Go Back

Aefeso Chapter 2

• 1. O na inyuĩ-rĩ, Ngai nĩaatũmire mũgĩe na muoyo, rĩrĩa mwarĩ akuũ nĩ ũndũ wa mahĩtia o na mehia manyu,
• 2. marĩa mwarũmanagĩrĩra namo o mbere, kũringana na ũrĩa gũtũire gwĩkagwo mahinda maya tũrĩ, o na ũrĩa ũhoro wa mũnene ũrĩa wĩ na hinya rĩera-inĩ ũtariĩ, o roho ũcio ũtabanagia maũndũ make rĩu thĩinĩ wa andũ a rũciaro rũrĩa rũremu.
• 3. O na ithuĩ ithuothe, kwĩ hingo twatũire hamwe na andũ acio twathagwo nĩ merirĩria ma mwĩrĩ, tũkĩhingagia maũndũ marĩa mendagwo nĩ mwĩrĩ o na magecirio nĩ ngoro, o na ha ũhoro wa kĩĩmerera-rĩ, twarĩ a rũciaro rũa kũrakarĩrũo, o ta acio angĩ.
• 4. Ĩndĩ Ngai-rĩ, tondũ wa ũrĩa tha ciake ciingĩhĩte, o na tondũ wa wendani ũrĩa mũnene atwendete naguo-rĩ,
• 5. o hĩndĩ ĩrĩa twakorirũo tũrĩ akuũ nĩ ũndũ wa mehia maitũ, nĩaatũmire tũcoke kũgĩa na muoyo hamwe na Kristo (na rĩrĩ, nĩ Wega wa Ngai watũmire mũhonokio),
• 6. na agĩtũriũkanĩria hamwe nake, agĩtũikaria hamwe nake kũrĩa Igũrũ, twĩ thĩinĩ wa Kristo Jesu;
• 7. nĩ getha mahinda-inĩ marĩa magoka akamenyithania ũrĩa Wega wake ũingĩhĩte mũno kũrĩ ithuĩ, nĩ ũrĩa atũire atũtugaga thĩinĩ wa Kristo Jesu.
• 8. Nĩ ũndũ-rĩ, nĩ Wega wa Ngai watũmire mũhonokio nĩ ũndũ wa gwĩtĩkia; naguo ũndũ ũcio ndwoimanire na inyuĩ inyuene: no kũheo mwaheirũo nĩ Ngai:
• 9. na ndwakiumanire na mawĩra marĩa mwanaruta, nĩ getha mũndũ o wothe ndakanegooce.
• 10. Nĩ gũkorũo nĩ ithuĩ wĩra wa moko make, tũũmbĩtwo thĩinĩ wa Kristo Jesu nĩguo twĩkage ciĩko njega, o iria Ngai aathondekire o mbere nĩguo atĩ tũtũũre tũciĩkaga.
• 11. Hakĩrĩ ũguo-rĩ, ta ririkanagai ũrĩa ũhoro wanyu watariĩ tene, inyuĩ andũ a Ndũrĩrĩ ha ũhoro wa kĩĩmwĩrĩ, o inyuĩ mwĩtagwo “andũ mataruaga” nĩ arĩa metagwo “andũ maruaga,” - na rĩrĩ, kũrua kũu no ũndũ wĩkĩtwo mwĩrĩ na moko ma andũ.
• 12. Hĩndĩ ĩo-rĩ, mwatũire mwamũranĩtio na Kristo, na mwarĩ ageni ahingĩrĩrie na nja mũtigatuĩke a ngwatanĩro ya Aisiraeli, na ha ũhoro wa irĩkanĩro cia maũndũ marĩa meranĩirũo mũtiarĩ aho, na mwatũire gũkũ thĩ mwagĩte ũhoro wa kwĩrĩgĩrĩra, o na mũtarĩ na Ngai.
• 13. No rĩu, thĩinĩ wa Kristo Jesu-rĩ, inyuĩ arĩa mwaraihĩrĩirie nĩmũreharehetwo hakuhĩ nĩ ũndũ wa thakame ya Kristo.
• 14. Amu nĩwe thayũ witũ, o we watũmire ithuĩ twarĩ erĩ tũtuĩke o ro ũmwe, agĩgĩtharia rũhĩrĩgo rũrĩa rũatũhakanĩtie;
• 15. naguo ũthũ-rĩ, akĩũnina na ũndũ wa mwĩrĩ wake, naguo ũguo nĩ ta kuuga atĩ nĩaaninire watho ũrĩa wa maathani marĩa maatuĩtwo. Agĩgĩĩka ũguo nĩ getha ombe thĩinĩ wake mwene mũndũ ũmwe mwerũ uumĩte harĩ acio erĩ, na amaciarithanie ũguo;
• 16. na ningĩ nĩ getha atũme matuĩke mwĩrĩ ũmwe, amaiguithanie na Ngai na ũndũ wa mũtharaba, tondũ wa ũrĩa aaninĩte ũthũ naguo.
• 17. Agĩgĩũka akĩhunjanĩria ũhoro wa thayũ, thayũ kũrĩ inyuĩ arĩa mwaraihĩrĩirie, o na thayũ kũrĩ arĩa maakuhĩhĩirie o nao,
• 18. nĩ gũkorũo nĩ tondũ wake we ithuĩ a iruka icio cierĩ twĩtĩkagĩrio tũkinye harĩ Ithe witũ, tũrĩ thĩinĩ wa Roho o ũmwe.
• 19. Nĩ ũndũ wa ũguo, rĩu mũtikĩrĩ ageni na agendi, no nĩmũtuĩkĩte ene itũũra hamwe na andũ arĩa aamũre, na mũgatuĩka a nyũmba ya Ngai,
• 20. mũgagĩakwo gĩtina-inĩ kĩrĩa gĩa atũmwo na anabii; nake Kristo Jesu we mwene agakorũo atuĩkĩte ihiga rĩrĩa inene rĩa koine.
• 21. Na rĩrĩ, nĩ thĩinĩ wake we mwako o wothe ũgwatanagio hamwe ũtuĩke o ũmwe, ũkanenehaga o nginya ũgatuĩka hekarũ theru ya gũtũũrũo nĩ Mwathani.
• 22. Ningĩ nĩ thĩinĩ wake o na inyuĩ mũraakwo hamwe mũtuĩke gĩikaro gĩa gũikarũo nĩ Ngai, mwĩ thĩinĩ wa Roho.

Home