Go Back

Agalatia Chapter 4

• 1. ŨRĨA ngũkiuga nĩ atĩrĩ, atĩ hĩndĩ ĩrĩa mũgaĩrũo arĩ o mwana-rĩ, ndarĩ ũndũ atiganĩte na ngombo, o na aatuĩka nĩwe mwene indo ciothe;
• 2. no gwathwo aathagwo nĩ amũikaria na aramati a indo ciake o nginya hĩndĩ ĩrĩa ithe aathanĩte ĩgakinya.
• 3. Ũguo no taguo o na ithuĩ, hĩndĩ ĩrĩa twarĩ ciana, twatũire tuohanĩtio na maũndũ marĩa ma ndũire ma gũkũ thĩ:
• 4. no rĩrĩ, hĩndĩ yakinya ĩrĩa njagĩrĩru kũna-rĩ, Ngai akĩrekia Mũriũ, nake agĩciarũo nĩ mũndũ-wa-nja, o na agĩciarũo arĩ wa gwathagwo nĩ watho,
• 5. nĩ getha akũũre andũ arĩa maatũire maathagwo nĩ watho, nĩguo tũitĩke gũtuwo ciana ciake.
• 6. Na tondũ mũkĩrĩ ciana ciake, nĩkĩo Ngai aarekirie Roho wa Mũrũ wake atonye thĩinĩ wa ngoro ciitũ, aanagĩrĩre akiugaga atĩrĩ, Abba, Baba.
• 7. Nĩ ũndũ ũcio, rĩu ndũkĩrĩ ngombo, wĩ mũrũ wa mwene; na kuona atĩ wĩ mũrũ wa mwene-rĩ, wĩ mũgai wa indo, nĩ ũndũ wa ũrĩa Ngai aagwĩkire.
• 8. Ĩndĩ hĩndĩ ĩo-rĩ, kuona atĩ mũtioĩ Ngai, nĩmwatũire mũrĩ ngombo cia ngai ingĩ, itarĩ cio ngai:
• 9. No rĩu, mwagĩkorũo mũrĩkĩtie kũmenya Ngai, kana hihi makĩria mũrĩkĩtie kũmenyũo nĩ Ngai, mũgũcokerera atĩa maũndũ marĩa ma ndũire marĩa maagĩte hinya na makaaga bata, mũkenda gũcoka gũtuĩka ngombo ciamo?
• 10. Mũgĩtindagĩrĩra ũhoro wa mĩthenya, na mĩeri na imera o na mĩaka.
• 11. Nĩndĩmũiguagĩra guoya, gũtikae gũtuĩka atĩ kũnoga kũrĩa ndanamũnogera no gwa tũhũ.
• 12. Atĩrĩrĩ, ariũ a Ithe witũ, ndamũthaitha mũtuĩke o ta niĩ, amu niĩ nĩnduĩkĩte o ta inyuĩ. Mũtirĩ mwanjĩka ũũru:
• 13. no nĩmũũĩ atĩ nĩndamũhunjĩirie Ũhoro-ũrĩa-Mwega ihinda rĩa mbere tondũ wa ũrĩa ndonjete mwĩrĩ.
• 14. Naguo wonje ũcio wakwa wa mwĩrĩ, o na warĩ wa kũmũgeria, ndwatũmire mũ’mene kana mũndurũke: no nĩmwanjĩtĩkĩrire ta ndĩ mũraika wa Ngai, kana ta ndĩ Kristo Jesu.
• 15. Kaĩ ũndũ ũcio watũmaga mwĩone ta mũrathimĩtwo ũkĩrĩ ha? Tondũ nĩ niĩ mũira wanyu atĩ, kũngĩahotekire-rĩ, o na maitho manyu nĩmũngĩamakũũrire mũ’he.
• 16. Githĩ rĩu nĩndĩgĩtuĩkĩte thũ yanyu, tondũ nĩndĩmwĩraga ũhoro-wa-ma?
• 17. Andũ acio nĩmamwĩkagĩrĩra kĩyo mũtuĩke ao, no ti ũndũ wa gĩtũmi kĩega; no kwenda mendaga kũmũrigĩrĩria, nĩ getha mwĩkagĩre kĩyo gĩa gũtuĩka ao.
• 18. Na rĩrĩ, ti ũũru gwĩkĩrĩrũo kĩyo ũhoro-inĩ wa ũndũ mwega o mahinda mothe, na to hĩndĩ o ĩrĩa ndĩ hamwe na inyuĩ.
• 19. Inyuĩ twana twakwa-rĩ, o inyuĩ njiguagĩra ruo rũa kũrũmwo rĩngĩ, nginya hĩndĩ ĩrĩa Kristo agakorũo eyũmbĩte thĩinĩ wanyu-rĩ,
• 20. ngũigua nyendete gũkorũo hamwe na inyuĩ rĩu, na ngarũre mũgambo wakwa ngĩmũtaaraga; nĩ ũndũ ndĩ na nganja ũhoro-inĩ wanyu.
• 21. Atĩrĩ, inyuĩ mwendete gwathagwo nĩ watho-rĩ, ta njĩrai ũndũ ũyũ, Kaĩ mũtaiguaga watho ũcio?
• 22. Nĩ ũndũ kwandĩkĩtwo atĩrĩ, atĩ Iburahimu aarĩ na ariũ erĩ, ũmwe waciarĩtwo nĩ mũndũ-wa-nja ũrĩa warĩ ngombo, na ũmwe waciarĩtwo nĩ ũrĩa ũtaarĩ ngombo.
• 23. No rĩrĩ, mwana wa ũcio warĩ ngombo-rĩ, aaciarirũo na mũciarĩre o wa ndũire; no mwana wa ũcio ũtaarĩ ngombo aaciarirũo na ũndũ wa kũhingĩrio kĩĩranĩro.
• 24. Namo maũndũ macio nĩ ma ngerekano: nĩ ũndũ atumia acio erĩ nĩ a kũgerekanio na irĩkanĩro igĩrĩ; kĩmwe kiumĩte kĩrĩma-inĩ gĩa Sinai, kĩrĩa gĩciaraga ciana cia ũkombo, nakĩo nĩkĩo kĩgerekanĩtio na Hagara.
• 25. Na rĩrĩ, Hagara ũcio nĩ tawe kĩrĩma gĩa Sinai kĩĩ bũrũri wa Arabia, nake nĩwe ũgerekanĩtio na itũũra rĩa Jerusalemu, o rĩrĩa rĩĩ ho rĩu: nĩ ũndũ nĩatũire ũkombo-inĩ hamwe na ciana ciake.
• 26. Ĩndĩ Jerusalemu, itũũra rĩrĩa rĩa kũrĩa Igũrũ, rĩtikĩrĩ ũkombo-inĩ, narĩo nĩrĩo nyina witũ.
• 27. Nĩ ũndũ kwandĩkĩtwo atĩrĩ, Kena, wee mũtumia mũthatu ũtaciaraga, Tumũra kanua na wanĩrĩre, wee ũtarĩ waigua ruo rũa kũrũmwo: Nĩ ũndũ-rĩ, ciana cia mũndũ-wa-nja ũrĩa ũtigĩtwo wiki, nĩ nyingĩ kũrĩ ciana cia ũrĩa wĩ na mũrũme.
• 28. Na ithuĩ, ariũ a Ithe witũ-rĩ, nĩ ithuĩ ciana iria iciarĩtwo cia kũhingia kĩrĩkanĩro, o ta Isaaka.
• 29. No rĩrĩ, o ta ũrĩa hĩndĩ ĩo ũcio waciarĩtwo na mũciarĩre wa ndũire aanyariraga ũcio ũngĩ waciarĩtwo na mũciarĩre wa kĩĩroho-rĩ, ũguo noguo gũtariĩ rĩu.
• 30. No rĩrĩ, Maandĩko mekuuga atĩa? Mekuuga ũũ: Ingata mũndũ-wa-nja ũrĩa ũrĩ ngombo, hamwe na mũriũ: nĩ ũndũ-rĩ, mũriũ wa ũcio ũrĩ ngombo ndakagaya igai hamwe na mũriũ wa ũrĩa ũtarĩ ngombo.
• 31. Hakĩrĩ ũguo-rĩ, ariũ a Ithe witũ, tũtirĩ ciana cia mũndũ-wa-nja ũrĩa ũrĩ ngombo; tũrĩ ciana cia ũrĩa ũtarĩ ngombo.

Home