na arĩa amenyi maũndũ, na arĩa moĩwo, o ta ũrĩa mĩhĩrĩga yanyu ĩtariĩ, ndĩmatue anene anyu mamũrorage.
• 14. Na inyuĩ mũgĩkĩnjokeria, mũkiuga atĩrĩ, Ũndũ ũcio waaria nĩwagĩrĩire tũwĩke.
• 15. Tondũ ũcio ngĩkĩnyita anene a mĩhĩrĩga yanyu, andũ arĩa ogĩ na arĩa moĩwo, ngĩkĩmatua anene anyu mamũrorage; ngĩkĩmatua anene a kũroraga andũ ngiri o ngiri, na anene a kũroraga andũ igana igana, na anene a kũroraga andũ mĩrongo ĩtano ĩtano, na anene a kũroraga andũ ikũmi ikũmi, o na anene a gwathana, o ta ũrĩa mĩhĩrĩga yanyu ĩtariĩ.
• 16. Na hĩndĩ ĩo ngĩgĩtaara aciri anyu, ngĩmera atĩrĩ, Thikagĩrĩriai mohoro ma ariũ a ithe wanyu macira-inĩ mao, mũtuage cira wa mũndũ na mũrũ wa ithe na kĩhooto, o na wa mũgeni ũrĩa maikaranĩtie nake.
• 17. Mũtigathuranagie ũrĩa andũ matariĩ mũgĩtua cira; thikagĩrĩriai ũhoro wa mũndũ ũrĩa mũnyinyi o na wa mũndũ ũrĩa mũnene o ũndũ ũmwe; mũtikanetigĩrĩre mũndũ o na ũrĩkũ gĩthiithi gĩake; nĩ gũkorũo ũhoro wa gũtuanĩra cira nĩ wa Ngai; naguo ũndũ ũrĩa ũrĩmũgĩtagĩra hinya mũũrehage harĩ niĩ, na niĩ ngaũthikĩrĩria ũrĩa ũtariĩ.
• 18. Na hĩndĩ ĩo ngĩmwatha ngĩmwĩra maũndũ mothe marĩa mwagĩrĩirũo nĩ gwĩkaga.
• 19. Tũgĩgĩthiĩ rũgendo tuumĩte Horebu, tũgĩtuĩkania werũ ũcio wothe mũnene na wa kũmakania, o ũcio mweoneire na maitho manyu, tũrorete bũrũri ũrĩa wĩ irĩma nyingĩ wa Aamori, o ta ũrĩa Jehova Ngai witũ aatwathĩte twĩke; tũgĩgĩkinya Kadeshi-barinea.
• 20. Ngĩcoka ngĩmwĩra atĩrĩ, Rĩu nĩmũkinyĩte bũrũri ũrĩa wĩ irĩma nyingĩ wa Aamori, ũrĩa Jehova Ngai witũ atũheaga.
• 21. Ta bara wone atĩ Jehova Ngai waku nĩaigĩte bũrũri ũyũ mbere yaku; ambata ũkawĩgwatĩre ũtuĩke waku, o ta ũrĩa Jehova, Ngai wa maithe maku, akwĩrĩte; ndũkanetigĩre, kana ũmake.
• 22. Na inyuĩ inyuothe mũgĩokoka harĩ niĩ, mũndũ o mũndũ, mũkĩnjĩra atĩrĩ, Reka tũrekie andũ mathiĩ mbere iitũ, nĩguo magatũthiganĩre bũrũri, na macoke matũrehere ũhoro wa ũrĩa njĩra ĩrĩa twagĩrĩirũo nĩ kwambatĩra ĩtariĩ, na wa matũũra marĩa tũgakinya.
• 23. Naguo ũndũ ũcio ũkĩngenia mũno, ngĩkĩnyita andũ ikũmi na erĩ thĩinĩ wanyu, ngĩoya mũndũ ũmwe ũmwe nĩ ũndũ wa mũhĩrĩga o mũhĩrĩga,
• 24. nao magĩkĩhũgũka makĩambata kĩrĩma, magĩkinya kĩanda gĩa Eshikoli, magĩgĩthigana.
• 25. Magĩgĩtua maciaro ma bũrũri ũcio, makĩmakuua na moko mao, magĩikũrũka namo, magĩtũrehere, nao magĩtũcokeria ũhoro, makiuga atĩrĩ, Bũrũri ũcio Jehova Ngai witũ atũheaga nĩ mwega mũno.
• 26. No rĩrĩ, mũtietĩkĩrire kwambata mũthiĩ kuo, tiga o kũrema mwaremire, mũkĩrega kũigua rĩathani rĩa Jehova Ngai wanyu.
• 27. Mũgĩkĩng’ong’orera hema-inĩ cianyu, mũkiuga atĩrĩ, Tondũ Jehova nĩatũthũũrĩte, nĩkĩo aatũrutire bũrũri wa Misiri, nĩ getha oke atũneane moko-inĩ ma Aamori, atũninithie.
• 28. Kaĩ twakĩambata tũthiĩ kũ? Ariũ a ithe witũ nĩmatũmĩte ngoro ciitũ ciũrũo nĩ hinya mũno, makiuga atĩrĩ, Andũ nĩ aingĩ gũtũkĩra, na nĩ araya kũrĩ ithuĩ; namo matũũra mao nĩ manene, na nĩ mairige na thingo ikinyĩte o matu-inĩ; o na ningĩ makĩria nĩtuonete ariũ a Anaki kuo.
• 29. Niĩ na niĩ ngĩmwĩra atĩrĩ, Menyai mũmake, kana mũmetigĩre.
• 30. Jehova Ngai wanyu, we ũrĩa ũthiaga mbere yanyu, nĩwe ũkũmũhũranĩra, o ta ũrĩa maũndũ mothe marĩa ekire Misiri, mũkĩĩonagĩra na maitho manyu, maatariĩ;
• 31. o na ningĩ kũu werũ-inĩ, mũkĩĩonera ũrĩa Jehova Ngai wanyu aamũtwaraga, o ta ũrĩa mũndũ athiaga akuuĩte mũriũ, o njĩra-inĩ ĩrĩa yothe mwagereire, o nginya mũgĩkinya kũndũ gũkũ.
• 32. No rĩrĩ, o na mwamenya ũguo mũtiigana gwĩtĩkia Jehova Ngai wanyu,
• 33. ũrĩa wathiaga amũtongoretie njĩra-inĩ, akamũcaragĩria handũ ha kwamba hema cianyu, amũmũrĩkĩire na mwaki ũtukũ nĩguo amuonagie njĩra ĩrĩa mũkũgera, na ningĩ akamũtongoragia na itu mũthenya.
• 34. Nake Jehova agĩkĩigua uuge wanyu, agĩkĩrakara, akĩĩhĩta, akiuga atĩrĩ,
• 35. Ti-itherũ hatirĩ mũndũ o na ũmwe wa andũ aya a rũciaro rũrũ rũthũku ũkona bũrũri ũcio mwega, o ũcio ndehĩtire ngiuga atĩ nĩngaũhe maithe manyu,
• 36. tiga o Kalebu wa Jefune wiki, ũkawona; ũcio nĩwe ngahe bũrũri ũcio akinyĩte na magũrũ make, o na ’he ciana ciake; nĩ gũkorũo nĩaarũmĩrĩire Jehova maũndũ-inĩ mothe.
• 37. O na ningĩ Jehova nĩaarakarire nĩ niĩ nĩ ũndũ wanyu, akĩnjĩra atĩrĩ, O nawe ndũgatonya kuo,
• 38. no Joshua wa Nuni, ndungata yaku, nĩwe ũkaũtonya; mũũmagĩrĩrie, nĩ ũndũ nĩwe ũgatũma Isiraeli maũgae ũtuĩke wao.
• 39. O na ningĩ makĩria andũ anyu arĩa anyinyi, o arĩa mwoigire atĩ nĩ a gũtahwo, o na ciana cianyu iria itohĩgĩte cia gũkũũrana wega na ũũru, andũ acio-rĩ, nĩmakaũtonya, na nĩo ngahe bũrũri ũcio, mawĩgwatĩre ũtuĩke wao.
• 40. No rĩrĩ, ha ũhoro wanyu-rĩ, hũndũkai mũgwate rũgendo, mũcoke na njĩra ya werũ mũrorete Iria Itune.
• 41. Hĩndĩ ĩo mũgĩkĩnjokeria mũkĩnjĩra atĩrĩ, Nĩtwĩhĩtie tũgokĩrĩra Jehova; nĩtũgũkĩambata tũthiĩ tũkahũrane o ta ũrĩa ũhoro wothe ũrĩa twathĩtwo nĩ Jehova Ngai witũ ũtariĩ. Na inyuĩ inyuothe, mũndũ o mũndũ akĩĩoha indo ciake cia mbaara, nĩguo atĩ mwambate kĩrĩma ta arĩ ũndũ mũhũthũ mũno.
• 42. Nake Jehova agĩkĩnjĩra atĩrĩ, Aria nao, ũmere ũũ: Tigai kwambata, ningĩ menyai mũrũe nao, mũtikae kũhũrũo nĩ thũ cianyu; nĩ gũkorũo niĩ ndirĩ thĩinĩ wanyu;
• 43. na tondũ ũcio ngĩkĩmwarĩria, no mũtiigana kũigua, tiga o kũrega mwaregire rĩathani rĩa Jehova, mũgĩkĩambata kĩrĩma kĩu na rũnano.
• 44. Nao Aamori arĩa maatũũrĩte kĩrĩma-inĩ kĩu makiuma kwao mahũrane na inyuĩ, nao magĩkĩmũhang’ahang’ia o ta ũrĩa njũkĩ ihang’ahang’agia andũ, magĩkĩmũtoreria kũu Seiru o nginya Horoma.
• 45. Mũgĩgĩcoka kĩraaro-inĩ, mũgĩitĩka kũrĩrĩra mbere ya Jehova no rĩrĩ, Jehova ndaigana gũthikĩrĩria uuge wanyu, kana atege matũ make amũigue.
• 46. Tondũ ũcio mũgĩgĩikara Kadeshi ihinda iraya o ta ũrĩa matukũ marĩa mwaikarĩte kuo maaiganaga.

Home