Go Back

Agalatia Chapter 6

• 1. ARIŨ a Ithe witũ, mũndũ angĩkorũo ahĩtĩtie ũndũ o na ũrĩkũ-rĩ, inyuĩ mũkoragwo mwĩ na Roho mũcokagĩrĩriei mũhoreire ngoro. Wĩmenyagĩrĩre wee mwene ndũkae kũgerio o nawe.
• 2. Hũthanagĩriai o mũndũ na ũrĩa ũngĩ maũndũ marĩa mamũritũhagĩra, nĩ getha, mũgĩĩka ũguo, mũhingagie watho wa Kristo.
• 3. Nĩ gũkorũo mũndũ o wothe angĩĩtua atĩ nĩ mũndũ ma, rĩrĩa arĩ mũndũ hatarĩ-rĩ, nĩ kwĩhenia ekwĩhenia.
• 4. Nĩ kaba o mũndũ aroragie wĩra wake mwene; na hĩndĩ ĩo-rĩ, ũndũ wake wa kwĩrahĩra nĩũgakorũo wĩ wake we mwene, na ti wa mũndũ ũngĩ.
• 5. Tondũ-rĩ, mũndũ o wothe nĩarĩĩkuuagĩra o mũrigo wake mwene.
• 6. Na rĩrĩ, nĩ wega mũndũ ũrĩa ũkũrutwo Ũhoro wa Ngai magayanagĩre na mũmũruti indo ciothe njega.
• 7. Mũtikanahenio; Ngai ndangĩnyũrũrio; amu kĩndũ o gĩothe kĩrĩa mũndũ ekũhanda nokĩo akagetha.
• 8. Nĩ ũndũ-rĩ, mũndũ ũrĩa ũkũhanda o maũndũ ma kũguna mwĩrĩ wake mwene-rĩ, ũcio nĩ kũgetha akagetha ũhoro wa kũbutha uumanĩte na mwĩrĩ ũcio wake; no ũrĩa ũkũhanda maũndũ ma gũkenia Roho-rĩ, ũcio nĩakagetha muoyo ũtagathira, uumĩte kwĩ Roho ũcio.
• 9. Ningĩ tũtikananogio nĩ gwĩkaga wega: nĩ ũndũ twaaga kũũrũo nĩ hinya, nĩtũkagetha hĩndĩ ĩrĩa yerekereire yakinya.
• 10. Hakĩrĩ ũguo-rĩ, o rĩrĩa rĩothe twona ihinda rĩagĩrĩru, nĩtwĩkage andũ othe wega, na makĩria nĩ andũ a nyũmba ya arĩa metĩkĩtie.
• 11. Atĩrĩrĩi, onei ũrĩa ndemwa irĩ nene, ici ndamwandĩkĩra nacio na guoko gwakwa mwene.
• 12. Andũ o arĩa mendaga kwĩonithia ta arĩ o maagĩrĩire maũndũ-inĩ ma mwĩrĩ, nĩo mamũhatagĩrĩria atĩ mũruithio; mekaga ũũ no getha matikae kũnyarirũo nĩ ũndũ wa mũtharaba wa Kristo.
• 13. Nĩ ũndũ-rĩ, o nao andũ acio metĩkagĩra ũhoro wa kũrua matirũmagia watho o ene: no nĩmendaga mũruithio inyuĩ nĩ getha megoocage nĩ ũndũ wa mĩĩrĩ yanyu.
• 14. No niĩ-rĩ, ndĩroaga kwĩgooca na ũndũ o wothe, tiga o ndĩĩgoocire nĩ ũndũ wa mũtharaba wa Mwathani witũ Jesu Kristo; nĩ ũndũ waguo-rĩ, maũndũ ma gũkũ thĩ nĩmaambĩtwo mũtĩ igũrũ nĩguo ma’thengere, na niĩ ngaambwo mũtĩ igũrũ nĩguo ndĩmathengere.
• 15. Nĩ ũndũ-rĩ, ũhoro wa kũrua ndũrĩ bata, o na kana wa kwaga kũrua, tiga o atĩ mũndũ agarũrũke, atuĩke mũndũ ũngĩ mwerũ.
• 16. Nao andũ arĩa othe marĩrũmagia ũhoro ũcio mĩthiĩre-inĩ yao marogĩa na thayũ na maroiguĩrũo tha, o na gwata Aisiraeli arĩa a Ngai.
• 17. Atĩrĩ, kuuma rĩu mũndũ o wothe nĩatige kũndanga; amu nĩnjikaraga njoretwo njoro cia Jesu mwĩrĩ-inĩ wakwa.
• 18. Wega wa Mwathani witũ Jesu Kristo ũrogĩa na maroho manyu, inyuĩ ariũ a Ithe witũ. Amen.

Home